-ថវិកាប្រមាណ២៤០០០ដុល្លារ គ្រោងចំណាយសម្រាប់ដឹក លោក ប៉ែន សុវណ្ណ ទៅសង្គ្រោះនៅក្រៅប្រទេស
ភ្នំពេញ ៖ លោក ប៉ែន សុវណ្ណ តំណាងរាស្រ្ត គណបក្សសង្គ្រោះជាតិ មណ្ឌល កំពង់ស្ពឺ ដែលរងការដាច់សរសៃឈាម ខួរក្បាលយ៉ាងធ្ងន់ធ្ងរនោះ កំពុងបន្ត សង្គ្រោះបន្ទាន់ នៅមន្ទីរពេទ្យកាល់ម៉ែត រហូតមកដល់យប់ថ្ងៃទី១៨ ខែមករា ឆ្នាំ២០១៥នេះ ហើយថ្នាក់ដឹកនាំ គណបក្សប្រឆាំង និងក្រុមគ្រួសារ កំពុង ត្រៀមបញ្ជូនលោក ទៅព្យាបាលនៅក្រៅប្រទេស។
មន្រ្តីគណបក្ស សង្គ្រោះជាតិមួយរូបនេះ បានលួចប្រាប់ថា រហូតមកដល់ម៉ោង ៨៖៤០នាទី យប់ថ្ងៃទី១៨ ខែមករា ឆ្នាំ២០១៥នេះ លោកតា ប៉ែន សុវណ្ណ កំពុងជួយ សង្គ្រោះនៅ បន្ទប់សង្គ្រោះបន្ទាន់ នៅក្នុងមន្ទីរពេទ្យកាល់ម៉ែត នៅឡើយ ហើយមិនទាន់ដឹងខ្លួននោះទេ ។
មន្រ្តីគណបក្ស សង្គ្រោះជាតិ បានបន្ត ទៀតថា ថ្នាក់ដឹកនាំបក្ស និងក្រុមគ្រួសារ កំពុងរៀបចំបញ្ជូន លោក ប៉ែន សុវណ្ណ នៅក្រៅប្រទេសតាមជើង ហោះហើរពិសេស ដោយត្រូវចំណាយ លុយប្រមាណ ២៤០០០ ដុល្លារឯណោះ។
លោក មុត ចន្ថា នាយក ខុទ្ទកាល័យ លោក កឹម សុខា មិនបានប្រាប់ថា តើប្រទេសណាមួយដែលត្រូវ បញ្ជូន លោក ប៉ែន សុវណ្ណ ទៅសង្គ្រោះនោះទេ ខណៈមន្រ្តីគណបក្ស សង្គ្រោះជាតិដដែល បន្តលួចបង្ហើបថា អាចទៅប្រទេសសឹង្ហបុរី។ យ៉ាងណាក៏ ដោយ លោក មុត ចន្ថា បានបញ្ជាក់ថា គណបក្សកំពុងត្រៀមបញ្ជូនគាត់ ទៅក្រៅប្រទេសហើយ។
សូមបញ្ជាក់ថា លោក ប៉ែន សុវណ្ណ អតីតនាយក រដ្ឋមន្រ្តី នៃរបបសាធារណរដ្ឋប្រជាមានិតកម្ពុជា និងជាតំណាង រាស្រ្តគណបក្សសង្រ្គោះជាតិមណ្ឌល ខេត្តកំពង់ស្ពឺនាពេលបច្ចុប្បន្ន បានដាច់សរសៃឈាមខួរក្បាល ត្រូវបញ្ជូនទៅ សង្រ្គោះបន្ទាន់ នៅក្រៅប្រទេស ។
នៅបើយោងតាមលិខិត អំពាវនាវរក ជំនួយសង្រ្គោះ របស់លោក កឹម សុខា អនុប្រធានគណបក្សសង្រ្គោះជាតិ ដែលបានបង្ហោះលើទំព័រហ្វេសប៊ុករបស់លោក នៅល្ងាចថ្ងៃទី១៨ ខែមករា ឆ្នាំ ២០១៥នេះ។ តាមរយៈលិខិតនេះ លោក កឹម សុខា បានបញ្ជាក់ថា លោក ប៉ែន សុវណ្ណ បានដាច់សរសៃឈាមខួរ ហើយកំពុង តែរៀបចំបញ្ជូនទៅសង្រ្គោះបន្ទាន់នៅក្រៅប្រទេស។
លោក កឹម សុខា បានអំពាវនាវដល់សប្បុរសជនទាំងក្នុង និងក្រៅប្រទេស ជួយជាវិភាគទាន ដើម្បីបញ្ជូនលោក ប៉ែន សុវណ្ណ ទៅសង្រ្គោះនៅក្រៅប្រទេសផងដែរ។ លោក មុត ចន្ថា បានប្រាប់មជ្ឈមណ្ឌលព័ត៌មានដើមអម្ពិល ឲ្យដឹងនៅល្ងាច ថ្ងៃនេះថា លោក ប៉ែន សុវណ្ណ មានជំងឺលើសឈាម ហើយបានដាច់សរសៃឈាមកាលពីយប់ថ្ងៃទី១៧ ខែមករា ពេលរៀបចំចូលសម្រាន្ត។
លោក បែន សុវណ្ណ មានជន្មាយុ ៧៩ឆ្នាំ បានកើតនៅថ្ងៃ១៥ មេសា ១៩៣៦ នៅ ភូមិចន្ទទៀប ត្រាំប្រាក់ ខេត្ត តាកែវ។ លោក ជាអតីតនាយករដ្ឋមន្ត្រីទីមួយ នៃរបបសាធារណរដ្ឋប្រជាមានិតកម្ពុជា (១៩៧៩-១៩៨២)។
លោកធ្លាប់ជាលេខា នៃបក្សបដិវត្តន៍ប្រជាជនកម្ពុជា (ប.ប.ប.ក.) ចាប់ពីឆ្នាំ១៩៧៩ ដល់ ថ្ងៃ ៥ ធ្នូ ១៩៨១។ បន្ទាប់ពីបាតមុខពីឆាកនយោបាយ និងខកខានបម្រើការងារ ប្រទេសទេសជាតិ ចាប់តាំងអំឡុងទសវត្សរ៍ឆ្នាំ៨០នោះ នៅក្នុងអាណត្តិទី៥ នៃរាជរដ្ឋាភិបាលបច្ចុប្បន្ននេះ លោក ប៉ែន សុវណ្ណ បានក្លាយជាតំណាងរាស្រ្ត មណ្ឌលខេត្ត កំពង់ស្ពឺ មកពីគណបក្សសង្រ្គោះជាតិ។
លោកធ្លាប់បាន សម្តែងការរំពឹងទុកថា តាមរយៈតួនាទីជាតំណាងរាស្រ្តនេះ នឹងផ្តល់ឱកាសឲ្យរូបលោកបានចូលបម្រើការងារប្រជាជន និងសង្គមកម្ពុជាជាថ្មី ហើយកាលពីពេលថ្មីៗនេះ លោក ក៏បានប្រកាសបើកមូលនិធិ ដោយប្រើថវិកាផ្ទាល់ខ្លួន ជួយដល់កុមារកំព្រា និងទុរគតផងដែរ៕
