ភ្នំពេញ៖ ក្រុមនិស្សិតមួយ ក្រុមដែល មានឈ្មោះថាក្រុម និស្សិត Fun-Runនឹងរៀបចំ ព្រឹត្តិការណ៍ មួយដែលមាន ឈ្មោះថា “I Like to Move It ” ក្រោមអត្ថន័យថា “រត់ និង ជួយសត្វព្រៃ” ដែលនឹងធ្វើឡើង នៅថ្ងៃទី១១ ខែវិច្ឆិកា ឆ្នាំ២០១២ ឧទ្យានចំការព្រីង ក្នុងគោលបំណង ប្រមូលថរិកា ដើម្បីទៅជួយសត្វព្រៃ នៅភ្នំតាម៉ៅ និងដាស់តឿនរំលឹកដល់ ប្រជាជនកម្ពុជាទាំងអស់ ក៏ដូចជា ពិភពលោកទំាងមូល ចូលរួមជួយសង្គ្រោះសត្វព្រៃ ព្រោះសត្វទាំងនោះស្ថិត ក្នុងភាពគ្រោះថ្នាក់ហើយ មួយចំនួនទៀតស្ទើរ តែផុតពូជទៅហើយ។

យោងតាមប្រភព ព័ត៌មានពីក្រុមនិសិ្សត Fun Run បានឲ្យដឹងថា ព្រឹត្តិការណ៍នេះត្រូវបាន គាំទ្រដោយអង្គការ សង្គ្រោះសត្វព្រៃ (Wildlife Alliance) និង សួនសត្វភ្នំតាម៉ៅ និង រំពឹងមានមនុស្ស ចំនួន២,០០០ នាក់នឹងចូលរួម។ យោងតាមស្ថិតិរបស់ ភ្នំតាម៉ៅ នៅចុង កញ្ញានេះ បានដឹងថាភ្នំតាម៉ៅ មានទំហំប្រមាណ ២,៣០០ហិតតា មានសត្វព្រៃចំនួន ៩៦ប្រភេទ ដែលស្មើនឹង១៤៤១ សត្វ ក្នុងនោះមាន សត្វព្រៃចំនួន១៦ប្រភេទ ដែលប្រឈមមុខ នឹងការផុតពូជ។

ប្រភពព័ត៌មានបាន លើកឡើងទៀតថា «ក្នុងនាមយើងជាជនជាតិកម្ពុជា យើងមានមោទកភាព ដែលមានធម្មជាតិ និងសត្វ ដ៏ មានតម្លៃទាំងនេះ។ ត្វទាំងនេះរស់នៅជាមួយ មនុស្សយើង ហើយ វាក៏បាន បង្កើតនូវបរិយាកាសដ៏ល្អ។ វាក៏មានតួនាទី សំខាន់ ក្នុង ការរក្សាលំនឹងប្រព័ន្ធ អេកូឡូស៊ីផងដែរ។ ទោះបីជាយ៉ាងណាក៏ដោយ សត្វដ៏មានទតម្លៃទាំងនេះ នឹងត្រូវផុតពូជនៅ ពេល ខាងមុខ»។

សួនសត្វភ្នំតាម៉ៅជាសួនសត្វជាតិ គឺជាមណ្ឌលសង្រោះសត្វ ព្រៃតែមួយគត់ក្នុង ប្រទេសកម្ពុជា ដែលដើតួនាទីយ៉ាងសំខាន់ ក្នុង ការការពារសត្វព្រៃនិង ជាកន្លែងឃ្លាំមើលភាព មិនល្អលើសត្វព្រៃ។ ទន្ទឹមនឹងការរីកចម្រើន របស់សួនសត្វ និង ចំនួនសត្វព្រៃ កាន់កើនឡើង សួនសត្វនេះកំពុងប្រឈមមុខ នឹងការខ្វះមូលនិធិដើម្បីទិញ ចំនីសត្វជួសជុលទ្រុងសត្វ និង ថែរក្សារសត្វព្រៃ របស់កម្ពុជាជាដើម។ កត្កាទាំងអស់នេះហើយ ដែលជំរុញឲ្យសត្វព្រៃកាន់តែ ប្រឈមនឹងការ ផុតពូជហើយនឹង បណ្តាលឲ្យ មនុស្ស ជំនាន់ថ្មីមិនអាចយល់ពី តម្លៃនៃជីវិតរបស់ ទាំងនេះ។

ប្រភពដដែលបន្ថែមថា ដោយមើលឃើញពី ចំណុចដ៏គ្រោះថ្នាក់នេះ ពួកក្រុមនិស្សិតបាន បង្កើតគំរោងនេះទ្បើង ដើម្បី រំលឹក ដល់ប្រជាជនកម្ពុជា ទាំងអស់ឲ្យយល់ ដឹងថាកម្ពុជានឹង បាត់បង់សត្វព្រៃក្នុង ពេលខាងមុខដ៏ខ្លី។ គំរោងនេះត្រូវបាន បើកជា សាធារណៈ ហើយសាធារណៈជននឹង ត្រូវបានអញ្ជើញឳ្យចូលរួម ក្នុងរូបភាពជាការរត់ ប្រណាំងកំសាន្ត ការសំដែង និងកម្មវិធី ជាច្រើនទៀត ដែលនឹងប្រព្រឹត្តទៅ ចាប់ពីម៉ោងប្រាំមូយព្រឹក រហូតដល់ ថ្ងៃត្រង់។ សំបុត្រសំរាប់ចូលរួមតម្លៃ ៣ដុល្លាចំពោះជន ជាតិខ្មែរ និង១០ដុល្លាសំរាប់ ជនជាតិបរទេស។ ចំពោះព័ត៌មាន ការទិញសំបុត្រ អាចទាក់ទងតាមលេខ ០៧៧ ៧០ ៥៨ ៦៩ រឺ គេហទំព័រ cambodiafunrun.org។

សូមបញ្ជាក់ថា ការប្រកួតរត់ប្រណាំងនេះ មានចម្ងាយផ្លូវ៤គីឡូម៉ែត្រ ដោយធ្វើការបែងចែក ទៅតាមភេទប្រុសនិងស្រី រីឯ ចំណាត់ថ្នាក់វិញ គឺទាំងផ្នែកបុរស និងផ្នែកនារី គឺកំណត់យកពីលេខ១ ដល់លេខ៣ ដូចគ្នា។ មូលនិធិដែលទទួលបាន ពីគំរោង នេះនឹងយកទៅ ជូយដល់ការគាំទ្រសត្វព្រៃ នៅសួនសត្វភ្មំតាម៉ៅ។ នេះជាពេលដែល ប្រជាជនកម្ពុជាសង្រោះ សត្វព្រៃនៅ ប្រទេសកម្ពុជា។ ការចូលរួមចំនែកម្នាក់បន្តិចៗ នឹងជូយឲ្យមានភាព ប្រសើរទ្បើងដល់សត្វព្រៃ។ លោកអ្នក ក៏អាចចូលរួម ឧបត្ថម្ភ តាមរយៈធនាគារ CIMB គណនីលេខ ២-០១-០១២៤-០០០០០៤៤៥-៩។

គួរបញ្ជាក់ថានេះជាគំរោង លើកទីពីរបន្ទាប់ពី គំរោងកាលពីឆ្នាំមុន ដែលមានឈ្មោះថា “កម្មវិធីអាស៊ានរត់ប្រណាំង» ដោយភ្ជាប់ ជាមួយ ពាក្យស្លោកមួយឃ្លាថា «យើងរត់ដើម្បីពិភពពណ៌បៃតង” ដែលធ្វើទ្បើងក្នុងការបង្កើត មូលនិធិគាំទ្របរិស្ថាន។ គំរោង នោះបានដក់ជាប់ ក្នុងចិត្តរបស់អ្នកចូលរួម ទាំងអស់ហើយជាពេល ដ៏ជោគជ័យមួយដែលមាន អ្នកចូលរួមប្រមាន៥០០នាក់ ក្នុងនោះមាន៨៥ជា សមាជិកស្មគ្រ័ចិត្ត និងរួមសហការពីបណ្តា ក្រុមហ៊ុនគាំទ្រនិង អ្នកឧបត្តម្ភចំនួន១៤៕

ភ្នំពេញ៖ ប្រទេសអាមេរិកគាំទ្រកម្ពុជា ដែលមានការរីកចំរើនយ៉ាងរលូន ក្នុងការអនុវត្តច្បាប់របស់ខ្លួន ស្តីពីការសុំកូនចិញ្ចឹមទៅក្រៅប្រទេស។

យោងតាមសេចក្តីថ្លែងការណ៍ របស់ស្ថានទូតអាមេរិកប្រចាំកម្ពុជា ដែលមជ្ឈមណ្ឌលព័ត៌មានដើមអម្ពិល ទទួលបាននៅថ្ងៃទី១ ខែវិច្ឆិកា ឆ្នាំ២០១២នេះបានឲ្យដឹងថា ប្រទេសកម្ពុជាមានការរីកចំរើនទៅមុខច្រើន ក្នុងការអនុវត្តច្បាប់របស់ខ្លួនស្តីពី ការសុំកូនចិញ្ចឹមទៅក្រៅប្រទេស និងបទបញ្ញត្តិដែលមានការទាក់ទង ស្តីពីជំរើស ផ្សេងក្នុងការចិញ្ចឹមបីបាច់កុមារ តែក៏នៅមានការងារដែលត្រូវធ្វើនៅឡើយផងដែរ។

សេចក្តីថ្លែងការណ៍នោះបន្តថា “យើងសូមស្វាគមន៍ដំណើរជឿនលឿនទៅមុខ ដែលសំរេចបានកន្លងមក ហើយយើងសូមបន្តគាំទ្រ កិច្ចខិតខំរបស់ប្រទេសកម្ពុជា ក្នុង ការឈានទៅគោរពអនុសញ្ញាក្រុងឡាអេស្តីពី ការសុំកូនចិញ្ចឹម ឲ្យបានពេញលេញ”។

លោកស្រីឯកអគ្គរដ្ឋទូត Susan Jacobs ទីប្រឹក្សាពិសេសផ្នែកបញ្ហាកុមារ របស់សហរដ្ឋអាមេ រិក បានធ្វើទស្សនកិច្ចនៅប្រទេសកម្ពុជា កាលពីថ្ងៃទី២៨ ដល់ថ្ងៃទី២៩ ខែតុលា ឆ្នាំ២០១២នោះ ដើម្បីបន្តការពិភាក្សាស្តីពី ផែនការរបស់រាជរដ្ឋាភិបាលកម្ពុជា ក្នុងការចាប់ផ្តើមឡើងវិញ នូវដំណើរការសុំកូនចិញ្ចឹមទៅក្រៅប្រទេស។ ក្នុង អំឡុងពេលទស្សនកិច្ច លោកស្រី បានជួបពិភាក្សាជាមួយមន្រ្តីក្រសួងការបរទេស និងសហប្រតិបត្តិការអន្តរជាតិ និងក្រសួងសង្គមកិច្ច អតីតយុទ្ធជន និងស្តារយុវនីតិសម្បទា។

សហរដ្ឋអាមេរិកបន្ត ធ្វើការពិភាក្សាជាមួយមន្រ្តីរដ្ឋាភិបាលកម្ពុជា ស្តីពីការបន្តឡើងវិញ នូវដំណើរការសុំកូនចិញ្ចឹមទៅក្រៅប្រទេស ហើយមិនបានធ្វើការសំរេចចិត្ត ឬក៏កំណត់ពេលវេលាសម្រាប់ ដំណើរការឡើងវិញនូវការសុំកូនចិញ្ចឹម ទៅបរទេសរវាងកម្ពុជានិងសហរដ្ឋអាមេរិកឡើយ។

បន្ទាប់ពីកម្ពុជា បានចូលជាសមាជិកអនុសញ្ញា The Hague convention ពេញសិទ្ធិមក នាព្រឹកថ្ងៃទី២៩ ខែតុលា ឆ្នាំ២០១២នេះ រាជរដ្ឋាភិបាលកម្ពុជា បានអនុញ្ញាត ឲ្យរដ្ឋាភិបាលអាមេរិក យកកុមារកម្ពុជា ទៅចិញ្ចឹមដោយស្របច្បាប់ តាមលក្ខណៈអន្តរជាតិឡើងវិញ ដែលគំរោងនេះ នឹងផ្តើមអនុវត្តចាប់ពីថ្ងៃទី១ ខែមករា ឆ្នាំ២០១៣តទៅ។

