ផ្ទះចំនួន ១៦០.០០០ខ្នង ក្នុងតំបន់ក្រីក្រ ទទួលបាន អគ្គិសនីប្រើប្រាស់

ប៉េកាំង, (ស៊ីនហួ)៖ គណៈកម្មាធិការនិយត កម្មអគ្គិសនីរបស់រដ្ឋ បានឲ្យដឹងនៅថ្ងៃអង្គារ ទី១៣ ខែវិច្ឆិកា ថា មាន លំនៅដ្ឋានជិត ១៦០.០០០ខ្នង សុទ្ធតែជាតំបន់ក្រីក្រ នៅក្នុងប្រទេសចិន បានទទួលអគ្គិសនីប្រើប្រាស់ចាប់តាំង ពីខែតុលា ឆ្នាំមុន។

យោងតាមសេចក្តីថ្លែងការណ៍ខ្លីមួយ បានបង្ហោះតាមវេបសាយរបស់ (SERC's) បានឲ្យដឹងថា គណៈកម្មាធិការ បានចាប់ផ្តើមយុទ្ធនាការនៅក្នុងខែតុលា ឆ្នាំ២០១១ ក្នុងគោលបំណង ជំរុញឲ្យអ្នកចែកចាយថាមពលអគ្គិសនី នៅតាមជនបទ ដើម្បីបំរើសេវាកម្មអគ្គិសនីឲ្យកាន់តែប្រសើរឡើង សម្រាប់បម្រើជូនអ្នកភូមិទីទ័លក្រ តាមជនបទ ដាច់ស្រយាល តាមរយៈការពង្រីកតបណ្តាញអគ្គិសនី ដោយទាញយកពន្លឺព្រះអាទិត្យ និងកម្លាំងខ្យល់។

យោងតាមការអភិវឌ្ឍថាមពលគម្រោង៥ឆ្នាំ លើកទី១២ (២០១១-២០១២) បានចេញផ្សាយកាលពីខែមុននេះ ឲ្យដឹងថា រដ្ឋាភិបាលបានវិនិយោគ ដោយចំណាយជាប្រាក់ជាង ៥៥០ ពាន់លានយន់ ស្មើនឹង (៨៨,២៥ពាន់ លានដុល្លារអាមេរិក) ក្នុងគម្រោងផលិតថាមពលឲ្យកាន់ តែរីកចម្រើននៅតាមជនបទ ចាប់ពីឆ្នាំ២០០៦ ដល់ ឆ្នាំ២០១០ ដោយតម្រូវឲ្យអ្នកភូមិទាំងអស់គ្នា មានអគ្គិសនីប្រើប្រាស់គ្រប់គ្រាន់៕