រ៉ង់ហ្គូន, (ស៊ិនហួ) ៖ មនុស្សប្រមាណ ២០១ នាក់បន្ថែមទៀត មកពីសង្កាត់ចំនួន ៧ ក្នុងទីក្រុង មែន ដាឡាយ ដែលធំជាងគេលំដាប់ទីពីរ នៅមីយ៉ាន់ម៉ា ត្រូវបានតុលាការកាត់ទោសពីបទបង្ក អំពើហិង្សា ហើយនេះជាបទល្មើសមួយទៅ នឹងច្បាប់រក្សា សន្តិសុខ និង សណ្តាប់ធ្នាប់ ដែលបានដាក់ នៅក្នុង រយៈពេល ២ថ្ងៃចុងក្រោយនេះ។
ទីភ្នាក់ងារព័ត៌មានចិនស៊ិនហួ បានចេញផ្សាយនៅថ្ងៃចន្ទ ទី០៧ ខែកក្កដា ឆ្នាំ ២០១៤ នេះថា ដំណាក់ កាលដំបូង អាជ្ញាធរបានចាប់ខ្លួនមនុស្សចំនួន ១៤៥នាក់រួចមកហើយ ពាក់ព័ន្ធនឹង ករណីបង្កអំពើហិង្សា ប៉ុន្តែក្រោយមកពួកគេត្រូវបានដោះលែងមកវិញ។ មនុស្សមួយចំនួន ត្រូវបានតុលាការ កាត់ទោស លើករណីដូចជា ការប្រមូលផ្តុំគ្នាធ្វើ កុប្បកម្ម, ប្រើប្រាស់អាវុធខុសច្បាប់, និង បទឧក្រិដ្ឋផ្សេងៗទៀត។
គួរបញ្ជាក់ថា សង្កាត់ចំនួន ៧នៃទីក្រុងមែនដាឡាយ របស់ប្រទេសមីយ៉ាន់ម៉ា ត្រូវបានដាក់ ទៅក្នុងបំរាម គោចរចាប់តាំងពីថ្ងៃទី០៣ ខែកក្កដា មកម្ល៉េះ ដោយសារតែកាលពីថ្ងៃទី០១ ខែកក្កដា មានការប៉ះទង្គិច ប្រឆាំងនឹងករណីរំលោភផ្លូវភេទ ដែលបណ្តាលឲ្យមនុស្ស ២នាក់ ស្លាប់ និង ១៧នាក់ផ្សេង ទៀតរងរបួស។ រហូតមកដល់ថ្ងៃចន្ទ នេះសេចក្តីរាយការណ៍ព័ត៌មាន ក្នុងតំបន់អះអាងថា តំបន់ទាំងមូលកំពុងស្ថិត នៅក្នុងការគ្រប់គ្រងហើយ។