ប្រទេសកម្ពុជា បានអនុញ្ញាតឲ្យជនបរទេសយកកុមារ ទៅចិញ្ចឹមជាច្រើនឆ្នាំមកហើយ ដែលរហូតមកដល់ពេលនេះ ប្រហែលជាង៥០០០នាក់។ ប្រទេសដែលត្រូវបាន អនុញ្ញាតមានដូចជាប្រទេស អ៊ីតាលី, បារាំង, អូស្រ្តាលី, អាល្លឺម៉ង់, អាមេរិក និងប្រទេសអង់គ្លេសជាដើម។ កម្ពុជា បានទទួលស្គាល់សន្ធិសញ្ញាឲ្យ អន្តរជាតិស្មុំកុមារ តាំងពីថ្ងៃទី២៧ ខែមករា ឆ្នាំ២០០៧ ហើយនៅក្នុងខែសីហា ឆ្នាំដដែល បានចូលជាពេញសិទ្ធិជាស្ថាពរ៕

ភ្នំពេញ៖ សិក្ខាសាលាពិគ្រោះយោបល់ស្តីពី សូចនាករសិទ្ធិកុមារ ត្រូវបានបើកធ្វើឡើង ដោយមានការចូលរួមពីមន្រ្តីមកពីក្រសួងស្ថាប័នពាក់ព័ន្ធ អង្គការជាតិ និងអន្តរជាតិ ជាច្រើនរូប នៅព្រឹកថ្ងៃទី១ ខែវិច្ឆិកា ឆ្នាំ២០១២នេះ នាសណ្ឋាគារ អៀមភើរៀល រាជធានីភ្នំពេញ។

សិក្ខាសាលាពិគ្រោះយោបល់ស្តីពីសូចនាករសិទ្ធិកុមារនេះ ត្រូវបានរៀបចំធ្វើឡើងក្នុងគោលបំណង២យ៉ាង ១.ដើម្បីបង្ហាញពីលទ្ធផលដែលបានចងក្រង នៃសូចនាករពាក់ព័ន្ធនឹងសិទ្ធិកុមារ និង២.ដើម្បីពិនិត្យ ពិភាក្សាផ្តល់យោបល់លើសូចនាករ ដែលបានចងក្រងពាក់ព័ន្ធនឹងសិទ្ធិកុមារ។

រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអនុប្រធានក្រុមប្រឹក្សាជាតិកម្ពុជាដើម្បីកុមារ លោក នឹម ថូត បានមានប្រសាសន៍នៅក្នុងពិធីបើកនោះថា កម្ពុជាបានផ្តល់សច្ចាប័នលើអនុសញ្ញា ស្តីពីសិទ្ធិកុមារនៅថ្ងៃទី១៥ ខែតុលា ឆ្នាំ១៩៩២ ដោយមិនមានលក្ខខណ្ឌ ហើយបន្ទាប់មក ប្រទេសកម្ពុជា ក៏បាន ផ្តល់សច្ចាប័នលើពិធីសារបន្ថែមនៃអនុសញ្ញាស្តីពីសិទ្ធិកុមារចំនួន២ទៀត គឺស្តីពីការចូលរួមរបស់ កុមារនៅក្នុងជម្លោះប្រដាប់អាវុធ និងស្តីពីការជួញដូរកុមារ ពេស្យា កម្មកុមារ និងរូបភាពអាសអាភាសកុមារ ឆ្នាំ២០១២។

លោកបានបន្តថា «រាជរដ្ឋាភិបាល បានជំរុញការលុបបំបាត់ទម្រង់ធ្ងន់ធ្ងរ នៃពលកម្មកុមារ ដោយផ្អែកលើគោលចម្បង ៣ យ៉ាងគឺ៖

១.ការដកហូតកុមារ ពីទម្រង់ធ្ងន់ធ្ងរនៃពលកម្មកុមារ ដើម្បីឲ្យកុមារទទួលបានការអប់រំ បណ្តុះបណ្តាលវិជ្ជាជីវៈ និងសមាហរណកម្មកុមារទៅក្នុងសង្គម។

២.កិច្ចសហការជាមួយសង្គមស៊ីវិល និងការប្រយុទ្ធប្រឆាំងការជួញដូរស្រ្តីនិងកុមារ និងទី៣.លើកកម្ពស់ការងារសមរម្យ និងសុវត្ថិភាពការងារកុមារ ព្រមទាំងបានចេញប្រកាសចំនួន៤ ដើម្បីទប់ស្កាត់ពលកម្មកុមារ ក្នុងកសិកម្មមានលក្ខណៈជាគ្រួសារ។

លោកស្រី Robin Mauney ជំនាញការចងក្រងសូចនាករ ពាក់ព័ន្ធនឹងសិទ្ធិកុមារ បានមានប្រសាសន៍ថា បានជាយើងត្រូវបង្កើត សូចនាករសិទ្ធិកុមារ គឺដើម្បីត្រួតពិនិត្យ លើការអនុវត្តអំពីសិទ្ធិកុមារ របស់ប្រទេសកម្ពុជា ហើយជាការទទួលខុសត្រូវក្រោមច្បាប់កិច្ច ការពារកុមារអន្តរជាតិ ២០១២-២០១៣។

លោកស្រីបានបន្តថា ប្រទេសកម្ពុជា បានចូលរួមយ៉ាងសកម្ម ក្នុងការបញ្ជូនរបាយការណ៍ រៀងរាល់៥ឆ្នាំម្តង ជូនទៅគណៈកម្មាធិការ ការពារកុមារ។

សូមបញ្ជាក់ថា ប្រទេសកម្ពុជាបានផ្តល់សច្ចាប័នលើអនុសញ្ញា ស្តីពីសិទ្ធិកុមារ នៅថ្ងៃទី១៥ ខែតុលា ឆ្នាំ១៩៩២ ហើយតាមរយៈអនុសញ្ញានេះ រាជរដ្ឋាភិបាលកម្ពុជា បានដាក់ចេញនូវយន្តការជាច្រើន ដើម្បីឲ្យកុមារទទួលបាន នូវសិទ្ធិពេញលេញរបស់ខ្លួន ជាពិសេស សិទ្ធិជាមូលដ្ឋានទាំង ៤ គឺសិទ្ធិរស់រានមានជិវិត សិទ្ធិអភិវឌ្ឍ សិទ្ធិទទួលបានការការពារ និងសិទ្ធិចូល រួម។ ដើម្បីអនុវត្តអនុសញ្ញា ស្តីពីសិទ្ធិកុមារ រាជរដ្ឋាភិបាល បានបង្កើតក្រុមប្រឹក្សាជាតិកម្ពុជា ដើម្បីកុមារ (ក.ជ.ក.) នៅឆ្នាំ ១៩៩៥ ដោយអនុក្រឹត្យ និងបានកែសម្រួល ទៅជាព្រះរាជក្រឹត្យនៅចុងឆ្នាំ២០០៩៕

ភ្នំពេញ៖ កុមារ និងគ្រូបង្វឹកក្នុងស្រុក នឹងទទួលបានឱកាស ដែលកម្រជួបបំផុត ដោយមិនធ្លាប់មានពីមុនមកពី YKK ASAO ជាក្រុមហ៊ុនអភិវឌ្ឍ ផលិត ផ្គត់ផ្គង់ នៅទូទាំងពិភពលោក នូវផលិតផលសម្រាប់ពាក់ភ្ជាប់ (រូតទំពក់ ឡេវ ជ័រកឹប) និងផលិតផលសម្រាប់ស្ថាបត្យកម្ម ពីគ្លីនិកបាល់ទាត់កុមារ ដែលបានបើកសម្ពោធជា លើកដំបូងនៅកម្ពុជា។

ក្រុមហ៊ុន នឹងនាំគ្រូបង្វឹក របស់ Real Madrid Foundation មកកាន់រាជធានីភ្នំពេញ ចាប់ពីថ្ងៃទី១-៣ខែវិច្ឆិកា ដើម្បីធ្វើការបង្វឹកបន្ថែមជូនដល់គ្រូបង្វឹក និងកុមារក្នុង ស្រុក។ គ្រូបង្វឹកក្នុងស្រុកជាង ៣០រូប កុមារជាង២៥០នាក់ នឹងធ្វើការជួបជុំ ហើយហ្វឹកហ្វឺនជាមួយនឹងគ្រូបង្វឹក Pablo Gomez Revenga, Javier Garcia Torres និងIvan Garcia Sacritan ដែលមកពី RMF ក្លឹបបាល់ទាត់ Real Madrid Club De Futbol។

គ្រូបង្វឹករូបនេះ នឹងធ្វើការចែករំលែកនូវបច្ចេកទេស និងវិធីសាស្រ្ត ក្នុងការហ្វឹកហាត់ ដល់គ្រូបង្វឹកក្នុងស្រុកនៅថ្ងៃទី១ ខែវិច្ឆិកា ហើយនឹងរៀបចំការហ្វឹកហ្វឺន បាល់ទាត់ ដោយបែងចែកជាចំនួនបួនក្រុម សម្រាប់កុមារ ដែលមានអាយុ ចាប់ពី៧ដល់១៥ឆ្នាំ នៅថ្ងៃទី២-៣ ខែវិច្ឆិកា។

ព្រឹត្តិការណ៍នេះ មានឈ្មោះថា “សម្រាប់តែកីឡាបាល់ទាត់” និង” YKK ASAO គ្លីនិកបាល់ទាត់កុមារ” ដែលមានរយៈពេលបីថ្ងៃ ហើយកម្មវិធីនឹងត្រូវចាប់ផ្តើម ពីថ្ងៃ ទី១នេះ នៅសណ្ឋាគារអាំងទែកង់ទីណង់តាល់ ដឹកនាំដោយក្រុមការងាររបស់ YKK និងសហព័ន្ធកីឡាបាល់ទាត់កម្ពុជា។

ប្រធាន និងនាយកប្រតិបត្តិរបស់ YHA លោក Ken Nakano មានប្រសាសន៍ថា “គម្រោង CSR មានគោលបំណងគាំទ្រការលូតលាស់ ប្រកបដោយសុខភាពល្អ របស់កុមារតាមរយៈកីឡា ហើយយើងជឿថា កីឡាបាល់ទាត់ ជាកីឡារួមមួយ ដែលអ្នកគ្រប់គ្រងអាចលេងបានយ៉ាងរីករាយ ដោយមិនរើសអើងសាសនា ជាតិសាសន៍ ឬវប្បធម៌ អ្វីឡើយ។

លោកបន្ថែមថា YKK ASAO គ្លីនិកបាល់ទាត់ កុមារ អនុញ្ញាតឲ្យក្រុមហ៊ុនយើង ធ្វើការរួមចំណែក ជួយដល់សហគមន៍ក្នុងស្រុក ជាពិសេសនៅក្នុងតំបន់ ដែលយើង បានបើកដំណើរការិយាល័យ និងអគារបម្រើសេវាកម្មផ្សេងៗ៕

ស្វាយរៀងៈ បន្ទាប់ពីអាជ្ញាធខេត្តស្វាយរៀងស្នើសុំឲ្យម្ចាស់ រថយន្ដដឹកកម្មកទាំងអស់ នៅក្នុងខេត្ត ស្វាយរៀង កាត់បន្ថយការដឹកកម្មករ ដែលមានចំណុះច្រើននាក់ ជាហេតុបង្កឲ្យមានគ្រោះថ្នាក់ជាញឹក ញាប់មកនោះ ក្រុមអ្នកមានរថយន្ដដឹកកម្មករមួយ ចំនួនមានគម្រោងដង្ហែក្បួនមកកាន់សាលា ខេត្តស្វាយ រៀង ឲ្យជួយរកដំណោះស្រាយឲ្យពួកខ្លួន។

បុរសម្នាក់ដែលមានរយន្តម៉ាកកូរ៉េ ដែលអាចដឹកក្រុមកម្មករប្រមាណ ៦០នាក់ បានប្រាប់ឲ្យដឹងថា ប្រសិន បើម្ចាស់រថយន្ដទាំងអស់ ធ្វើតាមការស្នើសុំរបស់អាជ្ញាធរ ដែលតម្រូវឲ្យធ្វើកន្លែងអង្គុយឲ្យបានត្រឹមត្រូវ ដល់កម្មករ និងមិនឲ្យកម្មករឈរនោះ វានឹងធ្វើឲ្យចំនួនកម្មករជិះធ្លាក់ចុះជាងមុន។

