ព្រៃវែង ៖ ផ្លូវចាក់បេតុងដ៏រឹងមាំ ជាច្រើនខ្សែ បានបង្ហាញវត្តមាន ជាបណ្តើរៗ នៅទីរួម ខេត្ត ព្រៃវែង ដែលសម្មិទ្ធផល ទាំងនេះ ធ្វើឲ្យប្រជាពលរដ្ឋ តាមមូលដ្ឋាន កាន់តែមានភាពងាយ ស្រួល លើការធ្វើដំណើរ និងដឹកទំនិញផ្សេងៗ ព្រមទាំងការបង្កើន សោភ័ណភាពទីក្រុង កាន់ តែមាន ការទាក់ទាញពីគ្រប់មជ្ឈដ្ឋាន។
ក្រៅមានកិច្ចការងារធ្វើច្រើន នៅក្នុងការិយាល័យនោះ អភិបាល ខេត្តព្រៃវែង លោក ហាស់ សារ៉េត នៅរសៀលថ្ងៃ ទី១២ ខែកុម្ភៈ ឆ្នាំ២០១៥នេះ បានចុះត្រួតពិនិត្យ ដោយផ្ទាល់ ផ្លូវចាក់បេតុង ដែលទើបនឹងស្ថាបនាហើយ ព្រមទាំង បានជួប សំណេះសំណាល ជាមួយប្រជាពលរដ្ឋ នៅតាមផ្ទះផងដែរ ។
មន្រ្តីសាលាខេត្តព្រៃវែង ដែល បានអមដំណើរនោះ បានថ្លែងថា លោកអភិបាលខេត្ត បានលើកឡើង ពីគម្រោង អភិវឌ្ឍន៍នានា មិនថា តែនៅក្រុងព្រៃវែងនោះទេ ប៉ុន្តែនៅតាមបណ្តា ស្រុកផ្សេងទៀត ទូទាំងខេត្តបាន និង ដំណើរ ការដែលគម្រោងទាំងនេះ នឹងជួយធ្វើឲ្យជីវភាព របស់ប្រជាពលរដ្ឋ នៅក្នុងខេត្តព្រៃវែង កាន់តែមានភាព ធូរធា ជាងមុន តាមរយះប្រព័ន្ធ ហេដ្ឋារចនាសម្ព័ន្ធខ្ចាត់ខ្វែង បើទោះបីតំបន់ខ្លះ កំពុងចាប់ផ្តើមក៏ដោយនោះ។
បង្ហាញពីភាពស្និតស្នាល លើការជជែកលេងជាមួយ ប្រជាពល រដ្ឋ នៅតាមផ្ទះនោះ លោក ហាស់ សារ៉េត បានបង្ហាញពីការរីកចម្រើន នៅខេត្តព្រៃវែង ជា ពិសេសនោះ គឺនៅទីរួមខេត្តតែម្តង។
ជាមួយនឹងប្រព័ន្ធផ្លូវបេតុង ដ៏រឹងមាំ នៅទីរួមខេត្តនេះ លោកអភិបាលខេត្ត បានជំរុញ និងផ្តាំផ្ញើដល់ ប្រជាពលរដ្ឋរួមគ្នា ជួយថែរក្សា ឲ្យបានគង់វង្ស ពីព្រោះ នេះជាប្រយោជន៍រួម របស់បងប្អូន តែលោកក៏បានណែនាំ ឲ្យគ្រប់គ្នា ត្រូវមានការ ប្រុងប្រយ័ត្ន អំពីគ្រោះថ្នាក់ ចរាចរណ៍ផងដែរ កុំអាងផ្លូវស្រួលនាំគ្នាបើកលឿន និង មិនគោរពច្បាប់នោះ៕
អភិបាលខេត្តព្រៃវែង ជួបនិយាយលែងជាមួយ ប្រជាពលរដ្ឋ នៅតាមដងផ្លូវ
