ភ្នំពេញ៖ អភិបាលខណ្ឌ ច្បារអំពៅ លោក អ៊ាង ស៊ីផាន ប្រធានកិត្តិយស អនុសាខាកាកបាទ ក្រហមកម្ពុជាខណ្ឌ កាលពីព្រឹកថ្ងៃទី១២ ខែមិថុនា ឆ្នាំ២០១៤ បាននាំយកនូវអំណោយ សង្រ្គោះបន្ទាន់ របស់ អនុសាខាកាកបាទ ក្រហមកម្ពុជាខណ្ឌ និងអំណោយសប្បុរសជន នានា ទៅផ្តល់ជូនដល់ពលរដ្ឋ ២គ្រួសារ នៅភូមិព្រែកធំ២ សង្កាត់ក្បាលកោះ ដែលរងគ្រោះ ដោយអគ្គិភ័យបំផ្លាញផ្ទះ របស់ពួកគាត់ កាលពីវេលាព្រឹក ថ្ងៃទី១២ ខែមិថុនា ឆ្នាំ២០១៤ ។
ក្នុងការនាំយកអំណោយ របស់អនុសាលាកាកបាទ ក្រហមខណ្ឌ ទៅឧបត្ថម្ភជូនប្រជាពលរដ្ឋ
លោក អ៊ាង ស៊ីផាន ក្នុងនាម គណ:អភិបាលខណ្ឌ និងក្នុងនាមក្រុមប្រឹក្សាខណ្ឌ បានថ្លែងអំណរគុណយ៉ាង ជ្រាលជ្រៅ ចំពោះសប្បុរសជន ដែលមានទឹកចិត្តសប្បុរសធម៌ បានបរិច្ចាគនូវធនធាន ផ្ទាល់ខ្លួន ឧបត្ថម្ភ ដល់គ្រួសាររងគ្រោះ ។ លោកក៏បានអំពានាវដល់ប្រជាពលរដ្ឋឲ្យមានការប្រុងប្រយ័ត្ន ចំពោះភ្លើងចង្រ្កានទាន ធូប និងប្រព័ន្ឋភ្លើងអគ្គិសនី ព្រោះវានឹងងាយកើតឡើងនូវគ្រោះអគ្គិភ័យ ដែលវានឹងបំផ្លិចបំផ្លាញផ្ទះ សម្បែង ខ្ទេចខ្ទីអស់ ដូចពាក្យចាស់លោកពោលថាស៊ូស្លាប់
គួរបញ្ជាក់ថា គ្រោះអគ្គិភ័យ នេះកើតឡើង នៅវេលាម៉ោងប្រមាណ ៨និង៤០ ព្រឹកថ្ងៃទី១២ ខែមិថុនា ឆ្នាំ២០១៤ បានឆាបឆេះផ្ទះប្រជាពលរដ្ឋ ក្នុងភូមិព្រែកធំ២ សង្កាត់ក្បាលកោះ ខណ្ឌច្បារអំពៅ បណ្កាលឲ្យឆេះផ្ទះអស់២ខ្នង ដែលមានឈ្មោះ អ៊ុំ ឈឿន ភេទស្រី អាយុ ៨០ឆ្នាំ និងម្នាក់ទៀត ឈ្មោះ ខែម អូន ភេទប្រុស អាយុ ៤០ឆ្នាំ ៕
សកម្មភ្លើងឆេះផ្ទះរបស់ប្រជាពលរដ្ឋក្នុងខណ្ឌ ច្បារអំពៅ
