ខឹងបើករថយន្ត កៀរហើយ មិនព្រមឈប់ ជិះម៉ូតូដេញតាម ត្រូវម្ចាស់រថយន្ត បាញ់មួយគ្រាប់ រងរបួសធ្ងន់

ភ្នំពេញ : បុរសម្នាក់ដោយសារតែខឹង អ្នកបើករថយន្តCRV ពណ៌ស្ករមួយគ្រឿង បើកកៀរ តែមិនព្រមឈប់ បានជិះ ម៉ូតូដេញតាមពីក្រោយ ស្រាប់តែត្រូវអ្នកបើករថយន្តរូបនោះ បាញ់មួយគ្រាប់បណ្តាលអោយត្រូវចង្កេះ រងរបួសធ្ងន់តែម្តង ។ ហេតុការណ៍បាញ់ប្រហារខាងលើនេះ ដែលផ្តើមចេញពីគ្រោះថ្នាក់ចរាចរណ៍ បានកើត ឡើង កាលពីវេលាម៉ោងប្រមាណ ៤:៥០នាទីនៅក្បែរផ្សារកណ្តាល ខណ្ឌដូនពេញ ។

សេចក្តីរាយការណ៍ ពីកន្លែងកើតហេតុ បានអោយដឹងថា ជនរងគ្រោះមានឈ្មោះ ភីន ស៊ីណេត អាយុ២៧ឆ្នាំ ជាបុគ្គលិក នៅក្លឹបកំសាន្ត Happy Club សង្កាត់ចាក់អង្រែលើ ស្នាក់នៅផ្ទះជួល នៅសង្កាត់ចាក់អង្រែ ខណ្ឌមានជ័យ ។ មុនពេលកើតហេតុ នៅវេលាម៉ោង ប្រមាណ៣ : ៥០នាទីទាបភ្លឺ ជនរងគ្រោះជិះម៉ូតូ ស្មាស់វី ពាក់ស្លាកលេខភ្នំពេញ. 1P-0987 ពីវិមានឯករាជ្យ ទៅវត្តភ្នំ ហើយពេលមកដល់ម្តុំផ្សារកណ្តាល ត្រូវខ្មាន់កាំភ្លើងបើក រថយន្ត CRV ពណ៌ស្ករ បាញ់មួយគ្រាប់ចំចង្កេះ។ ជនរងគ្រោះក៏មិនទាន់ ប្រាប់ពីមូលហេតុដែរ តែសមត្ថកិច្ចអះអាងថា ផ្តើមចេញពីរឿងគ្រោះថ្នាក់ចរាចរណ៍ ។

បច្ចុប្បន្ន ជនរងគ្រោះត្រូវបញ្ជូន និងកំពុងសម្រាកព្យាបាលនៅមន្ទីរពេទ្យកាល់ម៉ែត ខណ:កម្លាំងនគរបាល ជំនាញ បាននិងកំពុងធ្វើការស្រាវជ្រាវ ករណីនេះបន្តទៀត៕