ក្រចេះ ៖ កម្លាំងនគរបាល មូលដ្ឋាន ឃុំកញ្ជរ ស្រុកឆ្លូង ខេត្តក្រចេះ បានធ្វើ ការស្រាវជ្រាវ រហូតឈានទៅដល់ ការចាប់ខ្លួន យុវជនម្នាក់ ជាប់ពាក់ព័ន្ធ និងសកម្មភាព ចាប់រំលោភ ក្មេងស្រីអាយុ ទើបតែ១២ឆ្នាំ កាលពីយប់ថ្ងៃទី២០ ខែធ្នូ ឆ្នាំ២០១៤ ស្ថិតនៅចំណុចភ្នំវែង ភូមិចំឡាក់។
មន្រ្តីនគរបាល ព្រហ្មទណ្ឌ ស្រុកឆ្លូង បានថ្លែងឲ្យដឹងថា ជនសង្ស័យខាងលើនេះ មានឈ្មោះ ស្រ៊ុន ឡា អាយុ១៥ឆ្នាំ ជាតិខ្មែរ មានទីលំនៅ ភូមិឃុំកើតហេតុ ។
ដោយឡែក ក្មេងស្រី រងគ្រោះឈ្មោះ ហ.រ.ដ អាយុ១២ឆ្នាំ រស់នៅភូមិឃុំជាមួយគ្នា។ មន្រ្តីនគរបាលដដែល បានបន្តទៀតថា កាលពីវេលាម៉ោងប្រមាណ ៨៖៣០នាទី យប់ថ្ងៃទី២០ ខែធ្នូ ឆ្នាំ២០១៤ មានសេចក្តីរាយការណ៍ និងពាក្យបណ្តឹង ពីអណាព្យាបាល ក្មេងស្រីរងគ្រោះ អំពីការចាប់រំលោភ បានសំរេច ទៅលើក្មេងស្រីរងគ្រោះ នៅចំណុចភ្នំវែង រួចហើយ ជនសង្ស័យរត់គេចខ្លួនបាត់ ។
មន្រ្តីនគរបាល បានបញ្ជាក់ទៀតថា ក្រោយទទួលព័ត៌មាន នៃករណីបទល្មើស មួយនេះភ្លាម អធិការ នគរបាលស្រុក បានបញ្ជាឲ្យ នគរបាលមូលដ្ឋាន ចុះទៅធ្វើការស្រាវជ្រាវ ដើម្បីស្វែងរកចាប់ខ្លួន យកទៅផ្តន្ទាទោស តាមផ្លូវច្បាប់។ បន្ទាប់ពី ធ្វើការរុករករួចមក កម្លាំងសមត្ថកិច្ច បានឈានទៅដល់ ការចាប់ខ្លួន ជនសង្ស័យរូបនេះតែម្តង។
បច្ចុប្បន្ន ជនសង្ស័យត្រូវបានឃុំខ្លួន ជា បណ្តោះអាសន្ន នៅអធិការដ្ឋាន នគរបាលស្រុកឆ្លូង ដើម្បីបញ្ជូនខ្លួន ទៅកាន់ស្នងការដ្ឋាន នគរបាលខេត្ត ចាត់ការបន្តតាមនីតិវិធី៕
