សៀមរាប ៖ អគារសង្គ្រោះបន្ទាន់ ១ខ្នង មានពីរជាន់ នៅឯមន្ទីរពេទ្យបង្អែក ស្រុកសូទ្រនិគម ខេត្តសៀមរាប បានសម្ពោធដាក់ឲ្យប្រើប្រាស់ជាផ្លូវការ នៅថ្ងៃទី២៦ ខែមិនា ឆ្នាំ២០១៥ ដែលបានចំណាយថវិកាប្រើប្រាស់អស់ចំនួន ៩ម៉ឺន ៨ពាន់ ៣៥០ ដុល្លារសហរដ្ឋអាមេរិក ដើម្បីជាប្រយោជន៍សម្រាប់បងប្អូនប្រជាពលរដ្ឋ ដែលស្ថិតនៅក្នុងភូមិសាស្ត្រនោះ ។
ពិធីសម្ភោធនេះ គឺស្ថិតក្នុងអធិបតីភាពរបស់លោក ជូ យិនស៊ីម រដ្ឋលេខាធិការក្រសួងសុខាភិបាល លោកឧកញ៉ា សៀង ណាំ អ្នកតំណាងរាស្ដ្រមណ្ឌលសៀមរាប និងមានការអញ្ជើញចូលរួមពី លោកព្រឹទ្ធាចារ្យ សាលាអង់រីកូ ម្ចាស់អំណោយ លោក គឹម ឆៃហៀង អភិបាលរងខេត្តសៀមរាប និងព្រះសង្ឃ អាជ្ញាធរមូលដ្ឋាន មន្ត្រីរាជការ លោកគ្រូ អ្នកគ្រូ សិស្សានុសិស្ស និងបងប្អូនប្រជាពលរដ្ឋ ផងដែរ ។
បន្ទាប់ពីមតិស្វាគមន៍របស់លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប រួចមក លោកព្រឹទ្ធាចារ្យ សាលា អង់រីកូ បានមានប្រសាសន៏ឲ្យដឹងថា ដោយការស្រឡាញ់ និងជាប់ចិត្ដជាមួយនិងប្រជាជនខេត្ដសៀមរាប លោកនិងជនរួមជាតិស្វីស បានជួយកសាងមណ្ឌលសុខភាពជាច្រើន កន្លែងជូនដល់ប្រជាពលរដ្ឋក្នុងខេត្តសៀមរាប ដែលបានចំណាយមូនិធិ អស់ចំនួន ជាង ២លាន ៦សែន ដុល្លារសហរដ្ឋអាមេរិក រួមទាំងគម្រោង សម្រាប់ឆ្នាំ ២០១៥ នេះទៀត គឺស្មើនឹង ជាង ២លាន ៨ សែន ១ម៉ឺន ១ពាន់ ៦២ដុល្លារអាមេរិក ។
លោកបានគូសបញ្ជាក់ ថា ចាប់ពីឆ្នាំ១៩៩៩ មកទល់នឹងឆ្នាំ២០១៤ គឺមានសប្បុរសជនស្វីសជាច្រើននាក់ បានគាំទ្រគម្រោងរបស់លោក ហើយគម្រោងនោះ បាននាំយកមកផ្តល់ជូនប្រជាជនខេត្តសៀមរាប រួមមានអណ្តូងទឹក សាលារៀន អាគារសិក្សា បណ្ណាល័យ មត្តេយ្យសាលា មណ្ឌលសុខភាព អាគារពេទ្យ អាគារសម្ភព អាគារផ្តល់ឈាម ហើយនៅមានអំណោយសប្បុរសធម៌ជាច្រើនទៀត ដូចជាស្បៀងអាហារ សម្លៀកបំពាក់ សម្ភារៈប្រើប្រាស់ និងការសាងសង់លំនៅដ្ឋានជូនជនក្រីក្រ ផងដែរ ។
