សេអ៊ូល៖ ប្រេសិតអាមេរិក បាននិយាយនៅ ថ្ងៃព្រហស្បតិ៍ ទី២៤ ខែមករា ជាថ្ងៃតែមួយដែល កូរ៉េខាងជើង សន្យាថា ដំណើរការសាកល្បង នុយក្លេអ៊ែររបស់ខ្លួន គឺសំដៅទៅរដ្ឋាភិបាល ទីក្រុង វ៉ាស៊ីនតោនថា ការ សាកល្បងនុយក្លេអ៊ែរ ពីសំណាក់ប្រទេស កូរ៉េខាងជើង នឹងក្លាយទៅជាក្តីអស់ សង្ឃឹមយ៉ាងខ្លំាង និងការ បោះជំហាន ដ៏ខាតបង់មួយ។

យោងតាមទីភ្នាក់ងារព័ត៌មានចិន ស៊ិនហួ បានឲ្យដឹងនៅថ្ងៃព្រហស្បតិ៍ ទី២៤ ខែមករា ឆ្នាំ២០១៣ថា លោក គ្លីនដេវីស ប្រេសិតអាមេរិក ទទួលបន្ទុកនយោបាយប្រទេស កូរ៉េខាងជើង បានមកដល់ ទីក្រុងសេអ៊ូល កាលពីថ្ងៃពុធ សម្រាប់ដំណើរទស្សនកិច្ច រយៈពេលបីថ្ងៃនៅអាស៊ី ក្នុងគោលបំណង ដើម្បីពិភាក្សា តាម ដានសកម្មភាព ក្នុងការពង្រីកការដាក់ ទណ្ឌកម្មបន្ថែម របស់ក្រុមប្រឹក្សា អង្គការសហប្រជាជាតិ ចំពោះ កូរ៉េខាងជើង បន្ទាប់ពីប្រទេសនេះបានបាញ់ បង្ហោះផ្កាយរណប កាលពីថ្ងៃទី១២ ខែធ្នូ កន្លងទៅនេះ។

នៅមុននេះដែរ កូរ៉េខាងជើង បានការពារសិទ្ធិរបស់ខ្លួនដោយអះអាងថា ការបាញ់បង្ហោះ ផ្កាយរណប គឺក្នុង គោលបំណងដើម្បី សន្តិភាពប៉ុណ្ណោះ ខណៈទង្វើនេះមានការ រិះគន់ពី សហរដ្ឋអាមេរិក និងកូរ៉េខាងត្បូង ដោយបានចាត់ទុកថា ការបាញ់បង្ហោះនោះដើម្បី សាកល្បងមីស៊ីល រយៈចម្ងាយឆ្ងាយ និងនុយក្លេអ៊ែរ សុទ្ធសាធ។

លោក ដេវីស និយាយថា «វានឹងក្លាយទៅជាកំហុសមួយ និងការបាត់បង់ឱកាស ប្រសិនបើពួកគេ ធ្វើរបៀប នេះ»។ លោកនិយាយបែបនេះ ដោយចង់សំដៅទៅលើភាព ដែលអាចទៅរួចណាមួយ នៃការសាកល្បង នុយក្លេអ៊ែរ ជាលើកទីបីរបស់រដ្ឋាភិបាល ទីក្រុងព្យុងយ៉ាង ដែលជារដ្ឋកុម្មុយនីស ដ៏ឯកោនេះ។

គួរបញ្ជាក់ផងដែរថា ពាក់ព័ន្ធនឹងការឆ្លើយឆ្លងខាងនយោបាយរវាងប្រទេស កូរ៉េខាងជើង និងសហរដ្ឋអាមេរិក នេះដែរ គឺបន្ទាប់កូរ៉េខាងជើង បាននិយាយថា ការបាញ់បង្ហោះគ្រាប់ មីស៊ីលថែមទៀត រួមទំាងការចាប់ផ្តើម សាកល្បងនុយក្លេអ៊ែរ កម្រិតខ្ពស់ នៅតំណាក់កាលបន្ទាប់ គឺចង់សំដៅលើ សត្រូវដ៏មុតស្រួចរបស់ខ្លួន គឺសហរដ្ឋអាមេរិក ផ្ទាល់តែម្តង ៕

បាត់ដំបងៈ មន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង ធ្វើពិធីបុណ្យដារ លានកាលពីព្រឹកថ្ងៃទី២៤ ខែមករា ឆ្នាំ២០១៣ នៅចំណុចវាលស្រែ ស្ថិតក្នុង ភូមិភ្នំសំពៅលិច ឃុំភ្នំសំពៅ ស្រុកបានណន់ខេត្តបាត់ដំបង ក្រោមអធិបតីភាព លោក តេង ឡៅ រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ លោក បណ្ឌិត ជាម ច័ន្ទសោភ័ណ អភិបាលរង ខេត្ត លោកឈឹម វជិរា ប្រធានមន្ទីរកសិកម្មខេត្តបាត់ដំបងនិង សការី អង្គការ JICA និងអង្គការដៃគូអភិវឌ្ឍន៌ផ្សេងទៀត មន្រ្តីរាជការ កងកម្លាំងប្រដាប់អាវុធលោកគ្រូអ្នកគ្រូ សិស្សានុសិស្ស អាជីវករ កសិករនិង ប្រជាពលរដ្ឋ ចូលរួមសរុបប្រមាណ ជិត៥០០នាក់។

លោក ឈឹម វជិរា ប្រធានមន្ទីរកសិកម្មខេត្ត បានឡើងធ្វើរបាយការណ៌ ស្តីពីលទ្ធផលការងារ កសិកម្មនិង ទិន្នផលសម្រេច បានរបស់ខេត្តបាត់ដំបង ក្នុងឆ្នាំ២០១២ កន្លងមក ។ ដោយលោកបានបញ្ជាក់ថា នៅដើមរដូវវស្សា ឆ្នាំ២០១២នេះ កន្លងទៅនេះ  មានភ្លៀងធ្លាក់ច្រើន តែនៅកណ្តាលរដូវភ្លៀងធ្លាក់បានពន្យាពេលធ្វើឲ្យការ បង្ក បង្កើន ផលមានការ យឺតយ៉ាវបន្តិច ទោះជាយ៉ាងណាក៏ដោយមន្ទីរជំនាញនិងស្ថាប័នពាក់ព័ន្ធក៏ដូច ជាអាជ្ញាធរខេត្ត បានយកចិត្តទុកដាក់និងជំរុ្ឮញ ឲ្យកសិករធ្វើ ស្រូវប្រាំងបន្តបានលទ្ធផលគួរឲ្យកត់សម្គាល់ ទោះជាកន្លែងខ្លះកសិករបានធ្វើស្រែប្រាំងលើសផែនការនៃទំហំការស្រោចស្រពទឹកក៏ដោយ ។ សម្រាប់ខេត្តបាត់ដំបង ទទួលទិន្នផលស្រូវទាំងស្រូវវស្សា និងស្រូវប្រាំងបានលើសផែនការ ។

លោក ជាម ច័ន្ទសោភ័ណ អភិបាលរងខេត្តបានមានប្រសាសន៌ថា ពិធីបុណ្យដារលាននេះប្រជាពលរដ្ឋយើង និងអាជ្ញាធរមូលដ្ឋាន តែងតែប្រារពធ្វើពិធី នេះជារៀង រាល់ឆ្នាំ តាមប្រពៃណីរបស់ប្រជាកសិករយើង តាំងពីបុរាណមក។

លោក តេង ឡៅ រដ្ឋលេខាធិការ ក្រសួងកសិកម្មរុក្ខា ប្រមាញ់និងនេសាទបានមានប្រសាសន៍ថា នៅកម្ពុជា យើង រាជរដ្ឋាភិបាលបានចាត់វិស័យកសិកម្ម ជាវិស័យ អាទិភាពចំបងមួយ និងបានចាត់ទុកថា ស្រូវ អង្ករគឺជា មាសស .របស់កម្ពុជា និងបានប្រកាសដាក់ឲ្យអនុវត្តនូវគោលនយោបាយ ស្តីពីជំរុញផលិតស្រូវនិង នាំចេញអង្ករ ដើម្បីសម្រេចគោលនយោបាយ ធំៗ ។

លោក តេង ឡៅ បានបញ្ជាក់ថា ដើម្បីឆ្លើយតបនូវគោលនយោបាយ ដែលបានដាក់ឲ្យអនុវត្តនេះយើង បានយក ចិត្ត ទុកដាក់លើចំណុចគន្លិះសំខាន់ៗ ចំនួន៤គឺ ១.ការបង្កើនសេវ់ាកម្មនិងអន្តរាគមន៍នានា ដើម្បីជួយ ដល់ការបង្កើនផលិត ផលស្រូវ តាមរយៈការផ្ទេរបច្ចេកទេសសមស្របដល់កសិករ បង្កើនការស្រាវជ្រាវ និងអភិវឌ្ឍន៍ពូជ ស្រូវដែលស្រប និង លក្ខណៈដី អាកាសធាតុ និងសម្រាំងពូជស្រូវ ស្របតាមតម្រូវការ ទីផ្សារ ជំរុញការប្រើប្រាស់ ពូជស្រូវឲ្យបានទូលំទូលាយ ដល់ស្រទាប់កសិករ។ ២.ការប្រមូលផ្តុំផលិតកម្ម ស្រូវក៏ជាចំណុចគ្រិះសំខាន់ផងដែរ ។ ៣.យកចិត្តទុកដាក់ខ្លាំងក្លា ដល់ផ្នែកឯជន ពិសេសបណ្តាក្រុមហ៊ុន ដែលចូលរួមក្នុងការផលិតស្រូវ នៅកម្ពុជាតាមរយៈការផ្សារភ្ជាប់រវាងក្រុមអ្នក ផលិត ឬសហគមន៍ កសិកម្មនិងអ្នកប្រមូលទិញស្រូវនាំចេញ ដើម្បីធានាគុណ ភាពការផ្គត់ផ្គង់និងតម្លៃ ។ ៤.ផលិត ផលនាំចេញត្រូវមានអនាម័យនិង គុណភាពនិងពង្រឹងផ្លូវច្បាប់ លិខិតបទដ្ឋាននានា សម្រួលការ នាំចេញមានភាព សាមញរហ័សនិងចំណាយតិចនិងមានប្រសិទ្ធភាព។

បន្ទាប់ពីផលិតផលស្រូវ ក៏មានផលិតផល កសិឧស្សាហកម្មក៏ជាកត្តា សំខាន់ផងដែរ ដូចជាការជ្រើសរើស ពូជ មានដំឡូងមី ពោតក្រហម ។ល។ ដែលមានក្រុមហ៊ុនឯកជន បាននាំចូលដែលមាន គុណភាពល្អ ទទួលបានទិន្នផល់ខ្ពស់។បន្ទាប់មកគណអធិបតីបានដើរទស្សនា ពិពណ៌ផលិតផលក្នុង ស្រុកនាក្នុងឱកាស នោះផងដែរ ៕

ភ្នំពេញ ៖ បន្ទាប់ពីមានរឿងរ៉ាវកើតមានឡើង ក្នុងករណីប្លន់ធនាគារអេស៊ីលីដា ដែលកើតចេញពីបុគ្គលិករបស់ខ្លួននោះ ប្រធានធនាគាអេស៊ីលីដា បានប្រកាសថា នឹងបង្កើនរឹតបន្តឹងវិន័យបុគ្គលិកកិច្ចបន្ថែមទៀត ដើម្បីការពារករណីបែបនេះ កើតឡើងសាជាថ្មីម្តងទៀត។

លោក អ៊ីន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ប្រាប់ មជ្ឈមណ្ឌលព័ត៌មាន ដើមអម្ពិល ឲ្យដឹងនៅថ្ងៃទី២៤ ខែ មករា ឆ្នាំ២០១៣ថា ករណីប្លន់កាលពីថ្ងៃទី២៣ ខែមករានេះ មិនមែនកើតឡើងពីខាងក្រៅទេ ប៉ុន្តែវាកើតឡើងនៅខាងក្នុង ដូច្នោះលោក នឹងបង្កើន វិន័យនិងការធ្វើអធិការកិច្ច ការត្រួតពិនិត្យ រួមទាំងការធ្វើសវនកម្មបន្ថែមទៀត ដើម្បីការពារ និងទប់ស្កាត់កុំឲ្យមានករណីនេះ កើតមានឡើងទៀត។

លោកបន្តថា “នៅគ្រប់សាខានៃធនាគារអេស៊ីលីដា សុទ្ធតែមានមន្រ្តីប៉ូលិសពីអង្គភាព នៅចាំថែរក្សាសន្តិសុខសុវត្ថិភាព ជៀសវាងករណីនេះកើតឡើងទៀត”។

