អភិបាលខណ្ឌ ចំការមន ប្រកាសឲ្យ ប្រជាការពារ សង្កាត់ផ្សារដើមថ្កួវ បន្តពង្រឹង សន្តិសុខ និងសុវត្ថិភាព ក្នុងមូលដ្ឋាន

ភ្នំពេញ: លោក ព្រុំ សំខាន់ អភិបាលខណ្ឌចំការមន នៅរសៀលថ្ងៃទី១៨ ខែកញ្ញា ឆ្នាំ២០១៤ នេះ ក្នុងពិធី សំណេះសំណាល ជាមួយប្រជាការពារ នាសាលាសង្កាត់ផ្សារដើមថ្កូវ បានថ្លែងទៅកាន់ ប្រជាការពារទាំងអស់បន្តពង្រឹងសន្តិសុខ សុវត្ថិភាពជូនប្រជាពលរដ្ឋ។

អភិបាលខណ្ឌចំការមន លោក ព្រុំ សំខាន់ បានថ្លែឲ្យដឹងថា បងប្អូនប្រជាការពារទាំងអស់ដែលស្ម័គ្រចិត្ត បម្រើការងារក្នុងភូមិទាំង៧ របស់សង្កាត់ផ្សារដើមថ្កូវ ពិតជាមានសារ:សំខាន់ណាស់ ព្រោះកម្លាំង ប្រជាការពារទាំងអស់ បានរួមចំណែកការពារសន្តិសុខ សណ្តាប់ធ្នាប់ជូនប្រជាពលរដ្ឋ ដោយធ្វើការងារទាំងយប់ ទាំងថ្ងៃ។

លោក ព្រុំ សំខាន់ ក៏បានថ្លែងទៅកាន់ប្រជាការពារ ទាំងអស់ត្រូវរួមគ្នាសហការជាមួយអាជ្ញាធរ មូលដ្ឋាន ជាមួយកម្លាំង សមត្ថកិច្ច បន្តពង្រឹងរក្សាសន្តិសុខ សុវត្ដិភាពជូនប្រជាពលរដ្ឋ ក្នុងមូលដ្ឋានឲ្យកាន់តែល្អប្រសើរ ជាងមុន៕