សាលាខណ្ឌ ដូនពេញ និងគណៈកម្មការ វត្តបុទមវតី រៀបចំពិធី ក្រុងពាលី រំកិលទូកង ចុះទឹកត្រៀមចូលរួម ប្រណាំង ក្នុងព្រះរាជពិធីបុណ្យអុំទូក

ភ្នំពេញ៖ អាជ្ញាធរខណ្ឌដូនពេញ នៅព្រឹកថ្ងៃទី០១ ខែវិច្ឆិកា ឆ្នាំ២០១៤ បានអញ្ជើញចូលរួមជាមួយនិង ព្រះចៅអធិការ វត្តបុទមវតី សម្តេចសង្ឃ នន្ទ ង៉ែត ព្រមទាំង គណៈកម្មការអាចារ្យ និងព្រះសង្ឃវត្តបុទមវតី រៀបចំពិធី ក្រុងពាលីសែន ព្រេនដល់ម្ចាស់ទឹក ម្ចាស់ដី សុំសេចក្តីសុខសេចក្តីចំរើន ទៅតាមទំនៀមទម្លាប់ របស់ខ្មែរយើង តាំងពីបុរាណមកដើម្បី រំកិលទូកង ចុះទឹកត្រៀមចូលរួមប្រណាំង ក្នុងព្រះរាជពិធីបុណ្យអុំទូក អកអំបុក និងសំពះព្រះខែ ដែលប្រារព្ធធ្វើឡើង ចាប់ពីថ្ងៃទី០៥-០៧ ខែវិច្ឆិកា ខាងមុខនេះ ។

ពិធីនេះមានការចូលរួមពីលោក គួច ចំរើន អភិបាលខណ្ឌដូនពេញ ប្រធានក្រុមប្រឹក្សាខណ្ឌ លោក ហែម អាន អភិបាល រងខណ្ឌ លោក សុខ ពេញវុធ ព្រមទាំងមានការអញ្ជើញចូលរួមពីថ្នាក់ដឹកនាំសាលាខណ្ឌ គណៈកម្មការ គ្រប់គ្រងទូក និងកីឡាករអុំទូកជាច្រើននាក់ផងដែរ ។

គណៈកម្មការវត្តបុទមវតី គ្រប់គ្រងទូកងនោះ បានឲ្យដឹងថា ទូកង ដែលកំពុងរៀបចំពិធីក្រុងពាលី រំកិលចុះទឹក នាពេលនេះ មានឈ្មោះថា "ដូនពេញសែនជ័យ" មានចំណុះកីឡាករ ៦៧នាក់ ហើយក៏ធ្លាប់ បានចូលរួមប្រកួត ប្រជែងក្នុងពិធីបុណ្យជាតិជាច្រើនលើកផងដែរ ហើយទទួលបានជ័យលាភីគួរជាទីមោទនៈ ។

ជាមួយគ្នានោះដែរ លោក គួច ចំរើន បានមានប្រសាសន៍ ដោយផ្តាំផ្ញើដល់កីឡាករ ទូកងទាំងអស់ ត្រូវតែមាន ស្មារតី ខ្ពស់ ក្នុងការប្រកួតប្រជែង និងខំប្រឹងបឲ្យអស់ ពីលទ្ធភាពកម្លាំងកាយចិត្ត ដើម្បីនាំយក ជោគជ័យ ១០០ ភាគរយ ជូនខណ្ឌដូនពេញយើងវិញ។

មន្ត្រីសាលាខណ្ឌដូនពេញ បានបញ្ជាក់ផងដែរថា សាលាខណ្ឌបានឧបត្ថម្ភ ដែលបានមកពីការចូលរួមបរិច្ចាគពី ព្រះសង្ឃ និងគណៈកម្មការវត្តទាំង ៧ នៅក្នុងខណ្ឌដូនពេញ ដើម្បីជួយទ្រទ្រង់ និងផ្គត់ផ្គង់ជូនកីឡាករទាំង អស់ ដែលត្រៀមចូលរួមប្រណាំងនាពេលខាងមុខដ៏ខ្លីនេះ ។ ដោយឡែក លោកអភិបាលខណ្ឌ ក៏បានអំពាវនាវ ដល់សប្បុរសជន ចំពោះការចូលរួមឧបត្ថម្ភដល់កីឡាករអុំទូក របស់ទូកអុំ "ដូនពេញសែនជ័យ" ដើម្បីឲ្យក្រុម កីឡាករទាំងអស់មានទឹកចិត្ត និងខិតខំប្រឹងប្រែងអស់ពីកម្លាំងកាយចិត្ត យកជ័យជម្នះ នាការចូលរួមប្រកួត ក្នុង ព្រះរាជពិធីបុណ្យអុំទូកនេះ ៕