លោកបានថ្លែងថា «បើយើងធ្វើតាមការទាមទាររបស់អាជ្ញាធរ តើនរណាជាអ្នកទទួលខុសត្រូវ ចំពោះជីវ ភាពរបស់ពួកយើង?»។
បើតាមម្ចាស់រថយន្តរូបនេះ ជាទូទៅក្នុងរយន្ដមួយគ្រឿង គេអាចផ្ទុកកម្មករ បានចំនួន ៦០ទៅ៨០នាក់ តែ បើធ្វើតាមស្នើសុំរបស់អាជ្ញាធរ ដែលឲ្យដឹកកម្មករចំនួន៣៥នាក់ ចំនួនកម្មករធ្លាក់ចុះជិតពាក់កណ្ដាល។

ចំណែកយុវជនវ័យក្មេងម្នាក់ទៀត ឈ្មោះ នី ដែលមានរថយន្តដឹកកម្មករមួយគ្រឿងដែរនោះ បានឲ្យដឹង ថា យើងមិនប្រឆាំងនិងវិធានការរបស់អាជ្ញាធរនោះទេ ក៏ប៉ុន្តែបើធ្វើបែបនេះមែន យើងនឹងដំឡើងថ្លៃរថ យន្ដទ្វេមួយជាពីរ។

លោកថ្លែងថា « តើក្រុមកម្មករដែលជិះរថយន្តទាំងនោះ យល់ព្រមតាមការដំឡើងថ្លៃនេះដែរឬទេ? ពីមុន យើងយកតម្លៃ ១៥ដុល្លារក្នុងកម្មករម្នាក់ក្នុងមួយខែ តែបើធ្វើដូចអាជ្ញាធរប្រាប់នោះ យើងនឹងដំឡើង៣០ ដុល្លារក្នុងម្នាក់»។

យុវជនរូបនេះបានបន្តថា បើតាមលោកដឹងក្រុមកម្មករទាំងអស់មិនចង់ឲ្យមានការរៀបចំជាកៅអីអង្គុយ នោះទេ ពួកគេសុខចិត្តទ្រាំជិះឈរបែបនេះ ព្រោះវាមានតម្លៃថោក តែបើអាជ្ញាធរចាប់បង្ខំឲ្យម្ចាស់រថយន្ដ កាត់បន្ថយចំនួនអ្នកជិះនោះ ក្រុមកម្មករទាំងអស់ក៏ព្រមចូលរួមទាមទារជាមួយម្ចាស់រថយន្ដដែរ។

លោក ជៀង អំ អភិបាលខេត្តស្វាយរៀង បានថ្លែងប្រាប់មជ្ឈមណ្ឌលព័ត៌មានដើមអម្ពិលនៅរសៀល ថ្ងៃទី១ ខែវិច្ឆិកា ថា សាលាខេត្តបានធ្វើការប្រជុំជាមួយក្រុមម្ចាស់រថយន្ត និងតំណាងរោងចក្រអស់ហើយ ពីបញ្ហានេះ ដោយសាលាខេត្តតម្រូវឲ្យម្ចាស់រថយន្តទាំងអស់ត្រូវតែធ្វើកៅអីអង្គុយ ដោយមានបង្កាន់ដៃ សម្រាប់កាន់ព្រមទាំងបន្ថយចំនួនអ្នកជិះផង ដោយការជួបជុំគ្នានោះ គឺមានការឯកភាពគ្នាអស់ហើយពី ម្ចាស់រថយន្ត ហើយបើមានអ្នកមិនពេញចិត្តគឺតិចតួចប៉ុណ្ណោះ។
លោកបានថ្លែងថា «ការតម្រូវឲ្យធ្វើបែបនេះ វាគ្មានចំណេញអ្វីដល់សាលាខេត្តនោះទេ ក៏ប៉ុន្តែវាបានធ្វើ ឲ្យក្រុមកម្មករទាំងអស់ មានសុវត្ថិភាពក្នុងការធ្វើដំណើរ»។

បើតាមលោកអភិបាលខេត្ត ជៀង អំ ក្នុងរយៈពេលមិនដល់ពេញមួយឆ្នាំផង នៅឆ្នាំ២០១២នេះ មាន គ្រោះថ្នាក់ចរាចរចំនួន៤ដងមកហើយ ដោយសាតែរថយន្ដដឹកកម្មករច្រើនពេក គឺពី៥០នាក់ទៅ៦០នាក់ ក្នុងមួយរថយន្ដនេះ។

លោកបន្ថែមថា« បើយើងមិនចាត់វិធានការទេ គ្រោះថ្នាក់បែបនេះ នឹងកើតមានជាបន្តទៅទៀត ហើយជា ពិសេសទៅទៀតនោះនឹងមានការរិះគន់ថា អាជ្ញាធរអសម្មតភាព បានជាបណ្ដោយឲ្យមានគ្រោះថ្នាក់កើត ឡើងញឹកញាប់បែបនេះ»៕

ឡុងដ៏៖ ប្រធានាធិបតីប្រទេស ឥណ្ឌូនេស៊ី ស៊ូស៊ីឡូ បំាបំាង យ៉ូដូយូណូ នឹងប្រែក្លាយជាមេ ដឹកនំាពិភពលោក ទីមួយ ដែលធ្វើទស្សនកិច្ចទៅចក្រភពអង់គ្លេស អំឡុងពេលបុណ្យគម្រប់ខួប ៥០ឆ្នាំរបស់ម្ចាស់ក្សត្រី។

យោងតាមព័ត៌មានពីទូរទស្សន៍សឹង្ហបុរី Channel News Asia បានឲ្យដឹងនៅថ្ងៃព្រហស្បតិ៍ ទី០១ ខែវិច្ឆិកា ឆ្នាំ ២០១២នេះថា បណ្ឌិត យ៉ូដូយូណូ និងភរិយា ធ្វើទស្សនកិច្ចរយៈពេលបីថ្ងៃ នៅចក្រភពអង់គ្លេស ជាងនេះ ទៅទៀត អ្នកទំាងពីរនឹងចូលគាល់រាជវង្ស រួមជាមួយនឹងការពិភាក្សាអំពីការបណ្តាក់ទុន និងការអភិវឌ្ឍន៍ ផ្នែកជំនួញ ជាមួយនឹងអ្នកនយោបាយមួយចំនួនថែមទៀតផងដែរ។

កាលពីថ្ងៃពុធ បណ្ឌិត យ៉ូដូយូណូ បានជួបជាមួយនាយករដ្ឋមន្រ្តី ដេវីដ កាម៉ារូន និងឧបនាយករដ្ឋមន្រ្តី ណិក គ្លិក នៅវិមាន បាកឃីងហាម ហើយនៅថ្ងៃព្រហស្បតិ៍ លោកនឹងជួបជាមួយនឹងលោក កាម៉ារូន ម្តងទៀតនៅ ដោនស្ទ្រីត។

គួរបញ្ជាក់ផងដែរថា ការធ្វើទស្សនកិច្ចរបស់លោក យ៉ូដូយូណូនេះដែរ មិនត្រូវបានទទួលការរាក់ទាក់ ខ្លំាងពីអ្នក ទំាងអស់គ្នានោះទេ ដោយមានក្រុមបាតុកររាប់សិបនាក់ បានប្រមូលផ្តុំគ្នានៅ ដោនស្ទ្រីត ដោយចោទប្រកាន់ ប្រទេស ឥណ្ឌូនេស៊ីថា រំលោភសិទ្ធិមនុស្សផងដែរ។

ភ្នំពេញៈ ក្រោយពីទទួល បាននូវដំណឹង ដ៏គ្រោតគ្រាត ទាក់ទងនឹងការធ្លាក់ ដុនដាប ទៅលើកម្រិត ជីវភាព របស់ តារាចម្រៀង ធ្លាប់ ចាយលុយពេញៗដៃ នាង អ៊ុំ គន្ធា ដែលត្រូវ ជាអតីតភរិយា របស់តារាចម្រៀង ផាន សុផាត ដែលកំពុង តែធ្លាក់ខ្លួន ដើរ រាវខ្យង ខ្ចៅ នឹងបេះត្រកួន ដើម្បីយកមកធ្វើ ជាអាហារ បរិភោគចិញ្ចឹមជីវិត ស្ទើរមិនគួរ ឲ្យជឿរួចមក នៅរសៀលថ្ងៃទី១ ខែវិច្ឆិកា ឆ្នាំ២០១២ នេះ មជ្ឈមណ្ឌលព័ត៌មាន ដើមអម្ពិល បាននាំយក ថវិកា មួយចំនួន ដែលបានមកពី សប្បុរសជននានា និងថវិកា មជ្ឈមណ្ឌលព័ត៌មាន ដើមអម្ពិល ផ្ទាល់ទៅឧបត្ថម្ភ ជូនគ្រួសាររបស់ តារាចម្រៀង អ៊ុំ គន្ធា ដែលកំពុងតែជួបប្រទះ នូវការខ្វះខាត យ៉ាងធ្ងន់ធ្ងរ ទៅលើការទិញថ្នាំ ព្យាបាលជំងឺ នឹងផ្គង់ផ្គងជីវភាពប្រចាំថ្ងៃ ដែលផ្ទះនាងស្នាក់នៅ មានអាសយដ្ឋាននៅ ក្នុងភូមិ បាយ៉ាប សង្កាត់ភ្នំពេញថ្មី ខណ្ឌសែនសុខ ខាងក្រោយ បុរីពិភពថ្មី។

ថវិកាដែលសប្បុរសជន ជួយឧបត្ថម្ភតារាចម្រៀង អ៊ុំ គន្ធា តាមរយៈមជ្ឈមណ្ឌល ព័ត៌មានដើមអម្ពិល មានដូចជាកញ្ញា លីដា ណាលីស (Lida Nalish) ឧបត្ថម្ភតាម រយៈក្រុម ប្រហុកខ្មែរ ថវិកា ១០០ ដុល្លារអាមេរិក ។ លោក វី នៅភ្នំពេញ ថវិកា៦ម៉ឺនរៀល ។ មជ្ឈមណ្ឌលព័ត៌មាន ដើមអម្ពិល ថវិកា ១០ម៉ឺនរៀល និងអង្ករ ៤៥គីឡូក្រាម និង លោក ហុក ចាន់លីណូ ថវិកា ៥ដុល្លារ ផង ដែរ ។ ក្នុងឱកាសនោះ អ្នកនាង អ៊ុំ គន្ធា ក៏ដូចជាម្ដាយ របស់នាង បានថ្លែងអំណរគុណ យ៉ាងជ្រាលជ្រៅ ចំពោះការយកចិត្ត ទុក ដាក់ ពីសំណាក់ សប្បុរស ជននានា ទាំងទឹកភ្នែក រលីងរលោង ជាប់ថ្ពាល់ ហើយនេះជាទឹកចិត្ត ដែលមិនអាច កាត់ថ្លៃបានរបស់ សប្បុជន ដែលបានជួយសង្គ្រោះ នាង និងគ្រួសារ ក្នុងពេលក្រខ្សត់នេះ ។

