ភ្នំពេញ ៖ សាលាដំបូងរាជធានី ភ្នំពេញ កាលពីរសៀល ថ្ងៃ ទី ៣១ ខែ តុលា ឆ្នាំ២០១៤ បានបើកសវនាការ ប្រកាសសាលក្រម លើសំណុំរឿង ព្រហ្មទណ្ឌរបស់ ជនជាប់ចោទ ២នាក់ក្នុងនោះ មានម្នាក់ គឺជាអ្នកកាសែត បម្រើការនៅអង្គភាព កាសែតជាតិ ដែលជាប់ចោទ ពីបទជួញ ដូរគ្រឿង ញៀន ប្រព្រឹត្តកាលពី កំឡុងខែ មករា ឆ្នាំ ២០១៤ នៅក្នុងភូមិត្រពាំងឈូក សង្កាត់ទឹក ថ្លា ខណ្ឌសែនសុខ រាជធានីភ្នំពេញ។
លោកចៅក្រមកែវ មុនី នៃ សាលាដំបូង រាជធានីភ្នំពេញ បានសម្រចផ្តន្ទា ទោសពួកគេ ដាក់ពន្ធ នាគារម្នាក់ៗ រយៈពេល ២ឆ្នាំ តែ ការអនុវត្តទោសក្នុងពន្ធនាគារត្រឹមតែ ១ឆ្នាំ ៦ខែ តែប៉ុណ្ណោះ ទោសនៅសេសសល់ ត្រូវព្យួរទាំងអស់ ។
លោកកែវ មុនី ចៅក្រមនៃ សាលាដំបូងរាជធានីភ្នំពេញ បានឲ្យដឹងថា ជនជាប់ចោទ ទាំង២នាក់ ខាងលើនេះ មានឈ្មោះ ទី១-ឈ្មោះ ហុង យ៉ារិទ្ធ ហៅរិទ្ធិ ភេទប្រុស អាយុ ៣៦ឆ្នាំ មាននមុខ របរមុនចាប់ខ្លួនជាអ្នកយកព័ត៌មាន នៃ កាសែតជាតិ ប្រចាំនៅខេត្ត សៀមរាប ។ និង ទី២-ឈ្មោះ សួន ម៉ានិត ហៅឆ្អឹង ភេទប្រុស អាយុ ១៨ ឆ្នាំ មុខរបរ សិស្សថ្នាក់ទី ១០។ ជនជាប់ចោទទាំង២ ត្រូវបានចោទ ប្រកាន់ពីតំណាងអយ្យការពីបទ ជួញដូរដោយខុសច្បាប់នូវ សារធាតុញៀន តាម មាត្រា៤០ នៃ ច្បាប់ស្តីពីការត្រួតពិនិត្យ គ្រឿងញៀនកម្ពុជា។
លោកចៅក្រមបានបន្ថែមថា ជនជាប់ចោទឈ្មោះ សួន ម៉ានិត ហៅឆ្អឹង ត្រូវបានចាប់ ខ្លួន ដោយសមត្ថកិច្ចអាវុធរាជធានីភ្នំពេញ ខណៈកំពុងតែធ្វើសកម្មភាពលក់ដូរ ថ្នាំញៀន នៅក្នុងចំណុច ស្ពានឈើ ស្ថិតនៅក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ កាលពីរាត្រី ថ្ងៃ ទី ២៣ ខែ មករា ឆ្នាំ ២០១៤។ ក្រោយឃាត់ខ្លួន សមត្ថកិច្ចអាវុធហត្ថ ដកហូតបានថ្នាំញៀនចំនួន២ កញ្ចប់ ថង់សម្រាប់វេចខ្ចប់ថ្នាំញៀន និង សម្ភារៈពាក់ព័ន្ធមួយចំនួនផ្សេងទៀត។ ចំណែកឯ ជនជាប់ ចោទ ឈ្មោះ ហុង យ៉ារិទ្ធ ហៅរិទ្ធិ ត្រូវបានចាប់ខ្លួន កាលពីថ្ងៃ ទី ១៧ ខែ កុម្ភៈ ២០១៤ តាម ចម្លើយ ឆ្លើយដាក់របស់សារភាព របស់ឈ្មោះ សួន ម៉ានិត ៕
