បុរសម្នាក់ត្រូវ រថយន្តដឹកខ្សាច់ ចំណុះ៥តោន បើកបុកស្លាប់

ភ្នំពេញៈ នៅវេលាម៉ោង ប្រមាណ៦ល្ងាច ថ្ងៃទី០៦ ខែមិថុនា ឆ្នាំ២០១៤ បុរសម្នាក់ត្រូវបាន រថយន្តដឹក ខ្សាច់ពេញ បើកបុកបណ្តាយឲ្យស្លាប់ភ្លាមៗ នៅនឹងកន្លែងកើតហេតុ។ ហេតុការណ៍នេះបានកើត ឡើងនៅលើកំណាត់ផ្លូវជាតិលេខ៣ ក្នុងភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ។

ប្រភពព័ត៌មានបានឲ្យដឹងថា ជនរងគ្រោះមានឈ្មោះ ឃឿន ស៊ីន ភេទប្រុស អាយុ៣១ឆ្នាំ មុខរបរជា កម្មករ ស្នាក់នៅផ្ទះជួល ក្នុងភូមិព្រៃទា សង្កាត់ចោមចៅ មានស្រុកកំណើតនៅភូមិពោធិ៍បាន ឃុំពោធិ៍បាន ស្រុកកោះធំ ខេត្តកណ្តាល ជិះម៉ូតូម៉ាកសេ១២៥ ស៊េរីឆ្នាំ២០១២ ពាក់ស្លាកលេខភ្នំពេញ 1BN-2680។ ចំណែករថយន្តបង្ក ជារថយន្តដឹកខ្សាច់ពេញ ចណុះ៥តោន ពាក់ស្លាកលេខ ក-៨០១២ ភព៣។

ប្រភពព័ត៌មានបន្តទៀតថា នៅមុនពេលកើតហេតុ ជនរងគ្រោះបានជិះម៉ូតូតែម្នាក់ឯង លុះមកដល់ចំណុច កើតហេតុកត្រូវរថយន្តដឹកខ្សាច់ខាងលើ បុកពីក្រោយបណ្តាលស្លាប់ភ្លាមៗ នៅនឹងកន្លែងកើតហេតុ ។ ក្រោយ កើតហេតុអ្នកបើករថយន្តបង្កបានព្យាយាមបើករថយន្តរត់គេចខ្លួន តែត្រូវបានកម្លាំងសមត្ថកិច្ច ធ្វើការស្ទាក់ចាប់បាន តែអ្នកបើកបរបានរត់គេចខ្លួនបាត់។

បច្ចុប្បន្នសពជនរងគ្រោះត្រូវបានគេយកទៅរក្សាទុក រង់ចាំសាច់ញាតិមកទទួលសព យកទៅធ្វើ បុណ្យតាមប្រពៃណី៕