សូមជម្រាបថា ជនសង្ស័យចំនួន៦នាក់ ដែលជាក្រុមឃុបឃិត ប្លន់ប៉ុស្តិ៍សេវាកម្ម របស់សាខាធនាគារ អេស៊ីលីដាស្រុកស្ទឹងត្រង់ ត្រូវបានសមត្ថកិច្ច ចាប់ខ្លួន កាលពីវេលាម៉ោង១០និង៣០នាទីយប់ ថ្ងៃទី២៣ ខែមករា ឆ្នាំ២០១៣ ក្រោយពេលសមត្ថកិច្ច បានស្រាវជ្រាវដឹងថា ក្រុមជនល្មើសទាំងនោះ បានរៀបឆាកល្ខោន ប្រើរូបភាពចាប់ចំណាប់ខ្មាំង ជាបុគ្គលិកធនាគារចំនួន ៣នាក់ កាលពីល្ងាចថ្ងៃទី២២ ខែមករា ទៅឃុំទុកនៅក្នុងបន្ទប់ពិសេស របស់ប៉ុស្តិ៍សេវាកម្មធនាគារ អេស៊ីលីដា ស្ថិតក្នុងភូមិបែកអន្លូង ឃុំអារក្សត្នោត ស្រុកស្ទឹងត្រង់ ខេត្តកំពង់ចាម។

ជនសង្ស័យទាំង៦នាក់នោះមាន ទី១ ឈ្មោះ ស៊ីម គឹមថាត ជាមេខ្លោង និងជាប្រធានបេឡា ប៉ុស្តិ៍សេវាកម្មធនាគារ ដែលជននេះបានឆ្លើយសារភាព ថា មកពីខ្លួនជំពាក់បំណុលគេច្រើនពេក ទី២ ឈ្មោះ ស៊ីម គឹមថុន បុគ្គលិក ទី៣ ឈ្មោះ ស៊ីម តុលា ហៅ ចេម មកពីភ្នំពេញ ទី៤ ឈ្មោះ អាន ម៉ាត់លី បុគ្គលិក ទី៥ ឈ្មោះ ស៊យ ឌីណា ជាប្រធានស្តីទី នៅប៉ុស្តិ៍សេវាកម្មនោះ ទី៦ ឈ្មោះ ទីម គុយហេង បុគ្គលិក។

ទាំង៦នាក់នោះ មាន៤នាក់ជាប់ពាក់ព័ន្ធដោយផ្ទាល់ និង២នាក់ជាប់ពាក់ព័ន្ធដោយប្រយោល ក្នុងករណីនេះ សមត្ថកិច្ចបានដកហូត បានអាវុធខ្លីម៉ាក កា៥៤ មួយដើម គ្រាប់៥គ្រាប់ និងលុយរៀលមួយចំនួន ដោយឡែកចំពោះការបាត់បង់ប្រាក់ របស់ធនាគារប៉ុន្មាននោះ សមត្ថកិច្ចនៅមិនទាន់បាន ដឹងទេ។ ចំណែកឯជនសង្ស័យទាំង៦នាក់ បច្ចុប្បន្នកំពុងឃុំខ្លួនបណ្តោះអាសន្ន នៅស្នងការដ្ឋាននគរបាល ខេត្តកំពង់ចាម ដើម្បីចងក្រងសំណុំរឿង បញ្ជូនទៅសាលាដំបូង ខេត្តកំពង់ចាម ចាត់ការតាមផ្លូវច្បាប់៕

ខេត្តកណ្តាលៈ ជនរងគ្រោះម្នាក់ ក្នុងចំណោមគ្នីគ្នាបីនាក់ បានស្លាប់ភ្លាមៗនៅនឹងកន្លែងកើតហេតុ ដោយសារខ្មាន់កាំភ្លើងម្នាក់ បានបាញ់សម្លាប់ យ៉ាងឃោរឃៅ នៅកណ្តាលបឹងឈូក ខណៈគេទាំងបីនាក់ បានយកឧបករណ៍ឆក់ ពីរគ្រឿងទៅឆក់ត្រីនៅទីនោះ ហេតុការណ៍នេះបានកើតឡើង កាលពីវេលាម៉ោង១០និង៣០នាទី យប់ថ្ងៃទី២៣ ខែមករា ឆ្នាំ២០១៣ នៅចំណុចបឹងឈូកអូរតាប៉េះ ក្នុងភូមិព្រែហូរ ខាងលិចសង្កាត់ព្រែហូរ ក្រុងតាខ្មៅ ខេត្តកណ្តាល។

នគរបាលបានឲ្យបានដឹងថា ជនរងគ្រោះមានឈ្មោះ ណាំ រ៉ុម ភេទប្រុស អាយុ ២៨ឆ្នាំ មានមុខរបរជាកម្មករថែសួន នៅក្រុមហ៊ុនមួយ មាន ទីលំនៅក្នុងភូមិ សង្កាត់កើតហេតុខាងលើ ដោយរងរបួសចំក្បាលធ្លាយទៅខាងលើ ចំនួន១គ្រាប់ ស្លាប់ភ្លាមៗនៅនឹងកន្លែង ចំណែកមិត្តភក្តិពីរនាក់ ទៀត ដែលទៅជាមួយគ្នានោះ ពុំមានរងរបួសនោះទេ ។ រីឯជនសង្ស័យមានឈ្មោះ ឆែ សៀប ហៅ បុល ភេទប្រុស អាយុ៥៤ឆ្នាំ មានមុខរបរជា អង្គរក្សសក្តិ៤ រស់នៅភូមិលេខ១ ឃុំស្វាយរលំ ស្រុកស្អាង ខេត្តកណ្តាល ត្រូវឃាត់ខ្លួន ជាបណ្តោះអាសន្ន ដើម្បីធ្វើការសាកសួរនៅ អធិការដ្ឋាន នគរបាលក្រុងតាខ្មៅ ។

បើតាមសាក្សី ដែលទៅជាមួយជនរងគ្រោះ បានឲ្យដឹងថា មុនពេលកើតហេតុ ពួកគេបានយកឧបករណ៍ឆក់ត្រី ទៅឆក់ត្រីនៅទីនោះ ទុកធ្វើម្ហូប ប៉ុន្តែខណៈកំពុងតែឆក់ ស្រាប់តែជនសង្ស័យ បានយកកាំភ្លើងមិនស្គាល់ម៉ាក បាញ់សំដៅមកលើជនរងគ្រោះ ចំនួន៣គ្រាប់ បណ្តាលឲ្យត្រូវ ១គ្រាប់ចំក្បាល ធ្លាយខាងលើស្លាប់ភ្លាមតែម្តង ក្រោយពីកើតហេតុ នគរបាលក្រុងតាខ្មៅ ដឹកនាំដោយលោក ស៊ឹម ប៊ុតបណ្ឌិត ចុះទៅធ្វើការស្រាវ ជ្រាវដល់កន្លែងកើតហេតុ ក៏ឃាត់ខ្លួនជនសង្ស័យកំពុងតែដេក ដោយមានការចង្អុលបង្ហាញពីសាក្សី ដែលបានឃើញជនសង្ស័យបាញ់ ព្រោះ ជនរងគ្រោះផ្សេង បានចុចពិលសំដៅ ឃើញមុខជនសង្ស័យច្បាស់ ។ ប៉ុន្តែខណៈឃាត់ខ្លួនជនសង្ស័យ មកសាកសួរនោះ ជនសង្ស័យមិនឆ្លើយ សារភាពទេ ។

បច្ចុប្បន្នជនសង្ស័យ ត្រូវឃាត់បានឃាត់ខ្លួនជាបណ្តោះអាសន្ន នៅអធិការដ្ឋាននគរបាលក្រុងតាខ្មៅ ដើម្បីធ្វើការសាកសួរបន្ត និងចាត់ការទៅតាម នីតិវិធី៕

កំពង់ស្ពឺ៖ នៅព្រឹកថ្ងៃទី២៤ ខែមករា ឆ្នាំ២០១៣ ស្ថិតក្នុងបរិវេណ សាលាបឋមសិក្សា វល្លិ៍ស ស្ថិតនៅស្រុក សំរោងទង ខេត្តកំពង់ស្ពឺ អង្គការមូលនិធិបង្ការរបួស អាស៊ី សហការជាមួយគណៈ កម្មាធិការជាតិសុវត្ថិភាព ចរាចរណ៍ផ្លូវគោក ក្រសួងអប់រំ យុវជន និងកីឡា និងអគ្គស្នងការដ្ឋាននគរបាលជាតិ ក្រសួងមហាផ្ទៃ បាន ប្រារព្ធពិធីប្រកាសផ្តើមអនុវត្តកម្មវិធីមួកសុវត្ថិភាពសម្រាប់កុមារ ដែលឧបត្ថម្ភគាំទ្រដោយមូលនិធិក្រុមហ៊ុន យូភីអេស (UPS)។តាមរយៈកម្មវិធីនេះ ផ្តល់មួកសុវត្ថិភាពចំនួន ៦២២មួក ត្រូវបានផ្តល់ជូនដល់ សិស្សា នុសិស្ស និងលោកគ្រូ អ្នកគ្រូនៅសាលាបឋមសិក្សាវល្លិ៍ស។

ពិធីនេះ បានប្រព្រឹត្តទៅក្រោមអធិបតីភាព លោកឧត្តមសេនីយ៍ទោ គីម យីដេត អនុប្រធាននាយកដ្ឋាន កណ្តាល សណ្តាប់ធ្នាប់សាធារណៈនៃក្រសួងមហាផ្ទៃ និងជាអគ្គលេខាធិការ រងគណៈកម្មាធិការជាតិ សុវត្ថិភាពចរាចរណ៍ផ្លូវគោក តំណាងសាលាខេត្តកំពង់ស្ពឺ តំណាងមន្ទីរអប់រំ យុវជន និងកីឡា លោក គឹម បញ្ញា នាយកអង្គការមូលនិធិបង្ការរបួស អាស៊ី ប្រចាំនៅកម្ពុជា កញ្ញា អ៊ីវ៉ា តារាចម្រៀងយុវវ័យ ដ៏ពេញនិយម មួយរូប នៃព្រះរាជាណាចក្រកម្ពុជា និងមានការចូលរួមពីអាជ្ញាធរដែនដី ដៃគូពាក់ព័ន្ធ មាតាបិតាសិស្ស លោកគ្រូ អ្នកគ្រូ និងសិស្សានុសិស្ស សរុបប្រមាណជិត ៨០០នាក់។

តារាចម្រៀង អ៊ីវ៉ា បានមានប្រសាសន៍ថា "ខ្ញុំសូមគាំទ្រទាំងស្រុង ចំពោះការផ្តួចផ្តើម និងការយកចិត្ត ទុកដាក់ ខ្ពស់ក្នុងការជំរុញការពាក់មួកសុវត្ថិភាព ក្នុងចំណោមអ្នករួមដំណើរតាមទោចក្រយានយន្ត ជាពិសេសកុមារ ដែលស្របតាមគោលនយោបាយជាតិ ទាក់ទងនឹងសុវត្ថិភាពចរាចរណ៍ផ្លូវគោក ដើម្បីកាត់បន្ថយ អត្រា រងរបួស និងស្លាប់ដោយសារគ្រោះថ្នាក់ចរាចរណ៍នៅលើដងផ្លូវ"។

កញ្ញាក៏បានសម្តែងនូវការគាំទ្រចំពោះសារអប់រំ "ព្រួយបារម្ភពីគ្នា ធ្វើដំណើរគ្រប់វេលាពាក់មួកសុវត្ថិភាព" អ្នករួមដំណើរតាម ទោចក្រយានយន្ត គិតទាំងកុមារត្រូវតែពាក់មួកសុវត្ថិភាព ដោយកញ្ញាជឿជាក់ថា សារអប់រំ នេះនឹងជួយដាស់តឿនស្មារតីប្រជាពលរដ្ឋសហគមន៍មាតាបិតាលោកគ្រូអ្នកគ្រូនិងប្អូនៗសិស្សានុសិស្សឲ្យពាក់មួកសុវត្ថិភាពគ្រប់វេលា ធ្វើដំណើរ។ កញ្ញា ក៏បានសំណូមពរដល់មាតាបិតាឲ្យលើកទឹកចិត្ត និងជំរុញកូនៗឲ្យពាក់មួកសុវត្ថិភាព រាល់ ពេលធ្វើដំណើរតាមទោចក្រយានយន្ត។

