សៀមរាប : នៅតំបន់មួយចំនួន នៃមាត់បឹងទន្លេសាប និងទីតាំងមួយចំនួនទៀត នៅខេត្តសៀមរាប ត្រូវបានក្រុមឈ្មួញធ្វើអាជីវកម្ម ជីករណ្ដៅកាយយកអាចម៍ដី (ដឹកដីលក់) បានជីកកកាយធ្វើអាជីវកម្មនៃរណ្ដៅដី មានទំហំធំជាង និងជ្រៅជាងច្បាប់អនុញ្ញាត តែអង្គភាព និងមន្ទីរ ព្រមទាំងមន្ត្រីជំនាញពាក់ព័ន្ធ ហាក់មិនបានដឹងឮ និងយកចិត្តទុកដាក់ ក្នុងការពិនិត្យ ចាត់វិធានការទាន់ពេលវេលា ទើបធ្វើឲ្យមន្ត្រីសាលាខេត្ត ធ្វើការចុះត្រួតពិនិត្យ រួចធ្វើសេចក្ដីរាយការណ៍ ជូនថ្នាក់ដឹកនាំខេត្ត ដើម្បីពិនិត្យ និងសម្រេចចំពោះករណីទាំងនេះ។

សូមបញ្ជាក់ថា បើតាមប្រសាសន៍ របស់មន្ត្រីសាលាខេត្តសៀមរាប គឺ លោក គិម វណ្ណៈ នាយកទីចាត់ការអន្តរវិស័យ កាលពីរសៀលថ្ងៃទី១២ ខែកុម្ភះ ឆ្នាំ២០១៣នេះ ថា បើតាមលិខិតអនុញ្ញាតិ គឺរណ្ដៅដី ដែលត្រូវជីកកកាយយកអាចម៍ដីធ្វើអាជីវកម្ម គឺ ត្រូវមានទំហំ បណ្ដោយ៣០ម៉ែត្រ ទទឹង២០ម៉ែត្រ និងជម្រៅអតិបរមាត្រឹមតែ ៥ម៉ែត្រ។ តែការពិនិត្យ និងការចុះវាស់វែងជាក់ស្ដែង ឃើញរណ្ដៅដីខ្លះដែលកំពុងជីក និងរណ្ដៅដីចាស់ មានបណ្ដោយជាង៥០ម៉ែត្រ ទទឹងរហូតដល់៥០ម៉ែត្រ ជម្រៅ ៧ម៉ែត្រ ឬ អាចជ្រៅជាងនេះក៏មាន។ ហើយរណ្ដៅខ្លះទៀតបានជីកជិតៗគ្នា រួចគេជីកទម្លាយរហូតមានប្រវែងប្រមាណជា ១០០ម៉ែត្រ និងជម្រៅជ្រៅលើកការកំណត់ នៃច្បាប់អនុញ្ញាតិ។

ក្រៅពីនោះ យើងបានទៅដល់កន្លែង ដែលកំពុងនិងបានជីករណ្ដៅយកអាចម៍ដី ដែលនៅជាប់តំបន់ព្រៃលិចទឹក នៃមាត់បឹងទន្លេសាបផងដែរ ដូចជា នៅភូមិ... សង្កាត់ ស្វាយដង្គំ ក្រុងសៀមរាប ដែលមានចម្ងាយប្រមាណជា ៥គីឡូម៉ែត្រពីក្រុង និងមានចម្ងាយប្រមាណជា ៣-៤គីឡូម៉ែត្រ ពីតំបន់ភ្នំក្រោម (ដែលនៅពេលរសៀលនោះ យើងបានឃើញប្រភេទសត្វស្លាប់យ៉ាងច្រើន នៃតំបន់ដីសើម កំពុងហោះហើរ និងចុះរកចំណី)។