ជាមួយគ្នានេះដែរ មជ្ឈមណ្ឌលព័ត៌មាន ដើមអម្ពិល ក៏សូមអំពាវនាវដល់សិល្បករ-សិល្បការិនី និងសប្បុរសជននានា ដែលមាន សុទ្ធាជ្រះថ្លា សូមជួយឧបត្ថម្ភ ដល់តារាចម្រៀង អ៊ុំ គន្ធា ដែលកំពុងជួបបញ្ហាទីទាល់ក្រ ដើម្បីបង្ហាញពីទឹកចិត្ត ចេះជួយគ្នា ទៅវិញ ទៅមក ក្នុងនាមជា ប្រជាពលរដ្ឋខ្មែរ និងក្នុងនាមជាអ្នកសិល្បៈ ដូចគ្នា ព្រោះមនុស្សគ្រប់រូប ពិតជាមិនអាច មើលឃើញ ពីជោគវាសនា របស់ខ្លួនបានឡើយ។ ជាក់ស្ដែងដូចជានាង អ៊ុំ គន្ធា នេះជាដើម រហូតដល់ថ្នាក់ ថ្ងៃមួយមានជនពិកា ពីនាក់ ប្ដីប្រពន្ធ បាន ដឹកដៃគ្នាដើរកាត់ទឹក កាត់ភក់ ដើម្បីយកថវិកា បន្តិចបន្តួច ទៅជូននាងដល់ផ្ទះ ដោយសារតែពួក គាត់មានការក្ដី អាណិតអាសូរនាង ជាពន់ពេក ធ្វើឲ្យនាងស្រក់ទឹកភ្នែក ខ្សឹបខ្សួលនិយាយ លេងចេញ ព្រោះមិននឹក ស្មានថា ជីវិតនាងធ្លាក់ដល់ ថ្នាក់នេះសោះ។
គួរបញ្ជាក់ថា រឿងរ៉ាវដែលមិននឹកស្មានមិនដល់មួយ នៅក្នុងខ្សែជីវិត របស់តារាចម្រៀងស្រី ដែលធ្លាប់ល្បីឈ្មោះ ដោយសារតែ ការឡើង ច្រៀងស្លៀកពាក់ ដ៏សិចស៊ី គឺអ្នកនាង អ៊ុំ គន្ធា អតីតភរិយាតារាចម្រៀង ដែលចូលចិត្ដ ច្រៀងបទពីដើមៗបានពីរោះ គឺលោក ផាន សុផាត នោះ ត្រូវបានបែកធ្លាយ ធ្វើឲ្យមជ្ឈដ្ឋាន អ្នកដែលធ្លាប់ស្គាល់ ពីជីវិតហ៊ឺហារបស់នាង ស្ទើរតែនាំគ្នា មិន ជឿសោះឡើយថា តារាចម្រៀងដែលធ្លាប់ រស់នៅក្នុងជីវភាព ធូរធារថ្កុំ ថ្កើង ស្គាល់តែពាក្យចូល ហាងតុបតែងខ្លួន ស៊ីវីល័យ ទៅណាមកណាជិះរថយន្ដ និងដើរស៊ីចាយ ហ៊ឺហានោះ បែរជា ធ្លាក់ខ្លួនរហូតដល់ថ្នាក់ ស្ទើរតែរកលុយ ចិញ្ចឹមជីវិត ខ្លួនឯង មិនរស់ ដល់ថ្នាក់ ដើររើស ខ្យង ខ្ចៅ និងបេះត្រកួន ព្រលឹត យកស្លហូបចម្អែតក្រពះ។
អ៊ុំ គន្ធា សព្វថ្ងៃឆាក ជីវិតនាង និងកូនប្រុសទាំង ២ធ្លាក់ខ្លួន ស្ទើរតែរកអង្ករច្រក ឆ្នាំងគ្មាន និងមានជំងឺ ជាប់កាយ ជ្រកកោន ក្នុងផ្ទះប្អូនស្រី មិនអាចធ្វើការ ធ្ងន់ធ្ងរបានទេ។ ប្រឈមនឹងបញ្ហាជីវិត នាងត្រូវបង្ខំចិត្ដនាំ កូនចុះរាវខ្ចៅ ខ្យង និងដកព្រលឹត បេះត្រកួន ក្នុងបឹងបាយ៉ាប យកទៅលក់។ នាងតូចចិត្ដ នឹងវាសនា ណាស់ថា តើពីជាតិមុន នាង បានសាងកម្មពៀរអ្វី បានជា ជាតិនេះ ធ្លាប់ល្បីល្បាញ ឡើងកប់ពពក បែរជាជ្រកអាចម៍ជន្លេន ស្ទើរមិនគួរ ឲ្យជឿយ៉ាងនេះ ។ អ៊ុំ គន្ធា បានផ្ដាំផ្ញើទៅដល់ លោក ផាន សុផាត ជាអតីតស្វាមី ថា នាងមិនចង់បានអ្វីក្រៅតែអំពីឲ្យលោក ផាន សុផាត ជួយជាថវិកាចេញថ្លៃ សាលាឲ្យកូន រៀន ដើម្បីឲ្យកូនមាន អនាគតនឹងគេ ចំណែកលោកដែល បានប្រកាន់ចិត្តខឹងនាង ធ្ងន់ធ្ងរយ៉ាងណា នោះ ក៏ខឹងទៅ សម្រាប់ នាងផ្ទាល់ គឺលេងគិតហើយ ចំពោះរឿងនេះ៕

ព័ត៌មានចិនស៊ិនហួរ ចុះផ្សាយនៅរាត្រីថ្ងៃទី៣១ ខែតុលា ឆ្នាំ២០១២ថា ពលរដ្ឋហ្គី នៀ ប្រមាណជាង ៣លាននាក់ ប្រឈមមុខនឹង រោគងងុយដេក ។

ក្រសួងសុខាភិបាល របស់ប្រទេស ហ្គីនៀ បានប្រកាសឱ្យដឹងថា ពលរដ្ឋប្រមាណ ជាង៣លាននាក់ ប្រឈមមុខនឹង រោគងងុយដេក ភាសាបច្ចេក ទេសហៅថា ” trypanosomiasis ” ។  

ជាទូទៅ រោគមួយនេះតែងតែ កើតមានឡើងនៅ ក្នុងតំបន់ក្ដៅ ក្នុងនោះមាន តំបន់សាហារ៉ា នៅអាហ្វ្រិក ពិសេសនៅ ក្នុងបណ្ដាប្រទេស ជាប់នឹងតំបន់ឆ្នេរខ្សាច់ ដូចជាៈ ហ្គីនៀ ហ្គាមប៊ី និងលីប៊ី ។ 

ក្រសួងសុខាភិបាល ប្រទេសខាងលើបានបញ្ជាក់ថា ប្រទេសហ្គីនៀ ប្រឈមមុខនឹងរោគនេះ ហើយជាជំងឺដែលបាន និងកំពុង រីកសាយភាយ នៅក្នុងតំបន់ ពិសេសតំបន់ឆ្នេរខ្សាច់ ។

តាមការស្រាវជ្រាវ បានរកឃើញថា រោគមួយនេះអាចឆ្លង ពីមនុស្សទៅសត្វ និងពីសត្វបក្សីទៅមនុស្សវិញ ដែលធ្វើ ឱ្យអ្នកជំងឺមាន អាការៈងងុយដេក និងអាចប្រកាច់ បានគ្រប់ពេល រួមទាំងអាចបំផ្លាញ ធ្ងន់ធ្ងរដល់ប្រព័ន្ធប្រសាទ៕

ភ្នំពេញ៖ នៅរសៀលថ្ងៃទី០១ ខែវិច្ឆិកានេះ ជប៉ុនបានប្រារព្ធពិធីចុះហត្ថលេខា លើកិច្ចសន្យាផ្តល់ជំនួយឥតសំណង ក្រោមគម្រោងអង្គការក្រៅរដ្ឋាភិបាលជប៉ុន ដែលគិតជាទឹកប្រាក់ សរុប៤៣៤.២៤៦ដុល្លារ សម្រាប់គម្រោងពង្រីកអគារវះកាត់ ក្នុងមន្ទីពេទ្យកុមារជាតិ។

ឯកអគ្គរាជទូតវិសាមញ្ញ និងពេញសមត្ថភាព របស់ប្រទេសជប៉ុនប្រចាំនៅកម្ពុជា លោក ម៉ាសាហ៊្វូមី គូរ៉ូគិ មានប្រសាសន៍ នៅក្នុងពិធីចុះហត្ថលេខានោះថា ការកែលម្អ ស្ថានភាពសុខាភិបាលមានសារសំខាន់ សម្រាប់ការអភិវឌ្ឍន៍ប្រកបដោយនិរន្តរភាព។ ជាងនេះទៅទៀត ការកែលម្អសេវាសុខាភិបាល សម្រាប់កុមារ រឹតតែមាន សារសំខាន់ ពីព្រោះវាជាការវិនិយោគទៅលើកុមារ ដែលនឹងក្លាយជាអ្នកដឹកនាំនាពេលអនាគត់។

លោកបានបានបញ្ជាក់ថា” ការកែលម្អស្ថានភាពសុខាភិបាល មានសារសំខាន់ណាស់សម្រាប់ការអភិវឌ្ឍន៍ ប្រកបដោយនិរន្តភាព។ ផែនការយុទ្ធសាស្រ្ត សម្រាប់ វិស័យសុខាភិបាលឆ្នាំ២០០៨-២០១៥ ក៏បានផ្តល់អាទិភាពខ្ពស់ ទៅលើវិស័យការកែលម្អ ទៅលើសេវាសុខាភិបាលសម្រាប់កុមារផងដែរ”។

លោកបន្តថា រដ្ឋាភិបាលជប៉ុន តែងតែផ្តល់ជំនួយឧបត្ថម្ភ សម្រាប់វិស័យ ជាច្រើនដើម្បីគាំទ្រ ដល់ការក៏សាង និងអភិវឌ្ឍន៍ប្រទេសកម្ពុជា តាំងពីឆ្នាំ១៩៩២មក។ ចំពោះការគាំទ្រ វិស័យសុខាភិបាលរដ្ឋាភិបាលជប៉ុន រួមចំណែកតាមរយៈការកែលម្អ ហេដ្ឋារចនាសម្ព័ន្ធសុខាភិបាល តួយ៉ាងមជ្ឍមណ្ឌលជាតិ គាំពារមាតានិងទារក ការអភិវឌ្ឍធនធានមនុស្សជាដើម។

នាយិកាមូលនិធិ សម្រាប់ការអភិវឌ្ឍន៍ និងជំនួយសង្រ្គោះជាតិ កញ្ញា អាកេមិ តាកាហាហ្សិ មានប្រសាសន៍ផងដែរថា ការពង្រឹងអគារផ្នែកសណ្តំ និងសល្យគារដែល មានការគាំទ្រ ពីគម្រោងជំនួយសម្រាប់ អង្គការក្រៅរដ្ឋាភិបាលជប៉ុននេះ ពិតជានាំមកនូវការព្យាបាល វេជ្ជសាស្រ្តយ៉ាងល្អប្រសើរ សម្រាប់កុមារកម្ពុជាដែលនេះ ជាយុទ្ធសាស្រ្តមួយ ក្នុងចំណោមយុទ្ធសាស្រ្តអភិវឌ្ឍន៍ សហស្សវត្សរ៍ និងជាផែនការយុទ្ធសាស្រ្តសុខាភិបាល របស់ប្រទេសកម្ពុជាផងដែរ។

សូមជម្រាបថា ជំនួយដែលផ្តល់មកកម្ពុជា គិតជាទឹកប្រាក់សរុប ៤៣៤.២៤៦ដុល្លារ នោះនឹងត្រូវអនុវត្តគម្រោង ពង្រីកអគារវះកាត់ក្នុងមន្ទីពេទ្យកុមារជាតិ ដោយធ្វើ ការសាងសង់បន្ទប់វះកាត់ថ្មី បន្ទប់បណ្តុះបណ្តាល និងបន្ទប់ថែទាំសម្រាប់អ្នកជំងឺធ្ងន់ធ្ងរ ព្រមទាំងធ្វើការជួសជុលអគារ និងកែលម្អប្រព័ន្ធទឹក ហ្គាស ក្នុងអគារផងដែរ។

ចាប់តាំងពីឆ្នាំ២០០២មក រដ្ឋាភិបាលជប៉ុន បានផ្តល់ថវិកាជាង១៧.៥លានដុល្លារ ដល់គម្រោងចំនួន៦៨គម្រោង របស់អង្គការក្រៅរដ្ឋាភិបាលជប៉ុន ដែលផ្តោតសំខាន់ ទៅលើវិស័យអប់រំ នៅតាមកម្រិតមូលដ្ឋាន វិស័យសុខាភិបាល និងសកម្មភាពបោសសម្អាតមីន៕

ភ្នំពេញៈ ក្រោយជាប់ឆ្នោតរយៈពេល១៩ ថ្ងៃ លោកមេធាវី ប៊ុន ហុន នៅសៀលថ្ងៃទី១ ខែវិច្ឆិកា ឆ្នាំ២០១២ ត្រូវបានប្រគល់តំណែងជូនជាប់ ប្រធានគណៈមេធាវីអាណត្តិទី៩ ជំនួសលោក មេធាវី ជីវ សុងហាក់ ក្រោមការចូលរួមជាកិត្តិយសរបស់ ឧបនាយករដ្ឋមន្ត្រី រដ្ឋមន្ត្រីទទួលបន្ទុក ទីស្តីការ គណៈរដ្ឋមន្ត្រី លោក បណ្ឌិតសភាចារ្យ សុខ អាន ។