យោងតាមរបាយការណ៍នៃប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ផ្លូវគោកនៅកម្ពុជា បាន បង្ហាញ ឲ្យឃើញថា នៅឆ្នាំ២០១១កន្លងទៅ ចំនួនអ្នកស្លាប់មានដល់ ១,៩០៥នាក់ ចំនួនអ្នករងរបួសធ្ងន់ធ្ងរ មានដល់ ៥,៨០៧នាក់ និងធ្វើឲ្យកម្ពុជាខាតបង់ គិតជាទឹកប្រាក់ប្រមាណ ៣១០លានដុល្លារ សហរដ្ឋអាមេរិក ។ របាយការណ៍ដដែល បានបង្ហាញថា កំរិតនៃការពាក់មួកសុវត្ថិភាព នៅក្នុងខេត្តកំពង់ស្ពឺ នៅពេលថ្ងៃមានតែ ៤១%ប៉ុណ្ណោះ ក្នុងចំណោមអ្នកបើកបរ និងត្រឹម៤% ប៉ុណ្ណោះ ។ក្នុងចំណោមអ្នករួមដំណើរជាមួយ តាម ទោចក្រយានយន្ត គិតទាំងកុមារ។

តាមការសិក្សាស្រាវជ្រាវជាអន្តរជាតិ បានបង្ហាញថា ការពាក់មួកសុវត្ថិភាព ដែលមានគុណភាព និងបាន ត្រឹមត្រូវ អាចកាត់បន្ថយអត្រាស្លាប់ ដោយសារគ្រោះថ្នាក់ចរាចរណ៍ ដល់ទៅ៤២%និងការរងរបួស ក្បាលធ្ងន់ធ្ងរ ដល់ទៅ៦៩%។

លោកឧត្តមសេនីយ៍ទោ គីម យីដេត បានមានប្រសាសន៍ថា ការពាក់មួកសុវតិ្ថភាព ដោយគិតទាំងក្នុង ចំណោម អ្នករួមដំណើរតាមទោចក្រយានយន្ដ គឺមានសារៈសំខាន់ណាស់ ដែលមិនគួរឲ្យខ្វះបានទេ ស្រប ពេលដែលបណា្ដប្រទេសនានា កំពុងខិតខំពុះពារមួយជំហ៊ានមុន ក្នុងគោលដៅការការពារ របួសក្បាល ដោយគ្រោះថា្នក់ចរាចរណ៍។ លោកបានមានប្រសាសន៍ថា ក្រៅពីបង្កឲ្យមានអ្នកស្លាប់ និងអ្នករងរបួស ធ្ងន់-ស្រាល នៅលើដងផ្លូវគួរឲ្យសង្វេគ គ្រោះថា្នក់ចរាចរណ៍បានបង្កើត សោកនាដកម្មក្នុងរង្វង់គ្រួសារ សាច់ ញាតិ សហគមន៍ និងសង្គមជាតិទាំងមូលដែលជាការព្រួយបារម្ភ និងធ្វើឲ្យប៉ះពាល់ដល់ គោលនយោបាយ កាត់បន្ថយភាពក្រីក្ររបស់រាជរដា្ឋភិបាលកម្ពុជា។ លោកឧត្តមសេនីយ៍ទោក៍បានសង្កត់ធ្ងន់ថា ការពង្រឹង ការអនុវត្តន៍ច្បាប់ គឺជាមធ្យោបាយមួយ ដែលកាន់តែមានប្រសិទ្ធិភាព សំដៅបង្កើនកំរិតនៃការ ពាក់មួក សុវត្ថិភាព និងកាត់បន្ថយការស្លាប់ និងការរងរបួសនៅទូទាំងប្រទេស។

លោក គឹម បញ្ញា នាយកអង្គការមូលនិធិបង្ការរបួស អាស៊ី ប្រចាំកម្ពុជាបានមានប្រសាសន៍ថា ការផ្តល់ មួក សុវត្ថិភាពដល់កុមារ តាមរយៈកម្មវិធីមួកសុវត្ថិភាព សម្រាប់កុមារនៅតាមសាលាបឋមសិក្សា នានានៅ ក្នុងប្រទេសកម្ពុជា ពិតជាមានសារៈសំខាន់ណាស់ ព្រោះនឹងផ្តល់ការការពារដល់កុមារ ជាសិស្សានុសិស្ស ដែលជាអ្នកប្រើប្រាស់ផ្លូវងាយរងគ្រោះពីគ្រោះថ្នាក់ចរាចរណ៍នៅពេលធ្វើដំណើរតាមទោចក្រយានយន្ត និងទោចក្រយាននៅលើដងផ្លូវ។

លោកបន្ថែមទៀតថា កម្មវិធីនេះនឹងរួមចំណែកកសាងទម្លាប់របស់កុមារ អំពីការពាក់មួកសុវត្ថិភាព និង សុវត្ថិភាពចរាចរណ៍ ព្រមទាំងពង្រឹងចំណេះដឹង និងសមត្ថភាពរបស់កុមារទាំងឡាយ ឲ្យក្លាយជាអ្នកបើកបរ ដោយសុវត្ថិភាព នាពេលអនាគត ជាប្រយោជន៍ជំរុញឲ្យកិច្ចខិតខំប្រឹងប្រែង លើកកម្ពស់សុវត្ថិភាពចរាចរណ៍ ផ្លូវគោកមាននិរន្តរភាព។ ជាមួយគ្នានេះ សកម្មភាពនេះ ក៏នឹងជួយធ្វើការផ្លាស់ប្តូរការយល់ដឹងពុំត្រឹមត្រូវ របស់ អ្នកធ្វើដំណើរតាមទោចក្រយានយន្ត មាតាបិតា ឬអាណាព្យាបាលមួយចំនួន ដែលថាការពាក់ មួកសុវត្ថិភាព ពុំចាំបាច់នៅពេលធ្វើដំណើរជិត ឬនៅពេលជិះយឺតៗ ឬសំរាប់កុមារ។

ក្រៅពីបានចាត់ទុកការផ្តល់អំណោយមួកសុវត្ថិភាពដល់សិស្សានុសិស្ស និងលោកគ្រូ អ្នកគ្រូ ថាជាប្រវត្តិ សាស្រ្ត មួយសម្រាប់សាលាបឋមសិក្សានៅខេត្តកំពង់ស្ពឺ នាយិកាសាលាបឋមសិក្សា វល្លិ៍ស លោកស្រី ប៉ុល សុផន បានថ្លែងអំណរគុណចំពោះអង្គការមូលនិធិបង្ការរបួស អាស៊ី និងមូលនិធិក្រុមហ៊ុន យូភីអេស ដែល បានជ្រើសរើសយកសាលាបឋមសិក្សា វល្លិ៍ស ដើម្បីអនុវត្តគម្រោងមួកសុវត្ថិភាពសម្រាប់កុមារ ជាពិសេស ផ្តល់ការអប់រំទាក់ទងនឹងសុវត្ថិភាពចរាចរណ៍ផ្លូវគោក និងការជំរុញការពាក់មួកសុវត្ថិភាព ក្នុងចំណោម សិស្សានុសិស្សនិងលោកគ្រូ អ្នកគ្រូ។

គួរបញ្ជាក់ថា នាពេលថ្មីៗនេះ អង្គការមូលនិធិបង្ការរបួស អាស៊ី បានប្រកាសផ្តើមអនុវត្តយុទ្ធនាការ អប់រំ ផ្សព្វផ្សាយ ឆ្នាំ២០១៣ ដើម្បីជំរុញការពាក់មួកសុវត្ថិភាពក្នុងចំណោមអ្នករួមដំណើរតាមទោចក្រយានយន្ត ដោយរួមមានការផ្សព្វផ្សាយតាមបណ្តាស្ថានីយទូរទស្សន៍ វិទ្យុ ផ្ទាំងប៉ាណូ បដាអប់រំ និងតាមសារព័ត៌មាន ជាដើម។ យុទ្ធនាការអប់រំផ្សព្វផ្សាយនេះនឹងរួមបញ្ចូលទាំងការអប់រំផ្សព្វផ្សាយ និងការផ្តល់មួកសុវត្ថិភាព ដល់សិស្សានុសិស្ស មាតាបិតា និងលោកគ្រូ អ្នកគ្រូ សាលាបឋមសិក្សាចំនួន ៥ ដែលស្ថិតនៅក្នុងតំបន់ ដែលប្រឈមនឹងគ្រោះថ្នាក់ចរាចរណ៍ខ្ពស់ ហើយការផ្តល់អំណោយនេះ បានទទួលការឧបត្ថម្ភ ពីមូលនិធិ ក្រុមហ៊ុន UPS ក្រុមហ៊ុន Manulife និងក្រុមហ៊ុន ARRB៕

ភ្នំពេញ៖ បុរសម្នាក់ស្លៀកពាក់ ជាអង្គរក្ស និងបក្ខពួកម្នាក់ទៀត ខណៈកំពុងបើកម៉ូតូ ទៅដល់ភ្លើង ស្តុបទួលទំពូង ក្នុងទឹកដី ខណ្ឌចំការមន ត្រូវបានសមត្ថកិច្ចឃាត់ខ្លួន បង្កឲ្យមានការភ្ញាក់ផ្អើល នៅកន្លែងកើតហេតុ កាលពី ៥ល្ងាច ថ្ងៃទី២៤ ខែមករា ឆ្នាំ២០១៣។

ស្នងការនគរបាល រាជធានីភ្នំពេញ លោកឧត្តមសេនីយ៍ ផ្កាយ៣ ជួនសុវណ្ណ បានមានប្រសាសន៍ថា ការឃាត់ខ្លួនបុរសខាងលើនេះ បានធ្វើឡីង បន្ទាប់ពីទទួល ព័ត៌មានថា បុរសនេះបានយកកាំភ្លើង ភ្ជង់គេភ្ជង់ឯង តាំងពីគល់ ស្ពានស្ទឹងមានជ័យ ក្នុងសង្កាត់ស្ទឹងមានជ័យ ខណ្ឌមានជ័យ ។

សមត្ថកិច្ចមូលដ្ឋាន បានឲ្យដឹងថា មូលហេតុដែលនាំឲ្យ មានការឃាត់ខ្លួន បុរសទាំងពីរនាក់នេះ បានធ្វើឡើង បន្ទាប់ពី ពួកគេ ដែលមានស្ថាន ភាពស្រវឹង ខ្លាំងបានដកកាំភ្លើងចេញ ពីចង្កេះហើយគ្រវីចុះឡើងៗ ពេលកំពុងជិះម៉ូតូ និងភ្ជង់គេ ភ្ជង់ឯង នៅតាមផ្លូវ តាំងពីស្ពានស្ទឹងមានជ័យមកម៉្លេះ ។

សមត្ថកិច្ចបានបន្តថា ជនដែលម្ចាស់កាំភ្លើង មានឈ្មោះ ទិត្យ លីហ៊ាង មុខរបរជាអង្គរក្ស ឲ្យបុគ្គលម្នាក់ និងដៃគូរបស់ខ្លួន ដែលជិះម៉ូតូជាមួយនោះ មានឈ្មោះ លុន វិបុល អាយុជាង២០ឆ្នាំ។

នៅកន្លែង អធិការដ្ឋាននគរបាល ខណ្ឌចំការមន ជនបង្កដែលយកកាំភ្លើងភ្ជង់គេ ភ្ជង់ឯង នៅតាមផ្លូវ បានយកដៃ ទៅគាស់ ជញ្ជាំងខ្លាំងៗ ហើយស្រែក និងនិយាយ អួតអាងពីនេះពីនោះ ពីព្រោះពួកគេ ត្រូវបានសមត្ថកិច្ច ប្រាប់ថា ស្រវឹងទឹកត្នោតជូ និងស្រា។ យ៉ាងណាក៏ដោយ ជនទាំងពីរនាក់នេះ ត្រូវសមត្ថកិច្ច ឃុំខ្លួនជា បណ្តោះអាសន្ន ដើម្បីរង់ចាំដោះស្រាយបន្តទៀត៕

ពោធិ៍សាត់ ៖ មួកសុវត្ថិភាពចំនួន ៥០មួក ដែលជាអំណោយរបស់នាយឧត្ដមសេនីយ៍ ផ្កាយមាស៤ នេត សាវឿន អគ្គស្នងការនគរបាលជាតិ សម្រាប់មន្ដ្រីនគរបាលចរាចរផ្លូវគោក ខេត្ដពោធិ៍សាត់ ត្រូវបានលោកឧត្ដមសេនីយ៍ត្រី សារុន ចាន់ធី ស្នងការនគរបាលខេត្ដពោធិ៍សាត់ ធ្វើការបែង ចែក និងប្រគល់ជូនដល់មន្ដ្រីនគរបាលចរាចរផ្លូវគោក តាមបណ្ដាស្រុក ក្រុង និងការិយាល័យជំនាញ កាលពីរសៀលថ្ងៃទី២៤ ខែមករា ឆ្នាំ២០១៣ នេះ ។

