ព្រះសីហនុ៖ ក្នុងឱកាសបុណ្យឆ្លងឆ្នាំសកល ២០១៤ ឈានចូល២០១៥ ភ្ញៀវទេសចរទាំងជាតិ និង អន្តរជាតិ បានសំរុកទៅទស្សនាកម្សាន្តនៅក្រុងព្រះសីហនុ ដោយរយៈពេលបីថ្ងៃ ចាប់ពីថ្ងៃទី២៩ ដល់៣១ធ្នូ ឆ្នាំ២០១៤ ទទួលបានភ្ញៀវទេសចរកើនឡើងដល់ ១១០,៥២៦នាក់ ដែលចំនួននេះច្រើនហួសពីការរំពឹងទុក របស់អាជ្ញាធរ ខេត្ត ដែលគិតថា មានចំនួនប្រមាណតែ៨ម៉ឺនប៉ុណ្ណោះ។
លោក នូ សុផល ប្រធានមន្ទីរទេសចរណ៍ខេត្តព្រះសីហនុ បានមានប្រសាសន៍ប្រាប់មជ្ឈមណ្ឌលព័ត៌មានដើម អម្ពិលនៅព្រឹកថ្ងៃទី០១ ខែមករា ឆ្នាំ២០១៥នេះថា ចំនួនភ្ញៀវទេសចរ ដែលបានអញ្ជើញទៅកម្សាន្ត នៅក្រុងព្រះ សីហនុរយៈពេលបីថ្ងៃនេះគឺមានចំនួន ១១០,៥២៦នាក់ ដោយក្នុងនោះភ្ញៀវជាតិមានចំនួន ៩៦,៧១១នាក់ ភ្ញៀវ អន្តរជាតិ១៣,៨១៥នាក់ ដែលចំនួននេះ កើនហួសពីការរំពឹងទុករបស់អាជ្ញាធរ។ ចំនួននេះ ក៏ប្រហាក់ប្រហែលនឹង ឆ្នាំកន្លងទៅផងដែរ។
លោក នូ សុផល បានបញ្ជាក់ថា លទ្ធផលដែលទទួលបាននេះ គឺជាលទ្ធផលដែលល្អប្រសើរ និងជោគជ័យបំផុត សម្រាប់អាជ្ញាធរខេត្តព្រះសីហនុ ដែលបានសំរេចនាពេលនេះ។ លោក នូ សុផល បានមានប្រសាសន៍បន្តទៀតថា កត្តា ដែលភ្ញៀវទេសចមកកំសាន្តដ៏ច្រើនលើសលប់នេះ ក៏ព្រោះតែខេត្តព្រះសីហនុមានកន្លែងកម្សាន្ត និងរមណីយ ដ្ឋានដល់ទៅ២២កន្លែង ក្នុងនោះមានឆ្នេរខ្សាច់ដ៏ស្រស់ស្អាតជាច្រើន កោះ ឧទ្យានជាតិ និងរមណីយដ្ឋានក្បាល ឆាយជាដើម និងជាពិសេសអាជ្ញាធរខេត្តព្រះសីហនុ បានសហការជាមួយសភាពាណិជ្ជកម្មខេត្ត បានប្រារព្ធពិធី អបអរសាទរបុណ្យឆ្លងឆ្នាំសកល និងបើកសម្ពោធការតាំងពិព័រណ៍ពាណិជ្ជកម្មខេត្តព្រះសីហនុ ដោយមានការ សម្តែងសិល្បៈ ការប្រគុំតន្ត្រីសម័យ ពីតារាចំរៀងល្បីៗជាច្រើនរូបទៀត ដើម្បីបង្កលក្ខណៈសប្បាយរីករាយ ជូន ប្រជាពលរដ្ឋ ក៏ដូចជាភ្ញៀវទេសចរណ៍ជាតិ និងអន្តរជាតិ ហើយព្រឹត្តិការណ៍នេះបានរៀបចំឡើងនៅឆ្នេរអូរឈើ ទាល ក្នុងសង្កាត់លេខ ៤ ក្រុងព្រះសីហនុ ។
ចំពោះកិច្ចការងារសន្តិសុខ និងសុវត្ថិភាពទេសចរណ៍ ត្រូវបានលោក នូ សុផល បញ្ជាក់ថា ក្រោមការដឹកនាំ និង ចង្អុលបង្ហាញជាប្រចាំរបស់លោក ឈិត សុខុន អភិបាលខេត្តព្រះសីហនុ គណៈបញ្ជាការឯកភាពខេត្ត រួមមាន នគរបាល អាវុធហត្ថ និងកងកម្លាំងមានសមត្ថកិច្ចគ្រប់លំដាប់ថ្នាក់បានពង្រឹងរក្សាសន្តិសុខ សុវត្ថិភាពជូនភ្ញៀវ ទេសចរនៅតាមគោលដៅទេសចរណ៍សំខាន់ៗក្នុងខេត្ត សំដៅចូលរួមរក្សាស្ថេរភាពនយោបាយក្នុងខេត្ត ពិសេស ការផ្តល់ជូននូវភាពកក់ក្តៅ និងការជឿជាក់ជូនភ្ញៀវទេសចរ ដូច្នេះសំរាប់រយៈពេលបុណ្យ៣ថ្ងៃនេះ មិនមានបញ្ហា ធំដុំអ្វីកើតឡើងនោះឡើយ។ ដោយឡែកគ្រោះថ្នាក់ចរាចរណ៍វិញ ប្រភពពីសមត្ថកិច្ចបានឲ្យដឹងផងដែរថា រយៈ ពេលបុណ្យឆ្លងឆ្នាំសកល៣ថ្ងៃនេះមាន៣ករណី ក្នុងនោះ បង្កឡើងដោយខ្លួនឯង ១ករណី ម៉ូតូជាមួយរថយន្ត ១ ករណី ម៉ូតូ និងម៉ូតូ ១ករណី បណ្តាលឲ្យរបួសធ្ងន់ស្រាល ៩នាក់ផងដែរ៕
