រថយន្ត​ មិនស្គាល់ម៉ាក បុកអ្នកជិះម៉ូតូ២នាក់ ស្លាប់ភ្លាមៗ នៅ ស្រុកមោងឬស្សី

បាត់ដំបង ៖ រថយន្ត មិនស្គាល់ម៉ាក១គ្រឿង បានបើកបុក អ្នកជិះម៉ូតូ២នាក់ ស្លាប់ភ្លាមៗ កាលពីវេលាម៉ោង២៣និង៣០នាទី យប់ថ្ងៃទី១ ខែវិច្ឆិកា ឆ្នាំ២០១៤ នៅតាមបណ្តោយផ្លូវជាតិលេខ៥ ស្ថិតនៅ ក្រុមទី១ភូមិកាឡោមភ្លុក ឃុំព្រៃស្វាយ ស្រុកមោងឬស្សី សពជនរងគ្រោះនគរបាលចរាចរណ៍ស្រុក ជួយដឹកយកទៅផ្ទះដើម្បីធ្វើបុណ្យតាមប្រពៃណី ឯរថយន្តបង្កបានបើករត់គេចខ្លួនបាត់។

លោក សោម រ៉ាវុធ មន្រ្តីអាវុធហត្ថស្រុកមោងឬស្សីបានឱ្យដឹងថា កាលពីវេលាម៉ោង២៣និង៣០នាទីយប់ ថ្ងៃទី១ ខែវិច្ឆិកា ឆ្នាំ២០១៤ នៅចំណុចតាមបណ្តោយផ្លូវជាតិលេខ៥ ស្ថិតនៅក្រុមទី១ ភូមិកាឡោមភ្លុក ឃុំព្រៃស្វាយ ស្រុកមោងឬស្សី មានរថយន្តមិនស្គាល់ម៉ាកបានបើកពីទិសភ្នំពេញមកបាត់ដំបង ពេលមកដល់ចំណុចកើតហេតុ បានបុកម៉ូតូ១គ្រឿងម៉ាក ហុងដាឌ្រីម ស៊េរី០១៤ ពណ៌ខ្មៅពាក់ស្លាក លេខបាត់ដំបង1R-9348 ក្នុងទិសច្រាស់ ទិសគ្នា បណ្តាលឱ្យអ្នកជិះម៉ូតូ២នាក់ បាក់ដាច់ជើង ស្លាប់ទាំង២នាក់ភ្លាមៗនៅកន្លែងកើតហេតុ។

សមត្ថកិច្ចបានបញ្ជាក់ថា ជនរងគ្រោះដែលបានស្លាប់នោះមាន៖ទី១ឈ្មោះ ភន ចាប ភេទប្រុសអាយុ១៩ឆ្នាំ អ្នកបើកបរ ទី២ឈ្មោះ ធា ថុន ភេទប្រុសអាយុ១៩ឆ្នាំ ទាំង២នាក់នេះជាសិស្ស រស់នៅភូមិទួលធ្នង់ ឃុំព្រៃស្វាយ ស្រុកមោងឬស្សី។

បន្ទាប់ពីកើតហេតុហើយ សមត្ថកិច្ចនគរបាលចរាចរណ៍ស្រុក បានមកវាស់វែងកន្លែងកើតហេតុ និងជួយដឹកសព ជនរងគ្រោះទាំង២នាក់យកទៅប្រគល់ឱ្យក្រុមគ្រួសារ ធ្វើបុណ្យតាមប្រពៃណី៕