មួកសុវត្ថិភាពចំនួន ៥០មួក ដែលត្រូវចែកជូននៅពេលនេះរួមមាន ៖ អធិការដ្ឋានស្រុកក្រគរ ៧មួក, អធិការដ្ឋាន នគរបាលស្រុកបាកាន ៧មួក, អធិការដ្ឋាននគរបាលស្រុកកណ្ដៀង ៥មួក, អធិការដ្ឋាននគរបាលស្រុកភ្នំក្រវាញ ៥មួក, អធិការដ្ឋាននគរបាលស្រុកវាលវែង ៥មួក, អធិការដ្ឋាននគរបាលក្រុងពោធិ៍សាត់ ៦មួក និង ១៥មួកទៀត ត្រូវបានប្រគល់ជូនមន្ដ្រីនគរបាលចរាចរខេត្ដពោធិ៍សាត់។

មានប្រសាសន៍ទៅកាន់មន្ដ្រីនគរបាលចរាចរផ្លូវគោក ដែលទើបតែទទួលបានមួកសុវត្ថិភាពនាពេលនេះ លោកឧត្ដមសេនីយីត្រី សារុន ចាន់ធី បានមានប្រសាសន៍ថា ដើម្បីសុវត្ថិភាព ចំនួនមួក ៥០មួក សម្រាប់បំពាន់ជូន មន្ដ្រីនគរបាលជំនាញទូទាំងខេត្ដពោធិ៍សាត់ ដូច្នេះអស់លោក ដែលបានមកទទួលមួកសុវត្ថិភាពនៅថ្ងៃនេះ ត្រូវយកទៅបំពេញការងារ ឱ្យបានចំគោលដៅការងារជំនាញរបស់ខ្លួន ដើម្បីបម្រើជូនប្រជាពលរដ្ឋ ឱ្យបានល្អប្រសើរ។ លោកស្នងការបន្ដថា លោកសូមឱ្យមន្ដ្រីនគរបាលចរាចរទាំងអស់ ធ្វើជាគំរូគេ ក្នុងការអនុវត្ដច្បាប់ចរាចរ៕

ព្រះវិហារ៖ នៅសាលា ខេត្តព្រះវិហារ កាល ពីព្រឹកថ្ងៃទី ២៣-២៤ ខែមករា ឆ្នាំ២០១៣ បានរៀបចំពិធី បើក និងបិទសន្និបាទ បូកសរុប ការងារ ដែលបាន អនុវត្តការងារ កាលពីឆ្នាំ២០១២ និងលើកទិសដៅ សម្រាប់អនុវត្ត ការងារ សម្រាប់ឆ្នាំ២០១៣ ដែលពិធី បើកសន្និបាទ បានធ្វើឡើងក្រោម អធិបតីភាព ពីសំណាក់ អភិបាលខេត្តព្រះវិហារ លោក អ៊ុំ ម៉ារ៉ា លោក ឡុង សុវណ្ណ ប្រធានក្រុម ប្រឹក្សាខេត្ត និងមានការចូលរួម ពីសំណាក់ថ្នាក់ ដឹកនាំ និងមន្រ្តី សាលាខេត្តព្រះវិហារ ជាច្រើនរូប ផ្សេងទៀត។

ដោយឡែក នៅរសៀលថ្ងៃទី២៤ ខែមករា ឆ្នាំ២០១៣ ពិធី បិទសន្និបាទ និងលើកទិសដៅ ការងារ ប្រចាំឆ្នាំ២០១៣ បានប្រព្រឹតិ្ត ធ្វើឡើង ក្រោមអធិបតីភាព ពីសំណាក់ លោក ប៉ុល លឹម រដ្ឋលេខាធិការ ក្រសួងមហាផ្ទៃ និងមានការ ចូលរួមពី លោក ខៀវ សាម៉េត ព្រមទាំងថ្នាក់ដឹកនាំ សំខាន់ៗ ជាច្រើនរូបផ្សេងទៀត។

នៅក្នុងពិធីបើក សន្និបាទ កាលពីព្រឹកថ្ងៃទី២៣ ខែមករា ឆ្នាំ២០១៣ បន្ទាប់ពីឡើងអាន របាយការណ៍របស់ នាយករដ្ឋបាល សាលាខេត្តព្រះវិហារ រួចមក លោកអភិបាលខេត្តព្រះវិហារ អ៊ុំ ម៉ារ៉ា បានឡើង សំណេះសំណាល និងដាក់ចេញនូវ វិធានការណ៍ មួយចំនួន សម្រាប់ជាការលើកទិសដៅ ការងារ សម្រាប់ការ អនុវត្តការងារ នៅឆ្នាំ២០១៣ នេះ។

ជាមួយគ្នានេះ លោក អ៊ុំ ម៉ារ៉ា បានលើកឡើងពីការ អនុវត្តការងារ នាពេលកន្លងមក របស់មន្រ្តីរដ្ឋបាល ថ្នាក់ក្រោមជាតិ ព្រមទាំងលើកឡើង នូវបញ្ហាប្រឈម មួយចំនួនដែលមន្រ្តី បានជួបប្រទះ នាឆ្នាំកន្លងទៅ និងយកមកអនុវត្ត និងដកស្រង់ជា បទពិសោធ សម្រាប់ការងារ នាឆ្នាំ២០១៣។

លោកអភិបាលខេត្ត បានមានប្រសាសន៍ថា ទាក់ទង និងការទំនាក់ទំនង របស់មន្រ្តីនៅ តាមមូលដ្ឋាន និងប្រជាពលរដ្ឋ ជាពិសេសការងារ ទាំងឡាយណាដែល ក្រុមមន្រ្តី មូលដ្ឋាន បានធ្វើ និងជួយដោះស្រាយ រាល់បញ្ហាជាមួយ ប្រជាពលរដ្ឋ នៅតាមមូលដ្ឋាន។

លោក អ៊ុំ ម៉ារ៉ា ក៏បានវាយតម្លៃខ្ពស់ ចំពោះការងារ របស់មន្រ្តីសាលា ខេត្តព្រះវិហារ នៅតាមអង្គភាព នីមួយៗ និងត្រូវបង្កើន ប្រសិទ្ធភាព ការងារ ឲ្យមានការរីក ចម្រើនកាន់តែខ្លាំងឡើង។ ដោយឡែក ក្រោយពីបាន បញ្ចប់ការងារបើក សន្និបាទការងារ រួចហើយ នៅរសៀលថ្ងៃទី២៤ ខែមករា ឆ្នាំ២០១៣ ពិធីបិទ សន្និបាទ ការងារប្រចាំឆ្នាំ២០១២និងលើកទិសដៅ ប្រចាំឆ្នាំ២០១៣ បានដំណើរការ ក្រោមវត្តមាន លោក ប៉ុល លឹម រដ្ឋលេខាធិការ ក្រសួងមហាផ្ទៃ តំណាងរបស់លោកឧបនាយករដ្ឋមន្រ្តី ស ខេង ។

ក្រោយពីលោកអភិបាល ខេត្តព្រះវិហារ អ៊ុំ ម៉ារ៉ា បានឡើងអាន របាយការណ៍រួចមក លោក ប៉ុល លឹម បានឡើងសំណេះសំណាល  នៅក្នុងអង្គពិធី ។ លោក ប៉ុល លឹម បានឡើងនូវ ការអនុវត្តការងារ នាពេលកន្លងទៅ និងបានស្នើឲ្យ អាជ្ញាធរខេត្ត និងមន្រ្តីពាក់ព័ន្ធ ទាំងអស់ ត្រូវបន្តអនុវត្តការងារ ឲ្យកាន់តែមាន ប្រសិទ្ធភាព សម្រាប់ឆ្នាំ២០១៣នេះ។

ជាមួយគ្នានេះ លោក ប៉ុល លឹម បានលើកឡើង ពីស្ថានភាពនៅតាម ព្រំដែន ដោយជម្រុញឲ្យ អាជ្ញាធរខេត្ត ត្រូវបង្កើន ទំនាក់ទំនង ការងារកាន់តែមាន ប្រសិទ្ធភាពការងារ ជាមួយប្រទេស ជិតខាង ដើម្បីឲ្យព្រំដែន ក្លាយជាកន្លែង អភិវឌ្ឍន៍ ជឿនលឿន និងរីកចម្រើន សម្រាប់ប្រជាជន ទាំងសងខាង។

ជាមួយគ្នានេះ លោករដ្ឋលេខធិការ ក្រសួងមហាផ្ទៃ បានលើកឡើង ពីគោលនយោបាយ របស់រាជរដ្ឋាភិបាល ចំពោះបញ្ហាដីធ្លី ដែលក្រុមនិស្សិត បាននិងកំពុងចុះវាស់វែងដីធ្លី ជូនប្រជាពលរដ្ឋ ហើយសម្រាប់ ខេត្តព្រះវិហារ អាជ្ញាធរទាំងមូល ត្រូវយកចិត្តទុកដាក់ និងបង្កើនការងារនេះ ឲ្យទទួលបានជោគជ័យ។

នៅចុងបញ្ចប់នៃ កម្មវិធី និងដើម្បីលើកចិត្ត នូវការអនុវត្តការងារ នាពេលកន្លងមក គណៈអធិបតី បានបំពាក់ គ្រឿងឥស្សរយស ជូនមន្រ្តីមួយ ចំនួនផងដែរ៕

ភ្នំពេញ៖ ជនសង្ស័យ ចំនួន២នាក់ កាលពីល្ងាច ថ្ងៃទី២៤ ខែមករា ឆ្នាំ២០១៣ វេលាម៉ោង ៥ ត្រូវប្រជាពលរដ្ឋ ឃាត់ខ្លួនបានភ្លាមៗ ប្រគល់ឲ្យសមត្ថកិច្ច ខណ្ឌសែនសុខ ក្រោយពីជនសង្ស័យទាំងនេះ បានធ្វើសកម្មភាព ឆក់ខ្សែក ប្រជាពលរដ្ឋ នៅតាមដងផ្លូវ។

ប្រជាពលរដ្ឋ ដែលបានចូលរួម ចាប់ជនសង្ស័យ ទាំងពីរនាក់ បានឲ្យដឹងថា នៅវេលាម៉ោង កើតហេតុនោះ មានជនសង្ស័យ ចំនួន២នាក់ ជិះម៉ូតូមួយគ្រឿង បានធ្វើសកម្មភាពឆក់ខ្សែក ប្រជាពលរដ្ឋ នៅតាមផ្លូវ ដូច្នេះបានធ្វើ ឲ្យមានការភ្ញាក់ផ្អើល ហើយប្រជាពលរដ្ឋ នៅកន្លែងកើតហេតុ បានដេញចាប់បាន យកទៅ ឲ្យសមត្ថកិច្ច។ ការដេញចាប់ក្រុមចោរ ឆក់ខាងលើនេះ បានកើតមានឡើង នៅមុខក្រសួងពាណិជ្ជកម្ម ខណ្ឌសែនសុខ។

យ៉ាងណាក៏ដោយ សមត្ថកិច្ចមិនទាន់បាន បញ្ជាក់ពីអត្តសញ្ញាណ ជនសង្ស័យទាំងពីរនាក់ នេះនៅឡើយទេ ខណៈត្រូវបានឃុំខ្លួន ជាបណ្តោះអាសន្ន នៅអធិការខណ្ឌ ដើម្បីចាត់ការបន្តទៀត៕

កណ្តាល៖ បុរសជាអ្នកស្ទួចត្រី ម្នាក់ត្រូវបានរងគ្រាប់កាំភ្លើងចំក្បាល ស្លាប់នៅនឹងកន្លែងកើតហេតុភ្លាមៗ នៅវេលាម៉ោង ១០៖៣៥នាទីយប់ ថ្ងៃទី ២៣ ខែមករា ឆ្នាំ ២០១៣ នៅសង្កាត់ព្រែកហូរ ក្រុងតាខ្មៅ ខេត្តកណ្តាល បន្ទាប់ជនដៃដល់ជាអ្នកចំាចំការ ប្រើប្រាស់កាំភ្លើងម៉ាកឡុក បាញ់សម្លាប់ ។

សមត្ថកិច្ចជាន់ខ្ពស់ខេត្តកណ្តាលអោយដឹងថា  ករណីបាញ់ជនរងគ្រោះពិតជាកើត នៅកន្លែងបឹងតាបេស ដោយជនសង្ស័យបាន បាញ់ជនរងគ្រោះត្រូវក្បាល ស្លាប់ភ្លាមៗ នៅកន្លែងកើតហេតុ ស្ថិតក្នុងភូមិសាស្រ្ត ភូមិព្រែកហូរខាងលិច កាលពីវេលាម៉ោង ២០៖៣៥នាទី យប់ថ្ងៃទី ២៤ ខែមករា ។

