កណ្តាលៈ គណបក្សប្រជាជនកម្ពុជាស្រុកកោះធំ នៅព្រឹកថ្ងៃទី២៧ និងថ្ងៃទី២៩ ខែវិច្ឆិកា បានធ្វើពិធី បញ្ចូលសមាជិកថ្មី ដែលសុទ្ធតែជាយុវជនចំនួន ១.៤៦២នាក់។

ពិធីប្រកាសទទួលស្គាល់ និងបញ្ចូលសមាជិកគណបក្ស ប្រជាជនកម្ពុជានៅក្នុងស្រុកកោះធំ បានធ្វើឡើង ដោយមានការអញ្ជើញចូលរួមពីលោកទេសរដ្ឋមន្រ្តី ស៊ុន ចាន់ថុល ប្រធានគណៈពង្រឹងមូលដ្ឋានស្រុក កោះធំ លោក ជឹម សុខខុន លោក ឈាង រ៉ា លោក ចាន់ សុខុម និង លោក លុយ ធៀម ព្រមទាំងសមា ជិកសមាជិកាគណៈពង្រឹងការងារក្នុងស្រុកកោះធំជាច្រើនរូបទៀត។

ក្រុមយុវជន ដែលបញ្ចូលក្នុងសមាជិកគណបក្សប្រជាជនថ្មីនេះ មកពីឃុំឈើខ្មៅ ១៦២នាក់ ស្រី ៥៧ នាក់, ឃុំកោះធំខ ២០៩នាក់ ស្រី ៨៣នាក់, ឃុំព្រែកស្តី ៣៧៥នាក់ ស្រី ១៦៥នាក់ ឃុំសំពៅពូន ៧១៦ នាក់ ស្រី ៣៥៦នាក់។

នៅក្នុងឱកាសបញ្ចូលសមាជិកថ្មីនោះ លោកទេសរដ្ឋមន្រ្តី ស៊ុន ចាន់ថុល បានមានប្រសាសន៍ថា យុវជន គឺជាទំពាំងស្នងឬស្សី ហើយលោកក៏បានអំពាវនាវដល់ក្រុមយុវជនទាំងអស់គាំទ្រ និងបោះឆ្នោតជូនគណ បក្សប្រជាជនកម្ពុជា ដើម្បីទទួលបានការអភិវឌ្ឍប្រទេសជាតិ។

ជាមួយគ្នានេះ លោកប្រធានគណៈពង្រឹងមូលដ្ឋានស្រុកកោះធំ ក៏បានលើកឡើងផងដែរថា ក្រោមចក្ខុ វិស័យដ៏មុតស្រួច ដើម្បីបង្កើនសេដ្ឋកិច្ចជាតិ ក៏ដូចជាជួយអភិវឌ្ឍន៍កម្រិតជីវភាពរបស់ប្រជាពលរដ្ឋនោះ  រាជរដ្ឋាភិបាលកម្ពុជា ដែលមានសម្តេចតេជោ ជាប្រមុខ បានដាក់ចេញនូវគោលនយោបាយ ជំរុញការនាំ អង្ករចេញឱ្យបាន ១ លានតោននៅឆ្នាំ២០១៥។ ជាពិសេសក្រោមការដឹកនាំរបស់រាជរដ្ឋាភិបាលកម្ពុជា នាពេលថ្មីៗនេះ បានសម្រេចនូវកិច្ចការ ដែលជាកិត្តិយសដ៏ធំធេងជូនជាតិ ក៏ដូចជាប្រជាពលរដ្ឋកម្ពុជា ទាំងអស់ គឺការបញ្ចប់នូវកិច្ចប្រជុំកំពូលអាស៊ានលើកទី២១ ប្រកបដោយជោគជ័យ ក្នុងនាមកម្ពុជាជា ម្ចាស់ផ្ទះ។

លោក ស៊ុន ចាន់ថុល ក៏បានឡើងលើកពីសមិទ្ធផលនានា ដែលសម្រេចបាននៅក្នុងស្រុកកោះធំ រួម មាន៖ ស្ពានលើកដែក ដែលបានសាងសង់រួចជាស្ថាពរ  ផ្លូវលេខ ១១០ ដែលកំពុងសាងសង់។ មិនតែ ប៉ុណ្ណោះ ស្ពានកោះធំ  និងផ្លូវជាតិលេខ ២១ នឹងបើកការដ្ឋានសាងសង់នាពេលឆាប់ៗខាងមុខនេះ៕

ភ្នំពេញៈគ្រូបង្វឹករបស់ក្លឹបប្រដាល់ តាមបណ្តាខេត្តមួយចំនួន បានត្អូញត្អែរនូវ ទុក្ខលំបាករបស់ខ្លួនចំពោះ ការដែរ ស្ថានីយ៍ទូរទស្សន៍ ដែលរៀបប្រកួតកីឡាប្រដាល់ ប្រចាំសប្តាហ៍ មិនបានផ្តល់លទ្ធភាព ឲ្យកីឡាករប្រដាល់ក្នុង ក្លឹបរបស់ខ្លួន អាចចូលរួមប្រកួតបាន ពោលគឺ ពួកគាត់បានព្យាយាមស្នើសុំ ប្រកួតជាច្រើនលើកច្រើនសារ យ៉ាងណាក៏ដោយ ក៏លទ្ធភាពបានចូលរួមតិចតួចបំផុត សឹងថាមិនអាចទទួលបាន។

គ្រូបង្វឹកក្លឹបប្រដាល់ទាំងនោះ បានសម្តែងនូវក្តីព្រួយបារម្ភថា ប្រសិនបើនៅតែមាន ការរើសអើង ប្រកាន់បក្សពួកដូច្នេះ ទៀតក្លឹបរបស់ពួកគាត់ នឹងត្រូវបិទទ្វារ ព្រោះគ្មានសិស្ស បន្តទៀតទេ។

ជាក់ស្តែង លោក ផុន ដាំផា ជាគ្រូបង្វឹករបស់ក្លឹប កងកេងខេត្តបាត់ដំបង បានត្អួញត្អែរទុក្ខលំបាក របស់ខ្លួនប្រាប់ LookingTODAY នៅថ្ងៃព្រហស្បតិ៍ ទី២៩ ខែវិច្ឆិកា ឆ្នាំ២០១២ ថា សព្វថ្ងៃនេះ ក្លឹបនៅតាមខេត្តពិបាកខ្លាំងណាស់ ក្នុងការចូលរួមប្រកួត នៅភ្នំពេញ ជាពិសេសគឺរាល់ការស្នើសុំ ឲ្យអ្នករៀបចំផ្គូរផ្គង់ កីឡាករឲ្យប្រកួតនៅតាម សង្វៀនប្រដាល់មួយចំនួន ដើម្បីដាក់ឲ្យកូនសិស្ស របស់គាត់បានចូលរួមប្រកួត ។

លោកបន្ថែមទៀតថា អ្នកផ្គូផ្គងដែលយ៉ាបជាងគេនោះ គឺលោក អែម ចាន់សុផល ពីព្រោះរាល់ពេលលោកស្នើសុំម្ដងៗ គឺលំបាកណាស់ទម្រាំ តែបានដាក់ឲ្យប្រកួតមួយគូៗ ត្រូវចំណាយពេលរាប់ខែឯណោះ។ ដូចនេះលោកចង់ឲ្យអ្នករៀបចំ ផ្គូផ្គងការប្រកួត តាមសង្វៀនទាំងអស់ ជាពិសេសលោក អែម ចាន់សុផល ត្រូវចេះយោគយល់កីឡាករ ដែលគ្នាមកពីតាម បណ្ដាលខេត្តផង ពីព្រោះការបង្កើតក្លឹបមួយៗ មិនមែនងាយស្រួលនោះទេ ហើយកីឡាករទាំងអស់ក៏មិនងាយ នឹងបានបញ្ចេញសមត្ថភាព របស់គេនោះដែរ បើមើលឃើញ តែគ្នាឯងបែបនេះ ។

លោកបន្ដទៀត«អាបញ្ហាបែបនេះ វាមិនមែនមានតែនៅលើក្លឹប របស់ខ្ញុំនោះទេ គឺវាមានច្រើនណាស់នៅក្លឹប ដែលមាននៅ តាមបណ្ដាលខេត្តនានា ប៉ុន្ដែគ្រូតាមក្លឹបទាំងនោះ មិនហ៊ាននិយាយ ចំណែកខ្ញុំវិញ គិតថា បើខ្ញុំមិននិយាយទៀត វានឹងធ្វើក្បាច់គុនបុរាណខ្មែរ យើងរលាយនៅថ្ងៃណាមួយ ជាមិនខាន ពីព្រោះកីឡាករដែលមាន សមត្ថភាពពិតបែរជា នៅស្ងៀមគ្មានប្រយោជន៍ទៅវិញ ។ ទាំងនេះជាកត្តាដែលធ្វើឲ្យ ពួកគេលាឈប់ពីវិស័យកីឡា »។

គ្រូបង្វឹកខាងលើបន្តថា លើកឡើងរបស់ខ្លួនទាំង ប្រថុយប្រថានបែបនេះ គឺពិតជាប៉ះពាល់ដល់ ផលប្រយោជន៍របស់បុគ្គលមួយចំនួន ជាក់ជាមិនខាន និងធ្វើឲ្យគេមិនសប្បាយចិត្ត ជាមួយរូបលោក ថាមិនត្រូវអាចនឹងផ្តាច់ ដង្ហើមក្លឹបរបស់លោកគ្រូ តែម្តងក៏ថាបាន។ ប៉ុន្តែការធ្វើបែបនេះ មិនមែនលោកគ្រូចង់ឲ្យតែ កូនសិស្សរបស់លោក បានចូលរួមប្រកួតតែឯងទេ។ លោកចង់ឲ្យកីឡាករ នៅតាមក្លឹបផ្សេងៗទៀត បានចូលរួមទាំងអស់គ្នា ដើម្បីលើកស្ទួយវិស័យ កីឡានៅកម្ពុជា ។

លោកគ្រូ ផុន ដាំផា សំណូមពរដល់សហព័ន្ធកីឡា ប្រដាល់កម្ពុជា និងជាពិសេសដល់បណ្តា អ្នកគ្រប់គ្រង រៀបចំការប្រកួតនៅ តាមស្ថានីយ៍ទូរទស្សន៍ មេត្តាជួយពិនិត្យ និងសម្រួលដល់បណ្តា ក្លឹបប្រដាល់តាមខេត្តផង ឲ្យពួកគេទទួលបានសិទ្ធិស្មើគ្នា រវាងក្លឹបនៅទីក្រុង និងជនបទ។

ពាក់ព័ន្ធនឹងការលើកឡើងរបស់គ្រូ ប្រដាល់ក្លឹបកងកេង ខេត្តបាត់ដំបងរូបនេះ មជ្ឈមណ្ឌលព័ត៌មានដើមអម្ពិល (គេហទំព័រដើមអម្ពិល, កាសែតដើមអម្ពិល, វិទ្យុដើមអម្ពិល, គេហទំព័រ LookingTODAY) បានទាក់ទងសុំការ អត្ថាធិប្បាយពីលោក តែ ម៉ឺន ប្រធានសហព័ន្ធកីឡាប្រដាល់ តែទូរស័ព្ទលោក មិនអាចទាក់ទងបាន ។

ចំណែក លោក ម៉ិល កាដូ អគ្គលេខាធិការសហព័ន្ធ កីឡាប្រដាល់កម្ពុជា បានបដិសេធមិនធ្វើ អត្ថាធិប្បាយ ដោយលោកលើកឡើងថា «ខ្ញុំអត់ជឿថា ប្អូនជាអ្នកសារព័ត៌មានទេ ទល់តែជួយផ្ទាល់ ទើបផ្តល់បទសម្ភាសន៍បាន»៕

ប៉េកាំងៈ កូរ៉េខាងត្បូងបានបញ្ចប់ ការសាកល្បងលើកក្រោយបង្អស់ នៃកាបាញ់កាំជ្រួចរ៉ុក្កែត Naro-1ទៅក្នុងលំហអាកាស។ គម្រោងបាញ់បង្ហោះនេះ ត្រូវបានបញ្ចប់ដោយ មជ្ឈមណ្ឌលអាវកាស ដោយបានបាញ់ទៅកាន់ឈូងសមុទ្រ ភាគខាងត្បូងនៃប្រទេសកូរ៉េ កាលពីថ្ងៃព្រហស្បតិ៍។

ទីភ្នាក់ងារព័ត៌មានចិនស៊ិនហួ រាយការណ៍ថា វិទ្យាស្ថានស្រាវជ្រាវអវកាសកូរ៉េខាងត្បូង បាននិយាយថា ការបញ្ចប់ការសាកល្បងនេះ ត្រូវបានចាប់ ផ្តើមជាពីរដំណាក់កាលផ្សេងៗគ្នា។ ការចាប់ផ្តើមនៃការបាញ់កាំជ្រួចរ៉ុក្កែត Naro-1លើកទី១ មានរយៈពេលប្រហែល៧ម៉ោង និងការបាញ់កាំជ្រួចរ៉ុក្កែត Naro-1លើកទីពីរ មានរយៈពេលប្រហែល៤ម៉ោង។