ប្រធានគណៈមេធាវីអាណត្តិទី៨ លោក ជីវ សុងហាក់ បានឲ្យដឹងថា លោក ប៊ុន ហុន បានទទួលជ័យលាភី ជាប្រធានគណៈ មេធាវីអាណត្តិទី៩ បន្ទាប់ពីទទួលជ័យជំនះ លើបេក្ខជនដែលបាន ឈរឈ្មោះចំនួន៨រូបទៀត ។
លោក ជីវ សុងហាក់ បានឲ្យដឹងទៀតថា បច្ចុប្បន្ន សមាជិកគណៈមេធាវីនៃព្រះរាជាណាចក្រកម្ពុជា មានចំនួន៧៨៣ រូប ក្នុងនោះមេធាវីជាស្ត្រី ចំនួន ១៥០រូប និងមានការិយាល័យមេធាវីចំនួន ២៨៩ ការិយាល័យតាមរាជធានីខេត្តចំនួន២០ ។

ឩបកនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បណ្ឌិតសភាចារ្យ សុខ អាន បានថ្លែងថា វិជ្ជាជីវៈមេធាវីមានសារៈសំខាន់មិនអាចខ្វះបានទាំងនៅក្នុងសង្គមកម្ពុជា ដ៏ដូចជាប្រទេសនានាលើសកលលោក ។ លោកបណ្ឌិតសភាចារ្យ បន្តទៀតថា មេធាវីត្រូវបានគេទទួលស្គាល់ថា ជាអ្នកមានការយល់ដឹងជ្រៅជ្រះទៅលើខ្លឹមសារច្បាប់ នីតិវិធី និងបញ្ហានានាពាក់ព័ន្ធនឹងការអនុវត្តច្បាប់ ទើបមនុស្សគ្រប់រូបស្វែងរកការពិគ្រោះយោបល់ និងការការពារពីមេធាវី ។

ប្រធានគណៈមេធាវីអាណត្តិទី៩ ដែលទើបនិងជាប់ឆ្នោតលោក ប៊ុន ហុន បានសន្យាផងដែរថា និងធ្វើការសម្រេចកិច្ចការសំខាន់ចំនួន៧ ក្នុងនោះរួមមាន

ទី១.ចូលអន្តរគមន៍ជួយដល់មេធាវីក្នុងពេលមានឩបសគ្គក្នុងការងារប្រកវិជ្ជាជីវៈ ដើម្បីធានាឲ្យការប្រកបវិជ្ជាជីវៈ របស់មេធាវីអាចប្រព្រឹត្តទៅបានដោយរលូនស្របតាមច្បាប់កំណត់,

ទី២.ពង្រឹងទំនាក់ទំនងជាមួយស្ថាប័នជាតិ និងអន្តរជាតិដែលមានស្រាប់ និងពង្រីកទំនាក់ទំនង ជាមួយស្ថាប័នជាតិ និងអន្តរជាតិបន្ថែមទៀត,

ទី៣.រៀបចំការបណ្តុះបណ្តាលដំបូង និងការបណ្តុះបណ្តាលបន្តដល់មេធាវី ដើម្បីពង្រឹងសមត្ថភាពដល់ មេធាវីឲ្យឆ្លើយតបទៅនឹងការរីកចំរើនផ្នែកគតិយុត្តិ,

ទី៤.រៀបចំកែលម្អប្រព័ន្ធរដ្ឋបាល និងហិរញ្ញវត្ថុរបស់គណៈមេធាវីឲ្យបានសមស្រប និងមានប្រសិទ្ធភាព,

ទី៥.រៀបចំឲ្យមានផែនការយុទ្ធសាស្រ្តរបស់គណៈមេធាវី សម្រាប់ជាផ្នែកការអភិវឌ្ឍគណៈមេធាវីក្នុងរយៈពេលខ្លី រយៈពេលមធ្យម និងរយៈពេលវែង,

ទី៦.រៀបចំសេចក្តីព្រាងវិសោធនកម្មច្បាប់ស្តីពីលក្ខន្តិកៈមេធាវីឲ្យស្របតាមការវិវឌ្ឍន៍ផ្នែកសេដ្ឋកិច្ច និងនយោបាយរបស់ព្រះរាជាណាចក្រកម្ពុជា និងទី៧.ធ្វើវិសោធនកម្មបទបញ្ជាផ្ទៃក្នុងរបស់គណៈមេធាវីឲ្យស្របតាមការរីកចំរើន នៃវិជ្ជាជីវៈមេធាវី ។
នៅថ្ងៃទី១២ ខែតុលា ឆ្នាំ២០១២ កន្លងទៅនេះ លោកមេធាវី ប៊ុន ហុន ត្រូវជ្រើសតាំង ជាប្រធាន គណៈមេធាវី នៃព្រះរាជាណាចក្រកម្ពុជា អាណត្តិទី៩ ដោយបានឈ្នេះ គូប្រកួត គឺមេធាវី សួន វិសាល ដោយ ទទួលបានសម្លេង ៣៨០ (៥៧,៤០%) ទល់ និងសម្លេង ២១៤ (៣២,៣៣%) នៃចំនួនមេធាវី ដែលមាន វត្តមាន៥៨៧នាក់ ។

លោកមេធាវី ប៊ុន ហុន ត្រូវបានគេចាត់ទុកថាបុគ្គល ដែលមានសាមគ្គីផ្ទៃក្នុង ល្អជាមួយបណ្តា មេធាវីទាំងអស់, មានគោលការ ច្បាស់លាស់ល្អក្នុងការ រៀបចំគណៈមេធាវី មិនត្រឹមតែប៉ុណ្ណឹងទេ លោក ក៏ទទួលបានការ ទុកចិត្តពី ថ្នាក់ដឹកនាំមួយចំនួន ក្នុងជួររាជរដ្ឋាភិបាល កម្ពុជា មានបទពិសោធន៍ និងលក្ខណៈសម្បត្តិមួយចំនួន លោកមាន សញ្ញាបត្រជាន់ខ្ពស់ ផ្នែកនីតិសាស្រ្ត មានចំណេះដឹងផ្នែក ភាសាអង់គ្លេស និងភាសាបារំាង អាចប្រើប្រាស់បាន, ធ្លាប់ជាសមាជិក ក្រុមប្រឹក្សា គណៈមេធាវីនៃ ព្រះរាជាណា ចក្រកម្ពុជា, ធ្លាប់ធ្វើជាអគ្គលេខាធិកា នៃគណៈមេធាវី, ជាសមាជិកក្រុមប្រឹក្សា អ្នកច្បាប់កម្ពុជា, ជាអនុរដ្ឋលេខាធិការ ក្រសួងយុត្តិធម៌, ជាស្ថាបនិក នៃមជ្ឈមណ្ឌល បណ្តុះ បណ្តាល វិជ្ជាជីវៈមេធាវី, បានចូលរួមធ្វើ សេចក្តីព្រាងច្បាប់ និងបានផ្សព្វផ្សាយច្បាប់ ហើយក៏ជាស្ថាប និកនៃកិច្ច ទំនាក់ទំនងអន្តរជាតិ រវាងសហព័ន្ធ គណៈមេធាវី ជប៉ុន គណៈមេធាវីកាណាដា និងគណៈមេធាវី សហរដ្ឋអាមេរិក ផងដែរ ។

សូមបញ្ជាក់ថា លោកមេធាវី សាយ បូរី ត្រូវបានបោះឆ្នោតជ្រើសតាំងជាប្រធានគណៈមេធាវី នៃព្រះរាជាណា ចក្រកម្ពុជា អាណត្តិទី១ និងអាណត្តិទី២ បន្ទាប់មក លោកមេធាវី អំាង អេងថុង ធ្វើជាប្រធានគណៈមេធាវី សម្រាប់ អាណត្តិទី៣ និង អាណត្តិទី៤, លោកមេធាវី គី តិច ធ្វើជាប្រធានគណៈមេធាវី សម្រាប់ អាណត្តិទី៥ និងទី៦ ហើយ លោក មេធាវី ជីវ សុងហាក់ បានធ្វើជាប្រធាន គណៈមេធាវីនៃព្រះរាជាណាចក្រ កម្ពុជា សម្រាប់អាណត្តិ ទី៧ និងអាណត្តិទី៨ ក្នុងពេល បច្ចុប្បន្ននេះ ៕

ពោធិ៍សាត់ៈ រថយន្ត CRV មួយគ្រឿងបោះពួយ យ៉ាងលឿនតាមបណ្តោយផ្លូវជាតិលេខ បានជ្រុលទៅបុកម៉ូតូ២ គ្រឿងបន្តបន្ទាប់គ្នា បណ្តាលឲ្យស្ត្រីជាស្មៀនឃុំមេទឹកម្នាក់ បានស្លាប់ និងបុរសម្នាក់ទៀតរងរបួសបាក់ជើង នាវេ លាម៉ោង ៣ និង៤០នាទីរសៀលថ្ងៃទី០២ ខែវិច្ឆិកា ឆ្នាំ២០១២ ស្ថិតនៅភូមិអូរប្រស្តៅ សង្កាត់ផ្ទះព្រៃ ក្រុងពោធិ៍ សាត់ ខេត្តពោធិ៍សាត់។

មន្ត្រីនគរបាលចរាចរផ្លូវគោក ខេត្តពោធិ៍សាត់ បានឲ្យដឹងថា ស្ត្រីរងគ្រោះ ដែលត្រូវរថយន្តបង្កបុកបណ្តាលឲ្យ ស្លាប់បាត់បង់ជីវិតនោះ មានឈ្មោះ សួង ដារី អាយុ ២២ ជាស្មៀនឃុំមេទឹក ។ ចំណែកឯបុរសម្នាក់ទៀត ដែល រងរបួសបាក់ជើងម្ខាងនោះ មិនទាន់ស្គាល់អត្តសញ្ញាណនៅឡើយទេ។

បើតាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុឃើញ ស្ត្រីរងគ្រោះជិះម៉ូតូ ម៉ាក C125 ពណ៌ ខ្មៅគ្មានស្លាកលេខ ស៊េរី ២០១២ ក្នុងទិសដៅពីកើតទៅលិច តាមបណ្តោយផ្លូវជាតិលេខ៥។ លុះមកដល់កន្លែង កើតហេតុ ស្រាប់តែមានថយន្តមួយគ្រឿងម៉ាក CRV ពណ៌ទឹកប៉ិច ពាក់ស្លាកលេខ ភ្នំពេញ 2B-6226  បោះពួយ យ៉ាងលឿនក្នុងទិសដៅបញ្ច្រាស់គ្នា ហើយរថយន្តបង្កនោះ បានរ៉េចង្កូតមកបុកពេញទំហឹង ហើយបន្តទៅបុករះ និងអ្នកជិះម៉ូតូសង់កូរ៉េមួយគ្រឿងទៀត ដែលកំពុងជិះបញ្ច្រាស់ទិសគ្នា ជាមួយរថយន្តដែរនោះ បណ្តាលឲ្យបាក់ ចើងម្ខាង។

ប្រភពបន្តថា អ្នកបើកបរថយន្តទំនងជាងងុយដេក ទើបបានជារ៉េចង្កូតមកបុកជាមួយម៉ូតូរងគ្រោះ ដល់ទៅ២ គ្រឿង នៅផ្នែកខាងស្តាំ នៃជនរងគ្រោះ ជិះម៉ូតូទាំងពីរគ្រឿងនោះ បណ្តាលឲ្យស្ត្រីជាស្មៀន ឃុំធ្លាក់ចូលក្នុងស្រះ ក្បែរផ្លូវហើយស្លាប់ភ្លាមៗ តែម្តង ចំណែកអ្នកបើករថយន្តបង្ករត់គេចខ្លួនបាត់។ ក្រោយពេលវាស់វែងទាំងរថយន្ត បង្ក និងម៉ូតូ២គ្រឿងផ្សេងទៀត បានយកមករក្សាទុកនៅការិយាល័យនគរបាលចរាចរណ៍ផ្លូវគោកខេត្ត ដើម្បីរង់ ចាំការដោះស្រាយ ចំណែកសពស្ត្រីរងគ្រោះត្រូវបានប្រគល់ជូនទៅក្រុមគ្រួសារយកទៅធ្វើបុណ្យតាមប្រពៃណី៕

