យោងតាមគេហទំព័រ បាងកកប៉ុស្តិ៍ របស់ថៃ បានឲ្យដឹងនៅ ថ្ងៃពុធ ទី២៤ ខែតុលា ឆ្នាំ២០១២នេះថា ប្រព័ន្ធសន្តិសុខ ត្រូវបានគេរឹត បន្តឹងខ្លំាង ក្នុងអំឡុង ពេលបុណ្យ ឥស្លាម អ៊ីដ អាល់ អាថា។
ពាក់ព័ន្ធនឹងពិធីបុណ្យសាសនានេះដែរ គឺមានព័ត៌មានមួយថា ក្រុមបំបែកខ្លួន គ្រោងនឹងធ្វើការ វាយប្រហារដោយ រថយន្តគ្រាប់បែក អត្តឃាត ក្នុង ពេលដែលពិធីនោះ នឹងចាប់ផ្តើមឡើង នៅថ្ងៃព្រហស្បតិ៍ ហើយបញ្ចប់ទៅវិញ នៅថ្ងៃសុក្រ។
ជាងនេះទៅទៀត ភ្នាក់ងារសន្តិសុខសម្ងាត់ប្រចាំនៅភាគខាងត្បូងថៃ មួយក្រុម បានទទួល ដំណឹងមួយថា មានក្រុមបះបោរមួយក្រុម បានរៀបចំ គម្រោង ការវាយប្រហារ ដែលមាន រថយន្តផ្ទុកគ្រាប់បែក អត្តឃាតចំនួន ១១គ្រឿង និងម៉ូតូ ១១គ្រឿងទៀត។
ដោយឡែកមានរថយន្តផ្ទុកគ្រាប់បែកអត្តឃាតចំនួនពីរ ក្នុងចំណោមទំាង ១១គ្រឿងនោះ ត្រូវបាន គេយកមកប្រើរួច ហើយកាលពីថ្ងៃទី០៨ ខែតុលា កន្លងទៅនេះ នៅសង្កាត់តាក់បៃ នៃខេត្ត ណារ៉ាត់ធីវ៉ាត់ នោះ។
ជាមួយគ្នានោះដែរ លោក ឆៃយុង ម៉ានីរ៉ុងសាគុល សមាជិកមួយរូបនៃ ក្រុមប្រឹក្សា អភិវឌ្ឍន៍ និងគ្រប់គ្រង គ្រោះមហន្តរាយតាម ព្រំដែនភាគខាងត្បូង បាននិយាយថា រថយន្តអត្តឃាត ត្រូវបានប្រើប្រាស់ ដោយពួកបះបោរ ដើម្បីបង្កើននូវអំណាច វាយប្រហាររបស់ ពួកគេ។ លោកថា ពួកទំាងនោះបាន លួចរថយន្តជាច្រើន គ្រឿងទុកសម្រាប់ ការវាយប្រហារ និងក្រោយមកលួច ម៉ូតូថែមទៀត ដោយប្តូរពណ៌ក្រោយ ពេលដែលលួចបាន ព្រមទំាងដូរ ប័ណ្ណបើកបរទៀតផង៕