ការបាញ់លាតផ្កាយរណបតូចមួយ ទៅលើលំហអាកាសជាមធ្យោបាយដើម្បីប្រមូលទិន្ន័យជាច្រើន អំពីការភាយចំហាយវិទ្យុសកម្ម ទៅក្នុងលំហអាកាស។

ការចាប់ផ្តើមសាកល្បង បាញ់កាំជ្រួចរ៉ុក្កែត ត្រូវចាប់ផ្តើមនៅថ្ងៃទី២៦ ខែតុលា តែត្រូវបានយឺតយ៉ាវ ដោយសារមានការខ្វះខាត ខាងបច្ចេកទេស ក្នុងការបាញ់បង្ហោះកាំជ្រូចរ៉ុកែត នៅជំហានដំបូងនោះ។ នៅថ្ងៃព្រហស្បតិ៍ជាការចាប់ផ្តើម ប៉ុនប៉ងបាញ់កាំជ្រួចរ៉ុក្កែតលើកទី៣ ដែលធ្វើនៅលំហ អាកាសលើទឹកដីរបស់កូរ៉េខាងត្បូង។

ការប៉ុនប៉ងបាញ់កាំជ្រួចរ៉ុក្កែត ជំហ៊ានទីមួយនៅឆ្នាំ២០០៩ និងជំហ៊ានទីពីរ នៅឆ្នាំ២០១០ ប៉ុន្តែត្រូវបានបញ្ចប់ដោយភាពបរាជ័យ។ ពេលវេលា ជាក់លាក់ក្នុងការបាញ់បង្ហោះ កាំជ្រួចរ៉ុក្កែតនោះ បន្ទាប់ពីបាន បញ្ចប់ការតាមដានត្រួតពិនិត្យ អាកាសធាតុនៅជុំវិញភពព្រះចន្ទ នៅថ្ងៃព្រហស្បតិ៍៕

ភ្នំពេញៈ តារាចម្រៀង វ័យក្មេងរូបស្រស់ផូរផង់ ដែលបានបាត់មុខ ពីពិភពសិល្បៈ អស់មួយរយៈពេលធំ មកហើយនោះ កាលពីពេលថ្មីៗ កន្លងទៅនេះ តារាស្រី កញ្ញា ពេជ្រ ខេនឌី បានចេញមុខប្រកាស ជាសាធារណៈថា នាងនឹងចូលប្រឡូក ក្នុងវិស័យសិល្បៈ សារជាថ្មី ម្តងទៀត ។ ពេជ្រ ខេនឌី នឹងចូលរួមជាភ្ញៀវកិត្តិយស នៅក្នុង កម្មវិធី "តារាក្នុងដួងចិត្តខ្ញុំ" នៃស្ថានីយវិទ្យុ ដើមអម្ពិល អេហ្វអឹម 93. 75 មេហ្គាហឺត នៅថ្ងៃសុក្រ ទី៣០ ខែវិច្ឆិកា ឆ្នាំ២០១២ នេះ។

ក្នុងកម្មវិធី "តារាក្នុងដួងចិត្តខ្ញុំ" មានផ្សាយជូន រៀងរាល់ថ្ងៃសុក្រ វេលាម៉ោង ២និង១០នាទី រហូតដល់ ម៉ោង៣រសៀល នៅក្នុងកម្មវិធីរៀងរាល់សប្តាហ៍ មានការអញ្ជើញ ចូលរួម ពីសិល្បករ និងសិល្បការិនី ដែលមានឈ្មោះ បោះសំឡេង នៅក្នុងប្រទេសកម្ពុជា ចូលរួមជា ភ្ញៀវកិត្តិយសផងដែរ។

នៅក្នុងសប្តាហ៍នេះ នឹងមានវត្តមានតារាសម្តែង និងជាពិធីការិនី ដែលធ្លាប់មាន ឈ្មោះបោះសំឡេងគួរសម មួយរូបគឺ កញ្ញា ពេជ្រ ខេនឌី នឹងចូលមកបកស្រាយ ដំណើរ ដើមទង នៃការចូល ប្រឡូកក្នុង វិស័យសិល្បៈ ក៏ដូចជាមូលហេតុ នៃការផ្អាកពី ការងារសិល្បៈអស់ មួយរយៈពេលធំមកនេះ ។ មិនត្រឹមតែប៉ុណ្ណោះ នាងនឹង ចូលរួម ចែករំលែក បទពិសោធន៍ និង ភាពជោគជ័យផ្ទាល់ ដែលនាងធ្លាប់បាន ហែលឆ្លងកន្លងមក ដល់ប្រិយមិត្ត អ្នកស្តាប់ថែមទៀតផង។

ជុំវិញចម្ងល់ទាំងនេះ នឹងបង្ហាញឲ្យប្រិយមិត្តដឹង នៅក្នុងកម្មវិធី "តារាក្នុងដួងចិត្តខ្ញុំ" ហើយប្រិយមិត្ត ក៏អាចទូរស័ព្ទសាកសួរ ក៏ដូចជាជជែកកម្សាន្ត ជាមួយតារា កិត្តិយស បាន ដោយគ្រាន់តែទាក់ទង តាមប្រព័ន្ធទូរស័ព្ទ ចំនួន៤ខ្សែ គឺលេខ 088 863 633 8, 092 942 955 ,015 595 435, 010 673 385 ។

សូមជម្រាបផងដែរថា ចាប់តាំងពីតារាចម្រៀង និងតារាសម្តែង កញ្ញា ពេជ្រ ខេនឌី ឈានជើងប្រឡូក ក្នុងសិល្បៈមក ដល់ពេលនេះ គឺមានរយៈជិតបីឆ្នាំ មកហើយ ។ នាងក៏ត្រូវបាន ទស្សនិកជនស្គាល់ ច្រើនតាមរយៈការសម្តែង និងការច្រៀងនៅតាម កម្មវិធីប្រគំតន្រ្តី នៃកញ្ចក់ទូរទស្សន៍នានា ។ មិនតែប៉ុណ្ណោះនាង ក៏ត្រូវ បាន ទស្សនិកជនដឹងថា ជាពិធីការិនី នៅតាមកម្មវិធីផ្សេងៗ ឬការប្រគំតន្ត្រីនានា ផងដែរ តែបើគិតពីប្រជាប្រិយភាព របស់នាង គឺមិនទាន់ឡើងខ្ពស់ ដូចតារាសម្តែង តារាចម្រៀងស្រករ ក្រោយទេ ព្រោះតែ នាង បានបាត់មុខមួយ រយៈធំពីការងារ សិល្បៈ។

ថ្មីៗនេះតារាស្រីរូបស្រស់ផូរផង់វ័យក្មេងកញ្ញា ខេនឌី បានប្រកាសជា សាធារណៈថា នាងនឹងដាក់ ចិត្តដាក់កាយ ចូលប្រឡូកក្នុងអាជីព សិល្បៈដូចដើមវិញ ។
ដើម្បី ចង់ដឹងថា ការបកស្រាយរបស់ តារាកិត្តិយសយ៉ាងនោះ ប្រិយមិត្តក៏អាច បើកស្តាប់កម្មវិធី "តារាក្នុងដួងចិត្តខ្ញុំ" តាមរយៈគេហទំព័រ http://www.lookingtoday.com/ ដោយគ្រាន់តែចូល ទៅកាន់កម្មវិធី Live Radio ជាការស្រេច ៕

ភ្នំពេញ៖ ត្រឹមតែរយៈពេល ២ខែប៉ុណ្ណោះ ពោលគឺខែតុលា និងវិច្ឆិកា ឆ្នាំ២០១២នេះ មាន កម្មករ-កម្មការនី ជាង២០០នាក់ ដែលបម្រើការងារ នៅក្នុង រោងចក្រកាត់ដេរ បានដួលសន្លប់ ជាបន្តបន្ទាប់ ដោយសារពួកគេធ្វើការ បន្ថែមម៉ោងច្រើន និងមានបញ្ហា សុខភាពជាដើម។

លោក អាត់ ធន់ ប្រធានសហភាពការងារកម្ពុជា មានប្រសាសន៍ប្រាប់ មជ្ឈមណ្ឌលព័ត៌មាន ដើមអម្ពិល នៅថ្ងៃទី២៩ ខែវិច្ឆិកា ឆ្នាំ២០១២ ថា "រយៈពេល២ខែ គឺខែតុលា និងវិច្ឆិកា មានកម្មករ-កម្មការនី ជាង២០០នាក់ បានជួលសន្លប់ជា បន្តបន្ទាប់ ក្នុងរោចក្រកាត់ដេរ ចំនួន៧ នៅប្រទេសកម្ពុជា”។

លោកបន្តថាចំពោះមូលហេតុដែលនាំឲ្យកម្មករ-កម្មការិនីបានដួលសន្លប់ បណ្តាលមកពី បរិយាកាស ក្នុងរោងចក្រមិនល្អ គ្មានខ្យល់ចេញ ចូលគ្រប់គ្រាន់ និងមានបញ្ហា ផ្នែកសុខភាព ការបរិភោគអាហារ មិនបានគ្រប់គ្រាន់ ជាពិសេសអាហារ មិនសូវមានជីវជាតិ ហើយបញ្ហាមួយ ទៀតពួកគេមានប្រាក់ខែ តិចតួច ដែលតម្រូវឲ្យពួកគេ ធ្វើ ការបន្ថែមម៉ោង ដើម្បីទទួលបាន ប្រាក់បន្ថែមពីលើប្រាក់ខែ គោលរបស់ពួកគេ។

លោក អាត់ ធន់ បានបញ្ជាក់ថា តាមតួរលេខដែលលោក ទទួលបានកាលពីឆ្នាំ២០១១ បានឲ្យដឹងថា រោងចក្រចំនួន១២ មានកម្មករ-កម្មការិនី បានដួលសន្លប់ចំនួន ជាង១៩០០នាក់ ហើយនៅក្នុង ឆ្នាំ២០១២ ត្រឹមតែរយៈពេល៩ខែ ដើមឆ្នាំ២០១២ ដែលមាន១៧រោងចក្រ មានកម្មករ-កម្មការិនី បានដួលសន្លប់ ចំនួនជាង ១៥០០នាក់ ។
យ៉ាងណាក៏ដោយ ក្រសួងការងារ និងបណ្តុះបណ្តាលវិជ្ជាជីវៈ ក៏ធ្លាប់បានចុះ អប់រំដល់ កម្មករ កម្មការិនី នៅតាមបណ្តារោងចក្រ សហគ្រាសមួយចំនួន ហើយការចុះ អប់រំនេះ ក្រសួងមាន គម្រោង ចុះទៅតាមបណ្តារោងចក្រ ជាច្រើនផ្សេងទៀត ដែលការចុះអប់រំនេះ មានដូចជា ខេត្តកំពង់ឆ្នាំង ស្វាយរៀង កំពង់ស្ពឺ កណ្តាល និង រាជធានីភ្នំពេញជាដើម ។

ក្នុងការជួយបំពេញ បន្ថែមនូវការខ្វះខាត របស់កម្មករ-កម្មការិនី នៅឆ្នាំ២០១២នេះ គណៈកម្មការ ប្រឹក្សាការងារ បានអនុម័តផ្តល់ប្រាក់ ១០ដុល្លារ ដល់កម្មកររោងចក្រ កាត់ដេរ និងផលិតស្បែកជើង ដែលសរុបទាំងប្រាក់ខែ បានចំនួន ៨៣ដុល្លារ នេះមិនទាន់គិតពី ប្រាក់អត្ថប្រយោជន៍ និងកម្រៃផ្សេងៗ ទៀតឡើយ ៕

ភ្នំពេញ៖ ស្រ្តីម្នាក់រស់នៅក្នុងសង្កាត់ស្ទឹងវែង ខេត្តកោះកុង ត្រូវបានប្តីប្រើអំពើហិង្សា មកលើខ្លួនជារៀងរាល់ថ្ងៃ ជាពិសេសបានវាយចំភ្នែក ស្ទើរតែ ក្លាយជាទៅជាមនុស្សឆ្កួត ដោយសារតែលោកប្តីប្រមឹក។

យោងតាមពាក្យបណ្តឹង របស់ស្រ្តីរងគ្រោះឈ្មោះ នឹង នៀក អាយុ ៣៧ឆ្នាំ និងប្តីមានឈ្មោះ សេង ហុង អាយុ ៤៨ឆ្នាំ បានដាក់ពាក្យប្តឹង មានកាន់ ប្រធានប៉ុស្តិ៍នគរបាលសង្កាត់ស្ទឹងវែង បានឲ្យដឹងថា “បន្ទាប់ពីបានរួមរស់ជាមួយប្តីជិត៥ឆ្នាំនេះ នាងទទួលរងការវាយធ្វើបាបលើរាងកាយ ជា ញឹកញាប់ ដោយប្តីយកកាំបិតកាប់លើដៃឆ្វេងរបស់ខ្លួន ឲ្យរងរបួស ចាប់សង្កត់បោចសក់ ច្របាច់ក បោកផ្ទប់ទៅនឹងជញ្ជាំងក៏មានផងដែរ។

