ស្រវឹង បើករថយន្ត Rang Rover ទៅបុកគូថ រថយន្តតួរីស ហើយជ្រុលល្បឿន បុកចូលរបងផ្ទះ ប្រជាពលរដ្ឋ បណ្តាលឲ្យ រថយន្ត រងការខូចខាត យ៉ាងដំណំ

ភ្នំពេញ៖ យុវជនម្នាក់ស្រវឹង បើករថយន្តមួយគ្រឿងម៉ាក Rang rover ទៅបុកពីក្រោយគូថរថយន្តតួរីស ហើយរថយន្តនៅមិន ទាន់អស់ល្បឿន ក៏បានជ្រុលចង្កូតបុក របងផ្ទះប្រជាពលរដ្ឋធ្លាយ ចូលដល់ខាងក្នុង។

ហេតុការណ៍នេះ កើតឡើងកាលពីវេលាម៉ោង ១និង០០នាទីយប់ ឈានចូលថ្ងៃទី ២៦មិថុនា ឆ្នាំ២០១៤ នៅចំណុចទល់មុខ ផ្លូវចូលអធិការខណ្ឌចំការមន ស្ថិតតាមបណ្តោយផ្លូវ ព្រះមុន្នីវង្ស ក្នុងសង្កាត់ផ្សារដើមថ្កូវ ខណ្ឌចំការមន។

យោងតាមប្រភពព័ត៌មាន ពីកន្លែងកើតហេតុបានឲ្យដឹងថា នៅមុនពេលកើតហេតុគេសង្កេត ឃើញយុវជនខាងលើ ជិះរថយន្តមួយគឿងម៉ាក Rang rover ពណ៌ខ្មៅ ពាក់ស្លាកលេខភ្នំពេញ 2W- 9298 បើកបរធ្វើដំណើរតាមបណ្តោយ ផ្លូវព្រះមុន្នីវង្ស ទិសដៅពីត្បូងទៅជើងក្នុងល្បឿនយ៉ាងលឿន លុះមកដល់ចំណុចកើតហេតុ ក៏បានជ្រុលល្បឿន បុកបញ្ឆិត ពីក្រោយរថយន្តតួរីស មួយគ្រឿងផ្សេងទៀត ពណ៌ទឹកប៊ិចលាយស គ្មានស្លាកលេខ បើកបរដោយបុរសម្នាក់ ក្នុងទិសស្របគ្នា បណ្តាលឲ្យរថយន្តតួរីស រងការខូចខាត ផ្នែកខាងក្រោយ ហើយរថយន្ត Rang Rover នៅមិនអស់ល្បឿន ក៏បានជ្រុលទៅ បុករបងផ្ទះប្រជាពលរដ្ឋ ធ្លាយចូលទៅខាងក្នុងជាង១០ម៉ែត្រ ។ រីចំណែកឯរថយន្ត Rang rover ត្រូវរងការខូចខាតផ្នែកខាងមុខ យ៉ាងដំណំ។

ក្រោយកើតហេតុ សមត្ថកិច្ចមូលដ្ឋាន បានសហការជាមួយជំនាញ ចុះធ្វើការអន្តរាគមន៍ដល់កន្លែងកើតហេតុ តែភាគីខាង ម្ចាស់រថយន្តបង្ក មិនចង់ឲ្យរំខានដល់សមត្ថកិច្ចនោះទេ ទើបសុខចិត្តចេញថ្លៃ ខូចខាតទាំងអស់  ទាំងថ្លៃរថយន្តតួរីស និងរបង ផ្ទះរបស់ប្រជាពលរដ្ឋនៅម្តុំនោះ។

សូមបញ្ជាក់ផងដែរថា ករណីខាងលើនេះ គឺកើតឡើងដោយសារតែយុវជន ជាម្ចាស់រថយន្ត Rang Rover បើកបរស្ថិក្នុងភាព ស្រវឹង ហើយខ្វះការប្រុងប្រយ័ត្នខ្ពស់ ទើបបង្កឲ្យមានរឿងហេតុ ដូចនេះកើតឡើងតែម្តងទៅ៕