សៀមរាប ៖ នៅថ្ងៃទី៦ ខែមេសា ឆ្នាំ២០១៥ ខាងមុខនេះ ដោយមានកិច្ចសហការ ជាមួយក្រសួងវប្បធម៌ និងវិចិត្រសិល្បៈ ព្រមទាំងសាលាបារាំង ចុងបូព៌ា អាជ្ញាធរជាតិអប្សរា នឹងរៀបចំឲ្យមានបទឧទ្ទេសនាម មួយ ស្ដីពី លទ្ធផលស្រាវជ្រាវថ្មី លើរមណីយដ្ឋានអង្គរ, ភ្នំគូលែន, និងកោះកេរ តាមរយៈបច្ចេកវិទ្យា LiDAR (ឡាយដា) ឆ្នាំ២០១២ និងផ្សព្វផ្សាយការ អនុវត្តគម្រោងនេះជំហ៊ានទី២ ហើយដែលគម្រោងនេះ នឹងពង្រីកទៅដល់ទីកន្លែងផ្សេងៗទៀត ដូចជា លង្វែក/ឧដុង្គ សម្បូរព្រៃគុក, ព្រះខ័នកំពង់ស្វាយ, ភ្នំគូលែន, និងប្រាសាទបន្ទាយឆ្មារ ។
ហើយតាមរយៈការប្រកាសព័ត៌មានដោយអាជ្ញាធរជាតិអប្សរា ការធ្វើបទឧទ្ទេសនាមនេះ នឹងរៀបចំ ប្រព្រឹត្តទៅនៅទីស្នាក់ការ កណ្ដាលរបស់អាជ្ញាធរជាតិអប្សរា ក្នុងសាលសន្និសីទអង្គរ ។ តាមការឲ្យដឹងពីមន្ត្រីអាជ្ញាធរជាតិអប្សរា សាលសន្និសីទ អង្គរនេះ ជាទីកន្លែងប្រជុំជារៀងរាល់ឆ្នាំ នៃគណៈកម្មាធិការអន្តរជាតិ អាយស៊ីស៊ី-អង្គរ(ICC-Angkor) ហើយអាចដាក់ចំណុះរហូតជាង ៥០០នាក់ឯណោះ។
រីឯអ្នកចូលរួមវិញ គឺអាជ្ញាធរជាតិអប្សរា សូមអញ្ជើញអ្នកសារព័ត៌មានជាទូទៅទាំងភ្នំពេញ និងបណ្ដាខេត្តផ្សេងៗ មន្ត្រីរាជការនៅសាលាខេត្តសៀមរាប និងតាមមន្ទីរផ្សេងៗ សិស្ស និស្សិត ព្រះសង្ឃ ព្រមទាំងមគ្គុទ្ទេសទេសចរណ៍ ហើយអ្នកពាក់ព័ន្ធផ្សេងៗទៀតប្រមាណ ៣៥០នាក់។
ចំពោះ លទ្ធផលនៃការស្រាវជ្រាវតាមបច្ចេកវិទ្យា LiDAR (ឡាយដា)វិញ គឺថា បច្ចេកវិទ្យានេះ ជា បច្ចេកវិទ្យាទំនើប ដោយគេយកប្រអប់របស់វា មកផ្អោបជាមួយឧទ្ធម្ភាចក្រ ហើយបាញ់កាំរស្មីឡាស៊ែ ចុះមកក្រោមដោយឆ្លងកាត់់ដើមឈើ និងព្រៃព្រឹក្សារហូតមកដល់ដី ហើយកាំរស្មីនេះបានឡងឡើងមកលើវិញ ដោយនាំមកជាមួយនូវទិន្នន័យជាក់ស្ដែង នៃស្ថានភាពដី ក្រោមដី និងដើមឈើ ។ អញ្ចឹងការឆ្លុះថតដោយប្រើកាំរស្មីឡាស៊ែ បែបនេះ អាចឲ្យអ្នកស្រាវជ្រាវ យល់ដឹងអំពីសណ្ឋានដី រុក្ខជាតិ និងផែនទីបុរាណវិទ្យានៃរមណីយដ្ឋានអង្គរ ប្រកបដោយសុក្រឹតភាពខ្ពស់។
ពិសេសជាងនោះទៅទៀត បើតាមការឲ្យដឹងពីមន្ត្រីអាជ្ញាធរជាតិអប្សរា បច្ចេកវិទ្យា LiDAR (ឡាយដា) នេះ បានផ្ដល់លទ្ធផលហួសពីការស្មានទុក ដោយផ្ដល់នូវទិន្នន័យសំខាន់ៗដែលអ្នកស្រាវជ្រាវ ក៏ដូចជាអ្នកបុរាណវិទ្យា អាចធ្វើការសន្និដ្ឋានបាន ថា ក្នុងកំឡុងពេល នៃអាណាចក្រខ្មែរ ការវិវត្តផ្នែកវិស្វកម្ម ការរៀបចំរចនាសម្ព័ន្ធទឹក ការពង្រីកក្រុងអង្គរ ព្រមទាំងការប្រែប្រួលអាកាសធាតុពេលនេះ មានលក្ខណៈយ៉ាងដូចម្ដេចខ្លះ?
នេះគឺគ្រាន់តែជាខ្លឹមសារមួយចំនួនដែលពាក់ព័ន្ធនឹងបទឧទ្ទេសនាម ស្ដីពី លទ្ធផលនៃការស្រាវជ្រាវនេះ សូមអញ្ជើញ មកចូលរួមស្ដាប់ទាំងអស់គ្នា នៅព្រឹកថ្ងៃទី៦ ខែមេសា ឆ្នាំ២០១៥ ហើយកម្មវិធីនេះ ក៏មានសម្រាប់អ្នកសារព័ត៌មានផងដែរ ជាពិសេសទៀតនោះ អ្នកសារព័ត៌មានទាំងអស់ នឹងបានចុះទៅពិនិត្យជាក់ស្ដែងសម្ភារៈ LiDAR (ឡាយដា) នៅព្រលានយន្តហោះអន្តរជាតិសៀមរាប ព្រមទាំងទស្សនកិច្ចនៅក្នុងតំបន់រមណីយដ្ឋានអង្គរផងដែរ ៕