អ្វីដែលធ្វើឲ្យអ្នកស្រីទ្រាំមិនបាននោះ គឺនៅថ្ងៃទី២៤ ខែវិច្ឆិកា ឆ្នាំ២០១២ វេលាម៉ោង៨ព្រឹកក្រោយពី គាត់ដាក់បានក្តាម ហើយយកទៅលក់ បានប្រាក់ ចំនួន៧.០០០រៀល ប្តីប្រើទៅទិញស្រា និងសាច់ជ្រូក បន្ទាប់ពីផឹកស្រាស្រវឹងរួចមក ប្តីបានជេរប្រមាថមាក់ងាយមកលើខ្លួនថា “មីអ្ហែង! ជាស្រីសំផឹង ម៉ែមីអ្ហែង! ក៏ជាស្រីសំផឹងដែរ” ។ នៅពេលដែលប្តីជេរយ៉ាងណាក៏ដោយ ក៏អ្នកស្រីមិនបានទប់ទល់អ្វីទេ គ្រាន់តែនិយាយ ដោយឆ្លើយតបទៅវិញ ថា ”ឯងអើយឯងនិយាយ លែងទទួលទៅ”។

ស្រ្តីជនងរងគ្រោះ បន្តថា៖ មួយសន្ទុះក្រោយមកប្តីក៏និយាយថា បើរស់នៅជាមួយអញ អញវាយអ្ហែងឲ្យងាប់ ហើយយកទៅចោលក្នុងព្រៃបំបាត់ ភស្តុតាង អ្នកណា ឬប៉ូលិសរកក៏មិនឃើញ។ ហើយក៏ស្រាប់តែប្តី បានយកដំបងឫស្សី វាយចំក្បាល ជើងសងខាង បណ្តាលឲ្យខ្ញុំពកក្បាល ហើមជើង រួចហើយគាត់បានចាប់ខ្វេះភ្នែក ធ្វើឲ្យភ្នែកខ្ញុំស្រវាំង និងបានយកមែកស្មាច់ បុកមាត់បន្ថែមទៀត។

នាគ្រានោះដែរ ស្រ្តីរងគ្រោះលើកដៃសំពះនិយាយថា “ឯងអើយ ឯងកុំធ្វើបាបខ្ញុំអី បើឯងធ្វើបាបខ្ញុំ ខ្ញុំមានមុខមាត់ឯណាទៅជួបម្តាយ និងកូននៅស្រុក កំណើត”។ បន្ទាប់មកទៀត គាត់បានយកអង្រែ មកបុកចំប្រដាប់ភេទរបស់ខ្ញុំ ចំនួន២ដង ដោយរងការឈឺចាប់មិនបាន នាងខ្ញុំចាប់ដណ្តើម អង្រែពីដៃគាត់គ្រវែងចោល ប្តីនាងខ្ញុំក៏ឈប់វាយ ហើយប្តីក៏ដេកលក់ ហើយខ្ញុំក៏បានលួចរត់ មកប្តឹងប៉ុស្តិ៍នគរបាលតែម្តង។

បន្ទាប់ពីបានទទួលពាក្យបណ្តឹងហើយ មេប៉ុស្តិ៍ស្ទឹងវែង លោក នុត សាខម បានចុះទៅដល់ផ្ទះជនរងគ្រោះ ដើម្បីឃាត់ខ្លួនប្តី ដែលជាអ្នកប្រព្រឹត្ត ប៉ុន្តែពេលចុះទៅដល់ ប្តីជនរងគ្រោះក៏រត់គេចខ្លួន បាត់ស្រមោលតែម្តង៕

ខេត្តបន្ទាយមានជ័យៈ ពីមួយថ្ងៃទៅមួយថ្ងៃ គេសង្កេតឃើញអាជ្ញាធរក្រុងប៉ោយប៉ែត តែងតែចំណាយថវិកាជាច្រើន ដើម្បីទិញរថយន្តដឹកទឹក ធ្វើការ សម្អាតផ្លូវជាតិទូទាំងក្រុង និងស្តារលូ មិនឲ្យមានការកកស្ទះក៏ដោយ តែតាមផ្លូវជាតិនៅតែបន្តមានដីហុយ និងលូត្រូវបានកកស្ទះដដែល នេះ ក៏ព្រោះតែមានរថយន្តដឹកដី ជាច្រើនមិនគោរពច្បាប់ ដឹកដីគ្មានស្បៃគ្រប ដឹកដីជ្រុះពេញផ្លូវព្រោះគ្មានរបាំងគូថក្រោយ។

ជាក់ស្តែងកាលពីថ្ងៃទី29 ខែវិច្ឆិការ ឆ្នាំ2012ម្សិលមិញនេះ មានរថយន្តដឹកដីមួយគ្រឿង បានដឹកដីចូលទីប្រជុំជនក្រុងប៉ោយប៉ែត នគរបាលសណ្តាប់ ធ្នាប់ក្រុងបានស្ទាក់ចាប់ ដើម្បីធ្វើការណែនាំ និងអប់រំ ខណះដែលកម្លាំងនគរបាល ចុះពង្រឹងរៀបចំសណ្តាប់ធ្នាប់តាមដងផ្លូវ តែត្រូវបានគេអន្តរាគមន៍ ទៅលោកអធិការ ឲ្យដៅលែងជាបន្ទាន់ ព្រោះរថយន្តដឹកដីនោះជារបស់អ្នកធំ។ តើរថយន្តអ្នកធំមិនចាំបាច់គោរពច្បាប់មែនទេ?

ខណៈនគរបាលឃាត់ រថយន្តដឹកដីខាងលើភ្លាមៗនោះ អ្នកបើកបររថយន្តម្នាក់ ក្នុងចំណោមបក្ខពួក04នាក់ បានចេញមុខមកអះអាងថា រថយន្តដឹក ដីនេះជារបស់ក្រុមហ៊ុនអានកូ ហើយអ្នកបើកបររូបនោះ បានទាញទូរសព្ទ័ខលទៅប្រាប់មេកើយរបស់គេ ដើម្បីអន្តរាគមន៍ភ្លាមៗ បន្ទាប់ពីសន្ទនាគ្នា អស់មួយសន្ទុះ អ្នកបើកបររូបនោះ បានហុចទូរសព្ទ័ ឲ្យលោកមកនគរបាលចរាចរណ៍ដោយនិយាយថា មេរបស់គេចង់ជួប អ្នកបើកបររូបនោះ បាន បញ្ជាក់ថា ចៅហ្វាយរ៉ូ នៅកាស៊ីណូហ្គោលដិន ភ្លាមៗនោះ ត្រូវបានខាងនគរបាលចរាចរណ៍ប្រាប់ថា ខ្ញុំមិនហ៊ានសម្រេចទេ សូមលោក ខលទៅ លោកអធិការទៅ ព្រោះពួកខ្ញុំគ្មានសិទ្ធិសម្រេចទេ 05នាទី ក្រោយរថយន្តដឹកដីជ្រុះពេញផ្លូវ ត្រូវបានដោះលេង ក្រោមការអន្តរាគមន៍ដោយ ឈ្មោះ ចៅហ្វាយរ៉ូ។

ជុំវិញការឃាត់រថយន្តខាងលើ ត្រូវបានប្រជាពលរដ្ឋ បញ្ជាក់ប្រាប់ថារថយន្តដឹកដីមិនគោរបច្បាប់នេះ មិនមែនជាលើកទីមួយទេដែលល្មើស បែប នេះនោះ គឺរថយន្តនេះគ្មានរបាំងគូថក្រោយទេ សូម្បីតែស្បៃក៏មិនគ្រប់ដែរ រាល់ពេលធ្វើដំណើរតាមដងផ្លូវម្តងៗ ដីធ្លាក់រាយតាមដងផ្លូវ ហើយពេល មានខ្យល់មកហុយ ចូលភ្នែកច្រមុះពួកគាត់តែរហូត ហើយក្រុងខូចសោភ័ណភាព ក៏ដោយសារពួករថយន្តដឹកដីទាំងនេះដែរ។

អាជ្ញាធរក្រុងប៉ោយប៉ែត ពីសេសលោក ង៉ោ ម៉េងជ្រួន គួរតែមានវិធានការក្តៅ បង្ក្រាបលើរថយន្តដឹកដីទាំងឡាយណា ដែលល្មើសច្បាប់ជាក់ស្តែង ដូច ជារថយន្តដឹកដី របស់ក្រុមហ៊ុនអានកូរ ដែលពាក់ស្លាកលេខ ក 3492 ភព2  តែងម្តង។ បើមិនដូច្នោះទេ ទីក្រុងស្អាតក្លាយជាទីក្រុងដីហុយមិនខាន ហើយការចំណាយថវិកាជួលកម្មករលាងផ្លូវ ក៏ក្លាយទៅជារឿងឥតប្រយោជន៍ផងដែរ៕

ប៉េកាំង៖ លោកឧបនាយករដ្ឋមន្ត្រី Li Keqiang បានជួបជាមួយលោក Jim Yong Kim ដែលលោកជាប្រធានធនាគារពិភពលោក កាលពីថ្ងៃពុធមុននេះ ក្នុងគោល បំណងដើម្បីផ្លាស់ប្តូរទស្សនៈវិស័យគ្នាទៅវិញទៅមក ដោយការពឹងផ្អែកទៅលើកិច្ច សហប្រតិបត្តិការរវាងប្រទេសចិន និងធនាគារពិភពលោក។

លោកលី ក៏បានមានប្រសាសន៍ថា ចិនបានថែរក្សាកិច្ចសហប្រតិបត្តិការល្អដែលប្រកប ដោយភាពជោគជ័យ នៅតាមតំបន់ផ្សេងៗគ្នាជាមួយធនាគារពិភពលោកអស់រយៈ ពេលជាច្រើនឆ្នាំមកហើយ។

លោកលីបានបន្តទៀតថា កិច្ចសហប្រតិបត្តិការចំណេះដឹងទ្វេភាគីគឺល្អណាស់ ហើយ ជាពិសេស ការបង្កើតបាននូវភាពរីកចម្រើនឥតឈប់ឈរ នារយៈពេលប៉ុន្មានឆ្នាំចុង ក្រោយនេះ ដែលការធ្វើកិច្ចសហប្រតិបត្តិការគឺជាប្រយោជន៍សំរាប់ចិន ក្នុងគោលបំណ ងដើម្បីបង្កើនចំណេះដឹងតាមរយៈការសិក្សាពីបទពិសោធន៍អន្តរជាតិ នៅចំពេល ដែលប្រទេសជាតិមានអភិវឌ្ឍន៍ទៅមុខ។

លោកលី បានគូសបញ្ជាក់ថា ចិនបានក្លាយប្រទេសដែលមានចំណូលមធ្យម ថ្វីបើការអភិវឌ្ឍន៍ប្រទេសរបស់ខ្លួនមិនទាន់ស្មើគ្នាក៏ដោយ ហើយលោកក៏បានបញ្ជាក់ បន្ថែមទៀតថា ប្រទេសនេះមានភាពមិនស្មើគ្នា ជាក់ស្តែងចំពោះការអភិវឌ្ឍន៍នៅតាម ជនបទ និងទីក្រុង។

លោកលីបន្ថែមទៀតថា នៅពេលដែលគម្លាតជនបទ និងទីក្រុងខុសគ្នាស្រឡះ គឺមានន័យថា សក្តានុពលមធ្យម ហើយប្រទេសចិនមានសក្តានុពលយ៉ាងខ្លាំងសំរាប់ ការអភិវឌ្ឍន៍នៅតាមតំបន់នគរូបនីយកម្ម អស់រយៈជាច្រើនទស្សវត្សរ៍។

លោកលី បន្តទៀតថា «ដើម្បីឲ្យមានការរីកចម្រើននគរូបនីយកម្ម យើងគួរតែទទួលយកការតម្រង់ទិសដៅក្នុងអភិវឌ្ឍន៍ ដែលកើតឡើងក្នុងពេលជាមួយគ្នានៃឧស្សាហូបនីយ កម្ម,នគរូបនីយកម្ម,ខាងកសិកម្ម,និងទំនើបនីយកម្ម»។

លោកបន្តទៀតថា «សន្តិសុខស្បៀងអាហាររបស់ចិន គួរតែត្រូវបានធានាឲ្យប្រាកដ។ នៅគាដដែលនោះ យើងត្រូវតែចាត់ទុកថា សំខាន់ជាង
នេះទៅទៀត ក្នុងគោលបំណង ដើម្បីការអភិវឌ្ឍន៍បៃតង និងការសន្សំសំចៃថាមពលឲ្យកាន់រឹងមាំឡើង»។

បើយោងតាមលោកលី ការធ្វើកំណែទម្រង់របស់ចិន គួរតែបានធ្វើអោយកាន់ តែខ្លាំងឡើង នូវការអិវឌ្ឍន៍សង្គមឲ្យកាន់តែរឹងមាំ និងការលើកកម្ពស់សេវ៉ារដ្ឋជាមូល ដ្ឋានរបស់ខ្លួន។ កាតព្វកិច្ចទាំងអស់នេះ ត្រូវឲ្យមានគោលទស្សនៈវិស័យ អន្តរជាតិ បទពិសោធន៍ទៅថ្ងៃអនាគត។