ការជីករណ្ដៅដី ធ្វើអាជីវកម្មលក់អាចម៍ដីទាំងនេះ ជាទូទៅមានការប៉ះពាល់ដល់ សណ្ដាប់ធ្នាប់ ដឹកធ្ងន់ខូចផ្លូវ ថ្នល់ ចរាចរគ្មានសណ្ដាប់ធ្នាប់ ដោយបើកបរក្នុង ល្បឿនលឿន និងរថយន្ដខ្លះពេលដឹកដីមិនបានគ្រប់ ដឹកលើសចំណុះ ជ្រុះកំពប់តាមផ្លូវសាធារណ: និងហើយជាទូទៅពួកគេ បានបើករថយន្ដប្រជែង ជើងគ្នាឲ្យ បានច្រើនជើង ដែលអ្នកសៀមរាប មានការព្រួយបារម្ភ ក្រែងមានគ្រោះថ្នាក់ចរាចរ ពិសេសចំពោះកុមារៗផងដែរ។

សូមរំលឹកថា ការពីថ្ងៃទី២៣ ខែមករា ឆ្នាំ២០១៣កន្លងទៅ លោក ស៊ូ ភិរិន្ទ អភិបាល នៃគណៈអភិបាលខេត្តសៀមរាប នៅឯកិច្ចប្រជុំរបស់សាលាខេត្ត ថា បច្ចុប្បន្ននៅ ខេត្តសៀមរាប មានការអភិវឌ្ឍន៍យ៉ាងច្រើន តម្រូវការផ្នែកហេដ្ឋារចនាសម្ព័ន្ធ និងសំណង់ផ្សេងៗ កាន់តែច្រើន ដែលនាំឲ្យមានការធ្វើអាជីវកម្មដឹកជញ្ជូនដីស ថ្ម ខ្សាច់ យកទៅប្រើប្រាស់ក៏ច្រើនផងដែរ។ ក្នុងការធ្វើអាជីវកម្ម និងដឹកជញ្ជូនដី បានធ្វើឲ្យមានបញ្ហាដល់បរិស្ថាន សណ្ដាប់ធ្នាប់ និងសោភ័ណភាពទីប្រជុំជន ពិសេសនៅក្រុង សៀមរាប ដូចជាខូចផ្លូវថ្នល់ ការស្ទះចរាចរ មានដីហុយក្នុងក្រុង កត្តាទាំងនេះនាំឲ្យមានការរិះគន់ ពីសំណាក់ភ្ញៀវទេសចរជាតិ អន្តរជាតិ និងប្រព័ន្ធផ្សព្វផ្សាយ ព័ត៌មានក្នុងស្រុកមួយចំនួន។ ហេតុនេះទើបអាជ្ញាធរខេត្ត បានប្រជុំពិភាក្សា លើការធ្វើអាជីវកម្ម និងដឹកជញ្ជូនអាចម៍ដី នៅក្នុងខេត្តសៀមរាប។

លោកអភិបាលខេត្ត បានស្នើរឲ្យលោក គិម វណ្ណ: នាយកទីចាក់ការអន្តរវិស័យ រាយការណ៍ និងបន្តចុះពិនិត្យ លើអាជីវកម្មជីករណ្ដៅដី និងការដឹកជញ្ជូនអាចម៍ដី នៅក្រុងសៀមរាប។ ហើយកាលពីថ្ងៃទី១៤ មករា ២០១៣ ក្រុមការងារសាលាខេត្ត បានចុះពិនិត្យមើលទីតាំង ធ្វើអាជីវកម្មជីករណ្ដៅកកាយយកអាចម៍ ចំនួន៨កន្លែង នៅក្នុងខេត្តសៀមរាប ក្នុងនោះ នៅក្រុងសៀមរាប ចំនួន ៧កន្លែង និងស្រុកប្រាសាទបាគង ចំនួន ១កន្លែង។ ហើយការធ្វើអាជីវកម្មទាំងនេះ មានការអនុញ្ញាត ពីមន្ទីរ ឧស្សាហកម្មរ៉ែ និងថាមពលខេត្ត តាមរយ:លោកមេភូមិ មេឃុំ ចៅសង្កាត់ លោកអភិបាលក្រុង ស្រុក។ ដែលក្នុងលិខិតអនុញ្ញាតរបស់មន្ទីរ ឲ្យជីកកាយដីក្នុងទំហំ ២០ម៉ែត្រx ៣០ម៉ែត្រ ជម្រៅមិនលើសពី៥ម៉ែត្រ ក្នុងរយ:ពេល៥ខែ ប៉ុន្តែការពិនិត្យជាក់ស្ដែង គឺទីតាំងនីមួយៗ មានទំហំលើសពីការអនុញ្ញាត ពីមន្ទីរឧស្សាហកម្ម រ៉ែ និងថាមពលខេត្ត។ ហើយការដឹកដី ឃើញថាមិនមានការគ្រប់ត្រឹមត្រូវ បណ្ដាលឲ្យមានការធ្លាក់ដី តាមទ្រូងផ្លូវ ថ្នល់ និងបណ្ដាលឲ្យស្ទះចរាចរនៅកន្លែង មួយចំនួន ទៀតផង។

