ហ្វ្រីថោន៖ ប្រធានាធិបតីសេរ៉ាឡេអូន បាននិយាយថា ប្រទេសនេះនឹងខាតបង់ថវិកាប្រហែល ៩២០លានដុល្លារអាម៉េរិក នៅក្នុងឆ្នាំ២០១៥នេះ ដោយសារតែ ផលប៉ះពាល់របស់ជំងឺអ៊ីបូឡា។
ទីភ្នាក់ងារព័ត៌មានចិន ស៊ិនហួ ចេញផ្សាយនៅរាត្រីថ្ងៃអង្គារ ទី១៧ ខែកុម្ភៈ ឆ្នាំ២០១៥ បានឲ្យដឹង ដោយផ្អែកតាមការលើកឡើង របស់ប្រធានាធិបតីសេរ៉ាឡេអូន លោក អៀននេស បាយ កូរ៉ូម៉ា លើកឡើងក្នុងកិច្ចប្រជុំតុមូល ស្តីអំពីវិស័យឯកជនថា ការខាតបង់នេះ គឺផ្នែកទៅលើការវិភាគផ្នែកសេដ្ឋកិច្ច។
លោកបានបង្ហាញឲ្យដឹងថា ផលប៉ះពាល់នេះ បានជះឥទ្ធិពលដល់គ្រប់វិស័យទំាងអស់ នៃសេដ្ឋកិច្ចរបស់សេរ៉ាឡេអូន ក្នុងនោះមានវិស័យ កសិកម្ម, រ៉ែ, ទេសចរណ៍ ព្រមទំាងវិស័យឧស្សាហកម្មផងដែរ។
ប្រធានាធិបតីរូបនេះ បានបញ្ជាក់ថា សង្វាក់ផលិតកម្មគឺបានធ្លាក់ចុះ ២ភាគរយ ពីការព្យាករណ៍កំណើន ១០ភាគរយ, ឧស្សាហកម្មដឹកជញ្ជូនធ្លាក់ចុះដល់ ០,១ភាគរយ កាលពីឆ្នាំ២០១៤ ខណៈវិស័យទេសចរណ៍បានធ្លាក់ចុះយ៉ាងគំហុគគឺប្រហែល ៣០ភាគរយ ចាប់ពីខែឧសភា ដលខែកញ្ញា ឆ្នាំ២០១៤។