ចិននឹងមានឆន្ទៈក្នុងគោលបំណងដើម្បីចូលរួមការសិក្សាស្រាវជ្រាវនគរូបនីយកម្មពិ ភពលោក ខណៈពេលដែលចិនកំពុងចូលសិក្សាសកលវិទ្យាល័យនានា និងគ្រឹះស្ថានសិក្សាស្រាវជ្រាវ ដើម្បីចូលរួមការសិក្សាស្រាវជ្រាវដើម្បីកសាងការងារ និងគម្រោងទៅថ្ងៃមុខ។

លោកលីបន្តថា ប្រសិនបើចិនអាចដើរតាមមាគ៌ានគរូបនីយកម្ម ចិននឹងកើន ប្រាក់ចំណូល ជាច្រើនដល់ជនជាតិចិន និងព្រមទាំងពិភពលោកផងដែរ។

លោកគីម ក៏បានឯកភាពនូវសំណើររបស់លោកលី ដែលលោកបានមានប្រសាសន៍ថា ការតម្រង់ទិសនគរូបនីយកម្មរបស់ចិន នឹងផ្តល់ផលិតផលទីផ្សារយ៉ាងច្រើន និងអ្វីដែលបានជួបប្រទះបទពិសោធន៍ពីមុនៗមក ដើម្បីឆ្ពោះទៅកាន់ពីភពលោក។

លោកគីមបានមានប្រសាសន៍ថា ធនាគារពិភពលោក នឹងមានបំណង ដើម្បីធ្វើកិច្ច សហប្រតិបត្តិការគ្នាជាមួយនគរូបនីយកម្មរបស់ចិន ដែលចិនមានសារៈសំខាន់យ៉ាង ខ្លាំងសម្រាប់ធនាគារពិភពលោក ដើម្បីធ្វើឲ្យមានគំនិតការអភិវឌ្ឍន៍ និងបង្កើនការរីក ចម្រើនជីវភាពក្រីក្រឲ្យកាន់តែប្រសើរឡើង៕

មូស្គូ៖ នាយករដ្ឋមន្រ្តីរុស្ស៊ីលោក ឌីមីទ្រី មេដវ៉េដដេវ បាននិយាយនៅ ថ្ងៃព្រហស្បតិ៍នេះថា រុស្ស៊ីត្រៀមខ្លួនរួចស្រេចហើយ ក្នុងការចាប់ផ្តើមពិភាក្សា ជាមួយមេដឹកនាំថ្មី របស់ប្រទេស ហ្សកហ្ស៊ី ក្នុងលក្ខខណ្ឌពិតប្រាកដមួយ។

ទីភ្នាក់ងារព័ត៌មានចិនស៊ិនហួ រាយការណ៍ថា លោក មេដវ៉េដដេវ បាននិយាយនៅក្នុងកិច្ចសម្ភាសន៍ ជាមួយសារព័ត៌មានសេដ្ឋកិច្ចមួយថា «រដ្ឋាភិបាលទីក្រុង មូស្គូបានសម្លឹងឃើញ ការបន្តទំនាក់ទំនងជាមួយនឹង រដ្ឋាភិបាលក្រុងប៊ីលីស៊ី ប្រសិនបើហ្សកហ្ស៊ី ទទួលស្គាល់បូរណភាពដែនដី ចំពោះខេត្តដែលផ្តាច់ ចេញរួមមានខេត្ត អាប់ខាសៀ និងអូសិតធាភាគខាងត្បូង»។

ដោយឡែកប្រទេស ហ្សកហ្ស៊ីវិញ បានរឹតត្បិតទំនាក់ទំនងផ្នែកការទូតជាមួយនឹងរុស្ស៊ី ចាប់តំាងពីមានជម្លោះ ប្រដាប់មួយបានកើតឡើង កាលពីឆ្នាំ២០០៨ នៅ អូស៊ីទីភាគខាងត្បូង ខណៈលោក មេដវ៉េដដេវ នៅជាប្រធានាធិបតី និងជាមេបញ្ជាការនៅសម័យនោះ។

ជាមួយនឹងការត្រៀម ភ្ជាប់ទំនាក់ទំនងនេះដែរ លោក មេដវ៉េដដេវ បាននិយាយថា លោកបានត្រៀមខ្លួន រួចជាស្រេចហើយ ដើម្បីនឹងជួបជាមួយ នាយករដ្ឋមន្រ្តីថ្មីរបស់ប្រទេស ហ្សកហ្ស៊ី លោក បីដស៊ីណា អ៊ីវ៉ាន់វីលី ដែលលោកបានចាត់ទុកជា អ្នកនយោបាយជំនាន់ថ្មី ប៉ុន្តែក៏បានព្រមានថា រដ្ឋាភិបាលទីក្រុង មូស្គូ ត្រូវតែឃ្លំាមើលឯកសារ ដែលខ្លួនបានសម្រេចជាមុនសិន។

លោក មេដវ៉េដដេវ បន្តថា «ជាការពិតណាស់ វាគួរតែចូលជាធរមាន នូវកត្តាសត្យនុម័តខាងភូមិសាស្រ្តនយោបាយ និងការសម្រេចចិត្តរបស់រុស្ស៊ី ក្នុងការទទួលស្គាល់ខេត្ត អាប់ខាសៀ និងអូសិតធាខាងត្បូងនេះ»។

គួរបញ្ជាក់ផងដែរថា បក្សនយោបាយសុបិនហ្សកហ្ស៊ី (The Georgian Dream) ដែលដឹកនាំដោយមហាសេដ្ឋី អ៊ីវ៉ាន់វីលី បានឈ្នះការបោះឆ្នោតសភា ដែលបានប្រព្រឹត្តទៅ កាលពីខែតុលាកន្លងទៅនេះ ហើយលោក អ៊ីវ៉ាន់វីលី បាននិយាយកាលពី ដើមខែវិច្ឆិកាថា រដ្ឋាភិបាល ប៊ីលីស៊ី នឹងស្តារមកវិញនូវ ចំណងទាក់ទងជាមួយនឹង រដ្ឋាភិបាលទីក្រុង មូស្គូ ចាប់ពីទំព័រថ្មីស្រឡាងមួយ ដើម្បីក៏បានទទួចនូវការ ស្តារមកវិញផ្នែកការទូត ដែលនឹងភ្ជាប់ទៅ បូរណភាពទឹកដីប្រទេស របស់លោកផងដែរ៕

តូក្យូ៖ គណបក្សសង្គ្រោះជាតិជប៉ុន បានប្រកាសថា គោលនយោ បាយរបស់ខ្លួនសម្រាប់ការ បោះឆ្នោតជ្រើសរើស សមាជិកសភាតំណាងរាស្ត្រ កាលពីថ្ងៃព្រហស្បតិ៍ បានឲ្យដឹងថា គោលការណ៍គ្រឹះរបស់គណបក្ស គឺត្រូវ តែបង្កើតរដ្ឋធម្មនុញ្ញថ្មី។

ទីភ្នាក់ងារព័ត៌មានចិនស៊ិនហ៊ួ រាយការណ៍ថា មេដឹកនាំរបស់គណបក្ស និងជាអតីតអភិបាលក្រុងតូក្យូ លោកហ្ស៊ីនតារ៉ូ អ៊ីហ៊្សីហ៉ារ៉ា និងលោកអូសាកា ម៉ាយ័រ តូរុ ហាហ៊្សីមូតូ បានថ្លែងនៅឯសនិ្នសីទ សារព័ត៌មានឋិត នៅទីក្រុងតូក្យូ បានកំពុងអំពាវនាវសុំ ឲ្យមានការការពារនូវការ ចំណាយយ៉ាងច្រើន ដែលឥឡូវបានកំណត់តែ ១ភាគរយនៃផលិតផលសរុប ក្នុងស្រុករបស់ប្រទេស។

គណបក្ស បាននិយាយគាំទ្រការ ចូលរួមកិច្ចចរចាជាមួយដៃគូ ទំនាក់ទំនងតាមមហាសមុទ្រប៉ាស៊ីហ្វីក ដែលដឹកនាំដោយអាមេរិក និងត្រួតពិនិត្យច្បាប់ធនា គារជប៉ុនឡើងវិញ។

ស្តីពីវិស័យសេដ្ឋកិច្ចនោះ គណបក្សក៏បានស្នើសុំ ឲ្យមានយុទ្ធសាស្ត្ររីកចម្រើនខាង ផ្នែកសេដ្ឋកិច្ច ដែលសេដ្ឋកិច្ចនោះមិនពឹងផ្អែក ទៅលើការកសាងនៃ ហេដ្ឋារចនា សម្ព័ន្ធទេ។

គណបក្សចង់បង្រួម ច្បាប់នៃរដ្ឋាភិបាលកណ្តាល និងបានសន្យាកាត់បន្ថយសមាជិ កសភាឲ្យខានតែបាន។

ក្រៅពីការសន្យាខាងលើ ស្តីពីគោលនយោបាយសន្តិសុខ និងគោលនយោបាយបរទេស គឺគោលនយោបាយរបស់គណបក្ស បានរួមបញ្ចូនទាំង គោលនយោបាយ សេដ្ឋកិច្ច,សន្តិសុខសង្គម,ថាមពលរ៉ែ និងប្រព័ន្ធជាតិផងដែរ។

លោកបានបន្ថែមទៀតថា ជប៉ុនគួរតែពង្រឹងការ ឈ្លបយកការណ៍តាម សមុទ្រឲ្យកាន់ ខ្លាំងឡើង គណបក្សហាគីស ចង់ដាក់កម្រិតលក្ខខណ្ឌ ទៅលើប្រទេសឯនាយសមុទ្រ ដោយប្រើអាវុធ តាមរយៈកងកម្លាំង ស័្វយការពារបស់ខ្លួន។

ច្បាប់ជប៉ុនមិនអនុញ្ញាត ឲ្យកងកម្លាំងស្វ័យការពា ប្រើប្រាស់អាវុធ នៅពេលដែលធ្វើ បេសកម្មនៅក្រៅប្រទេសនោះទេ។ ការពិនិត្យការ ដាក់កម្រិតឡើងវិញ គឺជាបញ្ហាដ៏ រសើបនៅក្នុងប្រទេស ដោយសារតែអ្នកសន្តិភាព និយមរដ្ឋធម្មនុញ្ញរបស់ជប៉ុន។

គណបក្សបានសន្យាថា នឹងធ្វើឲ្យលែងមានការ ផលិតថាមពលនុយក្លេអ៊ែ ជាបណ្តើរ ៗផងដែរ។

គណបក្សសង្រ្គោះជាតិជប៉ុន ត្រូវបានបង្កើតឡើង តាមរយៈលោកហាហ៊្សីមូតូ នៅក្នុងខែកញ្ញា។ គណបក្សសានរាយ របស់លោកអ៊ីហ៊្សីហារ៉ា គឺជាក្រុមអ្នកតែង ច្បាប់ ដែលបានចូលរួម ជាមួយគណបក្សរបស់ហាហ៊្សីមូតូ នៅខែវិច្ឆិកា ដើម្បីច្របាច់ គណបក្សនយោបាយបីតូចៗ ចូលគ្នាតែមួយនៅក្នុងប្រទេស។

សមាជិកសភាតំណាងរាស្រ្ត ត្រូវបានរំលាយចោល កាលពីខែវិច្ឆិការ ថ្ងៃទី១៦ ហើយនិងការបោះឆ្នោតក្រោយ នឹងចាប់ផ្តើមធ្វើនៅថ្ងៃទី១៦ខែធ្នូនេះ៕

ភ្នំពេញ ៖ មន្រ្តីជាន់ខ្ពស់រាជរដ្ឋាភិបាលកម្ពុជា បានថ្លែងនៅថ្ងៃទី៣០ ខែវិច្ឆិកា ឆ្នាំ២០១២ថា ចំពោះករណីក្រុមយុវជន គណបក្សប្រឆាំងសម រង្ស៊ី ដែលបានដាក់ពាក្យប្តឹងសម្តេចតេជោ ហ៊ុន សែន ដោយចោទប្រកាន់ពីបទមនុស្សឃាត គិតទុកជាមុន ទាក់ទងទៅនឹងការស្លាប់ របស់ប្រជាពលរដ្ឋ ក្នុងឧបទ្ទវហេតុ រត់ជាន់គ្នានៅកោះពេជ្រ កាលពីប៉ុន្មានឆ្នាំកន្លងមកនេះថា គ្រាន់តែចង់ល្បីសុះសាយក្នុងប្រព័ន្ធផ្សព្វផ្សាយប៉ុណ្ណោះ។

អ្នកនាំពាក្យ និងជារដ្ឋលេខាធិការ នៃទីស្តីការគណៈរដ្ឋមន្រ្តី លោក ផៃ ស៊ីផាន មានប្រសាសន៍ ប្រាប់មជ្ឈមណ្ឌលព័ត៌មាន ដើមអម្ពិល នៅថ្ងៃទី៣០ ខែវិច្ឆិកា ឆ្នាំ២០១២ថា ករណីពាក្យបណ្តឹងនេះ ជាសិទ្ធិរបស់ពួកគេ ប៉ុន្តែអ្វីដែលធ្វើឲ្យគេមើលនោះ វាគ្រាន់តែជាបំណងរបស់ក្រុមគណបក្សប្រឆាំង ឬឧទ្ទាម គឺពួកគេធ្វើយ៉ាងណា ដើម្បីឲ្យល្បីឈ្មោះ នៅក្នុងប្រព័ន្ធផ្សព្វផ្សាយសារព័ត៌មាន។

