ញូដេលី៖ ក្រុមហ៊ុន Rostech State Corporation របស់ប្រទេសរុស្ស៊ី បានចុះហត្ថលេខាលើ កិច្ចព្រមព្រៀងមួយ ជាមួយនឹងក្រុមហ៊ុន HAL របស់ប្រទេសឥណ្ឌា ដើម្បីបើកដំណើរការ ផលិតឧទ្ធម្ភាគចក្រ យោធាប្រភេទ Kamov នៅក្នុងទឹកដីឥណ្ឌា ផ្ទាល់តែម្តង។ នេះបើតាម សារព័ត៌មានឥណ្ឌា ចេញផ្សាយនៅថ្ងៃពុធ ទី៣០ ខែធ្នូ ឆ្នាំ ២០១៥។
កិច្ចព្រមព្រៀង ចុងក្រោយនេះ មានតម្លៃជាទឹកប្រាក់ ១ពាន់លានដុល្លារសហរដ្ឋអាមេរិក ដែលគ្រោងផលិតឲ្យបាន នូវឧទ្ធម្ភាគចក្រចំនួន ២០០ គ្រឿង ប្រភេទ Kamov 226T light helicopters។ នាយកប្រតិបត្តិក្រុមហ៊ុន រុស្ស៊ីលោក Sergei Chemezov បាននិយាយថា “ការផលិតឧទ្ធម្ភាគចក្រ នឹងមានការចូលរួមគ្នា រវាងក្រុមហ៊ុនបច្ចេកវិទ្យា រុស្ស៊ី និង ឥណ្ឌា។”
គួរបញ្ជាក់ថា នេះជាលើកទីមួយហើយ ដែលឥណ្ឌា និង រុស្ស៊ី បានរួមគ្នាលើវិស័យបច្ចេកវិទ្យា កម្រិតខ្ពស់ ដែលវា សមស្របទៅតាម គោលដៅរបស់រដ្ឋាភិបាលរបស់ លោកនាយករដ្ឋមន្ត្រី ណារិនដ្រា ម៉ូឌី តាំងពីឆ្នាំ ២០១៤ ថាត្រូវតែបង្កើនផលិតផល ដែលផលិតនៅលើទឹកដីឥណ្ឌា “Made in India” គ្រប់ប្រភេទនៃទំនិញទាំងអស់៕