ថ្លែងនៅក្នុងឱកាសនោះ លោក ជូ យិនស៊ីម និង លោកឧកញ៉ា សៀង ណាំ អ្នកតំណាងរាស្ដ្រមណ្ឌលសៀមរាប បានឲ្យដឹងថា អគារសង្គ្រោះបន្ទាន់១ខ្នង ស្មើរនឹង ២ជាន់នេះ ជាសមិទ្ធិផលថ្មីមួយទៀត ដែលលោកព្រឹទ្ធាចារ្យ សាលាអង់រីកូ បានជួយកសាងឲ្យស្រុកសូត្រនិគម សម្រាប់ ក្នុងការជួយសង្គ្រោះដល់ប្រជាពលរដ្ឋ ក្នុងមូលដ្ឋាននេះ ។ ហើយអគារនេះ គឺជា សមិទ្ធិផលដ៏មានតំលៃបំផុត និងបានរួមចំណែកយ៉ាងធំធេង ជាមួយរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាប្រមុខក្នុងការលើកស្ទួយវិស័យសុខាភិបាលនៅកម្ពុជា ឲ្យមានការរីកចម្រើនសម្រាប់បម្រើសេវាសាធារណៈ ផ្នែកសុខាភិបាលជូនប្រជាជន ។
ក្នុងឱកាសនោះដែរ លោកទាំងពីរ ក៏បានថ្លែងអំណរគុណ ដល់លោកព្រឹទ្ធាចារ្យ សាលាអង់រីកូ និងសប្បុរសជន នៃប្រជាជនស្វីស ដែលបានជួយកសាងសមិទ្ធផលនានាក្នុង ខេត្ដសៀមរាបនេះ។ លោកបានចាត់ទុកថា សកម្មភាពនេះបានសបញ្ជាក់ពី ការយកចិត្ដទុកដាក់យ៉ាងធំធេងរបស់លោកព្រឹទ្ធាចារ្យ សាលាអង់រីកូ ក្នុងការលើកស្ទួយវិស័យសុខាភិបាលនៅកម្ពុជា ។ ហើយលោក ក៏បានស្នើឲ្យលោកព្រឹទ្ធាចារ្យ សាលាអង់រីកូ បន្ដជួយកសាងសមិទ្ធិផលនានាបន្ថែមទៀត ដល់ខេត្តសៀមរាប ។
លោក ក៏បានគូសបញ្ជាក់ថា ថ្ងៃនេះយើងមានមោទនភាព និងក្តីសង្ឃឹម ចំពោះ សមិទ្ធផលថ្មី ដែលជាចំណងដៃដ៏មានតម្លៃ និងមានអត្ថន័យជ្រាលជ្រៅបំផុតសម្រាប់មន្រ្តីសុខាភិបាល គ្រប់ថ្នាក់ និង ប្រជាជនខេត្តសៀមរាប ដែលមិនត្រឹមតែមាន តម្លៃលើការសាងសង់អាគារ ការបំពាក់សម្ភារៈបរិក្ខាប្រកបដោយបច្ចេកវិទ្យាទំនើបៗ ប៉ុណ្ណោះទេ តែតាមរយៈ នៃសមិទ្ធផលទាំងនេះ គឺពិតជាមានតម្លៃមនសិកាស្រឡាញ់មនុស្សជាតិ និង ចំណងទាក់ទងនៃកិច្ចសហប្រតិបត្តិការ ជាមិត្តភាព អន្តរជាតិ រវាង ប្រទេសទាំងពីរ ដែលមិនអាចកាត់ ថ្លៃបាននោះឡើយ ។ ក្នុងឱកាសនោះដែរ លោក ក៏បានអំពាវនាវ ឲ្យប្រជាពលរដ្ឋទាំងអស់ ត្រូវរក្សាសុខភាពឲ្យបានល្អ ការពារឲ្យបាននូវជំងឺឆ្លងផ្សេងៗ ៕