ភ្នំពេញ៖ សម្តេចតេជោ នាយករដ្ឋមន្រ្តី នៃព្រះរាជាណាចក្រកម្ពុជា ជាថ្មីម្តងទៀត បានក្រើនរំលឹក ដល់មន្ត្រីនៅគ្រប់ខេត្តទាំងអស់ ត្រូវយកចិត្តទុកដាក់ អំពីការរស់នៅ សុវត្ថិភាព ចំពោះយុវជនស្ម័គ្រចិត្ត វាស់វែងដីធ្លីរបស់សម្តេច។

យោងតាមសេចក្តីប្រកាសព័ត៌មាន ស្តីពីលទ្ធផលកិច្ចប្រជុំពេញអង្គ គណៈរដ្ឋមន្ត្រី នាព្រឹកថ្ងៃ២ ខែវិច្ឆិកានេះ បានឲ្យដឹងថា សម្តេចតេជោ ហ៊ុន សែន បានសម្តែង ការសោកស្តាយយ៉ាងខ្លាំង ចំពោះការទទួលមរណភាពរបស់យុវជនស្ម័គ្រចិត្ត ឈ្មោះ ច័ន្ទ មារឌី ដោយសារឧបទ្ទវហេតុខ្យល់ព្យុះ នៅស្រុកឆ្លូង ខេត្តក្រចេះ កាលពី ពេលកន្លងទៅនេះ។ ដូច្នេះសម្តេច “ស្នើឲ្យស្ថាប័នពាក់ព័ន្ធ ជាពិសេសអាជ្ញាធរដែនដី ត្រូវបង្កើនការយកចិត្តទុកដាក់ដល់ជីវភាព និង សុវត្ថិភាព របស់ក្រុមយុវជនស្ម័គ្រ ចិត្តឲ្យបានល្អ”។

សម្តេចបានមានប្រសាសន៍បន្តថា ក្រុមអាជ្ញាធរត្រូវហាមជាដាច់ខាត មិនត្រូវអនុញ្ញាតឲ្យក្រុមយុវជនស្ម័គ្រចិត្ត ចូលវាស់វែងដីនៅកន្លែងណា ដែលសង្ស័យថា មានមីន នោះឡើយ។

សូមជ្រាបថា យុទ្ធនាការរបស់ក្រុមយុវជនស្ម័គ្រចិត្ត វាស់វែងដីធ្លី ជូនប្រជាពលរដ្ឋ របស់សម្ដេចតេជោ ហ៊ុន សែន ចាប់តាំងពីខែមិថុនា រហូតដល់ខែតុលា ឆ្នាំ២០១២ កន្លងទៅនោះ បានធ្វើកិច្ចការងារសម្រេចជាង ១៧ភាគរយហើយ លើផែនការណ៍ដីចំនួន មួយលានប្រាំបីសែនហិកតា ចំពោះប្រជាពលរដ្ឋ ជាងបួនសែនគ្រួសារ ទូទាំងប្រទេស៕

ខេត្តក្រចេះ៖ នៅសាលាខេត្តក្រចេះ នារសៀលថ្ងៃទី០២ ខែវិច្ឆិកា ឆ្នាំ២០១២ នេះ បានប្រកាសនូវសមាសភាព មន្រ្តីចំនួន ៨រូប ចូលកាន់តំណែងថ្មី ដើម្បីចូលរួមបម្រើការងារអភិវដ្ឍន៍នៅក្នុងខេត្ត។

ពិធីប្រកាសតែងតាំងនូវមុខតំណែងជាអភិបាល អភិបាលរងក្រុង ស្រុក និងនាយករដ្ឋបាល នាយកនាយករង  សាលាខេត្តក្រចេះ ធ្វើឡើងដោយមានការអញ្ជើញចូលរួមពី លោក នូ ភឿង ប្រធានក្រុមប្រឹក្សាខេត្ត លោក សរ ចំរ៉ុង អភិបាលខេត្តក្រចេះ ។

មន្រ្តីចំនួន ៨រូប ដែលទទួលបានការតែងតាំងថ្មី ដើម្បីចូលរួមចំណែក កែប្រែមុខមាត់ ក៏ដូចជាការអភិវឌ្ឍន៍នៅ ក្នុងខេត្តក្រចេះឲ្យបានរីកចម្រើនថែមទៀតនេះ រួមមាន៖ លោក ហង់ ចាន់ឌី ជាអភិបាលក្រុងក្រចេះ លោក អ៊ាន ណារម្យ ជាអភិបាលស្រុកព្រែកប្រសព្វ លោក គង់ គឹមនី ជាអភិបាលស្រុកស្នួល លោក សាមុត លីម៉ា ជានាយក ទីចាត់ការផែនការ និងវិនិយោគ លោក ហង់ មន្ទីរ ជានាយកទីចាត់ការដ្ឋបាល លោក ម៉ុត មេងហ៊ាង ជានាយក រងទីចាត់ការរដ្ឋបាល លោក នូ សុផល ជាអភិបាលរងក្រុងក្រចេះ និងលោក ប៉ែន លីណាត ជានាយករដ្ឋបាល សាលាខេត្តក្រចេះ។

លោក ហង់ ចាន់ឌី តំណាងឲ្យមន្ត្រី ដែលទើបតែងតាំងតំណែងថ្មី បានឡើងប្តេជ្ញាចិត្តថា នឹងខិតខំបំពេញការងារ និងអនុវត្តនូវតូនាទីភារកិច្ចរបស់ខ្លួនឲ្យបានល្អ ជាពិសេសបង្កើនកិច្ចសហប្រតិបត្តិការល្អជាមួយដៃគូអភិវឌ្ឍន៍នា នា ទាំងថ្នាក់ជាតិ អន្តរជាតិ និងជាមួយមន្ទីរការិយាល័យ ជុំវិញខេត្ត ក្រុង ស្រុក ខិតខំផ្តល់សេវាសាធារណៈក្នុង ដែនសមត្ថកិច្ចរបស់ខ្លួនឲ្យបានរលូន ដើម្បីបង្កើនជំនឿទុកចិត្តពីសំណាក់ប្រជាពលរដ្ឋលើការដឹកនាំរបស់រាជរដ្ឋា ភិបាល។ ជាពិសេសការអនុវត្តគោលនយោបាយភូមិ ឃុំ មានសុវត្ថិភាព ដើម្បីពង្រឹងនូវ សុខសន្តិភាព សណ្តាប់ ធ្នាប់សាធារណៈជូនប្រជាពលរដ្ឋ។

មានប្រសាសន៍សំណេះសំណាល និងផ្តាំផ្ញើនៅក្នុងពិធីនោះ លោក សរ ចំរ៉ុង អភិបាល ខេត្តក្រចេះ បានមាន ប្រសាសន៍ថា មន្រ្តីដែលទើបទទួលបានការតែងតាំងពីរាជរដ្ឋាភិបាល និងក្រសួងមហាផ្ទៃត្រូវខិតខំបំពេញការ ងារប្រកបដោយស្មារតីទទួលខុសត្រូវ គ្រប់បែបយ៉ាង ធានាបាននូវសន្តិសុខ សណ្តាប់ធ្នាប់ សុត្ថិភាព ស្ថិរភាព   ព្រមទាំងអនុវត្តនូវផែនការអាទិភាពខ្ពស់របស់ខេត្ត គ្រប់ដំណាក់កាលសម្រេចឲ្យបាននូវលទ្ឋផលល្អ ពិសេស ផ្អែកលើរចនាសម្ព័ន្ឋរូបវន្ត័ ជំរុញបាននូវការលើកកម្ពស់ជីវភាព ឆ្ពោះទៅរកការកាត់បន្ថយភាពក្រីក្ររបស់ប្រជា ពលរដ្ឋ៕

លោក សរ ចំរ៉ុង អភិបាលខេត្តក្រចេះ ឡើងថ្លែងតាស់តឿនដល់មន្រ្តីចូលកាន់តំណែងថ្មី

លោក ហង់ ចាន់ឌី អភិបាលក្រុងក្រចេះ ឡើងប្រកាសប្តេជ្ញាចិត្ត ខិតខំបំពេញភារកិច្ចបម្រើប្រជាពលរដ្ឋ

ភ្នំពេញ៖ ស្ថានទូតសហរដ្ឋអាមេរិកប្រចាំនៅ កម្ពុជា បានប្រកាសឱ្យដឹងនៅថ្ងៃសុក្រ ទី២ ខែវិច្ឆិកានេះថា ខ្លួននឹង រៀបចំពិធីមើលការផ្សាយលទ្ធផល នៃការបោះឆ្នោតជ្រើសរើសប្រធានាធិបតីសហរដ្ឋអាមេរិក នៅព្រឹកថ្ងៃពុធ ទី ៧ ខែវិច្ឆិកា ឆ្នាំ២០១២ វេលាម៉ោង៩ព្រឹកនៅស្ថានទូតសហរដ្ឋអាមេរិក។

យោងតាមសេចក្តីប្រកាសព័ត៌មានរបស់ស្ថានទូតអាមេរិក ឱ្យដឹងដែរថា ភ្ញៀវ ដែលត្រូវបានអញ្ជើញចូលរួមនឹង ធ្វើការទស្សនានូវការផ្សាយបន្តផ្ទាល់នូវលទ្ធផលបោះឆ្នោតនៅលើផ្ទាំងបញ្ចាំងធំ។ ភ្ញៀវចូលរួមក៏នឹងធ្វើការបោះ ឆ្នោតសាកល្បងផងងដែរ ដើម្បីស្វែងយល់ពីប្រព័ន្ធបោះឆ្នោតអាមេរិក។

លោក William E. Todd ឯកអគ្គរដ្ឋទូតសហរដ្ឋអាមេរិកប្រចាំកម្ពុជា នឹងថ្លែងសុន្ទរកថា ស្វាគមន៍ដល់ភ្ញៀវ ដែល បានចូលរួមក្នុងឱកាសនោះផងដែរ៕

លោក បារ៉ាក់ អូបាម៉ា និងលោក មីដ រូមនី បេក្ខភាពប្រធានាធិបតីអាមេរិក

ភ្នំពេញ៖ គណៈកម្មាធិការយុវជន ដើម្បីឯកភាព និងការអភិវឌ្ឍ ដែលហៅកាត់ថា (YCUD) បានចេញសេចក្តី ប្រកាសព័ត៌មានមួយស្តីពីការរៀបចំធ្វើសិក្ខាសិលាមួយ ទាក់ទងការចូលរួមរបស់យុវជននៅក្នុងការអនុវត្ត គោល នយោបាយថ្នាក់ជាតិ ស្តីពីការអភិវឌ្ឍយុវជនកម្ពុជា ដែលវានឹងត្រូវប្រារព្ធធ្វើឡើងនៅថ្ងៃ០៥ ខែវិច្ឆិកា ឆ្នាំ២០១២ នេះ នាមជ្ឈមណ្ឌលកិច្ចសហប្រតិបត្តិការជប៉ុន ក្នុងបរិវេណសាកលវិទ្យាល័យភូមិន្ទភំ្នពេញ រាជធានីភ្នំពេញ។

សេចក្តីប្រកាសព័ត៌មាននោះ បានឲ្យដឹងថា ការរៀបចំព្រឹត្តិការណ៍នេះឡើង ក្នុងគោលបំណង បង្កើនការដាក់ បញ្ចូលយុវជននៅក្នុងគ្រប់វិស័យ នៃសង្គម ដើម្បីជួយជាគំនិតដល់ផែនការសកម្មភាពអភិវឌ្ឍន៍យុវជនថ្នាក់ជាតិ និងដើម្បីបង្កើនចំណេះដឹង នៃគោលនយោបាយយុវជនថ្នាក់ជាតិ សម្រាប់យុវជនមកពីគ្រប់វិស័យ ជាពិសេស បង្កើនការចូលរួមរវាងយុវជន និងក្រសួងអប់រំ យុវជន និងកីឡា អនុវត្តគោលនយោបាយយុវជនថ្នាក់ជាតិ។

នៅក្នុងប្រទេសកម្ពុជា មានយុវជនអាយុចន្លោះពី ១៥ ទៅ ៣០ឆ្នាំ បានកើនឡើង ៣៣ ភាគរយ នៃចំនួន ប្រជា ពលរដ្ឋសរុប ហើយទោះបីជាយ៉ាងណាក៏ដោយ យុវជនទាំងនេះ បានប្រឈមមុខនិងបញ្ហាធំៗជាច្រើន ដូចជា ការអត់ការងារធ្វើ, ការកើតជំងឺអេដស៍ និងការឆ្លងជំងឺអេដស៍, ការប្រើប្រាស់សារធាតុញៀន និងថ្នាំញៀន, បញ្ហា សុខភាពបន្តពូជ និងផ្លូវភេទ, ភាពក្រីក្រ, ការខ្វះខាតចំណេះដឹង និងការខ្វះការចូលរួមក្នុងចំណោមយុវជនទាំង នោះ។

