កំពង់ចាមៈ ជនសង្ស័យម្នាក់ ដែលអាចជាប់ពាក់ព័ន្ធ ការធាក់ផ្តួលយកម៉ូតូ នៅស្រុកជើងព្រៃ ខេត្តកំពង់ចាម កាលពីថ្ងៃទី០៤ ខែមិថុនា ហើយរត់ទៅលាក់ខ្លួន នៅស្រុកចំការលើ ត្រូវបានកម្លាំងនគរបាលនៅទីនោះ ធ្វើការស្រាវជ្រាវ ហើយចាប់ខ្លួនយកទៅប្រគល់ឲ្យ នគរបាលស្រុកជើងព្រៃវិញ ដើម្បីសួរនាំបន្ត និងមានវិធានការ តាមផ្លូវច្បាប់។
មន្ត្រីនគរបាលស្រុកចំការលើ បានឲ្យដឹងថា ជនសង្ស័យរូបនេះត្រូវបានចាប់ខ្លួននៅថ្ងៃទី០៦ ខែមិថុនា ឆ្នាំ២០១៤ ក្រោយពីទទួលបានបទបញ្ជា ពីសំណាក់ស្នងការនគរបាលខេត្ត លោកឧត្តមសេនីយ៍បែន រ័ត្ន ឲ្យតាមស្រាវជ្រាវ មុខសញ្ញាខាងលើនេះ ក្រោយពីធ្វើសកម្មភាពនៅស្រុកជើងព្រៃនោះ ។
មន្ត្រីនគរបាលបានបន្តទៀតថា ជនសង្ស័យរូបនេះឈ្មោះ រ៉ន វិច្ឆិកា អាយុ១៧ឆ្នាំ ធ្លាប់ត្រូវបានកម្លាំងនគរបាល ស្រុកចំការលើ ចាប់ខ្លួនកាលពីថ្ងៃទី១៥ ខែកក្កដា ឆ្នាំ២០១២កន្លងទៅ ពីបទចោរកម្ម ហើយត្រូវបានតុលាការ ឃុំខ្លួន រួចដោះលែងមកវិញនៅថ្ងៃទី១៥ ខែមេសា ឆ្នាំ២០១៣ បន្តធ្វើសកម្មភាពបទល្មើស ទាំងនេះថែមទៀត មិនរាងចាលនោះឡើយ។
ជុំវិញការចាប់ខ្លួនជនសង្ស័យរូបនេះ អធិការនគរបាលស្រុកជើងព្រៃ លោក ហេង វុទ្ធី បានបញ្ជាក់ថា កម្លាំងនគរបាលជំនាញ របស់លោកបាននឹងកំពុងបន្តសួរនាំ ពាក់ព័ន្ធសកម្មភាពធាក់ផ្តួលយកម៉ូតូ កាលពីថ្ងៃទី០៤ ខែមិថុនា ថាតើពិតជាជនសង្ស័យរូបនេះ ឬមួយ៉ាងណា។
លោក ហេង វុទ្ធី បានបញ្ជាក់ថា ពេលដែលសមត្ថកិច្ចរបស់លោកសួរនាំ ជនសង្ស័យបានឆ្លើយបដិសេធរាល់ សកម្មភាពដែលបានកើតឡើង កន្លងមកនោះ ដូច្នេះមានតែរង់ចាំការសួរនាំបន្តទៀតទើបដឹងច្បាស់៕
