រថយន្តបុកម៉ូតូ រងរបួស ធ្ងន់ស្រាល២នាក់ នៅស្រុកអង្គស្នួល

កណ្តាល ៖ គ្រោះថ្នាក់ចរាចរណ៍ មួយបានកើតឡើង រវាងរថយន្ត និងម៉ូតូស្ថិតនៅ តាមផ្លូវជាតិលេខ៤ ចន្លោះគីឡូម៉ែត្រលេខ ២៥-២៦ ភូមិអង្គស្នួល ឃុំពើក ស្រុកអង្គស្នួល ខេត្តកណ្តាល បណ្តាលឲ្យ រងរបួសធ្ងន់ស្រាល ២នាក់ ។

សមត្ថកិច្ច មូលដ្ឋាន បានឲ្យដឹងថា មុនពេលកើតហេតុ មានរថយន្ត មួយគ្រឿង ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ.ព ៣ ៦០៥៧ សណ្ដោងរ៉ឺម៉ក ដឹកកុងតៃន័រ លេខ៤អា០២៦៣ បើកបរមិនដឹងឈ្មោះ ពីព្រោះរត់គេចខ្លួនបាត់ បើកឆ្លងថ្នល់ពីត្បូង ទៅជើងស្របពេលនោះក៏ មានម៉ូតូមួយគ្រឿងម៉ាកសេ១២៥ ពណ៌ខ្មៅ ពាក់ស្លាកលេខ ភ្នំពេញ1CE-1029 បើកបរដោយឈ្មោះ ពុត តឿ ភេទប្រុស អាយុ២២ឆ្នាំ រួមដំណើរដោយ ឈ្មោះ ចេង ព្រាប ភេទប្រុស២១ឆ្នាំ នៅភូមិជាមួយគ្នា ខណៈកំពុងបើកពី ទិសខាងកើតមកលិច បានបុកចំពីមុខកាប៊ិនរថយន្តតែម្ដង បណ្តាលឲ្យជនរងគ្រោះ រងរបួសធ្ងន់ស្រាល។

ក្រោយកើតហេតុ ទាំងរថយន្ត និងម៉ូតូ ត្រូវបានសមត្ថកិច្ច យកទៅរក្សាទុក នៅអធិការដ្ឋាន នគរបាល ស្រុកដើម្បីរង់ចាំការដោះស្រាយបន្តទៀត៕