គួរបញ្ជាក់ផងដែរថា រាជរដ្ឋាភិបាលកម្ពុជា បានដាក់ចេញនូវគោលនយោបាយថ្នាក់ជាតិ ស្តីអំពីការអភិវឌ្ឍយុវជន កម្ពុជា (NYP) ចាប់តាំងពីថ្ងៃទី៤ ខែមិថុនា ឆ្នាំ២០១១ម្ល៉េះ។ គោលនយោបាយយុវជនថ្នាក់ជាតិដ៏ខ្លាំងមួយ មិន គ្រាន់តែអាចផ្តល់នូវមូលដ្ឋានរឹងមាំសម្រាប់ការអភិវឌ្ឍសក្តានុពលរបស់យុវជនកម្ពុជាប៉ុណ្ណោះទេ ប៉ុន្តែថែមទាំង បម្រើជាផែនទីបង្ហាញផ្លូវមួយដល់រាជរដ្ឋាភិបាល សង្គមស៊ីវិល វិស័យឯកជននិងការអប់រំ ដើម្បីផ្តួចផ្តើមគោល
នយោបាយចូលរួមរបស់យុវជនឲ្យបានដូចៗគ្នា៕

ខេត្តក្រចេះ ៖ បទល្មើស នៃការដឹកជញ្ជូនផល អនុផលព្រៃឈើ មានគ្រប់រូបភាពស្ទើរតែថ្ងៃ ដែលសកម្មភាពចរា ចរណ៍ឈើទាំងនោះ ពីទឹកដីខេត្តមណ្ឌលគីរី ដឹកឆ្លងកាត់ចំណុច ភូមិ ១០៥ ចេញមកតាមច្រកផ្លូវ ស្នាក់ការ សង្កាត់រដ្ឋបាលព្រៃឈើកន្ទួត នេះតែម្តង។

កម្លាំងជំនាញរដ្ឋបាលព្រៃឈើ ដែលកំពុងតែរក្សានូវភាពស្ងៀមស្ងាត់ ត្រូវបានគេរិះគន់ថា មិនទាន់មានសមត្ថភាព គ្រប់គ្រាន់ក្នុងការបង្ក្រាបបទល្មើសនោះទេ  ឬអាចថា មានលាភសក្ការៈពីក្រុមឈ្មួញ ជាថ្នូរនឹងការបើកភ្លើងខៀវ ឲ្យក្រុមឈ្មួញដឹកជញ្ចូនឈើបានយ៉ាងរលូន។

ប្រភពព័ត៌មានពីប្រជាពលរដ្ឋម្នាក់ រស់នៅភូមិ១០៥ ដែលធ្នាប់ជាអ្នកស៊ីឈ្នួលលើកឈើឲ្យក្រុមឈ្មួញ បាន និយាយថា កាលពីពេលថ្មីៗនេះ ឈ្មួញរកស៊ីឈើវ័យក្មេងម្នាក់ ឈ្មោះ ហុង លី រស់នៅភូមិកន្ទួត ស្រុកចិត្របុរី  ខេត្តក្រចេះ ជាអ្នកស្នងតំណែងពីឪពុកខ្លួន ដែលជាមន្រ្តីយោធាម្នាក់ ហើយក៏ជាឈ្មួញដុះស្លែធ្នាប់ បានរកស៊ី ជាយូរឆ្នាំណាស់មកហើយដែរ ឥឡូវនេះត្រូវបានប្រគល់ឲ្យកូនជាអ្នកបន្តវេន និងចេញមុខនៅក្នុងការ ប្រកបមុខ របរកស៊ីដឹកជញ្ជូនឈើយ៉ាងកាក់កប។

គួររំលឹកថា ឈើដែលពួកឈ្មួញដឹករាល់ថ្ងៃនេះ គឺបានដឹកតាមរទះគោរចេញពីទឹកដីខេត្តមណ្ឌលគីរី ម្តងៗចាប់ ពី១០ ទៅជាង២០រទះឯណោះ  យកទៅដាក់នៅចំណុចត្រពាំងត្រពង ភូមិ១០៥ ឬក៏នៅចំណុចក្រោយផ្ទះប្រជា ពលរដ្ឋនៅភូមិ១០៤ រួចដឹកបន្តទៅតាមរថយន្តកែច្នៃវះគូទ ឆ្លងកាត់តាមច្រកផ្លូវក្បែរសង្កាត់រដ្ឋបាលព្រៃឈើកន្ទួរ តែម្តង ដោយពុំមានសមត្ថកិច្ចជំនាញណាមួយហ៊ានអើពើឡើយ។

ទាក់ទិនទៅនឹងសកម្មភាពល្មើសខាងលើនេះ មជ្ឃមណ្ឌលព័តមានដើមអម្ពិល បានសុំការបំភ្លឺតាមទូរស័ព្ទទៅ លោក សុខ គោរ នាយសង្កាត់រដ្ឋបាលព្រៃឈើកន្ទួតនៅអំឡុងម៉ោង៩ និង៣០នាទីយប់ថ្ងៃទី០១ ខែតុលា ឆ្នាំ ២០១២ ជាច្រើនដង តែពុំមានអ្នកលើកទូរស័ព្ទឡើយ៕

មណ្ឌលគិរីៈ កម្លាំងសមត្ថកិច្ចចម្រុះរួមមានមន្ត្រី មន្ទីរវប្បធម៌ និងវិចិត្រសិល្បៈ មន្ត្រីមន្ទីរឧស្សាហកម្ម រ៉ែ និងថាម ពលខេត្ត កម្លាំងកងរាជអាវុធហត្ថ កម្លាំងនគរបាល ដឹកនាំដោយអភិបាលក្រុងសែនមនោរម្យលោក ប៉េង សម្បត្តិ បានចុះរុះរើ លំនៅឋានសាងសង់ដោយខុសច្បាប់លើដី មជ្ឍមណ្ឌលវប្បធម៌ជនជាតិភាគតិចភ្នំដោះក្រមុំ ចំនួន ១១ខ្នង ស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ នាព្រឹកថ្ងៃទី២ វិច្ឆិកា ២០១២។

លោក ស្រ៊ុន ផល្លីម ប្រធានមន្ទីរវប្បធម៌ និងវិចិត្រសិល្បៈខេត្ត បានប្រាប់មជ្ឈមណ្ឌលព័ត៌មានដើមអំពិលថា ទំហំ ផ្ទៃដីសរុបរបស់មជ្ឃមណ្ឌលវប្បធម៌ជនជាតិភាគតិចភ្នំដោះក្រមុំ មានចំនួន ១០១ហិកតា ៧៣អា ត្រូវបានកាត់ ទៅឲ្យខាងទឹកស្អាត ដែលជាតម្រូវការក្រុងសែនមនោរម្យចំនួន ២ហិចតា នឹងខាងស្ថាននីយទូរស្សន៍បាយ័នចំនួន ២ហិចតាផងដែរ ហើយរហូតមកដល់ពេលនេះ មិនទាន់ដឹងពីទំហំផ្ទៃដី ដែលនៅសល់ពិតប្រាកដថាប៉ុន្មាននោះ ទេ។

លោកបានបន្តថា នៅពេលនេះយើងកំពុងធ្វើការរុះរើផ្ទះណា ដែលគ្មានលិខិតអនុញ្ញាតត្រឹមត្រូវ តែចំពោះផ្ទះ ណា ដែលមានលិខិតកាន់កាប់ដីតាំងពីឆ្នាំ១៩៨០ផ្លាយមក យើងនឹងប្រជុំគណៈកម្មាធិការម្តងទៀត ដើម្បីជជែក គ្នាសម្រេចគួរទុកឲ្យពួកគាត់ ឬត្រូវធ្វើយ៉ាងណា ព្រោះយើងបានមកកាន់កាប់ក្រោយពួកគាត់។

លោក ប៉េង សម្បត្តិ អភិបាលក្រុងសែនមនោរម្យ បានឲ្យដឹងថា មុនពេលចុះមកធ្វើការរុះរើនេះ ខាងអាជ្ញាធរមូល ដ្ឋាន បានចេញសេចក្តីណែនាំឲ្យពួកគាត់រុះរើដោយខ្លួនឯង អស់រយៈពេលជិតមួយខែមកហើយ តែពួកគាត់នៅ

តែមិនព្រម ធ្វើតាមការណែនាំរបស់អាជ្ញាធរឡើយ។ ដូច្នេះហើយនៅព្រឹកថ្ងៃទី២ ខែវិច្ឆិកាឆ្នាំ២០១២ នេះ កម្លាំង អាជ្ញាធរពាក់ព័ន្ធ និងសមត្ថកិច្ចខេត្ត ចុះអនុវត្តន៍សេចក្តីសម្រេចរុះរើតែម្ដងទៅ។

លោក សេន នី ជាម្ចាស់ផ្ទះដែលត្រូវអាជ្ញាធរចុះរុះរើ បានរៀបរាប់ថា គាត់ និងប្រពន្ធឈ្មោះ ញ៉ាន ផល្លា បច្ចុប្បន្ន ស្នាក់នៅភូមិសង្កាត់ខាងលើ បានមកកាន់កាប់លើដីមួយប្លង់ទំហំទទឹង ១០ម៉ែត្រ គុណនឹងបណ្តោយ ៦០ម៉ែត្រ កាលពីដើមឆ្នាំ២០១២។

បុរសដដែលបានបន្តថា ដីមួយប្លង់នេះ គាត់បានទិញពីឈ្មោះ អ៊ាវ សុខឃី នឹងប្រពន្ឋឈ្មោះ ពិន ហ៊ាញ ដែល មានទីលំនៅក្នុងភូមិសង្កាត់ជាមួយគ្នាក្នុងតម្លៃមួយពាន់ដុល្លារ។ បន្ទាប់ពីបានកាន់កាប់ដីមួយរយៈមក គាត់ក៏បាន ប្រមែលប្រមូលលុយកាក់សន្សំបានបន្តិចបន្តួចទិញគ្រឿងផ្ទះមកសាងសង់បានប្រហែលជា ៦០ភាគរយ ក៏ត្រូវ អាជ្ញាធរចុះមករុះរើអស់តែម្តង។

បើតាមការពិនិត្យជាក់ស្តែងគេមិនដឹងថា អ៊ាវ សុខឃី និងប្រពន្ឋឈ្មោះ ពិន ហ៊ាញ បានទទួលសិទ្ធមកពីណានោះ ទេក្នុងការលក់ដីមួយប្លង់ខាងលើទៅឲ្យឈ្មោះ សេន នី និងប្រពន្ឋឈ្មោះ ញ៉ាន ផល្លា នោះ ខណៈ ដែលអាជ្ញា ធរបានបញ្ជាក់ថា ដីទីទាំងនោះ ជាផ្ទៃដីរបស់មជ្ឃមណ្ឌលវប្បធម៌ជនជាតិភាគតិចសោះ។

គួររំលឹកផងដែរថា បច្ចុប្បន្នផ្ទៃដីដ៏ធំធេងរបស់មជ្ឃមណ្ឌលវប្បធម៌ជនជាតិភាគតិចភ្នំដោះក្រមុំ កំពុងរងការបាត់ បង់ដោយសារមានសំណង់តូចធំជាច្រើន បានសាងសង់យ៉ាងអនាធិបតេយ្យព័ទ្ធជុំវិញចង្កេះភ្នំ យកធ្វើជាកម្មសិទ្ធិ ផ្ទាល់ខ្លួន។ ពាក់ព័ន្ធនិងករណីនេះ ត្រូវបានគេសង្ស័យថា សំណង់តូចធំជាច្រើន ដែលខ្លះសាងសង់រួច និងខ្លះ ទៀត កំពុងសាងសង់រំលោភលើផ្ទៃដីរបស់រដ្ឋ ដែលបានចុះបញ្ជីសារពើពន្ធរួចទៅហើយនោះ។ តែបញ្ហាខាងលើ គេមិនដឹងថា អាជ្ញាធរខេត្ត-ក្រុង និងមន្ទីរពាក់ព័ន្ធ បាននឹងកំពុងមានចំណាត់ការយ៉ាងណានោះទេ។

