កំពង់ចាម ៖ កម្លាំង សមត្ថកិច្ចចម្រុះ រួមមាន កម្លាំងអាជ្ញាធរ កម្លាំងនគរបាល មូលដ្ឋាន សហការជាមួយ កម្លាំងរដ្ឋបាល ជលផល ខេត្តកំពង់ចាម កាលពីព្រឹកថ្ងៃទី២៨ ខែកក្កដា ឆ្នាំ២០១៤ បានបើក ប្រតិបត្តិការចុះ បង្ក្រាប បទល្មើសនេសាទ ខុសច្បាប់នៅក្នុង ភូមិសាស្ត្រ ឃុំបាធាយ ស្រុកបាធាយ ដោយឃាត់ខ្លួន មនុស្សចំនួន៦នាក់ ។
មន្រ្តីរដ្ឋបាល ជលផល ខេត្តកំពង់ចាម បានថ្លែងឲ្យដឹងថា នៅក្នុងប្រតិបត្តិការ ខាងលើនេះ កម្លាំងសមត្ថកិច្ចចម្រុះ បានដកហូតនូវ ឧបករណ៍នេសាទ ខុសច្បាប់ មួយចំនួន រួមមាន កាណូត ៣គ្រឿងទូក មួយគ្រឿង និងចាក់លែង កូនត្រីចំរុះចំនួន១៤៥គីឡូក្រាមផងដែរ។
មន្រ្តីរដ្ឋបាល ជលផល បានបន្តទៀតថា ជនសង្ស័យ ទាំង៦នាក់ ដែលត្រូវចាប់ខ្លួននោះ រួមមានទី១ឈ្មោះ ជា ស៊ឹមហេង អាយុ២៩ឆ្នាំ ទី២ឈ្មោះ គុល តែម អាយុ៥១ឆ្នាំ ទី៣ឈ្មោះ មាន កី អាយុ២៨ឆ្នាំ ទី៤ឈ្មោះ យ៉ើ រ័ត្ន អាយុ១៨ឆ្នាំ ទី៥ឈ្មោះ គុល ភី អាយុ៤០ឆ្នាំ និងទី៦ឈ្មោះ ពៅ ជឿន អាយុ៤៤ឆ្នាំ ជនទាំង៦នាក់ រស់នៅ ភូមិជ្រែក ឃុំបាធាយ ស្រុកបាធាយ។
ក្រោយការចាប់ខ្លួន ជនសង្ស័យទាំង៦នាក់ ត្រូវបានយកទៅសួរនាំ នៅខណ្ឌរដ្ឋបាលជលផល ដើម្បីចាត់ការបន្តតាមផ្លូវច្បាប់៕
