ប្រជាពលរដ្ឋ នៅស្រុកពាមជរ៍ ទទួលការវះកាត់ភ្នែក ដោយឥតគិតថ្លៃ

ព្រៃវែងៈ ប្រជាពលរដ្ឋចំនួន ៤៤ នាក់ ដែលមានជំងឺភ្នែក រស់នៅក្នុងស្រុកពាមជរ ខេត្តព្រៃវែង ត្រូវបានទទួល ធ្វើ ការវះកាត់ភ្នែក ដោយឥតគិតថ្លៃ ពីមជ្ឈមណ្ឌលជាតិ ស្តារលទ្ធភាព ពលកម្ម ជនពិការគៀនឃ្លាំង រាជធានីភ្នំពេញ តាមរយៈលោកបណ្ឌិតរដ្ឋ ជាម យៀប សមាជិកគណៈកម្មការ អចិន្ត្រៃយ៍ កណ្តាល គណបក្សប្រជាជន កម្ពុជានិងជាអ្នកតំណាងរាស្រ្ត មណ្ឌលខេត្ត ព្រៃវែង កាលពីព្រឹកថ្ងៃទី១៤ ខែមីនា ឆ្នាំ២០១៣ ។

លោក ឃន ជឺ អនុប្រធាន ក្រុមយុវជន ស្រុកពាមជរ តំណាងឲ្យ លោក គឹម សន្តិភាព អនុរដ្ឋ លេខាធិការ ក្រសួងយុត្តិធម៌ និងជាអនុប្រធាន ក្រុមប្រចាំការ ក្រុមការងារ ថ្នាក់កណ្តាល ចុះជួយស្រុកពាមរក៍-ពាមជរ៍ បានឲ្យដឹងថា ប្រជាពលរដ្ឋទាំង ៤៤ នាក់នេះ មកពីបណ្តាឃុំនានា ស្រុកពាមជរ៍ ខេត្តព្រៃវែង ។

លោក ជាម យៀប បានមានប្រសាសន៍ថា ការនាំប្រជាពលរដ្ឋ មកធ្វើការវះភ្នែក នាពេលនេះដោយ មើលឃើញ ពីទុក្ខលំបាក របស់ប្រជាពលរដ្ឋ ដែលមានជំងឺភ្នែក មានការពិបាក ក្នុងការប្រកបរបរ ចិញ្ចឹមជីវិតប្រចាំថ្ងៃ និង ដោយមានការជួយឧបត្ថម្ភ ពីមេជ្ឈមណ្ឌលវះកាត់កុមារ គៀនឃ្លាំង ហៅ កាត់ថាCSC ។

លោកបានបន្តថា រាល់សកម្មភាពមនុស្សធម៌ គឺជាការចូលរួមចំណែក យ៉ាងសកម្ម ក្នុងការយក ចិត្តទុក ដាក់ពីបញ្ហាសុខភាព របស់បងប្អូនប្រជាពលរដ្ឋ និងជាការចូល រួម ចំណែក ក្នុងការកាត់បន្ថយ ភាពក្រីក្រ ស្របទៅនឹងគោលនយោបាយ របស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋ មន្រ្តី នៃព្រះរាជាណាចក្រកម្ពុជា ដែលជានិច្ចកាល សម្តេចតែងតែយកចិត្តទុកដាក់ របស់ប្រជាពលរដ្ឋទូទាំងប្រទេស ។

ទទ្ទឹមនោះដែរ លោក ជាម យៀប បានថ្លែងអំណរគុណ ចំពោះការយកចិត្តទុកដាក់ របស់ក្រុម ការងារ និងក្រុមគ្រូពេទ្យ នៃមជ្ឈមណ្ឌលជាតិ ស្តារលទ្ធភាពពលកម្ម ជនពិការគៀនឃ្លាំង ដែលបាន រួមសហការ គ្នា ជួយព្យាបាលជំងឺភ្នែក ជូនប្រជាពលរដ្ឋ ដោយឥតគិតថ្លៃ នាពេលនេះ ហើយលោកបានផ្តាំផ្ញើ ឲ្យបងប្អូនទាំងអស់ យកចិត្តទុកដាក់ ថែទាំភ្នែកឲ្យ បានល្អព្រោះកែវភ្នែក គឺជាកត្តាយ៉ាងសំខាន់ ក្នុងការ ប្រកបរបរចិញ្ចឹមជីវិតរស់នៅប្រចាំថ្ងៃ របស់បងប្អូន ៕