មន្រ្តីនគរបាលបានរៀបរាប់ថា ដំបូងឡើយ ជនរងគ្រោះមានបក្ខពួក ៣នាក់ទៀត បាននាំគ្នាទៅស្ទួចត្រី នៅបឹងតាបេស ស្ថិតក្នុងភូមិសាស្ត្រ ព្រែកហូរខាងលិច ទី១៖ ឌឹម ចន្ថា អាយុ ២៩ឆ្នាំ ទី២៖ សែត សុខ អាយុ ៥១ឆ្នាំ ទី៣៖ អ៊ូចស្រស់ អាយុ ៣៨ឆ្នាំ ទាំងអស់គ្នាជាបុរសទាំងអស់ ។ លុះដល់ម៉ោងកើតហេតុ ជនដៃដល់ ឈ្មោះ ឆៃ សៀម អាយុ ៥៤ឆ្នាំ ជាអ្នកចាំចំការ បានយកកាំភ្លើងរបស់ខ្លួន ដែលលាក់ទុក បានមកបាញ់សំដៅជនរងគ្រោះ ស្លាប់ភ្លាមៗតែម្តងទៅ ។ មន្រ្តីនគរបាលរូបនោះបានបញ្ជាក់ថា ជនសង្ស័យមានឈ្មោះ ឆៃ សៀម អាយុ៥៤ឆ្នាំ រស់នៅក្រុងតាខ្មៅ ជាអ្នកដាំឈូក និង រកត្រី បានប្រើប្រាស់កាំភ្លើង ម៉ាកឡុក បាញ់ជនរងគ្រោះ ចំណែកជនរងគ្រោះឈ្មោះ ណាំ រ៉ុម អាយុ ២៨ឆ្នាំ ។

លោក អ៊ាវ ចំរើន ស្នងការខេត្តកណ្តាលបានថ្លែងប្រាប់ថា ជនសង្ស័យត្រូវបានសមត្ថកិច្ចរបស់លោក តាមចាប់បាននៅវេលាម៉ោង ៣៖០០ទៀបភ្លឺ ថ្ងៃទី ២៤ ខែមករា ឆ្នាំ ២០១៣ ប៉ុន្តែរហូតដល់ម៉ោង ៥៖០០ល្ងាចថ្ងៃដដែល ទើបជនសង្ស័យសារភាពថា ខ្លួនពិតជាបានបាញ់សម្លាប់ជនរងគ្រោះពិតប្រាកដមែន ។

លោកស្នងការបានបញ្ជាក់ថា បន្ទាប់ពីកើតហេតុ កម្លាំងរបស់លោកបានចុះស្រាវជ្រាវ ហើយប្រទះឃើញសំបកកាំភ្លើង ចំនួន ២គ្រាប់ នៅកន្លែងកើតហេតុកែ្បរ បឹងតាបេស ក្នុងភូមិសាស្រ្ត ព្រែកហូរខាងលិច ។ ចំណែកជនសង្ស័យ នៅវេលាម៉ោង ១០៖៣០នាទីយប់ ថ្ងៃទី ២៤ មករា នេះកំពុងឃាត់ខ្លួនទុក អធិការដ្ឋាន ក្រុងតាខ្មៅ ។

ភ្នំពេញៈ ក្រុមហ៊ុន យូណៃធីត ហ្វាម៉ា (ខេមបូឌា) ដែលជាក្រុមហ៊ុន ចែកចាយ ផលិតផល pH Care ,Pure´n Fresh និងទឹកសម្លាប់មេរោគ GynePro នៅកម្ពុជា កាលពីថ្ងៃទី២៥ ខែមករា ឆ្នាំ២០១៣ បានរៀបចំសិក្ខាសាលាមួយ នៅមជ្ឈមណ្ឌលពិព័រណ៍ និងសន្និបាត កោះពេជ្រ ស្តីពីការអប់រំ សុខភាព អនាម័យស្ត្រី ដល់សិស្ស-និស្សិតនារី នានា ។

តំណាងក្រុមហ៊ុន យូណៃធីត ហ្វាម៉ា (United Pharma (Cambodia) Co.,Ltd) បានឱ្យដឹងថា សិក្ខាសាលានេះ អ្នកជំនាញនឹងផ្តល់ ព័ត៌មាន ជាអត្ថប្រយោជន៍ ជាច្រើន សម្រាប់ស្ត្រី ដើម្បីឱ្យពួកគាត់ បានយល់ដឹងកាន់តែច្បាស់ នូវអ្វីជាអនាម័យស្ត្រី របៀបថែទាំអនាម័យស្រ្តី និងការចេះ ជ្រើសរើស ផលិតផល សមស្រប ដើម្បីប្រើប្រាស់ជាដើម ។ មិនតែប៉ុណ្ណោះ អ្នកចូលរួមទាំងអស់ ក៏អាចយក ចំណេះដឹងនេះ ទៅចែករំលែក ដល់ស្រ្តីផ្សេងៗទៀត ដែលជាសាច់ញាតិ មិត្តភក្តិ របស់គេផងដែរ ។

ក្រុមហ៊ុន យូណៃធីត ហ្វាម៉ា (ខេមបូឌា) គឺជាផ្នែកមួយ របស់ក្រុមហ៊ុន United Laboratorie: UNILAB ដ៏ល្បីនៅប្រទេសភីលីពីន ដែលនាំចូល នូវផលិតផលជាច្រើន មកកម្ពុជា ដូចជា ទឹកអនាម័យស្រ្តី pH Care ទឹកអនាម័យសម្រាប់យុវវ័យ Pure´ n Fresh ទឹកសម្លាប់មេរោគ GynePro ឡេលាបខ្លួន Myra ឱសថបំបាត់ ផ្តាសាយ Decolgen និង ផលិតផលសម្រាប់ សុខភាព មួយចំនួនទៀត ផងដែរ ៕

-ក្រសួងធនធានទឹក នឹងបង្កើតវិទ្យាស្ថាន «ទឹក និងដំណាំ » បណ្តុះបណ្តាល ថ្នាក់អនុបណ្ឌិត ដល់មន្រ្តីរបស់ខ្លួន

ភ្នំពេញ ៖ ថវិកាប្រមាណ ២០០លានដុល្លារ ត្រូវបានរាជរដ្ឋាភិបាលកម្ពុជា តាម រយៈក្រសួងធនធានទឹក និងឧតុនិយម ចំណាយក្នុងមួយឆ្នាំៗ ទៅលើប្រព័ន្ធធារា សាស្ដ្រ ដើម្បីស្រោចស្រពការដាំដុះក្នុងវិស័យកសិកម្មរបស់ប្រជាកសិករនៅក្រមខណ្ឌទូទាំង ប្រទេស ដែលតួលេខ ជាផ្លូវការនៃការប្រើ ប្រាស់ថវិកាក្នុងចំនួនដ៏ច្រើននេះ បានបង្ហាញ ឱ្យឃើញថា រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោ ហ៊ុន សែន ដែលមានក្រសួងធនធានទឹក ជាសេនា ធិការដ៏រឹងមាំនោះ បានយកចិត្ដទុកដាក់យ៉ាងខ្លាំង លើការប្រកបការងារក្នុងវិស័យកសិកម្ម និយាយរួម និយាយដោយឡែក គឺវិស័យ ប្រព័ន្ធធារាសាស្ដ្រតែម្ដង ។

នៅចំពោះមុខថ្នាក់ដឹកនាំក្រសួង និង ប្រធានមន្ទីរ អនុប្រធានមន្ទីរ ទូទាំងប្រទេស ក្នុងកិច្ចប្រជុំបិទសន្និបាត បូកសរុបការងារ ប្រចាំឆ្នាំ២០១២ និងដាក់ទិសដៅការងារ ឆ្នាំ ២០១៣ នៅទីស្ដីការក្រសួងធនធានទឹក កាលពីរសៀលថ្ងៃទី២៥ ខែមករា ឆ្នាំ ២០១៣ រដ្ឋមន្ដ្រីក្រសួងធនធានទឹក លោក លឹម គានហោ បានមានប្រសាសន៍ថា “ថវិកា ប្រមាណ១៥០ទៅ២០០លានដុល្លារ ត្រូវ បានចំណាយក្នុងមួយឆ្នាំៗ លើប្រព័ន្ធធារា សាស្ដ្រការដោះស្រាយទឹកជូនប្រជាកសិករ តាមការចង្អុលបង្ហាញ និងដឹកនាំដ៏ត្រឹមត្រូវ របស់សម្ដេចនាយករដ្ឋមន្ដ្រី ហ៊ុន សែន” ។

លោកលឹម គានហោ ដែលមានបទពិសោធន៍ដ៏យូរឆ្នាំ ក្នុងវិស័យ ធនធានទឹក បានចាត់ទុកថា ប្រព័ន្ធធារា សាស្ដ្រជាការងារដ៏ចាំបាច់បំផុត ដើម្បីដោះ ស្រាយឱ្យមានប្រសិទ្ធភាពនិងលក្ខណៈ សម្បត្ដិគ្រប់គ្រាន់ សម្រាប់បម្រើការស្រោច ស្រពលើវិស័យកសិកម្ម របស់ប្រជាកសិករ នៅទូទាំងប្រទេស ។

ជាមួយការរីកចំរើន លើប្រព័ន្ធធារាសាស្ដ្រ នៅក្រមខណ្ឌទូទាំង ប្រទេសនោះ និងធ្វើឱ្យការបង្កបង្កើនផល មានការកើនឡើងយ៉ាងខ្លាំងពីមួយឆ្នាំទៅ មួយឆ្នាំ លោកលឹម គានហោ បានបញ្ជាក់ថា ផ្ទៃដីចំនួន៦៣,១៥ភាគរយនៅទូទាំងប្រទេស បានទទួលការស្រោចស្រព ដែលតួលេខ នេះមាន ការកើនឡើង យ៉ាងខ្លាំង បើប្រៀប ធៀបកាលពីឆ្នាំ១៩៦៧ ដែលនៅមានកម្រិត ទាប ដោយឡែកការ បង្កបង្កើនផល កាលពីឆ្នាំ២០១២កន្លងទៅ បានកើនឡើងប្រមាណ៥២ភាគរយ ដែលតួ លេខជាផ្លូវការនេះ បានបង្ហាញឱ្យឃើញ ពី ភាពរីកចំរើនរបស់ប្រព័ន្ធធារាសាស្ដ្រទឹកសាប ដោយមិនទាន់រាប់បញ្ចូលការការពារទឹក ប្រៃ ផលដំណាំផ្សេងៗ និងការការពារទឹក ជំនន់នោះទេ ។

រដ្ឋមន្ដ្រីក្រសួងធនធានទឹក បានចាត់ទុក ថា ការសម្រេចបានក្នុងលទ្ធផលមួយដ៏ល្អ ក្រោមការដឹកនាំរបស់សម្ដេចតេជោ ហ៊ុន សែន គឺជាសមិទ្ធផលរួម ដែលកើតចេញពី អ្នករាល់គ្នា មិនមែនពីរូបលោក ឬនរណា នោះ ហើយរាជរដ្ឋាភិបាល បាននឹងកំពុង យកចិត្ដទុកដាក់យ៉ាងខ្លាំង លើការដោះស្រាយបញ្ហាទឹកជូនប្រជាកសិករ នៅទូទាំងប្រទេស ហើយការងារនេះ មិន មែនជារឿងសាមញ្ញទាមទារឱ្យមានការ ចំណាយថវិកាយ៉ាងច្រើន ។

ជាមួយគ្នានេះ លោកលឹម គានហោ បាន ជំរុញឱ្យមន្ដ្រីរបស់ក្រសួង និងថ្នាក់ដឹកនាំ មន្ទីរតាមបណ្ដាខេត្ដទាំងអស់ ត្រូវបង្កើន សមត្ថភាពរបស់ខ្លួន ដើម្បីជំរុញការកែលំអ និងការអភិវឌ្ឍន៍ប្រព័ន្ធធារាសាស្ដ្រឱ្យកាន់ តែមានប្រសិទ្ធភាពថែមទៀត ដើម្បីផ្ដល់ការ ស្រោចស្រពលើផ្ទៃដី កសិកម្មរបស់ ប្រជាកសិករ ។

ទាក់ទិនបញ្ហានេះ លោករដ្ឋមន្ដ្រី បានស្នើ ឱ្យមានការរើសបុគ្គលិកម្នាក់ ក្នុងមួយស្រុក តាមរយៈការទិញម៉ូតូឱ្យមួយគ្រឿង និងថវិកា ព្រមទាំងការ បណ្ដុះបណ្ដាលឱ្យ បុគ្គលិកទាំងនេះ ដែលអាចហៅថា ជាភ្នាក់ ងារពិសេសស្ថិតក្រោមការគ្រប់គ្រងរបស់ មន្ទីរ ត្រូវតាមដានជាប្រចាំនូវការថែរទាំ ការថែរក្សាឱ្យមានប្រសិទ្ធភាព នៃប្រព័ន្ធ ធារាសាស្ដ្រ ប៉ុន្ដែការរើសភ្នាក់ងារពិសេសនេះ មិនមានន័យថា ទាត់ចោលសហគមន៍ប្រើប្រាស់ ទឹកនោះឡើយ ។

