ម៉ូនិច៖ យោងតាម របាយការណ៍ចេញ ដោយក្រុមហ៊ុនផលិត រថយន្តប្រណីតៗ និងត្រូវបានគេចាត់ ទុកជាក្រុម ហ៊ុនយក្ស របស់ប្រទេសអាល្លឺម៉ង់ ឈ្មោះថា BMW នោះបានឲ្យដឹងថា ប្រាក់ចំណេញដែលក្រុមហ៊ុន ទទួលបាន ពីការលក់ យានយន្ត គិតនៅក្នុងអំឡុងពេល ដើមឆ្នាំ៦ខែ ឆ្នាំ២០១៤បានកើនឡើង គួរឲ្យកត់សម្គាល់ ។
ស្ថិតិមួយចំនួនដែលបានបង្ហាញឡើងដោយក្រុមហ៊ុន BMW បានឲ្យដឹងថា ប្រាក់ចំណូលក៏បាន កើនឡើងដែរ បើ គិតនៅក្នុង ត្រីមាសទី២ឆ្នាំ ២០១៤ បានកើនឡើង ១,៨ភាគរយ ស្មើនឹងទឹកប្រាក់ ចំនួន១៩,៩ពាន់លានអឺរ៉ូ ដែល ស្មើនឹង២៦,៦ពាន់លាន ដុល្លារសហរដ្ឋអាម៉េរិក ។ ក្នុងនោះប្រាក់ចំណេញសុទ្ធ (ចំណេញដុល) ក៏បានកើនឡើង ២៧,២ភាគរយ ស្មើនឹងទឹកប្រាក់ចំនួន ១,៧៧ពាន់លានអឺរ៉ូ ។
ទន្ទឹមនឹងនេះដែរ ប្រាក់ចំណូលដែលក្រុមហ៊ុន BMW គិតក្នុងអំឡុង ដើមឆ្នាំ៦ខែ នាឆ្នាំ២០១៤នេះ បានកើនឡើង ២,៨ភាគរយ ស្មើនឹងទឹកប្រាក់ ប្រមាណ៣៨,១៤ពាន់លានអឺរ៉ូ ។ រីឯប្រាក់ចំណេញសុទ្ធវិញបានកើនឡើង ១៩,៦ ភាគរយ ស្មើនឹងទឹកប្រាក់ប្រមាណ៣,២៣ពាន់លានអឺរ៉ូផងដែរ ។
ក្នុងនោះសរុបយានយន្តដែលក្រុមហ៊ុនបានលក់ចេញ បើគិតក្នុងត្រីមាសទី២ ឆ្នាំ២០១៤ ដែលមានដូចជា រថយន្ត ធុនតូច (Mini)និង Rolls-Royce ហើយបាននាំចេញទៅកាន់ទីផ្សារនៅទូទាំងពិភពលោក បានកើនឡើង៥,៣ ភាគរយ ដោយនៅក្នុងកំណត់ត្រាថ្មីមានចំនួន៥៣៣,១៨៧គ្រឿង ។
លើសពីនេះ បើគិតក្នុងអំឡុងពេលដើមឆ្នាំ៦ខែវិញ ការលក់រថយន្តមានប្រមាណ១,០២លានគ្រឿង នេះជាការលក់ រថយន្តបានបរិមាណច្រើនជាងគេរបស់ក្រុមហ៊ុននេះ ដោយមានរយៈពេលត្រឹមតែកន្លះឆ្នាំប៉ុណ្ណោះ ៕