នៅក្នុងកិច្ចប្រជុំកន្លងទៅ លោកអភិបាលខេត្ត បានដូកសរុប និងផ្ដល់អនុសាសន៍ ថា ចំពោះ ការធ្វើអាជីវកម្មជីកអាចម៍ដី និងការដឹកជញ្ជូននៅខេត្តសៀមរាប មាន បញ្ហាចំនួន៣ គឺ ការធ្វើឲ្យខូចផ្លូវថ្នល់នៅពេលដឹកជញ្ជូនដី ទីពីរខូចសណ្ដាប់ធ្នាប់សាធារណ: ការស្ទះចរាចរណ៍ ការបើករថយន្ដក្នុងល្បឿនលឿន ធ្វើឲ្យមានគ្រោះ ថ្នាក់ចរាចរណ៍។ បញ្ហាបរិស្ថាន ធ្លាក់ដីលើផ្លូវថ្នល់ បណ្ដាលឲ្យមានដីហុយ។ លោកអភិបាល បានលើកឡើងនូវវិធានការ សំដៅធ្វើឲ្យមានសណ្ដាប់ធ្នាប់ល្អ សោភ័ណភាព អនាម័យល្អ ក្នុងក្រុង និងខេត្តសៀមរាប ត្រូវ រាល់ការធ្វើអាជីវកម្មជីកអាចម៍ដី និងដឹកជញ្ជូនដី ត្រូវមានលិខិតអនុញ្ញាត ពីអភិបាលខេត្ត ឬ ក្រសួង ពាក់ព័ន្ធ តាមរយ:មេភូមិ មេឃុំ ចៅសង្កាត់ អភិបាលក្រុង ស្រុក និងមន្ទីរជំនាញ។ ហើយអភិបាលរងខេត្ត ទទួលបន្ទក់ នាយកទីចាត់ការអន្តរវិស័យ សាលាខេត្ត និង លោកប្រធាន មន្ទីរជំនាញ ត្រូវពិភាក្សាគ្នាអំពីការកំណត់ទីកន្លែងជីកដី កំណត់ទម្ងន់ដឹកជញ្ជូន កំណត់ផ្លូវត្រូវដឹកជញ្ជូន កំណត់ពេលវេលា និងគ្រប់គ្រងការ ដឹកជញ្ជូនឲ្យបានត្រឹមត្រូវ។

ទោះបីជាយ៉ាងណា ក៏នៅតែមានការរិះគន់ចំពោះជាអន្លើរៗ ចំពោះការធ្វើអាជីវកម្មជីករណ្ដៅយកអាចម៍ដី និងការដឹកជញ្ជូនដីធ្វើអាជីវកម្ម រហូតមកដល់ពេលនេះ នៅតែមានការធ្វើអាជីវកម្ម និងការដឹកជញ្ជូនដីល្មើសច្បាប់អនុញ្ញាត និងប៉ះពាល់ដល់សណ្ដាប់ធ្នាប់ល្អ សោភ័ណភាព អនាម័យល្អ ក្នុងក្រុង និងខេត្តសៀមរាប នៅ ឡើយ។ តែមន្ទីរ អង្គភាព និងមន្ត្រីជំនាញពាក់ព័ន្ធ ហាក់មិនទាន់បានចុះពិនិត្យ ពង្រឹងការអនុវត្តតាមលិខិត បទដ្ឋាន ច្បាប់នៅឡើយ។ ទើបតែពេលនេះ ទើបអាជ្ញាធរ ខេត្ត បានចុះពិនិត្យ និងឈានទៅរកការពង្រឹងការអនុវត្តច្បាប់ លិខិត បទដ្ឋាន៕

