ឆ្លងឆ្នាំ លោកប្រធាន សម រង្ស៊ី ឆ្លងទ្វីប ទៅលេងកូន នៅប្រទេសស្វីស

ភ្នំពេញ៖ ពីទីក្រុងហ្សឺណែវ ប្រទេសស្វីស លោក សម រង្ស៊ី ប្រធានគណបក្សសង្រ្គោះជាតិ (CNRP) បានយកពេលវិសម្សកាលរបស់ខ្លួន ទៅលេងកូនប្រុសតែមួយគត់របស់លោក ជាមួយនឹងការបង្ហាញរូបភាពជិះកង់ លើផ្លូវដែលមានព្រិលធ្លាក់ពាសពេញផ្លូវ ក្នុងគ្រាដែលមានការវាយប្រហារក្នុងចំណោមថ្នាក់ដឹកនាំរបស់ខ្លួនថា មានអំពើពុករលួយ នៅក្នុងគណបក្សក្រៅរដ្ឋាភិបាលមួយនេះ។

តាមរយៈហ្វេសប៊ុកផ្ទាល់ខ្លួន លោក សម រង្ស៊ី បានសរសេរយ៉ាងខ្លី នៅថ្ងៃ ទី ៣០ ធ្នូ ២០១៤ ថា “ ក្នុងឱកាសបុណ្យចូលឆ្នាំថ្មីសកលនេះ ខ្ញុំទៅលេងផ្ទះកូនប្រុសតែមួយ ដែលរស់នៅប្រទេសស្វីស។ កូននេះធ្វើការឲ្យអង្គការសហប្រជាជាតិ នៅទីក្រុងហ្សឺណែវ។ គេដឹកនាំអង្គភាពមួយ ដែលមានតួនាទីស៊ើបអង្កេត និងប្រឆាំងអំពើពុករលួយ”។

រូបភាពនេះ គឺជារូបភាពដ៏កម្រដែលរូបលោក សម រង្ស៊ី ទៅលេងកូនប្រុសសំណព្វចិត្តរបស់លោក ប្រទេសស្វីស ។

វិស្សមកាលរបស់លោក សម រង្ស៊ី ធ្វើឡើងអំឡុងពេល លេចឮព័ត៌មានទម្លាយស្តីអំពើពុករលួយ ក្នុងគណបក្សសង្រ្គោះជាតិ ដោយមានការបណ្តេញសមាជិកគណៈកម្មាធិការនាយក លោក ស្រី ឡាក់ សុភាព ដែលលោកស្រី នឹងធ្វើការជួបជុំតវ៉ាមួយ នៅថ្ងៃទី១ ខែមករា ឆ្នាំ ២០១៥ នៅមុខគណបក្ស ដើម្បីតវ៉ាការបណ្តេញសមាជិកភាពរបស់លោកស្រី ជាអ្វីដែលគេពណ៌នាថា ជា “កាដូដ៏ចុកចាប់” មួយរបស់លោកស្រី សម្រាប់លោក ប្រធាន សម រង្ស៊ី និងលោក អនុប្រធាន កឹម សុខា ក្នុងឱកាសឆ្នាំថ្មី ២០១៥៕