រថយន្ត បុកម៉ូតូ អូសជាង១០ម៉ែត្រ ស្លាប់ប្តីប្រពន្ធ ពីរនាក់ នៅកន្លែង កើតហេតុ

បន្ទាយមានជ័យ៖ ប្តីនិងប្រពន្ធ បានស្លាប់ភ្លាមៗ នៅកន្លែងកើតហេតុ គ្រាដែលពួកគាត់ ជិះម៉ូតូទៅបេះត្រូយ ផ្កាស្តៅលក់ ហើយត្រូវរថយន្តបុកកាលពីវេលា ម៉ោង៥ និង២៥នាទីល្ងាចកាល ថ្ងៃទី២៣ ខែធ្នូ ឆ្នាំ២០១៤ ស្ថិតនៅកំណាត់ ផ្លូវជាតិលេខ៦ ក្នុងភូមិសាលាក្រៅ សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។

សមត្ថកិច្ចនគរបាលក្រុងសេរីសោភ័ណ បានប្រាប់អោយដឹង នៅថ្ងៃទី២៤ ខែធ្នូនេះថា ជនរងគ្រោះត្រូវបានរថយន្តបុក ស្លាប់ គឺប្តីឈ្មោះមេឃ ផល្លី អាយុ៤៨ឆ្នាំ និងប្រពន្ធឈ្មោះហម ចន្នី អាយុ៤៤ ឆ្នាំ (មានមុខរបបដើរបេះផ្កាស្តៅលក់) បន្សល់ទុក កូនប្រុសស្រី ៤នាក់ រស់នៅភូមិគោកក្តួច ឃុំបន្ទាយនាង ស្រុកមង្គលបុរី ខេត្តបន្ទាយមានជ័យ ។

សមត្ថកិច្ចបានបន្តឲ្យដឹងថាមុនពេលកើតហេតុ គេឃើញជនរងគ្រោះ មកពីរនាក់ប្តីប្រពន្ធដើរ  រកទិញនិងបេះត្រួយ និងផ្កាស្តៅលក់ ដើម្បីចិញ្ចឹមជីវិតប្រចាំថ្ងៃ រួមទាំងកូនតូចៗ៤នាក់ ផងដែរ ជនរងគ្រោះបានបើកបរ ម៉ូតូម៉ាក ហុងដា C១០០ ស៊េរីចាស់ បើកបរតាមផ្លូវជាតិលេខ៦ ក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែរថយន្ត ធុននីស្សាន់ណាយរ៉ា ពាក់ស្លាកលេខភ្នំពេញ 2P-5568 បើកទិសដៅស្របគ្នា ក្នុងល្បឿនលឿន បានបុកពីក្រោយ ពេញទំហឹង ហើយអូសរុញជាង១០ម៉ែត្រ បណ្តាលស្លាប់ទាំងប្តីនិងប្រពន្ធភ្លាមៗ នៅនឹងកន្លែង ចំណែកអ្នក បើកបររថយន្ត បានបើកទ្វារ រត់បាត់ស្រមោលតែម្តង  បន្សល់ទុកតែរថយន្តប៉ុណ្ណោះ និងមិនទាន់ដឹងអត្តសញ្ញាណនៅឡើយ។

ក្រោយកើតហេតុសមត្ថកិច្ច បានយករថយន្តបង្ក និងម៉ូតូរងគ្រោះ យកទៅរក្សាទុកបណ្តុះអាសន្ននៅអធិការដ្ឋាន នគរបាលក្រុងសេរីសោភ័ណ រង់ចាំការដោះស្រាយនា ពេលក្រោយជាមួយក្រុងសាច់ញាតិរងគ្រោះ ចំណែក សពប្តីប្រពន្ធត្រូវក្រុមគ្រួសារ សាច់ ញាតិយកទៅធ្វើបុណ្យតាមប្រពៃណី ៕