ជាមួយគ្នានេះ លោកលឹម គានហោ បាន លើកឡើងថា ការបង្កបង្កើនផលដែលនាំឱ្យ មានការរីកចំរើន គឺមកពីមានទឹកគ្រប់គ្រាន់ ហើយការនិយាយពីសន្ដិសុខស្បៀង អាច កើតមានឡើង លុះត្រាការដោះស្រាយបញ្ហា ទឹកបានគ្រប់គ្រាន់ ។

លោករដ្ឋមន្ដ្រី ក៏បានជំរុញឱ្យថ្នាក់ដឹកនាំ មន្ទីរនីមួយៗ នៅទូទាំងប្រទេស ត្រូវខិតខំ ប្រឹងប្រែងបន្ថែមទៀត លើការងាររបស់ខ្លួន ហើយបន្ដជំរុញការស្ដារ ការកែលំអ និងការ អភិវឌ្ឍន៍ប្រព័ន្ធធារាសាស្ដ្រ ទាំងតូច ទាំង មធ្យមនិងទាំងធំ ឱ្យមានការរីកចំរើនខ្លាំង ឡើង ។

ដើម្បីបង្កើនសមត្ថភាពបន្ថែមដល់បុគ្គ លិករបស់ក្រសួងទាំងមូល លោករដ្ឋមន្ដ្រី លឹម គានហោ បានប្រកាសថា ក្រសួងធន ធានទឹក និងបង្កើតវិទ្យាស្ថាន “ទឹកនិងដំណាំ” ថ្នាក់អនុបណ្ឌិត ដើម្បីជួយបណ្ដុះបណ្ដាលដល់មន្ដ្រីរបស់ខ្លួន កាន់តែមានចំណេះដឹង តាមរយៈការជួល សាស្ដ្រាចារ្យបរទេស ដូចជាមកពីប្រទេស បារាំងជាដើម មកបង្រៀន ប៉ុន្ដែប្រើប្រាស់ ភាសាអង់គ្លេស។

នៅចំពោះមុខមន្ដ្រីជាង៣០០នាក់ខាង លើនេះ រដ្ឋមន្ដ្រីក្រសួងធនធានទឹក បានជំរុញឱ្យមន្ដ្រីទាំងអស់ ជាពិសេសថ្នាក់ដឹកនាំតាមមន្ទីរ ទូទាំងប្រទេស ត្រូវបង្កើនសមត្ថភាពផ្នែក ព័ត៌មានវិទ្យា ក្នុងនោះ ត្រូវចងក្រងនូវព័ត៌មាននិងមានប្រព័ន្ធ ទិន្ន័យគ្រប់ៗគ្នា ។

ត្រូវចេះផ្សព្វផ្សាយព័ត៌មាននូវអ្វីដែលកើតមានឡើងនិងយកចិត្ដទុកដាក់បន្ថែមទៀត ក្នុងការរៀនភាសាអង់គ្លេស និងបច្ចេកវិទ្យាថ្មី ព្រមទាំងការត្រួត ពិនិត្យសារ និងអ៊ីមែលជា ប្រចាំ ដែលថ្នាក់លើបានផ្ញើជូន ។

លោករដ្ឋមន្ដ្រីមានសង្ឃឹមយ៉ាងមុតមាំ ថា ថ្នាក់ដឹកនាំ និងមន្ដ្រីទាំងអស់របស់ក្រសួង ធនធានទឹក បន្ដការងារតាមផែនការរបស់ខ្លួនកាន់តែមានប្រសិទ្ធភាពថែមទៀត ជាពិសេសលើការងារស្រោចស្រពទឹកជូនប្រជាកសិករនៅទូទាំងប្រទេស៕

សៀមរាប : នៅក្នុងក្រុងសៀមរាប មានកំណាត់ផ្លូវរាប់សិបខ្សែ ដែលផ្លូវទាំងនោះ សាងសង់ឡើងពីបេតុង បេតុងកៅស៊ូ ផ្លូវដីក្រហម និងផ្លូវមួយ ចំនួនទៀត នៅក្នុងស្ថានភាពជាផ្លូវលំនៅឡើយ។ រាល់បណ្ដាផ្លូវសំខាន់ៗ ក្នុងក្រុងសៀមរាប បានកសាង រៀបចំ ជួសជុលកែលម្អ ជាបណ្ដើរៗ មាន លក្ខណ:ល្អប្រសើរ។ តែកំណាត់ផ្លូវមួយចំនួន ត្រូវបានរងការខូចខាត់ ដោយសារការសាងសង់ ជួសជុលកន្លងទៅមិនបានតាមបទដ្ឋាន លក្ខណ: បច្ចេកទេស ឬ ដោយការប្រើប្រាស់ដឹកធ្ងន់ តែផ្លូវមួយចំនួនទៀត គឺរងការខូចខាត ដោយសារគ្រោះធម្មជាតិ ពិសេសគ្រោះទឹកជំនន់ទឹកភ្លៀង កាល ពីឆ្នាំ២០១១កន្លងទៅ។ ហើយនៅព្រឹកថ្ងៃទី២៥ ខែមករា ឆ្នាំ២០១៣នេះ ត្រូវបាន លោក ស៊ូ ភិរិន្ទ អភិបាល នៃគណ:អភិបាលខេត្តសៀមរាប បាន រៀបចំពិធីសម្ភោធ បើកការដ្ឋានជួសជុល សាងសង់ កែលម្អកំណាត់ផ្លូវ ទាំង១៥ខ្សែនេះ ដោយមានការចូលរួមពី ថ្នាក់ដឹកនាំ មន្ត្រីរាជការ អាជ្ញាធរ និងប្រជាពលរដ្ឋរាប់រយនាក់។

លោកអភិបាលខេត្ត ស៊ូ ភិរិន្ទ បានមានប្រសាសន៍ថា ដោយមើល៍នូវតម្រូវការនៃភាពចាំបាច់ ក្នុងការរៀបចំជួសជុលកែលម្អកំណាត់ផ្លូវ ដែលរងការ ខូចខាត់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានឯកភាពក្នុងការផ្ដល់ជាចំណងដៃ សម្រាប់ប្រជាពលរដ្ឋ ដែលរស់ នៅក្នុងក្រុងសៀមរាប និងសាធារណ:ជនទូទៅ ក្នុងនោះមានភ្ញៀវជាតិ ភ្ញៀវអន្តរជាតិផងដែរ នូវគម្រោងជួសជុលកែលម្អកំណាត់ផ្លូវចំនួន ១៥ខ្សែ ដែលមានប្រវែង ១២គីឡូម៉ែត្រ និង៨៧៨ម៉ែត្រ។

លោកបានបញ្ជាក់ថា ខេត្តសៀមរាប គឺជាទឹកដី នៃសម្បត្តិបេតិកភណ្ឌ វប្បធម៌ពិភពលោកដ៏មហាអស្ចារ្យ នៃស្នាដៃបុព្វបុរសខ្មែរយើង និងជាទឹកដី ពោរពេញដោយរមណីយដ្ឋាន ទេសចរណ៍ វប្បធម៌ និងប្រវត្តិសាស្ត្រធម្មជាតិដ៏សម្បូរបែប ដែលជំរុញ ឲ្យទឹកដីសៀមរាប-អង្គរ ក្លាយជាគោលដៅ ទេសចរណ៍ ដ៏ទាក់ទាញសម្រាប់ភ្ញៀវទេសចរជាតិ និងអន្តរជាតិ ពីគ្រប់មជ្ឈដ្នានជុំវិញពិភពលោក។

ហើយរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិត ដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន អាជ្ញាធរខេត្ត ស្ថាប័នពាក់ព័ន្ធ បាននិងកំពុងពង្រឹង ពង្រីកនូវវិសាលភាព នៃការបម្រើសេវាសាធារណ: ក្នុងនោះ មានវិស័យទេសចរណ៍ឲ្យកាន់តែ មានការរីកចម្រើន តាមរយ:ការកសាងហេដ្ឋារចនាសម្ព័ន្ធនានា និងការកែលម្អសោភ័ណភាពក្រុង ដូចជាការស្ដារ កែលម្អស្ទឹងប្រវត្តិសាស្ត្រ ការពង្រឹង កិច្ចការពារសុខ សុវត្ថិភាពសង្គម បានយ៉ាងល្អប្រសើរ។

ចំពោះកំណាត់ផ្លូវទាំង ១៥ខ្សែ ក្នុងនោះ៦ខ្សែ ដែលមានប្រវែង ៣គីឡូម៉ែត្រ និង៣៤៤ម៉ែត្រ ជាគម្រោងឥណទានខេត្តសៀមរាប និង ៩ខ្សែ មាន ប្រវែង ៩គីឡូម៉ែត្រ និង៥៣៤ម៉ែត្រ ជាគម្រោងឥណទានជាតិ ពីធនាគារពិភពលោក (World Bank) ។ ហើយគម្រោងនេះ គ្រប់គ្រងដោយមន្ទីរ សាធារណការនិងដឹកជញ្ជូនខេត្តសៀមរាប ក្នុងត្រួតពិនិត្យ រៀបចំជួសជុលកែលម្អ សាងសង់ ដែលតាមការគ្រោងទុកត្រូវរួចរាល់ នៅក្នុងអំឡុងខែ មេសា ឆ្នាំ២០១៣ ខាងមុខនេះ៕

ភ្នំពេញៈ បន្ទាប់ពីប្រកួតជំរុះ ជាបន្តបន្ទាប់ រយៈពេលជាង ១ខែកន្លងមក ពេលនេះ ការប្រកួត ជ្រើសរើស ជើងឯក និយាយភាសាអង់គ្លេស សម្រាប់ឆ្នាំ២០១៣ ដែលរៀបចំដោយ ស្រ្ព៊ីងបត ហ្វខេមបូឌា (Spring Board 4Cambodia ) ជាមួយ ស្ថានទូតអង់គ្លេស ឈានដល់ពេលប្រកាស លទ្ធផលហើយ ដែលទីបំផុត យុវសិស្សឆ្នើម៤នាក់ ក្នុងចំណោម ៤កម្រិតផ្សេងគ្នា ត្រូវបានបង្ហាញខ្លួន ។

ការប្រកាស លទ្ធផល ត្រូវបានធ្វើឡើង ក្រោយពេលបញ្ចប់ ការប្រកួតវគ្គផ្តាច់ព្រ័ត្រ នៅសាលសន្និសីទ ចតុមុខ នាល្ងាច ថ្ងៃទី២៤ ខែមករា កន្លងទៅ ដោយបញ្ជាក់ថា សិស្ស-និស្សិត ចំនួន៤នាក់ ដែលបាន ទទួលជោគជ័យ ក្នុងចំណោមការប្រកួត ៤កម្រិតផ្សេងគ្នានោះមាន ពានរង្វាន់ SpringBoard-Kaplan បានទៅលើ មាស ចាន់សិត្យា មកពីសាលា Hapswell Foundation ។ ពានរង្វាន់កម្រិតវិទ្យាល័យ បានទៅលើកញ្ញា សំ សាលីតា មកពី សាលាអន្តរជាតិ ICS ។ ពានរង្វាន់ កម្រិតសិស្សឧត្តមសិក្សា បានទៅលើកញ្ញា អ៊ា អៃលួង មកពីវិទ្យាស្ថានប៊ែលធីអន្តរជាតិ និងពានរង្វាន់សម្រាប់ ការប្រកួត ជាសាធារណៈ បានទៅលើយុវជន អ៊ុង ធីកេត្យា មកពីវិទ្យាស្ថានភាសាបរទេស (IFL)។

លោក ខូលីន ក្លាស (Colin Glass) នាយកក្រុមហ៊ុន ស្រ្ព៊ីងបត បានឱ្យដឹងថា លទ្ធផលនេះ ជាការបង្ហាញឱ្យឃើញពីការវិវឌ្ឍន៍ នៃ ការប្រើប្រាស់ ភាសារអង់គ្លេស នៅកម្ពុជា ។ លោកថា "តាមរយៈកម្មវិធីនេះ យើងបាន មើល ឃើញថា ការនិយាយភាសាអង់គ្លេស នៅកម្ពុជា មានការអភិវឌ្ឍន៍ ជាពិសេសទៅលើសិស្សវិទ្យាល័យ គឺពួកគាត់មានសមត្ថភាពខ្ពស់បំផុត ហើយការអភិវឌ្ឍន៍ចំពោះ ការនិយាយ ភាសាអង់គ្លេស ខ្លាំងបែបនេះ នឹងធ្វើឱ្យមានការអភិវឌ្ឍន៍ ដល់សេដ្ឋកិច្ចកម្ពុជា យ៉ាងខ្លាំងក្លាមួយ នៅថ្ងៃអនាគត"។

