ភ្នំពេញ ៖ រថយន្តពីរគ្រឿង និងម៉ូតូមួយគ្រឿង រងការខូចខាតយ៉ាងដំណំ ដោយសារតែរថយន្តដឹកខ្សាច់មួយ គ្រឿងបើកលឿន ខណៈមានភ្លើងស្តុបក៏ជ្រុលទៅបុកម៉ូតូពីក្រោយ រួចហើយរុញម៉ូតូ ទៅបុកគូថ រថយន្តមួយគ្រឿង ពីខាងមុខ ធ្វើឲ្យរថយន្តខាងមុខម៉ូតូ ជ្រុលទៅបុកគូថរថយន្ត ពីខាងមុខមួយគ្រឿង ផ្សេងទៀត ។
ហេតុការណ៍នេះ កើតឡើងកាលពីព្រឹកថ្ងៃទី២៧ ខែកញ្ញា ឆ្នាំ២០១៤ ស្ថិតតាមបណ្តោយផ្លូវ សហព័ន្ធ រុស្ស៊ី ខាងមុខព្រលានយន្តហោះអន្តរជាតិភ្នំពេញ ភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
អ្នកឃើញហេតុការណ៍ បានឲ្យដឹងថា រថយន្តហ៊ីយ៉ានដាយ ពណ៌ស ពាក់ស្លាកលេខ ភ្នំពេញ 3C-4452 ដឹក ខ្សាច់ពេញ បើកបរដោយឈ្មោះ ចន្ធី ហៅសឿន ភេទប្រុស អាយុ ២៣ឆ្នាំ ស្នាក់នៅខណ្ឌសែនសុខ បើកមក ពីកើតយ៉ាងលឿនហើយ ចាប់ហ្វ្រាំងមិនទាន់ ក៏ជ្រុលទៅបុកម៉ូតូស្មាសរីវ៉ូ ស៊េរី ២០១០ ពាក់ស្លាកលេខ នគរបាល 1-3764 រួចហើយរុញម៉ូតូនោះ ទៅបុកគូថរថយន្តមួយគ្រឿងពីខាងមុខ ទើបធ្វើឲ្យរថយន្តខាងមុខនោះ ជ្រុលទៅ បុកគូថរថយន្ត ១គ្រឿងទៀត បណ្តាលឲ្យរងការខូចខាតយ៉ាង ដំណំ ក្រោយពេលកើតហេតុ នគរបាល ចរាចរចុះទៅវាស់វែង បន្តិចក្រោយមកម្ចាស់រថយន្តដឹកខ្សាច់ ចេញមុខមកសម្របសម្រួល ដោយសងថ្ងៃ ខូចខាតទៅភាគីទាំង៣ ដើម្បីបញ្ចប់រឿង ប៉ុន្តែគេពុំដឹងថា សងម៉ូតូ និងរថយន្តពីរគ្រឿងនោះប៉ុន្មាននោះទេ៕
