រដ្ឋមន្ត្រីការទេសហ្វាំងឡង់​​ សន្យាជួយកម្ពុជា ក្នុងកិច្ចដំណើរការ អភិវឌ្ឍប្រទេស

ភ្នំពេញ៖នៅក្នុងជំនួបទ្វេភាគីជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណា ចក្រកម្ពុជា នៅរសៀលថ្ងៃទី ១៨ កុម្ភៈ នៅវិមានសន្តិភាព លោក អ៊ើគី ទួមីអូចា (Erkki Tuomioja) រដ្ឋមន្ត្រីការបរទេសហ្វាំងឡង់បានសន្យាជួយចូលរួមចំណែក ដល់កម្ពុជា ក្នុងកិច្ចដំណើរការអភិវឌ្ឍឲ្យកាន់តែប្រសើរឡើង ក៍ព្រោះតែការអភិវឌ្ឍនេះមានទំហំធំធេងណាស់សំរាប់កម្ពុជា។

លោក Erkki Tuomioja បានឲ្យដឹងថា ដំណើរទស្សនកិច្ច របស់ឯកឧត្តម មកកាន់កម្ពុជា នាពេលនេះ គឺដើម្បីអភិវឌ្ឍន៍ទំនាក់ទំនងរវាងប្រទេសទាំងពីរថែមមួយ ជំហានទៀត ព្រមជាមួយមានចំណាប់អារម្មណ៍យ៉ាងខ្លាំងចំពោះសេដ្ឋកិច្ចដែល កំពុងតែ មានភាពរស់រវើកនៅក្នុងព្រះរាជាណាចក្រកម្ពុជា នោះសោធគឺកំពុងតែមានមោទនភាព។ នេះបើតាមលោក អ៊ាង សុផល្លែត ជំនួយការសម្តេចតេជោនាយករដ្ឋមន្ត្រី បានប្រាប់អ្នកយកព័ត៌មាននៅក្រោយជំនួប។ លោករដ្ឋមន្ត្រីការបរទេសហ្វាំងឡង់ក៍បាន ស្នើសុំស្វែងយល់ពីសម្តេចតេជោ នាយករដ្ឋមន្ត្រី អំពីដំណើរការនៃការអភិវឌ្ឍរបស់ប្រទេសកម្ពុជាជាបន្តទៀត។

សម្តេចតេជោ នាយករដ្ឋមន្ត្រី ហ៊ុន សែន បានជំរាបជូនលោករដ្ឋមន្ត្រីការបរទេស ហ្វាំងឡង់ ពីប្រវត្តិសង្ខេបរបស់កម្ពុជា ដែលបានចាប់ផ្តើមពីបាតដៃទទេមក។ ពាក់ព័ន្ធ នឹងបញ្ហាសេដ្ឋកិច្ច សម្តេចបានបញ្ជាក់ថា កម្ពុជាបានដាក់គោលដៅកំណែទម្រង់ របស់កម្ពុជា លើវិស័យសេដ្ឋកិច្ច គឺធ្វើយ៉ាងណាជំរុញ ឱ្យមានកំណើនសេដ្ឋកិច្ច យ៉ាងតិច៧% ក្នុងរយៈពេលវែង និងកាត់បន្ថយ ភាពក្រីក្រឱ្យបានជាង១%ក្នុង១ឆ្នាំ និងជំរុញ កំណែទម្រង់លើវិស័យហិរញ្ញវត្ថុសាធារណៈ វិស័យតុលាការ ការប្រយុទ្ធប្រឆាំងអំពើពុករលួយ និងរដ្ឋបាលសាធារណៈ ហើយអ្វីដែលជាកត្តាសំខាន់ នោះ រាជរដ្ឋាភិបាល មានយទ្ធសាស្ត្រចតុកោណ និងអភិបាលកិច្ចល្អ ដែលជាឆ្អឹងខ្នង នៃយុទ្ធសាស្ត្រនេះ៕