ត្បូងឃ្មុំ៖ ផ្ទះចំនួន២ខ្នង ជាកម្មសិទ្ធិ របស់ប្រជាពលរដ្ឋ ពីរគ្រួសារ ត្រូវបានឆាបឆេះ អស់ទាំងស្រុង កាលពីវេលាម៉ោង ១០ ថ្ងៃទី៣ ខែកុម្ភៈ ឆ្នាំ២០១៥ នៅភូមិត្រពាំងរាំង ឃុំមេមត់ ស្រុកមេមត់ ខេត្តត្បូងឃ្មុំ ។ អគ្គីភ័យនេះ សមត្ថកិច្ច បានសន្និដ្ឋាន ជាជំហ៊ានដំបូងថា បណ្តាលមកពីឆ្លងចរន្តអគ្គិសនី ធ្វើឲ្យខូចខាតទ្រព្យសម្បត្តិ អស់មួយចំនួនធំ។
អធិការនគរបាលស្រុកមេមត់ លោក ប៉េង អេងហាក់ បានប្រាប់ឲ្យដឹងថា ផ្ទះដែលឆាបឆេះនោះ មានទំហ៊ុំ ៧គុណនិង៨ម៉ែត្រ ធ្វើពីឈើប្រក់ក្បឿង ម្ចាស់ផ្ទះទី១ ឈ្មោះ គល់ ព្រិច ភេទប្រុស អា៥១ឆ្នាំ និងទី២ ឈ្មោះ សូយ វណ្ណា ភេទប្រុស អាយុ៣៨ឆ្នាំ ។ លោក អធិការ បានឲ្យដឹងទៀតថា គ្រោះអគ្គិភ័យនេះ ធ្វើឲ្យមានការខូចខាត មានដូចជា ស្រូវជាង៥តោន លុយ១លាន ៥០ម៉ឺនរៀល មាស២ជី ប្លាកទីន១ខែ្ស ស្មើនិងប្រាក់៤៥ម៉ឺនរៀល ម៉ូតូម៉ាកដេហាស់២គ្រឿង និងឈើគ្រឿងផ្ទះ មួយចំនួនទៀត។
លោក អធដិការបានបញ្ជាក់ថា ក្នុងហេតុការណ៍នោះ មានរថតន្តពន្លត់អគ្គិភ័យរបស់ស្នងការដ្ឋាន ខេត្តត្បូងឃ្មុំ និងរថយន្ត ពន្លត់អគ្គិភ័យ របស់ក្រុមហ៊ុនចំការកៅស៊ូមេមត់ ជួយអន្តរាគមន៍បាញ់ពន្លត់ដែរ។ហើយករណីអគ្គិភ័យនេះ សមត្ថកិច្ច របស់លោក បានធ្វើការសន្និដ្ឋានបឋមបណ្តាលមកពីឆ្លងចរន្តអគ្គិសនី ខណៈម្ចាស់ផ្ទះមិននៅ ។ ប៉ុន្តែ យ៉ាងណាក៏ដោយ មិនបណ្តាលឲ្យមានគ្រោះថ្នាក់ដល់មនុស្សនោះទេ៕