លោកបន្តថា គ្មានអ្វីដែលជាអង្គហេតុ ឬលក្ខណៈផ្លូវច្បាប់ ដែលអាចចោទប្រកាន់ មកលើរាជរដ្ឋាភិបាលទាំងមុន ទាំងក្រោយបានទេ ព្រោះសំណង បានសងទៅក្រុមគ្រួសារជនរងគ្រោះអស់ហើយ។ រាជរដ្ឋាភិបាល ក៏បានចាត់វិធានការណ៍រួចរាល់ នឲ្យមានបញ្ហាទាំងកើតមានឡើងជាថ្មី ម្តងទៀត ឡើយ។

លោកបញ្ជាក់ថា “អ្វីដែលយើងបានដឹងជាព័ត៌មាននោះ គឺថាការដាក់ពាក្យបណ្តឹងនេះ គឺប្តឹងសម្តេចនាយករដ្ឋមន្រ្តី អំពីគម្រោងជាមុន នៅក្នុងការធ្វើ ឲ្យប្រជាពលរដ្ឋខ្មែរ ទទួលមរណភាពដោយចៃដន្យ នោះជាព្រឹត្តិការណ៍ជាយថាហេតុដែលយើងមិនចង់បាន”។

កាលពីព្រឹកថ្ងៃទី៣០ ខែវិច្ឆិកា ឆ្នាំ២០១២ ប្រធានចលនាយុវជន គណបក្ស សម រង្ស៊ី លោក សួង សុភ័ណ្ឌ បានដាក់ពាក្យបណ្តឹង ទៅសាលាដំបូង រាជធានីភ្នំពេញ ដោយចោទប្រកាន់សម្តេចតេជោ ហ៊ុន សែន ពីបទមនុស្សឃាត គិតទុកជាមុន ហើយប្រធានចលនាយុវជន គណបក្សប្រឆាំង រូបនេះបាននិយាយថា សម្តេចត្រូវទទួលខុសត្រូវ ក្នុងឧបទ្ទវហេតុរត់ជាន់គ្នាស្លាប់ នៅលើស្ពានកោះពេជ្រ ដែលមានរហូតទៅដល់ ៣៥៣នាក់ និង អ្នករងរបួសជាង ៤០០នាក់ ក្នុងពិធីបុណ្យអុំទូក កាលពីរាត្រីថ្ងៃទី២២ ខែវិច្ឆិកា ឆ្នាំ២០១០នាពេលកន្លងមកនេះ។

ព្រមជាមួយគ្នានេះដែរ លោក សួង សុភ័ណ្ឌ ប្រធានចលនាយុវជនគណបក្ស សម រង្ស៊ី នឹងដាក់ពាក្យបណ្តឹង ទៅតុលាការយុត្តិធម៌អន្តរជាតិ ទីក្រុងឡាអេ នៅក្នុងអំឡុងខែធ្នូ ឆ្នាំ២០១២ខាងមុខនេះទៀត៕

បាងកក ៖ យោងតាម សេចក្ដីរាយការណ៍ ពីបណ្ដាញព័ត៌មាន នៅទីក្រុងបាងកក ប្រទេសថៃ នារសៀលថ្ងៃសុក្រ ទី៣០ ខែវិច្ឆិកានេះ បានឱ្យដឹងថា លោកកកែវ ភិគុណថង តំណាងរាស្ដ្រ គណបក្សភឿថៃ និងជាមេចលនាអាវក្រហម ដ៏មានឥទ្ធិពល ត្រូវបានតុលាការប្រទេសថៃ សម្រេច សេចក្ដីឱ្យ ជាប់ពន្ធនាគារ ឡើងវិញ បន្ទាប់ពី អនុញ្ញាតឱ្យនៅក្រៅឃុំជាបណ្ដោះអាសន្ន អស់រយៈពេលយូរកន្លងមក ខណៈដែល តំណាងរាស្ដ្រគណបក្សភឿថៃ ៤រូបផ្សេង ទៀតសម្រេចដោះលែងឱ្យមានសេរីភាព ក្នុងនោះមានលោក ណាត់ថាវុធសៃគឿផង ដែរ។

សេចក្ដីរាយការណ៍បានឱ្យដឹងថា គ្រាន់ តែតុលាការក្រុងបាងកកសម្រេចភ្លាម លោក តំណាងរាស្ដ្ររូបនេះ ត្រូវបានសមត្ថកិច្ច ដាក់ខ្នោះរួចជាស្រេច ហើយបានបញ្ជូន ទៅ ពន្ធនាគារកាលពីវេលាម៉ោង១៥និង៤០នាទីរសៀលថ្ងៃសុក្រនេះ ។

គួរបញ្ជាក់ថា កកែវ  ភិគុណថង និង តំណាងរាស្ដ្រគណបក្សភឿថៃ ៤រូបផ្សេងទៀត ត្រូវបានប្ដឹងពីបទគំរាមកំហែង តុលាការធម្មនុញ្ញប្រទេសថៃ កាលពីដើមឆ្នាំ២០១២។

អ្នកវិភាគបានវាយតម្លៃ ប្រហែលជា មានតែប្រទេសថៃមួយទេ នៅក្នុងតំបន់ អាស៊ាន ដែលតំណាងរាស្ដ្រនៃគណបក្សកាន់ អំណាច ត្រូវបានតុលាការកាត់ឱ្យជាប់ទោស រួចដាក់ខ្នោះចូលពន្ធនាគារ ដោយសារ ហេតុផលនយោបាយ ។ ដោយឡែកនៅ ប្រទេសកម្ពុជា មិនមានអ្នកនយោបាយឬតំណាងរាស្ដ្រជាប់គុក ដោយសារតែរឿងនយោបាយទេ មានតែតំណាងរាស្ដ្រ ត្រូវបានកាត់ឱ្យជាប់ពន្ធនាគារ ដោយសាររឿងព្រហ្មទណ្ឌ។

កំពង់ស្ពឺៈ បណ្តាមន្រ្តីក្រសួងប្រៃសណីយ៍ និងទូរគមនាគមន៍ នៅថ្ងៃទី២៩ ខែវិច្ឆិកានេះ បានចូលរួមផ្តល់ពានរង្វាន់ ដល់កីឡាករប្រណាំងទូក នៅថ្ងៃ បញ្ចប់នៃពិធីបុណ្យអុំទូក ដែលប្រព្រឹត្តទៅក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ និងមានការចូលរួមពីប្រជាជន យ៉ាងច្រើនកុះករ ។

លោកស្រី សេម នឿន សូរ ឃុន និងលោកស្រី ម៉ៅ សុន ឡៅ សារឿន និងលោក ស៊ីម ធី ទីប្រឹក្សា អមក្រសួងប្រៃសណីយ៍ និងទូរគមនាគមន៍ ព្រម ទាំងសហការី និងថ្នាក់ដឹកនាំស្រុកសំរោងទង បានឧបត្ថម្ភអាវយឺតចំនួន ១០០ អាវ មួកចំនួន ១០០មួក និងបានឧបត្ថម្ភថវិកាជូនដល់ទូក ជាប់ ចំណាត់ថ្នាក់លេខ ១ មានចំនួន ៣ទូក ក្នុងមួយទូកចំនួន ៥៥ ម៉ឺនរៀល។

រីឯទូកជាប់ចំណាត់ថ្នាក់លេខ ២ មានចំនួន ៣ ទូក ក្នុងមួយទូកចំនួន ៤៤ ម៉ឺនរៀល ទូកជាប់ចំណាត់ថ្នាក់លេខ ៤ មានចំនួន ៣ ទូក ក្នុងមួយទូក ចំនួន ៣៣ ម៉ឺនរៀល ទូកជាប់ចំណាត់ថ្នាក់លេខ ៤ មានចំនួន ៣ ទូក ក្នុងមួយទូកចំនួន ២២ ម៉ឺនរៀល ចំណែកឯទូកមិនបានទទួលចំណាត់ថ្នាក់ ចំនួន ១៣ ទូក ដោយក្នុងមួយទូកៗ ទទួលបានថវិកាចំនួន ១១ ម៉ឺន។ ដោយឡែកលោក ស៊ីម ធី បានឧបត្ថម្ភទូកវត្តត្រពាំងគង នូវថវិកាចំនួន ១០ ម៉ឺន ទូកភូមិកែវឧត្តម ចំនួន ១០ ម៉ឺន និងទូកវត្តអង្គភ្នៀតចំនួន ១០ ម៉ឺនរៀល គណៈកម្មការកណ្តាលរៀបចំពិធី ចំនួន ៤០ ម៉ឺនរៀល ៕

សៀមរាប : គ្រឿងញៀន ប្រភេទកូកាអ៊ីន និងមេតំហ្វេតាមីន (ម៉ាទឹកក) ដែលបានចាប់ កន្លងទៅ ប្រមាណជាង ២០គីឡូក្រាម នៅព្រលានយន្ត ហោះអន្តរជាតិ ខេត្តសៀមរាប កាលពីខែសីហា និងខែកញ្ញា ឆ្នាំ២០១២ កន្លងទៅនេះ បានត្រូវសមត្ថកិច្ច សម្រេចដុតកម្ទេចចោល កាលពីព្រឹកថ្ងៃទី ៣០ ខែវិច្ឆិកា ឆ្នាំ២០១២ នៅក្នុង បរិវេណតុលាការ ខេត្តសៀមរាប តែម្តង ។

ការដុតបំផ្លាញគ្រឿងញៀននេះ បានធ្វើឡើងដោយមានការចូលរួមពីប្រធានស្តីទីសាលាដំបូងខេត្ត លោក ឌុចសុខ សារិន ព្រះរាជអាជ្ញាសាលាដំបូងលោក ទី សុវីនថាល់ ព្រមទាំងកម្លាំង នគរបាលខេត្ត កងរាជអាវុធហត្ថ ខេត្តសៀមរាប និងមន្រ្តីពាក់ព័ន្ធនានា ជាច្រើននាក់ទៀត។ តាមការឲ្យដឹងពី លោក ទី សុវីនថាល់ ព្រះរាជអាជ្ញា សាលា ដំបូងខេត្តសៀមរាប គ្រឿងញៀន ជាង២០គីឡូក្រាមនេះ គឺបានមកពីការបង្រ្កាបការនាំ គ្រឿង ញៀន ឆ្លងកាត់ប្រទេសកម្ពុជា ចំនួន ៤ករណីរបស់ អាជ្ញាធរមានសមត្ថកិច្ច ដូចជាគយប្រចាំ ព្រលានយន្តហោះ អន្តរជាតិ កម្លាំងនគរបាលនិងកម្លាំងអាវុធហត្ថ ខេត្តសៀមរាប។

លោក ឌុច សុខសារិន ប្រធានស្តីទីសាលាដំបូងខេត្តសៀមរាប បានថ្លែងថា ការដុតកំទេច គ្រឿងញៀនទាំងនោះ ដោយសារវាគ្មាន ប្រយោជន៍បន្តិច ណាសោះ ដល់សង្គម ជាពិសេសវិស័យវេជ្ជសាស្រ្ត ហើយគ្រឿងញៀន ទាំងអស់នេះ ក៏ត្រូវបានចៅក្រមស៊ើបសួរអនុញ្ញាតឲ្យបំផ្លាញចោលផងដែរ។

សូមរំលឹកថា នៅក្នុងអំឡុងចុងឆ្នាំ២០១២ នេះមានករណីនាំគ្រឿងញៀនឆ្លងកាត់ព្រលានយន្តហោះ អន្តរជាតិ សៀមរាប ចំនួន ៤ករណីដែលប្រព្រឹត្ត ឡើងដោយ ជនបរទេស ក្នុងនោះករណីទី១ កាលថ្ងៃទី១៥ ខែសីហា ឆ្នាំ២០១២ មានស្ត្រីជនជាតិថៃ ម្នាក់ឈ្មោះ ឃតតាមី ណាតផាផន (KOTAN MISS NAPAPHON) អាយុ ២៩ឆ្នាំ កាន់លិខិតឆ្លងដែនលេខ V 990386 ដោយធ្វើដំណើរតាមជើងយន្តហោះ MI-636 សិង្ហបុរី-សៀមរាប បាននាំគ្រឿង ញៀនប្រភេទម៉ាទឹកកចំនួន ៣.៦៤២ក្រាម ចូលមក កម្ពុជា និងករណីទី២ឈ្មោះ ឥន្ធនូ សូភី (INTHANU SUPHEE) ភេទស្រី អាយុ ៤២ឆ្នាំ ជនជាតិថៃ កាន់លិខិតឆ្លងដែនលេខ Z573406 ធ្វើដំណើរ តាមជើង យន្តហោះ MG764 កូឡាឡាំពួរ សៀមរាប បានរកឃើញសារធាតុញៀន ទម្ងន់ ៥,៥៦៤ក្រាម (៥.៥៦៤គីឡូក្រាម) ត្រូវបានជនសង្ស័យរូបនេះ ដឹកជញ្ជូននិងជួញដូរ ដោយខុស ច្បាប់ ចូលតាមអាកាស យានដ្ឋានអន្តរជាតិសៀមរាប។ ករណីទី៣ និងទី៤ គឺនៅក្នុងថ្ងៃទី៨ ខែតុលា ឆ្នាំ២០១២ កម្លាំងគយប្រចាំច្រកទ្វារព្រលានយន្តហោះ ខេត្ត សៀមរាប ក៏បានធ្វើការឃាត់ខ្លួនស្រ្តីជនជាតិថៃចំនួន២នាក់ ដែលបាននាំគ្រឿងញៀន ពីប្រទេសប្រេស៊ីលក្នុងបំណងទៅកាន់ប្រទេសទីបីប៉ុន្តែត្រូវចាប់ខ្លួនក្នុង ខណៈឆ្លងកាត់ប្រទេសកម្ពុជា។ ស្រ្តីទាំងពីរនាក់មានឈ្មោះយ៉ាថា ណូផាក វ៉ារ៉ាផន កើតនៅឆ្នាំ១៩៩២ សមត្ថកិច្ចដកហូតថ្នាំញៀនប្រភេទកូកាអ៊ីនបានចំនួន ៦.៥២០ក្រាម និងឈ្មោះឆែថង អរ៉ាផា កើតនៅឆ្នាំ១៩៨៦ ដកហូតបានថ្នាំញៀនចំនួន៥.០៣៣ក្រាម។

