សមាជិក​សភា៖ រុស្ស៊ី​លៃលក​លើ​ថវិកា​ ការពារ​ជាតិ​កម្រិត​ខ្ពស់​សម្រាប់​ឆ្នាំ២០១៥

មូស្គូ៖ បើតាមសមាជិកសភាជាន់ ខ្ពស់មួយរូបរបស់រុស្ស៊ី បាននិយាយនៅថ្ងៃព្រហស្បតិ៍ ទី១៦ ខែតុលាថា គម្រោងចំណាយថវិកាលើវិស័យការពារជាតិ សម្រាប់ឆ្នាំ២០១៥ របស់ប្រទេសរុស្ស៊ី នឹងមានការកើនឡើងខ្ពស់។

ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃព្រហស្បតិ៍ ទី១៦ ខែតុលា ឆ្នាំ២០១៤ ដោយផ្អែកតាមការលើកឡើង របស់លោក វ្លាឌីមៀ កូម៉ូយីដូវ ប្រធានគណៈកម្មាធិការសភា ជាន់ទាបរដ្ឋឌូម៉ា ប្រាប់ទីភ្នាក់ងារព័ត៌មាន អ៊ិនធ័រហ្វាក់ថា ការចំណាយពាក់ព័ន្ធនឹង វិស័យការពារជាតិសរុបរបស់ សហព័ន្ធឆ្នាំក្រោយនេះ មានរហូតដល់ ៣.២៨៧ពាន់លានរូពី ស្មើនឹងជាង ៨២ពាន់លានដុល្លារអាម៉េរិក។

លោកបន្តថា ការចំណាយសម្រាប់វិស័យការពារជាតិ នៅឆ្នាំ២០១៥ មាន ៤,២ភាគរយ នៃផលិតផលក្នុងស្រុកសរុប។ តួលេខចំណាយនេះ នឹងខ្ពស់ជាងគេសម្រាប់រយៈពេល ៣ឆ្នាំបន្ទាប់ នៅពេលដែលការចំណាយលើ វិស័យការពារជាតិ នឹងមានចំនួន ៣,៧ភាគរយ និង៣,៦ភាគរយ សម្រាប់ GDP នៅក្នុងឆ្នាំ២០១៦ និងឆ្នាំ២០១៧។

ពាក់ព័ន្ធនឹងវិស័យការពារជាតិរុស្ស៊ីនេះដែរ កាលពីខែកញ្ញាកន្លងទៅ លោកប្រធានាធិបតី វ្លាឌីមៀ ពូទីន បានបញ្ជាឲ្យរដ្ឋាភិបាល ធ្វើពង្រាងច្បាប់មួយស្តីអំពី ជម្រើសតុល្យភាពពិតប្រាកដ នៃកម្មវិធីការពារជាតិរបស់រដ្ឋ សម្រាប់ឆ្នាំ២០១៦-២០២៥ ដោយបានត្រឹមខែវិច្ឆិកា។
រដ្ឋាភិបាលត្រូវតែបង្ហាញ ទិន្នន័យលទ្ធិយោធាចុងក្រោយបំផុត នៅចុងឆ្នាំ២០១៤នេះ ដោយរាប់បញ្ចូលទំាងបញ្ហា ស្ថានការណ៍នៅអ៊ុយក្រែន និងណាតូ ដើម្បីយកមកគិតពិចារណា៕