រថយន្តតាកូម៉ា បុកកុមារីអាយុ ៧ឆ្នាំ ជាប់ក្រោមរថយន្ត យ៉ាងសង្វេគ

កែប៖ កុមារីអាយុ ៧ឆ្នាំម្នាក់ បានស្លាប់បាត់បង់ជីវិត ជាប់ក្រោមកង់រថយន្តគួរឲ្យសង្វេគ នៅម៉ោង ៥ និង៤៥នាទី ល្ងាចថ្ងៃទី២១ ខែមីនា ឆ្នាំ២០១៥ ស្ថិតនៅចំណោទត្រពាំងទឹក ក្នុងភូមិថ្មី សង្កាត់ព្រៃធំ ក្រុងកែប ខេត្តកែប។

សមត្ថកិច្ច បានឲ្យដឹងថា រថយន្តដែលបុកកុមារីនោះ ម៉ាកតាកូម៉ា ពាក់ស្លាកលេខ ភ្នំពេញ 2W-1497។ ក្រោយ កើតហេតុការណ៍អ្នកបើកបររថយន្ត បានចុះរត់គេចខ្លួនបាត់ បន្សល់ទុកតែរថយន្តនៅកន្លែងកើតហេតុ ដោយគាប ជាប់កុមារីរងគ្រោះនៅក្រោមរថយន្តបង្ក។

សមត្ថកិច្ចមិនទាន់បញ្ជាក់ អត្តសញ្ញាណកុមារីរងគ្រោះ និងម្ចាស់រថយន្តនៅឡើយទេ។ ក្រោយកើតហេតុប្រជាពល និងសមត្ថកិច្ច បាននាំគ្នាព្យាយាមគាស់រថយន្តយកកុមារីចេញ និងប្រគល់ជូនក្រុមគ្រួសារធ្វើបុណ្យតាមប្រពៃណី។

ទោះបីជាយ៉ាងណាសមត្ថកិច្ច បានអះអាងថា នឹងតាមវែកមុខជនបង្កជាម្ចាស់រថយន្តមកដោះស្រាយលើបញ្ហា ឧប្បត្តិហេតុគ្រោះថ្នាក់ចរាចរនេះ៕