បច្ចុប្បន្នជនទាំងនោះត្រូវបានតុលាការឃុំខ្លួនជាបណ្តោះអាសន្ននៅពន្ធនាគារខេត្តសៀមរាប ដើម្បីរងចាំថ្ងៃបើក សវនាការ ៕

-ការបិទឡូតិ៍នេសាទ ធ្វើឲ្យអតិផរណាជាតិធ្លាក់ចុះមកត្រឹម៣%

កំពង់ធំ៖ សម្តេចតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានថ្លែងថា ការងារ ត្រួតពិនិត្យបទល្មើស នេសាទមិន ចាំបាច់នាយករដ្ឋមន្ត្រី ទៅស្រែក បានធ្វើនោះទេ ។ នេះជាសារដែលសម្តេចក្រើន រំលឹកឲ្យអាជ្ញាធរ បន្តត្រួតពិនិត្យបទល្មើសនេសាទ នៅជុំវិញបឹង ទន្លេសាបដែលកើតមានឡើង។

សម្តេចតេជោ ហ៊ុន សែន បានមានប្រសាសន៍ដូច្នេះ គ្រាដែលសម្តេចអញ្ជើញ ទៅចុះចែកប័ណ្ណ កម្មសិទ្ធិដីធ្លីជូន ប្រជាពលរដ្ឋនៅ ខេត្តកំពង់ធំនាថ្ងៃទី៣០ ខែវិច្ឆិកា ឆ្នាំ២០១២។

សម្តេចបានមានប្រសាសន៍ថា«អស់លោក កុំចាំគេស្រែកបានធ្វើ។ ខ្ញុំមិនចង់ស្រែកទៀតទេ ដោយសារខ្ញុំ ធ្វើអស់ហើយជាកាតព្វកិច្ច នាយករដ្ឋមន្ត្រី លុបឡូតិ៍នេសាទ ទាល់តែជាសមត្ថកិច្ច របស់នាយករដ្ឋមន្ត្រី ត្រឹមអារឿងបទល្មើសនេសាទ វាមិនចាំបាច់ដល់នាយករដ្ឋមន្ត្រី ស្រែកនោះទេ ក៏ប៉ុន្តែ មកពីអស់លោក វាស្ពឹក ដេកកេះមិន ក្រោកតាំងពីលើដល់ក្រោមយ៉ាងនេះសូមអស់ លោកបិទក្រោលសេះ មុនសេះវាចេញពីក្រោល»។

សម្តេចបានបន្តថា ដើម្បីធានាយ៉ាងណា ឲ្យការងារលុបឡូតិ៍នេសាទ ផ្តល់ប្រយោជន៍ពិតប្រាកដទៅ លើប្រជាជន ហើយសូមកុំ ឲ្យមានចរិតរុញឲ្យខ្លោចរោច ឲ្យឆៅ ពោល គឺចង់ផ្ចាញ់រឿង ដែលសម្តេចកាត់ឡូតិ៍ នេសាទ ឲ្យប្រជាពលរដ្ឋ នាំឲ្យភាពអាណាធិបតេយ្យលើការនេសាទ ដើម្បីឲ្យរដ្ឋាភិបាលទ្រាំមិន បានបង្កើតឡូតិ៍ នេសាទវិញ។

សម្តេចបន្តថា «បញ្ហាខ្លះគឺអស់លោកមិនធ្វើតែម្តង កន្លែងខ្លះមានការឃុបឃិតគ្នា ក៏មានចាំដល់ ខែ៣ ខែ៤ បានធ្វើរឿងសន្និបាតសរុប សូមកុំលេងល្បែងរុញ ឲ្យខ្លោច រោចឲ្យឆៅ ស្រែកបានធ្វើមិន ស្រែកមិនធ្វើ។

កុំថាអ្នកណាអ្នកណា ឧបនាយករដ្ឋមន្ត្រីក៏ ត្រូវមាត់រដ្ឋមន្ត្រី ក៏ត្រូវមាត់ដែរ»។ជាមួយគ្នានេះផងដែរ សម្តេចបានលើក ឡើងថាប្រជាពលរដ្ឋ បានអបអរគោលនយោ
បាយរបស់ រដ្ឋាភិបាលលុបឡូតិ៍នេសាទទាំង៦ ហើយបង្កើតតំបន់អភិរក្ស ៤កន្លែងដែលធ្វើឲ្យផលត្រីសម្បូរប្រជាពលរដ្ឋងាយស្រួល ក្នុងការប្រកបរបរនេសាទ ពូជត្រី ដែលជិតផុតពូជបានកើនឡើង វិញដូចជាពូជត្រីព្រួល ត្រីឆ្កោក ត្រីក្អែក។

សម្តេចថ្លែងបន្តថា «ចាប់តាំងពីមានការប្រែទម្រង់ឡូតិ៍នេសាទស៊ីជម្រៅ ធ្វើឲ្យត្រីនៅលើទីផ្សារ គឺរក្សាថ្លៃបានល្អ អតិផរណាវាអត់កើនឡើង ទេឆ្នាំនេះអតិផរណាអាច
ស្ថិតនៅក្រោម៣ភាគរយដែលឆ្នាំទៅព្យាករណ៍ ថាមានដល់៦ភាគរយ តែដោយសារត្រីទាញ ត្រឹម៥,៥ភាគរយ ហើយឆ្នាំនេះ មកត្រឹម៣ភាគរយ ហើយចុងឆ្នាំ នេះគ្មានហានិភ័យ អីនោះទេ»។

រដ្ឋាភិបាលកម្ពុជាបានសម្រេចបិទឡូតិ៍ នេសាទចំនួន៦ ក្នុងគោលបំណងលុបបំបាត់បាតុភាពអាណាធិបតេយ្យ ហើយឲ្យប្រជាពលរដ្ឋ ងាយស្រួលក្នុងការនេសាទ ត្រីដើម្បីផ្គត់ផ្គង់គ្រួសារ៕

កំពង់ស្ពឺ ៖ នៅរសៀលថ្ងៃទី២៩ ខែវិច្ឆិកា ឆ្នាំ២០១២ លោក ឆាយ ថន អនុប្រធានទី១ ក្រុមការងារ ថ្នាក់កណ្តាល ចុះជួយ ខេត្តកំពង់ស្ពឺ បានចុះប្រជុំពង្រឹង សមាជិកគណបក្សប្រជាជន នៅឃុំព្រៃរំដួល ស្រុកភ្នំស្រួច ។

ក្នុងឱកាសនោះមាន ការចូលរួមពី លោក ឡាយ អ៊ីពិសិដ្ឋ ប្រធាន គណៈ ពង្រឹង ស្រុកភ្នំស្រួច លោក សួស គង់ អនុប្រធាន គណៈពង្រឹងស្រុកភ្នំស្រួច លោកឧកញ៉ា កង សូសាទី ក្រុមលេខាធិការ សម្តេចតេជោ ហ៊ុន សែន និងជាអនុប្រធាន យុវជនបក្ស ថ្នាក់ឃុំ ប្រធានភូមិ និងប្រធានក្រុមក្នុង ឃុំព្រៃរំដួល ជាច្រើននាក់ផងដែរ។ ក្នុងឱកាសនោះ លោក ឆាយ ថន បានប្រកាស សមាសភាព ក្រុមការងារ យុវជន ក្រួសួងផែនការ ដែលត្រូវ បានប្រធានគណបក្ស ខេត្តកំពង់ស្ពឺ ចាត់តាំង ឲ្យចុះមកជួយ ពង្រឹង បន្ថែមនៅនៅ ឃុំព្រៃរំដួល ស្រុកភ្នំស្រួច ។

លោក ឆាយ ថន បានមានប្រសាសន៍ណែនាំ ពង្រឹងស្មារតីដល់ ក្រុមបក្សទាំងអស់ ត្រូវស្គាល់ពីខ្លួន ឯងឲ្យបានច្បាស់ ថាយើងបច្ចុប្បន្ននេះ គឺជាថ្នាក់ដឹកនាំ របស់បក្សនៅក្នុង មូលដ្ឋាន បន្ទាប់មកទើបអាចឈាន ទៅពង្រឹងសាមាជិកបក្ស ទាំង១៦៥២ ទៀតនៅ ក្នុងឃុំព្រៃរំដួល។

លោកបានបន្តថា គណបក្សប្រជាជន បានដឹកនាំប្រទេសជាតិ ពីបាទដៃទទេ រហូតមកដល់ បច្ចុប្បន្នមានការ រីកចម្រើន និងមានសេចក្តីសុខ សន្តិភាព ពេញលេញ។

លោក ឆាយ ថន បានមានប្រសាសន៍ កោតសរសើរ ចំពោះថ្នាក់ដឹកនាំ គណបក្សប្រចាំ ឃុំព្រៃរំដួល ទាំងអស់ ដែលបានយក ចិត្តទុកដាក់ បម្រើការងារ បក្សអស់ពីកម្លាំងកាយចិត្ត។ ជាទីបញ្ចប់ ដើម្បីជាការលើកទឹកចិត្ត ដល់សមាជិកបក្ស លោក និងក្រុមការងារ បានចែកអំណោយ ក្នុងម្នាក់ៗទទួលបាន សារុងមួយ និងប៊ីចេង មួយកញ្ចប់៕

ភ្នំពេញ៖ កម្លាំងនគរបាល នៃមន្ទីរប្រឆំាង គ្រឿងញៀន ក្រសួងមហាផ្ទៃ នារសៀល ថ្ងៃទី៣០ ខែវិច្ឆិកា ឆ្នាំ២០១២ បានបញ្ជូនខ្លួន ឩកញ៉ា តាន់ សេងហាក់ និងបក្ខពួក សរុប៥នាក់ ដោយជាប់ចោទពី បទជួញដូរ និងប្រើប្រាស់គ្រឿងញៀន ទៅកាន់សាលាដំបូង រាជធានីភ្នំពេញ ។ មន្រ្តីសាលាដំបូងរាធានីភ្នំពេញ បានឲ្យដឹងថា ឩកញ៉ តាន់ សេងហាក់ និងបក្ខពួកចំនួន ៤ នាក់ ត្រូវបានបញ្ជូនមក ដល់សាលាដំបូង រាជធានីភ្នំពេញ នារសៀលម៉ោង៤ និង៣០ នាទីថ្ងៃទី៣០ ខែវិច្ឆិកា នេះ ។

មន្រ្តីសាលាដំបូង រាជធានីភ្នំពេញ បានបន្តទៀតថា ជនជាប់ចោទត្រូវ បានក្រុមសមត្ថកិច្ចនាំខ្លួន ទៅកាន់បន្ទប់ ព្រះរាជអាជ្ញារង អមសាលាដំបូង រាជធានីភ្នំពេញ លោក ជា ម៉េត ដើម្បីចាត់ការ ជនជាប់ចោទទៅ តាមនីតិវិធី ។ ប៉ុន្តែមន្ត្រីសាលា ដំបូងរូបនោះ នៅមិនទាន់បញ្ជាក់ ព័ត៌មានលំអិតថា តើជនជាប់ចោទ និងត្រូវបញ្ជូនទៅឃុំខ្លួន បណ្តោះអាសន្ននៅ ពន្ធនាគារព្រៃស នៅល្ងាចនេះ ឬយ៉ាងណានោះទេ ? ប្រធាននាយកដ្ឋាន នៃមន្ទីរប្រឆំាង គ្រឿងញៀន រាជធានីភ្នំពេញ លោក ខៀវ សាមន បានឲ្យដឹងនៅព្រឹកថ្ងៃទី៣០ ខែវិច្ឆិកា នេះថា បន្ទាប់ពីត្រូវបាន ធ្វើការចាប់ខ្លួន លោក តាន់ សេង ហាក់ និងបក្សពួកចំនួន៤ នាក់ទៀត ត្រូវបានសមត្ថកិច្ចរៀប ចំកសាងសំណុំរឿងបញ្ជូន ទៅកាន់សាលាដំបូងរាជធានីភ្នំពេញ។

