កោះកុង ៖ ដោយសារប្រព័ន្ធហ្វេសប៊ុក តាមទូរស័ព្ទ មានការកើនឡើងច្រើន ធ្វើឱ្យយុវវ័យមានការភ្លើតភ្លើន មិនគិតពីប្រពៃណី មិនគិតពីមានទោសពៃរ៍អ្វីឡើយ ឱ្យតែបានបំពេញបំណងរបស់ខ្លួន នៅពេលមាន ភ្លើងតណ្ហា។ ជាក់ស្ដែងដូចករណីមួយ បានកើតឡើងទៅលើក្មេងស្រីម្នាក់ ដែលនាងទៅបេះផ្លែសាវម៉ាវហូប នៅចំការជិតផ្ទះ បុរសម្នាក់ដើរតាមពីក្រោយ រហូតដល់ចំណុចកើតហេតុ ហើយធ្វើសកម្មភាព ចាប់រហូតបាន សម្រេច។
ករណីចាប់រំលោភសេពសន្ថវៈ ទៅលើក្មេងស្រីជាអនីតិជន ដែលមានអាយុទើបតែ៣ឆ្នាំនេះ បានកើតឡើងនៅ វេលា ម៉ោង ៥,៣០នាទី ថ្ងៃទី ៧ ខែកក្កដា ឆ្នាំ ២០១៤ ស្ថិតនៅចំណុចភូមិត្រពាំងឈើត្រាវ ឃុំឫស្សីជ្រុំ ស្រុកថ្មបាំង ខេត្ដកោះកុង។ ដោយជនល្មោភកាម មានឈ្មោះ ហ៊ុន ពៅ ភេទប្រុស អាយុ ២៦ឆ្នាំ មានទីលំនៅភូមិ ឃុំកើតហេតុ មានមុខរបរមិនពិតប្រាកដ។ ចំណែកក្មេងស្រីរងគ្រោះ មានឈ្មោះ ប.ស.ណ អាយុ ៣ឆ្នាំ មាន ទីលំនៅភូមិឃុំកើតហេតុជាមួយគ្នា។
ប្រភពពីសមត្ថកិច្ចព្រហ្មទណ្ឌ នៃស្នងការខេត្ដបាននិយាយឱ្យដឹងថា មុនពេលកើតហេតុ ក្មេងស្រីបានទៅបេះផ្លែ សាវម៉ាវហូបតែម្នាក់ឯង ហើយជនសង្ស័យបានដើរពីក្រោយ ដោយមិនឱ្យក្មេងស្រីនោះដឹងខ្លួន នៅពេលជន សង្ស័យឃើញមានឱកាសល្អ ក៏ចាប់ក្មេងស្រីនោះ ទាញទៅក្បែរគុម្ពឫស្សី ហើយធ្វើការចាប់រំលោភ រហូតបាន សម្រេចតែម្ដង។ ប្រភពដដែលបានបន្ដថា ការរំលោភក្មេងស្រីបានសម្រេច ហើយជនសង្ស័យបានទៅផ្ទះវិញ ពេលនោះក្មេងស្រីរងគ្រោះ បានវិលមកផ្ទះ ហើយយំ ជីដូនឃើញចៅយំ ក៏សួរនាងថា យំរឿងអី្វ ក្មេងស្រីបាន ប្រាប់ដំណើរសាច់រឿង ពីការចាប់រំលោភ របស់ជនសង្ស័យ នៅពេលដឹងពីហេតុផល ក៏បានទៅដាក់ពាក្យ បណ្ដឹងនៅប៉ុស្ដិ៍ ធ្វើការចាប់ខ្លួនបានតែម្ដង។ នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជា បានប្រព្រឹត្ដទៅលើក្មេងស្រីរងគ្រោះ ពិតប្រាកដមែន។ ចំពោះករណីខាងលើ សមត្ថកិច្ចកំពុងកសាងសំណុំរឿង បញ្ជូនទៅសាលាដំបូងខេត្ដ ដើម្បីចាត់ការទៅតាម នីតិវិធីច្បាប់។
សូមបញ្ជាក់ថា ម្ដាយក្មេងស្រី បានទៅធ្វើការនៅម៉ាឡេស៊ី ទុកកូនស្រីឱ្យនៅជាមួយម្ដាយ។ ហើយនៅព្រឹកនេះ ថ្ងៃទី៩ ខែកក្កដា ឆ្នាំ ២០១៤ លោកស្រី ឡុង សុម៉ាម៉េត អនុប្រធានកិច្ចការនារីខេត្ដ បានជួយឧបត្ថម្ភថវិកា ដល់ក្មេងស្រីមួយចំនួន ហើយក៏មានការគ្រាំទ្រ ពីអង្គការសិទ្ធិមនុស្ស និងអង្គការអាដហុក ផងដែរ៕
