កំពង់ស្ពឺ ៖ គ្រោះថ្នាក់ចរាចរក្រឡាប់ រថយន្ដលុច្សស៊ីស ៤៧០មួយគ្រឿង នៅក្បែរ អាស្រមយាយម៉ៅពេជ្រនិល កាលពីវេលាម៉ោង៦ និង២០នាទីព្រឹកថ្ងៃទី១២ ខែកក្កដា ឆ្នាំ២០១៤ លើកំណាត់ផ្លូវជាតិ លេខ៤ ក្នុងឃុំត្រែងត្រយឹង ស្រុកភ្នំស្រួច ខេត្ដកំពង់ស្ពឺ បណ្ដាលឱ្យស្លាប់ពីរនាក់ និងរបួសធ្ងន់ស្រាល៥នាក់ ។
មន្ដ្រីនគរបាលចរាចរណ៍ផ្លូវគោកខេត្ដ កំពង់ស្ពឺ បានឱ្យដឹងថា គ្រោះថ្នាក់ចរាចរនេះ បានកើតឡើងដោយសារតែរថយន្ដបើកលឿន ហើយមានម៉ូតូមួយគ្រឿងបើកឆ្លងផ្លូវ ធ្វើឱ្យអ្នកបើករថយន្ដរេចង្កូត បណ្ដាលឱ្យក្រឡាប់តែម្ដងទៅ ។
នគរបាលស្រុកភ្នំស្រួច បានឱ្យដឹងថា ជន រងគ្រោះដែលស្លាប់ ឈ្មោះផេង អាយុ១៨ឆ្នាំ មុខរបរជាសិស្ស រស់នៅសង្កាត់ទួលសង្កែ ខណ្ឌឫស្សីកែវ ទី២ ឈ្មោះប៉ាង គឹមអេង ភេទស្រី អាយុ២០ឆ្នាំ រស់នៅជាមួយជនរងគ្រោះ ដោយឡែកជន រងគ្រោះ ៥នាក់ផ្សេងទៀត រួមមាន ទី១ ឈ្មោះកង ម៉េត ភេទប្រុស អាយុ២៨ឆ្នាំ រស់នៅក្បែរផ្សារដេប៉ូ សង្កាត់វាលវង់ ខណ្ឌ ៧មករា រងរបួសធ្ងន់ ទី២ ឈ្មោះប៉ាង គឹមចេង ភេទស្រី អាយុ២៨ឆ្នាំ រស់នៅសង្កាត់វាលវង់ ខណ្ឌ៧មករា រងរបួសស្រាល ទី៣ឈ្មោះពេជ្រ អាយុ២២ឆ្នាំ រស់នៅសង្កាត់ទួលសង្កែ ខណ្ឌ ឫស្សីកែវ រងរបួសធ្ងន់ ទី៤ ឈ្មោះសំ កូ ភេទប្រុស អាយុ២៨ឆ្នាំ ជាអ្នកបើករថយន្ដ រងរបួសស្រាល ជាប្ដីឈ្មោះគឹមចេងនិងទី៥ មិនទាន់ស្គាល់ឈ្មោះ អាយុប្រមាណ៣០ឆ្នាំ រងរបួសធ្ងន់ ។
ក្រោយកើតហេតុជនរងគ្រោះដែលរងរបួសធ្ងន់ស្រាល ត្រូវដឹកបញ្ជូនទៅកាន់មន្ទីរពេទ្យ រីឯរថយន្ដយកទៅរក្សាទុកជាបណ្ដោះអាសន្ន រង់ចាំប្រគល់ទៅឱ្យជនរងគ្រោះនៅពេលក្រោយ ។
