ភ្នំពេញ៖ មុខសញ្ញាចែកចាយ និងជួញដូរថ្នាំញៀន ដ៏សកម្មម្នាក់ ត្រូវបានកម្លាំងនគរបាល ខណ្ឌចំការមន ធ្វើការស្រាវជ្រាវ និងឃាត់ខ្លួន បានកាលពីវេលាម៉ោង១ និង៣០នាទី យប់រំលងអាធ្រាត្រ ឈានចូលថ្ងៃទី០៥ ខែកញ្ញា ឆ្នាំ២០១៤ ស្ថិតនៅចំណុច ហាងសំាងតូតា សង្កាត់បឹងកេងកង១ ខណ្ឌចំការមន ។
មន្ត្រីនគរបាលខណ្ឌចំការមនបានឲ្យដឹងថា ក្រោយពីទទួលបានព័ត៌មានសំងាត់ថាមានមុខសញ្ញាជួញដូរ និងចែកចាយគ្រឿងញៀន ខាងលើនេះ កម្លាំងនគរបាល ក្រោមការបញ្ជាផ្ទាល់ របស់លោកអធិការខណ្ឌ លោកយិន សាន បានចុះទៅស្រាវជ្រាវ ហើយធ្វើការឃាត់ខ្លួន និងបានរកឃើញថ្នាំញៀន ចំនួន៣៩កញ្ចប់ រួមទាំងវត្ថុតាងមួយចំនួទៀត លាក់ក្នុងកែបម៉ូតូ ។
មន្ត្រីនគរបាលព្រហ្មទណ្ឌបានបញ្ជាក់ទៀតថា ក្រោយពីការចាប់ខ្លួន និងដកហូតវត្ថុតាងទាំងនេះរួចមក ជនសង្ស័យត្រូវបានបញ្ជូន ទៅឃុំខ្លួនជាបណ្តោះអាសន្ន នៅអធិការដ្ឋាន នគរបាលខណ្ឌចំការមន ដើម្បីកសាង សំណុំរឿងបញ្ជូនទៅកាន់តុលាការ ចាត់ការតាមផ្លូវច្បាប់៕