ទោះជាយ៉ាងណាក៏ដោយ ពាក់ព័ន្ធនឹងការចុះអនុវត្តន៍របស់មន្ត្រីចម្រុះខេត្តនៅពេលនេះ ត្រូវបានមតិមហាជន មួយចំនួន ធ្វើការរិះគន់ថា បើពុំមានការត្រូវដងត្រូវផ្លែគ្នាជាមុនទេ សំណង់ទាំងនោះ ពិតជាពុំអាចមានរូបរាងកើត មានឡើងនៅទីតាំងខាងលើបានឡើយ ហើយនៅពេលចែកសំណែនគ្នាមិនស្មើរ បែរជាមកធ្វើបាបប្រជាពលរដ្ឋ អ្នកអត់ដឹងអីទៅវិញ៕

ម៉ូស្គូៈ ប្រទេស រុស្ស៊ី កំពុងត្រូវការជនអន្តោប្រវេស្តន៍ ចូលមកកាន់ប្រទេសរបស់ខ្លួន មូលហេតុដោយសារការខ្វះខាតកម្លាំងកម្មករ។ នេះបើយោងតាមការលើកឡើងរបស់ ភ្នាក់ងារជនអន្តោប្រវេស្តន៍សហព័ន្ធ បានឲ្យដឹងកាលពីថ្ងៃសុក្រ ទី០២ ខែវិច្ឆិកា ឆ្នាំ២០១២កន្លងទៅនេះ។

យោងតាមទីភ្នាក់ងារសារព័ត៌មាន ចិនស៊ិនហួ ចុះថ្ងៃទី៣ ខែវិច្ឆិកា ឆ្នាំ២០១២នេះបានឲ្យដឹងដោយយោងតាមការលើកឡើងរបស់ លោក Konstanin Romodanovaskyថា ការធ្វើវិសោធន៍កម្មច្បាប់ទាក់ទងទៅនឹងជនអន្តោប្រវេស្តន៍ ដែលនឹងចូលជាធរមាននាខែមករា ឆ្នាំ២០១៣ខាងមុខ បានកំណត់ថា តម្រូវឲ្យមានការធ្វើតេស្តន៍សមត្ថភាពភាសា ចំពោះអ្នកទើបមករស់នៅថ្មី ទាមទារការអប់រំកម្រិតទីពីរ ព្រមទាំងមានការរឹតបន្តឹង ដោយការដាក់ទណ្ឌកម្ម ទៅលើការជួញដូរមនុស្ស។

លោកបានបន្តថា ប្រទេសរុស្ស៊ីនឹងមិនមានការលើកលែងទោសសម្រាប់ជនអន្តោប្រវេស្តន៍ខុសច្បាប់នោះ ទេ ដោយប្រជាជនទាំងអស់ត្រូវគោរពច្បាប់ របស់រុស្ស៊ី។ជាមួយគ្នានេះដែរ មនុស្សដែលមករស់នៅក្នុងប្រទេស រុស្ស៊ី មានឱកាសច្រើនក្នុងការទទួលបានការងារស្របច្បាប់។

យោងតាមរបាយការណ៍ចេញពីភ្នាក់ងារជនអន្តោប្រវេស្តន៍ខុសច្បាប់បានបង្ហាញថា បច្ចុប្បន្នមានជនអន្តោប្រវេស្តន៍ខុសច្បាប់ប្រមាណជា៣,៥លាននាក់ដែលរស់នៅក្នុងប្រទេស រុស្ស៊ី ក្នុងចំណោមជនបរទេសប្រមាណជាពី១០ទៅ១២លាននាក់ ដែលរស់នៅក្នុងប្រទេស រុស្ស៊ីបណ្តោះអាសន្ន ឬជាអចិន្ទ្រៃយ។

គួរបញ្ជាក់ថា យោងតាមការធ្វើជំរឿនក្នុងឆ្នាំ២០១០កន្លងទៅនេះ បានបង្ហាញថាប្រទេស រុស្ស៊ីមានប្រជាជនប្រមាណជាំ១៤២,៨លាននាក់ ក្នុងនោះមានតែប្រជាជនប្រមាណ៧០ភាគរយប៉ុណ្ណោះ ដែលស្ថិតក្នុងវ័យជាប្រជាជនសកម្ម (ប្រជាជនដែលអាចមានលទ្ធភាព ស្វែងរកប្រាក់ចំណូលបាន)៕

តេអ៊ីរ៉ង់៖ អគ្គមេបញ្ជាការ នាយទាហាន ប្រទេស អ៊ីរ៉ង់ លោក Mohammad Reza Naqdi បាននិយាយកាលពីថ្ងៃសុក្រ ទី០២ ខែវិច្ឆិកា ឆ្នាំ២០១២កន្លងទៅនេះថា ប្រទេស អ៊ីរ៉ង់ នឹងមិនព្រមចុះចាញ់សហរដ្ឋអាមេរិកនោះទេ។

យោងតាមទីភ្នាក់ងារសារព័ត៌មាន ចិនស៊ិនហួ ចុះថ្ងៃទី០៣ ខែវិច្ឆិកា ឆ្នាំ២០១២នេះបានឲ្យដឹងថា លោកNaqdi  បានលើកឡើងបែបនេះ ទៅកាន់ហ្វូងមនុស្ស កាលពីថ្ងៃសុក្រ ទី០២ ខែវិច្ឆកា ឆ្នាំ២០១២កន្លងទៅនេះ ក្នុងឱកាសនៃបុណ្យរំលឹកខួបប្រចាំឆ្នាំ នៃការចាប់ខ្លួនមន្ត្រីទូតរបស់សហរដ្ឋអាមេរិក ក្នុងទីក្រុងតេអ៊ីរ៉ង់ កាលពី៣៣ឆ្នាំមុន ដោយនិស្សិតរបស់ប្រទេស អ៊ីរ៉ង់។

គួរបញ្ជាក់ថា សហរដ្ឋអាមេរិក បានកាត់ផ្តាច់ទំនាក់ទំនង កាទូតជាមួយប្រទេស អ៊ីរ៉ង់ ចាប់តាំងពីឆ្នាំ១៩៨០ បន្ទាប់ពីក្រុមនិស្សិតអ៊ីរ៉ង់ បានចាប់ខ្លួនមន្ត្រីទូតរបស់សហរដ្ឋអាមេរិក ៦០រូបក្នុងឆ្នាំ១៩៧៩។ ដោយមានវិបត្តិកើតឡើង មន្ត្រី៥២រូប ក្នុងចំណោមមន្ត្រីទូតទាំងអស់ត្រូវបានគេឃុំឃាំងអស់រយៈពេល៤៤៤ថ្ងៃ។

លោក Naqdi បានលើកឡើងថា ដើម្បីបន្តទំនាក់ទំនងជាមួយសហរដ្ឋអាមេរិក ប្រទេសមហាអំណាចមួយនេះ ចាំបាច់ត្រូវតែ ទទួលយកលក្ខខ័ណ្ឌ របស់ប្រទេស អ៊ីរ៉ង់ ព្រមទាំងពិចារណាសារជាថ្មីទៅលើគោលនយោបាយរបស់ខ្លួនចំពោះបណ្តាប្រទេសដទៃទៀតលើពិភពលោក ព្រមទាំងបញ្ចប់ ការតាំងមូលដ្ឋានទ័ពក្នុងប្រទេសទាំង៥០លើពិភពលោក។

មេបញ្ជាការរូបនេះបានបន្តថា ប្រទេស អ៊ីរ៉ង់ នឹងមិនចុះចាញ់ការដាក់សម្ពាធរបស់សហរដ្ឋអាមេរិក រួមជាមួយគោលនយោបាយអាក្រក់របស់សហរដ្ឋអាមេរិកប្រឆាំងប្រទេសនោះទេ។ ថ្មីៗនេះ បណ្តាអ្នកនិរទេ្ទសនានា និងអ្នកនយោបាយអ៊ីរ៉ង់ មានបំណងចង់ភ្ជាប់ទំនាក់ទំនងសារជាថ្មី ជាមួយសហរដ្ឋអាមេរិក គោលដៅដើម្បីសម្រាលនូវការដាក់សម្ពាធសេដ្ឋកិច្ច ដែលបានបង្កការប៉ះពាល់យ៉ាងខ្លាំង ដោយសារបញ្ហាវិវាទ រឿងកម្មវិធី អាវុធនុយក្លេអែររបស់អ៊ីរ៉ង់។

គួររំលឹកផងដែរថា កាលពីថ្ងៃទី០២ ខែតុលា ឆ្នាំ២០១២កន្លងទៅនេះ ប្រធានាធិបតីអ៊ីរ៉ង់ លោក Mahmoud Ahmadineijadបានថ្លែងដោយផ្ទាល់ទៅកាន់ សហរដ្ឋអាមេរិកថា ទំនាក់ទំនងទ្វេភាគីរវាងប្រទេស ទាំងពីរ អាចឈានទៅមុខបាន តែលុះត្រាតែសហរដ្ឋអាមេរិកយល់ព្រម ទទួលតាមលក្ខខ័ណ្ឌរបស់ប្រទេស អ៊ីរ៉ង់៕

សូរិន្ទ៖ នៅព្រឹកថ្ងៃទី៣ ខែវិច្ឆិកា ឆ្នាំ២០១២ នេះ លោក ខៀវ កាញារីទ្ធ និងលោកស្រី ព្រមទាំង អង្គកឋិនទាន ទាំងមូល ដែលមានអ្នកចូលរួម ដង្ហែ ជិត១០០០នាក់ បាននិងកំពុងធ្វើដំណើរ ទៅកាន់វត្ត ព្រះពុទ្ធបាទភ្នំ ដែលមានចំងាយ ប្រមាណ ៥០គីឡូម៉ែត្រ ពីទីរួមខេត្តសូរិន្ទ ក្រោយពេលដែល អង្គកឋិនទាំងមូល បានធ្វើដំណើរមកដល់ ទីរួមខេត្តសូរិន្ទ កាលពីល្ងាចថ្ងៃទី២ ខែវិច្ឆិកា ។

បន្ទាប់ពីបានធ្វើដំណើរ មកដល់ ទីរួមខេត្តសូរិន្ទ រួមមកអ្នកចូលរួម ត្រូវបាន អាជ្ញាធរខេត្ត សូរិន្ទ និងក្រុមព័ត៌មាន ថ្នាក់ខេត្តរបស់ពួកគេ បានចេញមកទទួល រាក់ទាក់ និងទទួលអាហារ ពេលល្ងាច នៅសាលាក្រុងសូរិន្ទតែម្តង។ រួចមក ពុទ្ធបរិស័ទ ដែលបានដង្ហែមកជាមួយ តម្រូវឲ្យ ស្នាក់នៅ តាមសណ្ឋាគារ ផ្សេងៗ ដែលមានសណ្ឋាគារជិត១០ ។

សូមបញ្ជាក់ផងដែរថា ការស្នាក់នៅតាម សណ្ឋាគារ ហាក់មានការ លំបាកបន្តិច ពីព្រោះតែគ្រប់សណ្ឋាគារ ទៅទីរួម ខេត្តសូរិន្ទ ត្រូវបានកក់ ពេញអស់ហើយ ដោយសារតែ មានកិច្ចប្រជុំ គ្រូបង្រៀននៅទូទាំងប្រទេសថៃ ដែលតម្រូវធ្វើឡើង នៅខេត្តសូរិន្ទតែម្តង។

 សូមបញ្ជាក់ថា ដើម្បីបង្ហាញពីកិច្ច សហប្រតិបត្តិការរវាងប្រទេស ដែលកាន់នូវ ព្រះពុទ្ធសាសនាដូចគ្នា និង បង្ហាញ ពីចំណង សាមគ្គីភាពរវាងព្រះសង្ឃ និងប្រជាពុទ្ធបរិស័ទ ដែលគង់ក្នុងវត្តបង្កើតឡើង ដោយ ព្រះសង្ឃខ្មែរនោះ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន និងលោកស្រី បានផ្តួចផ្តើមធ្វើ និង ដង្ហែអង្គកឋិនទាន ទៅកាន់វត្តព្រះពុទ្ធបាទភ្នំដី ដែលស្ថិតនៅភូមិឡៅអយ ឃុំឡៅអយ ស្រុកថាទូម ខេត្តសុរិន្ទ នៃប្រទេសថៃ។