តុលាការ ផ្តន្ទាទោស ឃាតករ ចាក់សម្លាប់ស្ត្រី និងកូនស្រី ជនជាតិហូឡង់ លួចយកកង់ ដាក់ពន្ធនាគារ ចំនួន១៣ឆ្នាំ

ភ្នំពេញ៖ សាលាដំបូងរាជធានីភ្នំពេញ កាលពីព្រឹកថ្ងៃទី២៤ ខែធ្នូ ឆ្នាំ២០១៤ បានបើកសវនាប្រកាសសាលក្រម លើសំណុំរឿង ជនជាប់ចោទម្នាក់ ដែលជាប់ចោទ ពីបទ «មនុស្សឃាតមានស្ថានទម្ងន់ទោស» ទាក់ទងនឹងករណី ចាក់សម្លាប់ស្ត្រីជនជាតិហូឡង់ម្នាក់ និងកូនស្រីរបួសធ្ងន់ ដើម្បីលួចយកទ្រព្យសម្បត្តិ ក្នុងផ្ទះជួល មួយកន្លែង ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃ ទី ២៧ ខែ មេសា ឆ្នាំ ២០១៤ ដោយ តុលាការសម្រេផ្តន្ទាទោស ដាក់់ពន្ធនាគារ ចំនួន១៣ឆ្នាំ។

លោកនូ វាសនា  ប្រធានចៅក្រមប្រឹក្សាជំនុំជម្រះនៃ សាលាដំបូងរាជធានីភ្នំពេញ បានឲ្យដឹងថា ជនជាប់ចោទរូបនេះ មានឈ្មោះជា ភិន ហៅពៅ ធិន ហៅតា ហៅ តុញ ធិន ហៅជា សុភាព ភេទប្រុស អាយុ៣៥ឆ្នាំ ជាជនអានាថា ស្នាក់នៅក្នុងវត្តថាន់ក្នុងខណ្ឌចំការមន។

លោកបានបញ្ជាក់ថា ជនជាប់ចោទ ត្រូវបានចាប់ខ្លួន ដោយសមត្ថកិច្ចនគរបាលរាជធានីភ្នំពេញ កាលពីថ្ងៃទី ២ ខែមេសា ឆ្នាំ ២០១៤ បន្ទាប់ពីបានប្រព្រឹត្តអំពើឃាតកម្ម ទៅលើជនរងគ្រោះ នៅថ្ងៃ កើតហេតុដូចទីតាំងខាងលើនេះ៕