លោកនុត ពុធដារ៉ា ជួបសំណេះ សំណាល ជាមួយកម្លាំង ប្រជាការពារ ប្រមាណ ៧០០នាក់ មកពីសង្កាត់ ទាំង១៣ ក្រោមឱវាទ សាលាខណ្ឌ

ភ្នំពេញៈ លោកនុត ពុធដារ៉ា អភិបាលខណ្ឌដង្កោ  កាលពីរសៀលថ្ងៃទី១ ខែសីហា នេះ បានជួប សំណេះសំណាល ជាមួយកម្លាំងប្រជាការពារ ចំនួន៧០០នាក់ មកពីតាមបណ្តាសង្កាត់ទាំង១៣ ក្រោម ឱវាទសាលាខណ្ឌ  ក្នុងគោលដៅពង្រឹងការ ការពារសន្តិសុខសណ្តាប់ធ្នាប់ ជូនប្រជាពលរដ្ឋ ក្នុងមូលដ្ឋានអោយ កាន់តែ ប្រសើរថែមទៀត។

លោកនុត ពុធដារ៉ា បានថ្លែងថា កម្លាំងសន្តិសុខ សណ្តាប់ធ្នាប់ របស់សង្កាត់ទាំង ៧០០រូប គឺជាកម្លាំងស្នូល មួយរបស់ខណ្ឌ មានការដឹកនាំច្បាស់លាស់ មានវិន័យល្អ ដែលមានតួនាទី ការពារសន្តិសុខ សណ្តាប់ធ្នាប់ក្នុង មូលដ្ឋាន និងនៅតាមទីសាធារណៈ។ លោក អភិបាលខណ្ឌ បានបន្តទៀតថា កន្លងមកនេះ កម្លាំងប្រជា ការពារទាំង ៧០០ នាក់របស់ខណ្ឌ បានចូលរួមយ៉ាងសកម្ម ក្នុងការ ការពារសន្តិសុខ សណ្តាប់ធ្នាប់ក្នុងមូលដ្ឋាន និងជាពិសេសបាន ចូលរួមជាមួយសមត្ថកិច្ច នានាក្នុងការបង្ក្រាបបទលើ្មសផ្សេងៗ ដែលធ្វើអោយ ប៉ះពាល់ដល់សន្តិសុខ សណ្តាប់ធ្នាប់ និងការរស់នៅរបស់ប្រជាពលរដ្ឋ។

 នៅក្នុងឱកាសនោះដែរ លោកនុត ពុធដារ៉ា បាននែនាំដល់កម្លាំងសន្តិសុខទាំងអស់ត្រូវ ចេះរួបរួមសាមគ្គីគ្នា ស្រឡាញ់គ្នាដូចបងប្អូន ចេះជួយគ្នាទៅវិញទៅមក  មានវិន័យល្អ និង មានឆន្ទៈមោះមុតក្នុងការបំពេញភារៈកិច្ច។

បន្ទាប់មកលោកនុត ពុធដារ៉ា បានផ្តល់អំណោយលើកទឹកចិត្តចជូនដល់កម្លាំងប្រជាការពារ ទាំង៧០០នាក់ ម្នាក់ៗ ទទួលបាន ថវិកា ចំនួន៥ម៉ឺនរៀល៕