ជិះម៉ូតូ បុកក្របីស្លាប់ និងរបួស២នាក់ រីឯក្របីងាប់ នៅស្រុកបាធាយ

- ដើមឆ្នាំ២០១៥ អ្នកស្លាប់ ដោយសារ គ្រោះថ្នាក់ចរាចរ នៅខេត្តកំពង់ចាម មានចំនួន២១នាក់

កំពង់ចាមៈ បុរសពីរនាក់ បានជួបគ្រោះ ថ្នាក់ចរាចរ រហូតបាត់បង់ជីវិតម្នាក់ នៅនឹងកន្លែងកើតហេតុ រីឯម្នាក់ទៀត រងរបួសធ្ងន់បន្ទាប់ពី ពួកគេបានបើកម៉ូតូ ទៅបុកសត្វក្របី នៅតាមដងផ្លូវ។គ្រោះថ្នាក់ចរាចរ ដែលធ្វើឲ្យសត្វក្របី មួយក្បាលបាន ងាប់ដែរនោះ កើតឡើងកាលពីវេលាម៉ោង៨ យប់ ថ្ងៃទី១២ ខែកុម្ភៈ ឆ្នាំ២០១៥នេះ ស្ថិតនៅភូមិសូកើត ឃុំសំបូរ ស្រុកបាធាយ ខេត្តកំពង់ចាម។

មន្ត្រីនគរបាលស្រុកបាធាយបានឲ្យដឹងថា ជនរងគ្រោះទាំង២នាក់ ពេលកំពុងបើកម៉ូតូ ឌុបគ្នា ទំនងជាលឿនពេកបានទៅបុកសត្វក្របីមួយក្បាលបណ្តាលឲ្យដួលបោកក្បាលទៅនឹងថ្នល់ ស្លាប់ភ្លាមៗម្នាក់ នៅចំណុចកើតហេតុ រីឯអ្នករួមដំណើររងរបួសធ្ងន់ ហើយក្របីរបស់អ្នកស្រុកដែលត្រូវម៉ូតបុកពេញមួយទំហឹង នោះក៏បានងាប់ផងដែរ។

ក្រោយកើតហេតុភ្លាមៗ នគរបាលមូលដ្ឋានបានចុះទៅកាន់ទីនោះដើម្បីជួយអន្តរាគម ដោយទាក់ទង ទៅក្រុមគ្រួសារសពមកទទួលយក រីឯជនរងគ្រោះដែលរងរបួស បានជួយដឹកបញ្ជូនទៅព្យាបាលនៅមន្ទីរពេទ្យ។

យោងតាមស្នងការនគរបាលខេត្តកំពង់ចាម លោកឧត្តមសេនីយ៍ បែន រ័ត្ន បានបង្ហាញថា រយៈពេល ២ខែ ដើមឆ្នាំ២០១៥នេះ អ្នកស្លាប់ដោយសារគ្រោះថ្នាក់ចរាចរនៅទូទាំងខេត្តបានកើតឡើង២១នាក់ រីឯអ្នករងរបួសជាច្រើននាក់ផ្សេងទៀត។

លោកឧត្តមសេនីយ៍ស្នងការ បានដាក់ផែនការឲ្យនគរបាលជំនាញចរាចរ និងនគរបាលតាមបណ្តាសុ្រកក្រុង បង្កើនយុទ្ធនាការរឹតបណ្តឹងច្បាប់ចរាចរផ្លូវគោក និងបង្កើតការផ្សព្វផ្សាយ អំពីករណីនេះដល់ប្រជាពលរដ្ឋតាមមូលដ្ឋាន ដើម្បីចូលរួមទាំងអស់គ្នា កាត់បន្ថយឃាតករនៅលើដងវិថីមួយនេះ៕