ពលរដ្ឋខ្មែរ ៣នាក់ បានវិលត្រឡប់ មកវិញហើយ បន្ទាប់ពីទាហាន បាញ់ឲ្យរបួស

ឧត្តរមានជ័យ៖ ប្រជាពលរដ្ឋខ្មែរ ៣នាក់ ដែលត្រូវបានទាហានថៃបាញ់ឲ្យរបួស កាលពីថ្ងៃទី១៩ ខែកញ្ញា នៅ តាមព្រំដែន ខណៈឆ្លងដែនទៅកាប់ឈើគ្រញូង បានវិលត្រឡប់ចូលមកម្ពុជាវិញហើយ កាលពីល្ងាចថ្ងៃទី២២ ខែកញ្ញា ។

ប្រភពពីមន្រ្តីយោធាននៅតាមព្រំដែន បានឲ្យដឹងថា អ្នកទាំងបីដែលត្រូវបានទាហានថៃបាញ់ឲ្ យរងរបួសនោះ បានមកកម្ពុជាវិញហើយ បន្ទាប់ពីអាជ្ញាធរនៃប្រទេសទាំងពីរ បានចរចាគ្នាឲ្យមានការដោះលែងនាពេលកន្លងមក។

ពលរដ្ឋ៣នាក់ ដែលរងរបួសរួមមាន ទី១-ឈ្មោះ យិន ដា ភេទប្រុស អាយុ១៨ឆ្នាំ ត្រូវគ្រាប់កាំភ្លើងចំកំភួនជើង ខាងឆ្វេង, ទី២- ឈ្មោះ លុយ ឡៃ ភេទប្រុស អាយុ ៣៨ឆ្នាំ មានរបួសដោយសារ គ្រាប់កាំភ្លើងត្រង់ភ្លៅខាងឆ្វេង និងទី៣-ឈ្មោះ អូន សុខជា ភេទប្រុស អាយុ១៨ឆ្នាំ មានរបួសដោយសារ គ្រាប់កាំភ្លើងត្រង់កំភួនជើងខាងឆ្វេង។ ពួកគេរស់នៅ ភូមិអូរយ៉ាដាវ សង្កាត់បន្សាយរាក់ ក្រុងសំរោង ខេត្តឧត្តរមានជ័យ។

ពលរដ្ឋខ្មែរ ២នាក់ ត្រូវទាហានថៃបាញ់ស្លាប់ និង ៣នាក់ទៀតរងរបួស នៅពេលពួកគេឆ្លងព្រំដែន ចូលក្នុងដីថៃ យ៉ាងជ្រៅ ដើម្បីកាប់ឈើគ្រញូង តាមច្រកប្រាសាទខ្នារ នៅយប់ថ្ងៃទី១៩ ខែកញ្ញា ត្រង់ចំណុចភូមិសាស្ដ្រ ប៉ុស្ដិ៍ នគរបាលព្រំដែន អណ្ដែងមុត ក្នុងឃុំអណ្ដែងមុត ស្រុកកាប់ជើង ខេត្ដសុរិន្ទ និងមានជំរៅប្រមាណ ៤គីឡូម៉ែត្រ ពីព្រំដែនកម្ពុជា ចូលទៅក្នុងទឹកដីថៃ ត្រង់ចំណុច AV ៣៤-៩២៕