កញ្ញា អ៊ា អៃលួង ជាសិស្សវិទ្យាស្ថានប៊ែលធីអន្តរជាតិ ដែលទទួលបានពានរង្វាន់ ជើងឯកនិយាយ ភាសាអង់គ្លេស សម្រាប់សិស្សថ្នាក់ឧត្តមសិក្សា នៅកម្ពុជា បានយល់ថា ភាសារអង់គ្លេសពិតជា មានសារសំខាន់ណាស់ សម្រាប់សង្គមកម្ពុជា ទាំងទំនាក់ទំនង ក៏ដូចជាការធ្វើការងារផងដែរ ។ នាងនិយាយថា “កាលណា យើងចេះភាសាអង់គ្លេស គឺយើងអាចទំនាក់ទំនងជាមួយ ពិភពលោកតែម្តង” ។

លោក អ៊ុក គឹមសេង ទីប្រឹក្សាក្រសួងព័ត៌មាន និងជាអគ្គនាយករង នៃទីភ្នាក់ងារសារព័ត៌មាន AKP បានកោតសរសើរ ចំពោះកម្មវិធីប្រកួតនិយាយ ភាសារអង់គ្លេសនេះ ដោយលោកចាត់ទុកថា កម្មវិធីនេះ ជាការចូលរួមចំណែកដ៏សំខាន់ ក្នុងការអភិវឌ្ឍន៍វិស័យអប់រំនៅកម្ពុជា  ។

លោកមានប្រសាសន៍ថា “មែនទែនទៅ ប្រទេសយើង កំពុងអភិវឌ្ឍន៍អញ្ចឹង ហើយយើងមើលទៅ នៅលើពិភពលោក ភាសារអង់គ្លេស គឺជា ភាសាយាន ។ ភាសា ដែលយើងត្រូវតែប្រើប្រាស់ ដើម្បីទំនាក់ទំនងគ្នា ទាំងសេដ្ឋកិច្ច និងនយោបាយ ។ អញ្ចឹងការរៀន ភាសាអង់គ្លេស អាចជួយ បង្កើនឱកាស ក្នុងការធ្វើការងារ និងជួយដល់ការអភិវឌ្ឍន៍ សង្គមផងដែរ ។ តែយើងឃើញ មានភាសាដទៃទៀត ដែលកំពុងតែទាមទារ ឱ្យយើងចេះនិយាយដែរ ដូចជាភាសា ចិនជាដើម” ។ លោកបន្ថែមថា “រៀនភាសាមិនពិបាក ដូចជារៀនជំនាញ ដែលទាមទារ ឱ្យមាន ការយល់ដឹង ខាងគណិតវិទ្យាទេ ។ ភាសាគ្រាន់តែ ជាការចងចាំ អញ្ចឹងហើយ យើងគួរតែចេះ ឱ្យបានជាង ១ភាសារ គឺលើសពី១ភាសា មានន័យថា ភាសាជាតិ យើងចេះហើយ គឺយើងត្រូវចេះ ភាសាភាសា បរទេសទៀត គឺភាសាអង់គ្លេសហ្នឹងឯង” ៕

-ក្មេងស្រី ត្រូវបានសមត្ថកិច្ច នាំទៅផ្ទះវិញ ក្រោយពីការ ស្រាវជ្រាវ រកឃើញការពិត

ភ្នំពេញ៖ រឿងរ៉ាវដែល ក្មេងស្រីម្នាក់ អាយុ១៣ឆ្នាំ បាននិយាយភូត សមត្ថកិច្ចថា ត្រូវគេចាប់ពី ខេត្តតាកែវ នាំមកភ្នំពេញ ដើម្បីជួញដូរផ្លូវភេទ និងធ្វើឲ្យសមត្ថកិច្ច នៅការិយាល័យ ប្រឆាំងការជួញដូរផ្លូវភេទ និងការពារអនីតិជន នៃស្នងការដ្ឋាននគរបាលរាជធានីភ្នំពេញ ដឹកនាំដោយលោកស្នងការរង បែន រ័ត្ន បើកការស្រាវជ្រាវ ភ្លាមៗ ស្ទើតែភ្លេចបាយភ្លេចទឹក បានបង្ហាញការ ពិតហើយនោះ គឺជារឿងមិនពិតឡើយ ពោលការការ បង្កើតរឿង ប្រឌិតកើតឡើងតែម្តង ពីសំណាក់ ក្មេងស្រីរូបនេះ ដោយមូលហេតុ ពិតប្រាកដនោះ គឺក្មេងស្រីខាងលើនេះ ភ័យយាយស្តីឲ្យ និងខ្លាចយាយ វាយដោយសារ តែបាត់កង់ ពេលទៅរៀន ក៏បែកគំនិតបង្កើត រឿងយ៉ាងដូច្នេះទៅ ។

ស្នងការរង នគរបាល រាជធានីភ្នំពេញ លោកឧត្តមសេនីយ៍ បែន រ័ត្ន បានថ្លែងឲ្យដឹងថា តាមពិតរឿងនេះ ជាការប្រឌិតឡើង ពីសំណាក់ក្មេងស្រី កែង ស្រីចិន អាយុ១៣ឆ្នាំ ជាសិស្សថ្នាក់ទី៧ នៃវិទ្យាល័យ ជា ស៊ីម តាកែវ មានស្រុកកំណើតនៅភូមិខ្នា សង្កាត់ដូនកែវ ក្រុងដូនកែវ ខេត្តតាកែវ នោះទេ ដែលមូលហេតុពិតប្រាកដនោះ គឺផ្តើមចេញពីក្មេង ស្រីរូបនេះ បានបាត់កង់ របស់ខ្លួននៅឯសាលា ពេលទៅរៀន ហេតុដូច្នេះហើយ ដើម្បីកុំឲ្យលោកយាយដែល នៅផ្ទះ និងជាអាណាព្យាបាល បន្ទាប់ពីឪពុកម្តាយ ស្លាប់ចោលនោះ ខឹងសម្បារ និងវាយមកលើខ្លួន ក្មេងស្រីរូបនេះ ក៏បានប្រឌិត រឿងបែបនេះ តែម្តងទៅ ។

លោក បែន រ័ត្ន បានបន្តថា មុនដំបូងនៅ ពេលទទួលព័ត៌មានខាងលើនេះថា ជាការជួញដូរផ្លូវភេទ រួចមក លោកបានដឹកនាំកម្លាំង នគរបាលការិយាល័យ ប្រឆាំងការជួញដូរមនុស្ស និងការពារអនីតិជន ចុះទៅធ្វើការស្រាវជ្រាវ ជាបន្ទាន់ ហើយក្រោយការស្រាវ យ៉ាងយកចិត្តទុក និងតាមរយៈ ការជជីកសួរដេញដោល ទៅលើក្មេងស្រីរងគ្រោះ រួចមក ទើបដឹងថា មិនមានរឿងបែបនេះ កើតឡើងនោះឡើយ ពោលជារឿងប្រឌិត តែប៉ុណ្ណោះ។

លោក កែវ ធា ប្រធានការិយាល័យ ប្រឆាំងការជួញ ដូរផ្លូវភេទ និងការពារអនីតិជន នៃស្នងការដ្ឋាន នគរបាល រាជធានីភ្នំពេញ បានថ្លែងឲ្យដឹងថា ក្រោយពីមានព័ត៌មាននេះកើតឡើង កម្លាំងសមត្ថកិច្ច របស់លោក ដែលមានការបញ្ជា ពីលោកស្នងការ ជួន សុវណ្ណ និងស្នងការរង បែន រ័ត្ន បានចែកជាពីរក្រុម ដើម្បីធ្វើការស្រាវជ្រាវ លើករណីនេះ ដោយមួយក្រុម ចុះទៅ ខេត្តតាកែវ ដើម្បីធ្វើការស្រាវជ្រាវ និងមួយក្រុមទៀត ចុះទៅកន្លែងកើតហេតុ នៅខណ្ឌដង្កោ។

លោក កែវ ធា បានបញ្ជាក់ថា ក្រោយពីបានសួរនាំ និងសាកសួរសាក្សី ព្រមទាំងវត្ថុតាង រួចមកបានបង្ហាញថា រឿងនេះមានការ សង្ស័យច្រើន ។

ដូច្នេះហើយដើម្បីចង់បញ្ជាក់ឲ្យ ដឹងការពិត និងរឿងច្បាស់នោះ សមត្ថកិច្ចបានហៅ ក្មេងស្រីរូបនេះ មកសួរនាំ ទើបក្មេងស្រីបាន សារភាពថា ពុំមានមនុស្សចាប់ខ្លួន ពីខេត្តតាកែវ មកភ្នំពេញ បម្រុងធ្វើការ ជួញដូរ នោះឡើយ ពោលខ្លួនបានឡើង ជិះរថយន្ត ក្រោយពីបានបាត់កង់ នៅសាលា។ ក្មេងស្រីរូបនេះ បានប្រាប់សមត្ថកិច្ចថា ក្រោយពី រថយន្ត បានធ្វើដំណើរ មកដល់ចំណុចកើតហេតុ នៅខណ្ឌដង្កោ ខ្លួនបានសុំចុះ ហើយនៅពេលជួបប្រជាពលរដ្ឋ នៅតាមផ្លូវ បានប្រឌិតរឿងបែបនេះ នាំឲ្យមានការផ្អើល ឆោឡោ តែម្តងទៅ។

បើតាមលោក កែវ ធា ក្រោយពីធ្វើការ ស្រាវជ្រាវ និងដឹងពីដំណើររឿង ពិតហើយនោះ សមត្ថកិច្ច របស់លោកដែលបានខិតខំ សឹងតែពុំបានហូបបាយ ហូបទឹក បានជូនក្មេងស្រីរូបនេះ ត្រឡប់ទៅផ្ទះ របស់នាងវិញ ហើយធ្វើការ ពន្យល់ណែនាំ កុំឲ្យធ្វើរឿងបែបនេះ ម្តងទៀត។

ជាមួយគ្នានេះ លោក បែន រ័ត្ន បានអំពាវនាវ ដល់ប្រជាពលរដ្ឋ គ្រប់ៗគ្នា មិនត្រូវប្រឌិតរឿង ផ្តេសផ្តាសនោះឡើយ នាំឲ្យមានការ ផ្អើល និងចលាចល ប៉ះពាល់ដល់ សន្តិសុខសង្គម ។

សូមបញ្ជាក់ថា សមត្ថកិច្ចបានបើកការស្រាវជ្រាវ លើករណីនេះ បានកើតមានឡើង ក្រោយពេលដែល ក្មេងស្រី ឈ្មោះ កែង ស្រីចិន   អាយុ១៣ឆ្នាំ ជាសិស្សថ្នាក់ទី៧ នៃវិទ្យាល័យ ជា ស៊ីម តាកែវ មានស្រុកកំណើតនៅភូមិខ្នា សង្កាត់ដូនកែវ ក្រុង ដូនកែវ ខេត្តតាកែវ ប្រាប់សមត្ថកិច្ចថា ត្រូវជនខិលខូចមិនស្គាល់ អត្តសញ្ញាណចំនួន៤ នាក់ ចាប់រូបនាង ពីខេត្ត តាកែវ ដឹកឆ្ពោះមករាជធានីភ្នំពេញ ក្នុងបំណង យកនាងមកជួញដូរ ហើយរឿងនេះធ្វើឲ្យមានការភ្ញាក់ផ្អើល កាលពីវេលាម៉ោង ៧ និង ២០ នាទីយប់ថ្ងៃទី២៤ ខែមករាឆ្នាំ ២០១៣ នៅចំណុច ផ្ទះគ្មាន ដំបូលមួយកន្លែងស្ថិតភូមិបាគូ  ក្នុងសង្កាត់ដង្កោ ខណ្ឌដង្កោ រាជធានីភ្នំពេញ៕

ភ្នំពេញ៖ ពលករខ្មែរ ចំនួន៨នាក់ ក្នុងចំណោម១៩នាក់ ដែលត្រូវបាន ក្រសួងការបរទេស សហការ ជាមួយអង្គការ ទេសន្តរប្រវេសន៍ អន្តរជាតិ IOM បានជួយសង្គ្រោះកាល ពីពេលកន្លងទៅ នៅប្រទេសឥណ្ឌូនេស៊ី នឹងត្រឡប់មក កាន់ប្រទេសកម្ពុជាវិញ ដែលជាទឹកដី កំណើតរបស់ខ្លួន នារសៀលថ្ងៃទី៣០ ខែមករា ឆ្នាំ២០១៣។ នេះបើយោងតាម ការបញ្ជាក់របស់ លោក កុយ គួង អ្នកនាំពាក្យ ក្រសួងការ បរទេស ក្នុងសេចក្តីថ្លែងការណ៍ របស់ខ្លួន នាថ្ងៃទី២៥ ខែមករា ឆ្នាំ២០១៣។