ភ្នំពេញ៖ប្រទេសបេឡារុស្ស គ្រោងនឹងបើករោងចក្រដំឡើង ត្រាក់ទ័រនៅកម្ពុជា នៅចុងឆ្នាំ២០១៣ ខាងមុខនេះ ដើម្បីផលិតត្រាក់ទ័រផ្គត់ផ្គង់ទីផ្សារកម្ពុជា និងទីផ្សារ បណ្តា ប្រទេសអាស៊ាន ប្រកួតប្រជែងនឹងត្រាក់ទ័រ របស់ប្រទេសចិន និងជប៉ុន។

គម្រោងបើករោងចក្រ ដំឡើងត្រាក់ទ័របេឡារុស្សនេះ បន្ទាប់រោងចក្រដំឡើងត្រាក់ទ័រ ទីក្រុងមីន របស់ប្រទេសបេឡារុស្ស និងក្រុមហ៊ុន មេគង្គ អេហ្គ្រីខលឈ័រ ត្រាក់ទ័រ របស់កម្ពុជា បានបើកសម្ពោធ មជ្ឈមណ្ឌលអភិវឌ្ឍន៍ កសិកម្ម  ដែលជាកន្លែងតាំងលក់ត្រាក់ទ័របេឡារុស្ស និងបណ្តុះបណ្តាលបច្ចេកទេស ជុសជួល ត្រាក់ទ័របេឡារុស្ស ជាផ្លូវការកាលពី រសៀលថ្ងៃទី១៣ ខែកុម្ភៈ ឆ្នាំ២០១៣ ក្រោមអធិបតី ភាពប្រធានរដ្ឋសភាបេឡារុស្ស លោក Vladumir Andreichenko ។

ប្រធានក្រុមហ៊ុន មេគង្គ អេហ្គ្រីខលឈ័រ ត្រាក់ទ័រ លោកស្រី អៀប គឹមតេង បានថ្លែងថា រោងចក្រផលិតត្រាក់ទ័រ ទីក្រុមមីន បានផ្តល់សិទ្ធិជាផ្លូវការ ឲ្យក្រុមហ៊ុន មេគង្គ អេហ្គ្រីខលឈ័រ ត្រាក់ទ័រ ធ្វើជាអ្នកផ្គត់ផ្គង់ ស្របច្បាប់នូវត្រាក់ទ័រម៉ាក MTZ បេឡារុស្ស។

លោកស្រីបន្តថា «ការបើកសម្ពោធមជ្ឈមណ្ឌល អភិវឌ្ឍន៍កសិកម្មបញ្ជាក់យ៉ាងច្បាស់ថា យើងបានទទួលសិទ្ធិផ្តាច់មុខ ក្នុងការនាំចូលត្រាក់ទ័រពី ប្រទេសបេឡារុស្ស មកលក់នៅកម្ពុជា។ បន្ទាប់មកទៀត នៅចុងឆ្នាំ២០១៣នេះ យើងនឹងឈានដល់ការបើករោងចក្រ ដំឡើងត្រាក់ទ័របេឡារុស្ស។ ការដំឡើងនេះមិនមែនផ្គត់ផ្គង់ តែប្រទេសកម្ពុជាប៉ុណ្ណោះទេ ពោលគឺផ្គត់ផ្គង់ទីផ្សារបណ្តា ប្រទេសអាស៊ានតែម្តង»។

ប្រធានរោងចក្រផលិត ត្រាក់ទ័រទីក្រុងមីនរបស់ ប្រទេសបេឡារុស្ស លោក Volchok Vladzimirបានថ្លែងថា «នេះជាការបើកសម្ពោធ នូវកន្លែងតាំងលក់ត្រាក់ទ័រ បេឡារុស្ស។ នៅទីនេះយើងធ្វើឲ្យដូច នៅរោចក្រក្នុងទីក្រុងមីនដែរ ដោយយើងនឹងបណ្តុះបណ្តាល បច្ចេកទេសប្រើប្រាស់ ជុសជួល ថែទាំ ឲ្យការប្រើប្រាស់ត្រាក់ទ័រ របស់យើងប្រកបដោយប្រសិទ្ធភាពខ្ពស់។ យើងជឿជាក់ថា ត្រាក់ទ័ររបស់យើងទទួលបានជោគជ័យក្នុងទីផ្សារកម្ពុជា ពិសេសនៅពេលដែលយើង បើករោងចក្រនាពេលខាងមុខនេះ»។