លោក ខៀវ សាម៉ន បានបន្តទៀតថា ជនជាតិខ្មែរ៣ នាក់ និងជនជាតិចិន៣ នាក់ទៀត ដែលត្រូវបានឃាត់ខ្លួននៅក្នុងផ្ទះលោក តាន់ សេងហាក់ នោះ ត្រូវបានដោះលែងវិញហើយ បន្ទាប់ពីរកឃើញថា ពុំមានការជាប់ពាក់ព័ន្ធ និងករណីជួញដូរ គ្រឿងញៀននេះ។

គួរបញ្ជាក់ផងដែរថា នៅថ្ងៃទី២៧ ខែវិច្ឆិកា បីថ្ងៃមុននេះ កម្លាំងសមត្ថកិច្ចបានសម្រុក នៃមន្ទីរប្រឆំាងគ្រឿងញៀន ក្រោមការបញ្ជារបស់ព្រះរាជអាជ្ញារងអមសាលាដំបូងរាជធានីភ្នំពេញ លោក ជា ម៉េត បានចុះប្រតិប្តិការបង្រ្កាបករណីជួញដូរគ្រឿងញៀន នៅក្នុងផ្ទះរបស់លោក ឩកញ៉ា តាន់ សេងហាក់ ស្ថិតនៅទីតាំងលេខ២២ ផ្លូវហាណូយ សង្កាត់ភ្នំពេញថ្មី ខណ្ឌសែនសុខ។

ក្នុងប្រតិបត្តិការនោះ សមត្ថកិច្ចបានឃាត់ខ្លួនមនុស្សប្រុសស្រីចំនួន១៦ នាក់ ក្នុងនោះមានជនជាតិចិន៣ នាក់ និងបានដកហូតថ្នាំញៀន ប្រភេទម្សៅពណ៌ស ចំនួន២ កញ្ចប់ធំ គ្រាប់កំាភ្លើងចំនួន១១ គ្រាប់ និងកញ្ឆាប្រហែលកន្លះគីឡូក្រាម ។

ក្នុងការឃាត់ខ្លួន លោក ឩកញ៉ា តាន់ សេងហាក់ នេះ ក្រុមសមត្ថកិច្ច អះអាងថា បានប្រើប្រាស់រយៈពេលយូរគួរសម ក្នុងនោះេកសារពាក់ព័ន្ធ និងសំណុំរឿងជួញដូរគ្រឿងញៀនរបស់លោក តាន់ សេងហាក់ ក៏មានច្រើនផងដែរ នៅមន្ទីរប្រឆំាងគ្រឿងញៀន ។

លោក ខៀវ សាម៉ន បានបញ្ជាក់ផងដែរថា ឩកញ៉ា តាន់ សេងហាក់ ប្រហែលជាអាចត្រូវជាប់ពន្ធនាគាររយៈពេលច្រើនឆ្នាំ ព្រោះថាសមត្ថកិច្ចបានរកឃើញសំណុំរឿងជួញដូរគ្រឿងញៀនរបស់លោក តាន់ សេងហាក់ ប្រហែល១០ ករណី នៅឯតុលាការ៕

សៀមរាប៖ ទិវាប្រណាំងកង់អន្តរជាតិ អង្គរលើកទី១ បានចាប់ផ្តើម ហើយនៅព្រឹកថ្ងៃទី១ ខែធ្នូ ឆ្នាំ២០១២ ដោយមានកីឡាករ-កីឡាការិនីជាតិ និងអន្តរជាតិចំនួន ៧០០នាក់ ចូលរួមប្រកួតប្រជែង។

ការប្រកាសបើការប្រកួតនេះ ធ្វើឡើងនៅព្រឹកព្រលឹមថ្ងៃទី១ ខែធ្នូ ដោយលោករដ្ឋមន្ត្រីក្រសួង ទេសចរណ៍កម្ពុជា ថោង ខុន និងជាប្រធាន NOCC លោកស៊ូ ភារិន្ទ អភិបាលខេត្តសៀមរាប ។ កីឡាករប្រណាំងក្នុង ទឹកមុខស្រស់ស្រាយ សប្បាយរីករាយ បានចេញពីគោលដៅភ្លាមៗ បន្ទាប់ពីឮសំឡេង សញ្ញាឲ្យចេញដំណើរ។

សម្រាប់ឆ្នាំ២០១២ នេះគឺជាលើកទី ១ ហើយដែលគណៈកម្មាការអូឡំាពិកកម្ពុជា(NOCC) សហការជាមួយដៃគូអន្តរជាតិ អង្គការភូមិគោលដៅអន្តរជាតិ ប្រារព្ធទិវាប្រណំាងកង់អន្តរជាតិនេះ ជាលក្ខណៈពេញសិទ្ធិ ខណៈដែល៦ឆ្នាំកន្លងមក ការប្រណាំងកង់អន្តរជាតិនេះ ជ្រកក្រោមទិវារត់ប្រណាំងពាក់កណ្តាល ម៉ារ៉ាតុងអន្តរជាតិអង្គរតែប៉ុណ្ណោះ។

អនុប្រធាន NOCC លោក នុត សាអាន និងជាប្រធានសហព័ន្ធខ្មែរទោចក្រយាន បានថ្លែងក្នុងពិធីជប់លៀង ទិវាប្រណាំងកង់អន្តរជាតិអង្គរ នៅយប់ថ្ងៃសុក្រ ទី៣០ ខែធ្នូ ឆ្នាំ២០១២ នៅសណ្ឋាគារសុខាអង្គរថា កីឡាករ-កីឡាការិនី ដែលចូលរួមប្រណាំងកង់ឆ្នាំ២០១២ នេះមានចំនួន ៧០០រយនាក់ក្នុងនោះ មានកីឡាករអន្តរជាតិចំនួន ៤២៨ នាក់ ដែលភាគច្រើនមកពី សហរដ្ឋអាមេរិក អង់គ្លេស អូស្ត្រាលី បារំាង ជាដើម។ ចំណែកកីឡាករ-ការិនីខ្មែរចំនួន ២៧២ នាក់ ។

លោកបន្តថា ចលនាជិះកង់ គឺជាសកម្មភាពសង្គមមួយ ដែលជួយដល់កិច្ចការងារបរិស្ថាន កាត់បន្ថយផ្សែងពុលបរិយាកាស ពិសេសការជិះកង់ គឺជាលំហាត់ប្រាណមួយដ៏មានប្រសិទ្ធភាពដល់សុខភាព ទាំងផ្លូវកាយ និងផ្លូវចិត្ត។ នៅប្រទេសជឿនលឿនដូចជា នៅទីក្រុងឡុងដ៍ ប្រទេសអង់គ្លេស បានយកចិត្តទុកដាក់ដល់អ្នកជិះកង់ ដោយរៀបចំផ្លូវជិះកង់ ពិសេសអបផ្លូវ រថយន្តពីព្រោះប្រជាពលរដ្ឋអង់គ្លេស ចូលចិត្តការកម្សាន្ត និងហាត់ប្រាណតាមរយៈជិះកង់នេះ។

លោកបន្ថែមថា «ទិវាប្រណាំងកង់អន្តរជាតិអង្គរនេះ ជាព្រឹត្តិការណ៍មួយដ៏សំខាន់រួមចំណែកដល់ ការទាក់ទាញភ្ញៀវទេសចរមកទស្សនាទីក្រុងសៀមរាប-អង្គរ និងជាសកម្មភាពការពារបរិស្ថាន ឆ្ពោះទៅកាន់ការអភិវឌ្ឍន៍ ទីក្រុងសៀមរាប អង្គរក្លាយជាទីក្រុងទេសចរណ៍ស្អាត និងបៃតង (Eco-City) នាពេលអនាគត»។

ក្នុងឱកាសនោះលោកនុត សាអាន ក៏បានថ្លែងអំណរគុណ ដល់អង្គការភូមិគោលដៅអន្តរជាតិ (Village Focus International) ដែលបានឧបត្ថម្ភ គំាទ្រ និងខិតខំប្រឹងប្រែងយ៉ាងសកម្ម សហការជាមួយសហព័ន្ធខ្មែរ កីឡាទោចក្រយានក្នុងការរៀបចំ ការប្រកួតកីឡាប្រណាំងកង់ ជាច្រើនឆ្នាំកន្លងមកនេះ។

គួរបញ្ជាក់ថា ចំណែកវិញ្ញាដែលត្រូវដាក់ ឲ្យប្រកួតមានចំនួន៣វិញ្ញាសា សម្រាប់កង់ ២ប្រភេទ (កង់កួក  និងកង់ដៃត្រង់) ។ វិញ្ញាសាទាំង៣នោះរួមមាន  វិញ្ញាសាចម្ងាយ១០០គីឡូម៉ែត្រ និងវិញ្ញាសាចម្ងាយ ៣០គីឡូម៉ែត្រ ជាវិញ្ញាសាដែលត្រូវទទួលបានរង្វាន់អនុស្សាវរីយ៍ ចំណែកវិញ្ញាសាមួយទៀត គឺចម្ងាយ ១៧គីឡូម៉ែត្រជាវិញ្ញាសាសម្រាប់ប្រកួត លក្ខណៈកម្សាន្ដ និងអបអរការប្រកួត៕

ព្រះសីហនុ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា អមដោយមន្រ្តីជាន់ខ្ពស់ នៃរាជរដ្ឋាភិបាល កម្ពុជាជាច្រើនរូប នៅព្រឹកថ្ងៃសៅរ៍ ទី០១ ខែធ្នូ ឆ្នាំ២០១២នេះ បានអញ្ជើញជាអធិបតីបើកសម្ពោធដាក់ ឲ្យដំណើរការ «ភូមិកុមារអារុណរះ» ស្ថិតនៅក្នុងខេត្តព្រះសីហនុ។

«ភូមិកុមារអារុណរះ» នេះ ជាមជ្ឈមណ្ឌលជួយសង្រ្គោះ និងចិញ្ចឹម កុមាកំព្រា ពិការ ព្រមទាំង កុមារ ដែល កំពុងផ្ទុក និងកើតមេរោគអេដស៍។ «ភូមិកុមារអារុណរះ» ត្រូវបានបង្កើតឡើង ដោយចំណាយថវិកាជាង ២លានដុល្លារ។

នៅក្នុងពិធីសម្ពោធដាក់ឲ្យដំណើរការនេះ មានការស្វាគមន៍ និងសាទរ ព្រមទាំងចូលរួមពីប្រជាពលរដ្ឋ ជាច្រើនរយគ្រួសារនៅក្នុងខេត្ត មន្រ្តីអាជ្ញាធរតាមមន្ទីរសា្ថប័ននានា ព្រមទាំងកម្លាំងប្រដាប់អាវុធជាច្រើន រូបទៀត៕

ហំាប៊ែគ៍៖ លោក Henry Kissinger ដែលកំពុង ញញឹមនឹកឃើញនូវអនុស្សាវរីយ៍ដ៏ល្អ ដោយ បាននិយាយថា «ទីក្រុង Hamburg ចំពោះខ្ញុំ គឺជាអារម្មណ៍ដ៏សំខាន់ធំធេង ដោយសារតែ លោក Helmut និងខ្ញុំ បានជួបគ្នានៅទីនេះ កាលពី៥៥ឆ្នាំកន្លងទៅ ដែលនៅគ្រានោះ ពេលដែលគាត់ជាក្មេងពូកែសន្យា»។

ទោះបីជាយ៉ាងណាក៏ដោយលោក Helmut Schmidt មិនបានយល់ព្រមជាមួយមិត្តភក្តិចាស់របស់គាត់ទេ ដោយសារតែគាត់ តែងតែជំទាស់នៅក្នុងការ ជួបប្រទះរបស់ពួកគេដំបូងនៅក្នុងឆ្នាំ១៩៥៧ នៅឯសាកល វិទ្យាល័យហាវើត ដែលជាកន្លែងពួកគេជជែករកខុសត្រូវអំពីយុទ្ធសាស្ត្រនុយក្លេអ៊ែរ។ ប៉ុន្តែរដ្ឋបុរសដ៏គួរឲ្យ គោរពដ៏ខ្ពង់ខ្ពស់ទាំងពីររូបនេះ បានមកកាន់ទីនេះ នៅថ្ងៃព្រហស្បតិ៍ មិនគ្រាន់តែបន្តនូវមិត្តភាព ការគោ រព ដ៏យូរលង់ប៉ុណ្ណោះទេ។ ពួកគេត្រូវបានអូសទាញ ឲ្យមកកាន់ទីនេះ ដោយសារតែផលប្រយោជន៍រួមនៅ ក្នុងប្រទេសចិន ដែលប្រទេសមួយនេះ បានដើរតួនាទីយ៉ាងធំនៅក្នុងអាជីពនយោបាយរបស់ពួកគេ។

