ភ្នំពេញ៖ អភិបាលរង ខណ្ឌចំការមន លោក ជ គឹមស៊ នៅយប់ថ្ងៃទី២ ខែធ្នូ ឆ្នាំ២០១៤ នេះ បានដឹកនាំ កម្លាំងអាជ្ញាធរ ចម្រុះចុះត្រួតពិនិត្យជាតិអាកុល និងអាវុធជាតិផ្ទុះ នៅចំណុចមុខវត្តទំពូង ផ្លូវម៉ៅសេទុង សង្កាត់ទួលទំពូងទី១ ខណ្ឌចំការមន។
លោក ជ គឹមស៊ អភិបាលរងខណ្ឌចំការមន បានថ្លែងឲ្យដឹងថា កម្លាំងចម្រុះបានចុះប្រតិបត្តិការ ត្រួតពិនិត្យ អាវុធជាតិផ្ទុះ និងជាតិអាកុលនេះ គឺចាប់ផ្តើមពីម៉ោង១៩៖០០ នាទី រហូតដល់ម៉ោង២១៖០០ នាទី ក្នុងនោះ បានធ្វើការ ពិន័យម៉ូតូគ្មានមួក គ្មានកញ្ចក់ បានចំនួន១០៣គ្រឿង។
លោកអភិបាលរងខណ្ឌ ក៏បានបញ្ជាក់ទៀតថា ក្នុងប្រតិបត្តិការនោះ កម្លាំងសមត្ថកិច្ចក៏បាន ឃាត់ខ្លួនមនុស្ស ម្នាក់ពាក់ព័ន្ធនិងការប្រើប្រាស់គ្រឿងញៀន រួចត្រូវបានបញ្ជូន ទៅកាន់អធិការដ្ឋាន នគរបាលខណ្ឌ ចំការមន ដើម្បីចាត់ការតាមនីតិវិធីច្បាប់៕