លោក កុយ គួង បានថ្លែងឲ្យដឹងថា ពលករខ្មែរ ដែលជាជនរងគ្រោះ ទាំង៨នាក់ នេះស្ថិតនៅក្នុង ចំណោម១៩នាក់ ត្រូវបានស្ថាន ឯកអគ្គរាជទូតកម្ពុជា ប្រចាំនៅ ប្រទេសឥណ្ឌូនេស៊ី សហការជាមួយ អាជ្ញាធរ ឥណ្ឌូនេស៊ី ធ្វើការស្រាវជ្រាវ និងជួយសង្គ្រោះ កាលពីពេលថ្មីៗនេះ ក្រោយពីពួកគេបានចាញ់ បោក មេខ្យល់ ទៅធ្វើការជាកម្មករ ខុសច្បាប់លើ ទូកនេសាទថៃ នៅកោះបេនជីណា នៅប្រទេសឥណ្ឌូនេស៊ី ហើយត្រូវបានធ្វើ បាបពីថៅកែទូកនេសាទ។

អ្នកនាំពាក្យ ក្រសួងការបរទេស លោក កុយ គួង បានបន្តថា ក្រោយការ សម្ភាសន៍ ពលករទាំងនោះ ត្រូវបានមេខ្យល់បោក បញ្ឆោតឲ្យមកធ្វើការ នៅប្រទេសថៃ ដោយបានសន្យាផ្តល់ ប្រាក់ឈ្នួលច្រើន។ ប៉ុន្តែតាមការពិត ក្រោយពីឆ្លងព្រំដែន កម្ពុជា-ថៃ តាមច្រករបៀង លួចលាក់ នៅពេលយប់រួច ពលករទាំងអស់ ត្រូវបានដឹក តាមរថយន្ត លក់ឲ្យទូកនេសាទថៃ នៅតំបន់មហាឆៃ ។

បើតាមលោក កុយ គួង ក្រោយពីការ មកដល់ ជាជំហានដំបូង របស់ពលករខ្មែរ ទាំង៨នាក់ ក្រសួងការបរទេស បាននិងកំពុង ធ្វើការងារ ជាមួយអង្គការ ទេសន្តរប្រវេសន៍ អន្តរជាតិ ដើម្បីធ្វើមាតុភូមិន៍ ពលករខ្មែរ ដែលជនរងគ្រោះទាំង១១នាក់ទៀត យកមកកម្ពុជា ជាបន្តបន្ទាប់ទៀត៕

ភ្នំពេញ៖ សេចក្តីព្រាងច្បាប់ស្តីពី ការទូទាត់ថវិកាទូទៅ របស់រដ្ឋ សម្រាប់ការគ្រប់គ្រង ឆ្នាំ២០១១ ត្រូវបានរដ្ឋសភា នៃ ព្រះរាជាណាចក្រកម្ពុជា អនុម័តគាំទ្រ ដោយសម្លេង ៧៧ ទល់នឹង៨៦សម្លេង នៅថ្ងៃទី២៥ ខែមករា ឆ្នាំ២០១៣នេះ នាវិមានរដ្ឋសភា។

ប្រធានគណៈកម្មាធិការសេដ្ឋកិច្ច ហិរញ្ញវត្ថុ ធនាគារ និងសវនកម្ម លោក ជាម យៀប បានមានប្រសាសន៍ថា បន្ទាប់ពីបានពិនិត្យពិភាក្សាលើសេចក្តីព្រាងច្បាប់នេះរួមមក គណៈកម្មការពិនិត្យ ឃើញថា រាជរដ្ឋាភិបាលក្រោមការដឹកនាំ ដោយ សម្តេចតេជោ ហ៊ុន សែន បានពុះពារជំនះបាននូវរាល់ការលំបាកនានា ច្រើនឥតគណនា ហើយធានាបាននូវបូរណភាពទឹកដី និងអធិបតេយ្យភាពរបស់ជាតិ ព្រមទាំងក្នុងពេលជាមួយគ្នានោះ គឺបានទប់ទល់ប្រកបដោយ ជោគជ័យ និងឆ្លងផុតអំពីផលប៉ះពាល់នៃការធ្លាក់ចុះ សេដ្ឋកិច្ចនិងវិបត្តិកលិយុគសកលលោក ដែលកំពុង ថយចុះ និងត្រូវជំនួសមកវិញដោយ ឥទ្ធិពលនៃវិបត្តិបំណុលអឺរ៉ុប ហើយសភាពការណ៍ ក្នុងប្រទេស
បានប្រឈមនឹងគ្រោះទឹកជំនន់ដ៏កាចសាហាវផង។

លោកបានបន្តថា «កម្ពុជាមានមោទនភាព ណាស់ដោយ សេដ្ឋកិច្ចមានការកើនឡើង បានធ្វើឲ្យចំណូលមធ្យម សម្រាប់ប្រជាជនម្នាក់ ក្នុងមួយឆ្នាំ
សម្រាប់ឆ្នាំ២០១១ បានកើនឡើងដល់ ៩១១ដុល្លាអាមេរិក គឺបានកើនឡើង៦,៧% ធៀបទៅនឹងឆ្នាំ២០១០ ដែលបានឆ្លុះបញ្ចាំងឲ្យឃើញនូវ កម្រិតជីវភាពរស់ នៅរបស់ប្រជាជនយើង កាន់តែប្រសើរឡើង និងធ្វើឲ្យសម្រេចបាននូវការកាត់បន្ថយអត្រានៃភាពក្រីក្របាន១%ក្នុងមួយឆ្នាំ ហើយអតិផរណា ស្ថិតក្នុងការគ្រប់គ្រងបាន គឺកម្រិតមធ្យមប្រចាំឆ្នាំមានចំនួន៥,៥%»។

សូមជម្រាបផងដែរថា ច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០១១ ត្រូវបានអនុវត្តនៅក្នុងបរិការណ៍ ដែលឥទ្ធិពលអវិជ្ជមាននៃការធ្លាក់ចុះសេដ្ឋកិច្ច និងវិបត្តិកលិយុគសកលលោកកំពុងថយចុះ និងត្រូវបានជំនួសមកវិញដោយឥទ្ធិពល នៃវិបត្តិបំណុលនៅអឺរ៉ុប ហើយសភាពការណ៍ក្នុងប្រទេសក៏បានផ្លាស់ប្តូរពីការធូរស្រាលខ្លះនៃទំនាស់ ព្រំដែននៅតំបន់ប្រាសាទព្រះវិហារ មកជាការប្រឈមនឹងទឹកជំនន់៕

ឧបករណ៍ បញ្ចុះសម្ពាធឈាម ម៉ាកធៀនស៍ ជាឧបករណ៍ផលិតឡើង តាមបែបបច្ចេកវិទ្យាទំនើប សម្រាប់ ព្យាបាល ជំងឺដោយប្រើ ជីវអគ្គិសនី ហើយព្យាបាល ក៏រួមផ្សំនឹងវិជ្ជាពេទ្យបុរាណចិន ដើម្បីសម្រួលជីពច ឱ្យដើរស្រួល កុំឱ្យស្ទះ ដែលអាចជួយដល់សុខភាព និងជំនួយក្នុងការព្យាបាល ជំងឺផ្សេងៗ ។ ក្រោយពីប្រើប្រាស់៣ទៅ៤នាទី សម្ពាធឈាមនឹងវិលត្រឡប់ដូចធម្មតាវិញ។ 

ព័ត៌មានលម្អិត សូមទំនាក់ទំនងតាមទូរស័ព្ទលេខ ០១១ ៦៥៨ ៧៩៦/០៨៩ ៨៤២ ៧៤៥/ ០៩៧ ៥១ ១៥ ៨៧២

សូមសាកល្បងនូវមុខងារ របស់ឧបករណ៍ពិសេសនេះ ដូចខាងក្រោម៖

ភ្នំពេញ ៖ គេសង្កេតឃើញ គ្រោះថ្នាក់ចរាចរណ៍ កើតឡើងនៅ ក្នុងរាជធានីភ្នំពេញ ក៏ដូចជា តាមបណ្តាខេត្ត ក្នុងប្រទេសកម្ពុជា ភាគីច្រើនកើតឡើង ដោយសារ អ្នកបើកបរស្រវឹងស្រា ហើយបើកលឿន មិនចេះអធ្យាស្រ័យគ្នា ដូចជា ករណីគ្រោះថ្នាក់ចរាចរណ៍ បង្កឡើងដោយបុរសម្នាក់ ស្រវឹងចេញហូបការ បើករថយន្តលឿន បុកធ្លាយចូលលំនៅឋាន ប្រជាពលរដ្ឋ និងម៉ូតូរ៉ឺម៉ក់ កង់បី ដែលចតទុកស្ងៀមពេញទំហឹង តែម្តង ដែលបណ្តាលឲ្យមនុស្ស រួមដំណើរក្នុង រថយន្តពីរនាក់ និងម្ចាស់ម៉ូតូរ៉ឺម៉ក់កង់បីត្រូវរងរបួស។

គ្រោះថ្នាក់បង្កឡើងកាល ពីវេលាម៉ោង កាលពីវេលាម៉ោង១និង០០នាទីរំលងអាធ្រាត្រ ឈានចូលថ្ងៃទី២៦ ខែមករា ឆ្នាំ២០១៣ នៅមុខផ្ទះលេខ៨២ យីហោ ឪសថស្ថាន បន្ទាយស្រី តាមបណ្តោយ មហាវិថីព្រះសីហនុ ក្នុងសង្កាត់បឹងកេងកងទី១ ខណ្ឌចំការមន។  

យោងតាមសេចក្តីរាយការណ៍ ពីកន្លែងកើតហេតុបានឲ្យដឹងថា មុនពេលកើតហេតុគេសង្កេតឃើញ បុរសម្នាក់វ័យជាង ៣០ ឆ្នាំ រួមដំណើរ ជាមួយបុរសពីរនាក់ទៀតបាន បើករថយន្តមួយគ្រឿង ម៉ាកកាមរីបឡែន ពណ៌ទឹកប្រាក់ ពាក់ស្លាកលេខ ភ្នំពេញ 2U1697 បានបើកក្នុងល្បឿនយ៉ាងលឿន តាមបណ្តោយផ្លូវលេខ ៥១ ( ម៉ាស្ទរ) ក្នុងទិសដៅពី ជើងទៅ ត្បូង លុះបើកមកដល់ចំណុច កែងផ្លូវព្រះសីហនុ រថយន្តបង្កហេតុបានទាញ ចង្កូតបត់មកខាងស្តាំដៃ ប៉ុន្តែដោយសារតែល្បឿន រថយន្តលឿនពេក ទាញចង្កូតមិនទាន់បាន ជ្រុលទៅបុកម៉ូតូកង់បី ដែលចតទុកនៅមុខផ្ទះខ្ទាតផ្លោង ហើយរថយន្តបាន បន្តបុក ទម្លាយចូលទៅក្នុងលំឋានមួយកន្លែងទៀត នៅជិតចំណុចកើតហេតុ ទើបរថយន្តអស់ល្បឿនទៅមុខ លែងរួច គឺបណ្តាលឲ្យ រថយន្តបង្កហេតុ ត្រូវរងការខូចខាតផ្នែកខាងមុខ ទាំងស្រុង និងសសរទ្វារផ្ទះប្រជាពលរដ្ឋ ត្រូវរងការខូចមួយផ្នែកធំ និងម៉ូតូកង់បី ដែលចតទុកស្ងៀមហើយ ត្រូវរថយន្តបើកបុកវិញ ក៏ត្រូវរងការខូចខាតច្រើនដែរ លើសពីនេះ អ្នករួមដំណើរក្នុងរថយន្ត ពីរនាក់ និងម្ចាស់កង់បីម្នាក់ ត្រូវរងរបួស ។

បន្ទាប់ពីកើតហេតុ សមត្ថកិច្ចមូលដ្ឋាន និងនគរបាលចរាចរណ៍ ខណ្ឌចំការមន បានចុះទៅអន្តរាគមន៍ ដល់ចំណុចកើតហេតុ ។ ប៉ុន្តែករណីខាងលើនេះអ្នកបើករថយន្តបង្កហេតុបាន រត់គេចខ្លួនបាត់ដោយមាន អ្នកផ្សេងចេញមុខមក ដោះស្រាយ សំណងជូនម្ចាស់ម៉ូតូកង់បី និង សងថ្លៃខូចខាត ផ្ទះប្រជាពលរដ្ឋដោយមិនបាន ឲ្យសមត្ថកិច្ចស្ទូចយក រថយន្តទៅរក្សាទុកឡើយ។ សមត្ថកិច្ចបានបញ្ជាក់ថាគ្រោះថ្នាក់នេះបង្កឡើង ដោយសារតែអ្នកបើកបរ ស្រវឹងស្រា បាត់បង់ស្មារតីបើកលឿន ៕