លោក Kissinger វ័យ៨៩ឆ្នាំ ជាអតីតរដ្ឋមន្រ្តីក្រសួងការបរទេសសហរដ្ឋអាមេរិក ខណៈដែលលោក Schmidt វ័យ ៩៣ឆ្នាំ ជាអតីតអធិការបតីអាល្លឺម៉ង់។ អ្នកនយោបាយចូលនិវត្តន៍ទាំងពីររូបនេះ នៅតែ រក្សាបាននូវឥទ្ធិពលយ៉ាងធំធេងក្នុងឋានៈជាអ្នកនិពន្ធ នៅក្នុងប្រទេសរៀងៗខ្លួន របស់ពួកគេ ថែមទាំង រឿងនយោបាយក្នុងពិភពលោកផងដែរ ជាមួយនិងការបោះពុម្ភសៀវភៅជាច្រើន ស្តីអំពីប្រទេសចិនរយៈ ពេលប៉ុន្មានឆ្នាំថ្មីៗនេះ។

ដូច្នោះវាគ្រាន់តែជាការពិភាក្សាគ្នាជាធម្មតាមួយជាមួយអ្នកជំនាញទាក់ទងនឹងប្រទេសចិន ដ៏ខ្លាំងទាំងពីរ រូប ដោយបានចាប់ផ្តើមលើកឡើង នៅក្នុងសន្និសីទពាណិជ្ជកម្មអឺរ៉ុប-ចិន ដ៏ធំបំផុតរបស់អឺរ៉ុប ដែលត្រូវ បានគេហៅថា «កិច្ចប្រជុំកំពូល Hamburg ក្រោមប្រធានបទៈ ចិន និងអឺរ៉ុប ជួបគ្នា» ដែលព្រឹត្តការណ៍ នេះ មានរយៈពេលពីរថ្ងៃនៅថ្ងៃព្រហស្បតិ៍ និងថ្ងៃសុក្រ។

នៅលើប្រធានបទដ៏ក្តៅ នៃការអភិវឌ្ឍរបស់ប្រទេសចិន ដែលបានឋិតក្រោមការគ្រប់គ្រងរបស់មេដឹកនាំ ថ្មីរបស់ប្រទេសខ្លួន ដែលទាំងលោក Kissinger និងលោក Schmidt រំពឹងទុកនូវការបន្តគោលនយោ បាយក្នុងប្រទេស និងគោលនយោបាយក្រៅប្រទេសរបស់ប្រទេសចិន ដែលលោក Kissinger បាននិយាយថា មេដឹកនាំថ្មី ប្រឈមមុខនូវការបង្កើតនូវកាលៈទេសៈថ្មី នៅក្នុងសង្គមរបស់ប្រជាជនចិន ដែល រួមមានការប្រឈមមុខគ្នារវាងតំបន់តាមឆ្នេរសមុទ្រ ដែលមានជីវភាពល្អប្រសើរ និងតំបន់ជនបទ ដែល កំពុងអភិវឌ្ឍ។

លោក Kissinger បាននិយាយថា «សម័យកាល ដែលឋិតនៅក្រោមការគ្រប់គ្រងរបស់មេដឹកនាំថ្មី និង ក្លាយទៅជាសម័យកាលជាប្រវត្តិសាស្រ្ត ដោយសារតែលក្ខខណ្ឌថ្មីទាមទារនូវការប្រែប្រួលដ៏សំខាន់»។

ក្នុងឋានៈជារដ្ឋបុរសលោកខាងលិចជាលើកដំបូង ដែលបានបើកទ្វារការទូតជាមួយសាធារណរដ្ឋប្រជាមា និតចិន រដ្ឋបុរសទាំងពីររូបនេះ បានសម្តែងនូវការកោតសរសើរនូវការអភិវឌ្ឍយ៉ាងរហ័សរបស់ប្រទេសចិន។

លោក Kissinger បានទៅដល់ទីក្រុងប៉េកាំងនៅក្នុងឆ្នាំ១៩៧១ ដើម្បីធ្វើការបង្កើតឡើងវិញនូវពន្លឺដ៏ត្រចះ ត្រចង់សម្រាប់ការបង្កើតនូវទំនាក់ទំនង ការទូតរវាងសហរដ្ឋអាមេរិក និងចិន។ នៅក្នុងឆ្នាំដដែលនោះ លោក Schmidt ក្នុងឋានៈជារដ្ឋមន្រ្តីការពារជាតិអាល្លឺម៉ង់ លោកបានជំរុញឲ្យលោកអធិការបតី Willy Brandt ធ្វើទំនាក់ទំនងបោកប្រាស់ជាផ្លូវការជាមួយចិន។ ក្នុងឋានៈជាអធិការបតី លោក Schmidt បាន ធ្វើដំណើរទស្សនកិច្ចជាលើកដំបូង របស់លោកទៅកាន់ទីក្រុងប៉េកាំង ប្រទេសចិន នៅក្នុងឆ្នាំ១៩៧៥។

នៅចំពោះមុខអ្នកស្តាប់ដ៏ច្រើន លោក Schmidt បានគូសបញ្ជាក់នូវលក្ខណៈស្នេហាសន្តិភាពរបស់ ប្រទេសចិន នៅពេលដែលភស្តុតាងបានឋិតនៅពាសពេញជាប្រវត្តិសាស្រ្តរបស់ខ្លួន និងតាមរយៈសកម្ម ភាពផ្សេងៗ នៅក្នុងប៉ុន្មានទសវត្សរ៍ថ្មីៗនេះ។

អតីតអធិការបតីអាល្លឺម៉ង់រូបនេះ បាននិយាយថា «ប្រសិនបើយើងធ្វើការសម្លឹងទៅលើប្រវត្តិសាស្រ្តចិន ប្រទេសចិនមិនដែលធ្វើអាណានិគមលើប្រទេសដទៃណាឡើយ ហើយប្រទេសនេះ គ្មានទម្លាប់នៅក្នុង គោលនយោបាយបរទេសរបស់ខ្លួន ចាប់យកទឹកដី នៃប្រជាជនដទៃឡើយ ហើយខ្ញុំមិនជឿថា ចិននឹងមិន ទៅណាឆ្ងាយពីទម្លាប់នេះទេ»។

លោកបានទទួលស្គាល់នូវការកើនឡើងយ៉ាងឆាប់រហ័សនូវសេចក្តីក្លាហានមោះមុតនៅក្នុងប្រទេសចិន ចាប់តាំងពីឆ្នាំ១៩៧៨ ក្រោយពេលដែលអរិយធម៌ប្រទេសចិន បានទៅមុខក្នុងរយៈពេលនៃការចុះអាប់ ឱនក្នុងរយៈពេលបីសតវត្សរ៍ ឬច្រើនសតវត្សរ៍ ពេលដែលអរិយធម៌ នៃប្រទេសនេះ បានសាបរលាបដោយ អរិយធម៌បុរាណដទៃ។

លោក Schmidt បានបង្ហាញនូវសុទិដ្ឋិនិយម សម្រាប់ការអភិវឌ្ឍ និងការកែប្រែថ្មីរបស់ប្រទេសចិន។

លោកបាននិយាយដោយពាក្យកំប្លែងលេងថា «ការធ្វើឲ្យជឿទុកចិត្ត នៃការខិតខំប្រឹងប្រែងយ៉ាងខ្លាំងក្លា របស់ប្រទេសចិន ក្នុងការអប់រំ និងស្រាវជ្រាវកាលពី៣០ឆ្នាំមុន។ ខ្ញុំនឹងមិនរាប់បញ្ចូលថា ច្រើនជាងពួក គេបានទុកមនុស្សនៅក្នុងអាកាស ហើយពួកគេប្រហែលជាអាចនឹងបង្កើតថ្នាំ ដើម្បីព្យាបាលជំងឺដែលគ្មាន មូលហេតុច្បាស់លាស់ផងដែរ»។

មិនខុសពីលោក Schmidt លោក Kissinger បានច្រានចោលនូវគំនិតចំពោះភាពរីកចម្រើនរបស់ចិន ហើយចិនប្រហែលជាអាចឈានទៅរកការប្រឈមមុខដាក់គ្នា ជាមួយប្រទេសលោកខាងលិច ជាពិសេស ជាមួយសហរដ្ឋអាមេរិក ។

លោកបានបន្តថា «យើងដឹងថា អ្វីដែលជាផលវិបាក នៃជម្លោះរវាងប្រទេសមហាអំណាចនាពេលបច្ចុប្បន្ន នេះ ប្រហែលជាអាចឈានទៅរកជម្លោះដោយប្រើយោធា អីចឹងហើយរឿងមួយនេះ ខ្ញុំតែងតែច្រានចោល ជានិច្ច»។

ទោះបីជាយ៉ាងណាក៏ដោយ គាត់បាននិយាយថា វាជាការប្រកួតប្រជែងគ្នាយ៉ាងខ្លាំងសម្រាប់ទាំងរដ្ឋវ៉ាស៊ីន តោន និងទីក្រុងប៉េកាំង ក្នុងគោលបំណងស្វែងរកដៃគូ នៃកិច្ចសហប្រតិបត្តិការ រកដំណោះស្រាយបញ្ហា ផ្សេងៗ និងដើម្បីបំបាត់ចោលនូវគំនិតដោយប្រើកម្លាំងយោធារវាងប្រទេសមហាអំណាចទាំងពីរនេះ។

លោក Kissinger បាននិយាយថា «ខ្ញុំជឿជាក់ទៅលើថ្នាក់ដឹកនាំប្រទេសទាំងពីរ ដែលមានកាតព្វកិច្ច ដើម្បីអប់រំមនុស្សឲ្យក្លាយទៅជាគំរូ នៃកិច្ចសហប្រតិបត្តិការ ពីព្រោះតែខ្ញុំមិនសម្លឹងឃើញតែប្រយោជន៍ ពេក ចំពោះប្រទេសទាំងពីរនេះ ឬក៏មិនធ្វើឲ្យមានជម្លោះនៅពេញពិភពលោកនោះទេ»។

ការគោរព និងកិច្ចសហប្រតិបត្តិការ

ចិនបានជ្រើសរីសយកមាគ៌ា នៃការអភិវឌ្ឍ។ ក្រុមអ្នកជំនាញបានឲ្យដឹងថា រដ្ឋគួរតែបង្ហាញនូវការគោរព ចំពោះការជៀសវាង និងការបង្កឧបសគ្គជាមួយកិច្ចការផ្ទៃក្នុង របស់ប្រទេសដទៃទៀត។

លោក Schmidt បាននិយាយថា «ខ្ញុំជាមនុស្សហួសសម័យហើយ ខ្ញុំជឿជាក់ទៅលើច្បាប់អន្តរជាតិ ដែល បានរៀបចំឡើងនូវវិមានសន្តិភាព Westphalia កាលពីប្រហែល ៤០០ឆ្នាំកន្លងទៅ»។

លោក Kissinger បានពន្យល់បន្ថែមទៀតថា គ្មានគោលការណ៍ជ្រៀតជ្រែកផ្ទៃក្នុង ត្រូវបានគេអភិវឌ្ឍន៍ នូវសន្តិភាព Westphalia បានឈានទៅដល់ការបញ្ចប់សង្រ្គាម៣០ឆ្នាំ ដែលបានបណ្តាលមកពីការបាត់ បង់ធនធានមនុស្សយ៉ាងច្រើននៅសហភាពអឺរ៉ុប។

គាត់បាននិយាយថា «គោលការណ៍នេះ ត្រូវបានបង្កើតឡើងដើម្បីការពារមហន្តរាយ ពីការកើតមានឡើង ជាថ្មីម្តងទៀត»។ «វាត្រូវបានពឹងផ្អែកទៅលើបទពិសោធន៍ ដែលអាចកើតមានឡើងនៅពេលណាប្រទេស ទាំងនោះ ចូលរួមដើម្បីផ្លាស់ប្តូររចនាសម្ព័ន្ធផ្ទៃក្នុងរបស់ប្រទេសទាំងអស់នោះ»។

លោក Schmidt បាននិយាយថា អ្នករាល់គ្នា ត្រូវតែសិក្សាអំពីរបៀបគោរពចំពោះមាគ៌ាផ្សេងៗគ្នា ដោយ ជ្រើសរើសយកនូវអ្វីៗផ្សេងៗទៀត។ អតីតអធិការបតីអាល្លឺម៉ង់ បានធ្វើការសន្និដ្ឋានថា «ការគោរព និង កិច្ចសហប្រតិបត្តិការទាំងពីរនេះ គឺជាពាក្យគន្លឹះដែលពិភពលោក គួរតែសិក្សារៀនសូត្រ តាមដែលអាច ធ្វើទៅបាន»។

(លោក Kissinger ជាអតីតរដ្ឋមន្រ្តីការបរទេសសហរដ្ឋអាមេរិក នៃរដ្ឋការរបស់អតីតប្រធានាធិបតី និច សុន ដែលបាននាំឱ្យមានការទម្លាក់ គ្រាប់បែកនៅក្នុងប្រទេសកម្ពុជា នាទសវត្សរ៍ឆ្នាំ១៩៧០ ដោយបានគាំទ្រ របបសាធារណរដ្ឋខ្មែរ)។

លោក Henry Kissinger និង លោក Helmut Schmidt