ប្រធានរដ្ឋសភាបេឡារុស្ស លោក Vladumir Andreichenko បានថ្លែងផងដែរថា ត្រាក់ទ័ររបស់ប្រទេសខ្លួនមានគុណភាពខ្ពស់ ក្នុងការបម្រើការងារក្នុងវិស័យកសិកម្ម  ហើយបានដាក់លក់ នៅប្រទេសចំនួន១០០ ប្រទេសក្នុងពិភពលោក។ លោកជឿជាក់ថា ត្រាក់ទ័របេឡារុស្ស នឹងទទួលបានជោគជ័យ ដោយសារទទួលបានគាំទ្រ ពេញទំហឹងពីរាជរដ្ឋាភិបាលកម្ពុជា។

លោកបន្តថា«ប្រទេសបេឡារុស្សនឹងចូលរួម សហការជាមួយដៃគូអ្នកផលិតត្រាក់ទ័រនៅកម្ពុជា ហើយយើងសង្ឃឹមថា ការងាររបស់យើងនឹងអភិវឌ្ឍន៍ ដោយសារ មានការគាំទ្រ ពីរាជរដ្ឋាភិបាលកម្ពុជា ពិសេសការបើករោងចក្រដំឡើងត្រាក់ទ័រនៅទីនេះ»។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន បានថ្លែងនូវក្តីរីករាយ និងសារទចំពោះការបើកឲ្យដំណើរការមជ្ឈមណ្ឌលអភិវឌ្ឍន៍កសិកម្ម និងគម្រោងបើករោងចក្រដំឡើងត្រាក់ទ័រ នៅកម្ពុជារបស់បេឡារុស្ស។ លោកក៏បានសំណូមពរ ឲ្យប្រទេសនេះ ជួយបណ្តុះបណ្តាលបច្ចេកទេស ដល់កម្ពុជា ដូចជាផ្តល់ជូននូវផលិតផល ប្រកបដោយគុណភាពល្អផងដែរ៕

ភ្នំពេញ៖ ថ្ងៃនៃសេចក្ដីស្រឡាញ់ Valentine’s Day ជារៀងរាល់ឆ្នាំ គេតែងឃើញយុវវ័យខ្មែរ មួយចំនួនធំ តែងតែមានភាពជ្រួលជ្រើម នៅក្នុងថ្ងៃបុណ្យមួយនេះ ដោយមានយុវវ័យយើងមួយចំនួន រសេចរសាចពេញដងវិថី ខ្លះមានកាន់ផ្កាក្នុងដៃ អ្នកខ្លះទៀតមានសង្សារបណ្តើរ។ នៅក្នុងថ្ងៃ១៤កុម្ភៈនេះដែរ មាននារីមួយចំនួន ត្រូវបានគេរាយការណ៍ថា ត្រូវបាត់បង់ព្រហ្មចារីរបស់ខ្លួន ដោយប្តូរជាមួយនិង ផ្កាកូលាបមួយបាច់រួមផ្សំ និងពាក្យសម្តីផ្អែមល្អែមរបស់ បុរសជាសង្សារក៏មានដែរ។

លោក លី វ័យគួង បានប្រាប់មជ្ឈមណ្ឌល ព័ត៌មានដើមអម្ពិល ឲ្យដឹងថា ថ្ងៃបុណ្យនៃក្តីស្រលាញ់ គេធ្វើឡើងទៅលើមនុស្សទូទៅ មិនចាំបាច់តែទៅលើ គូសង្សារស្រលាញ់គ្នានោះទេ ប៉ុន្តែយុវវ័យខ្មែរភាគច្រើន តែងមានការយល់ច្រឡំទៅលើថ្ងៃមួយនេះ ដោយពួកគេតែងតែផ្តោតជាសំខាន់ ទៅលើតែគូសង្សារបស់គេទៅវិញ។

លោកបន្តថា នៅថ្ងៃបុណ្យនៃក្តីស្រលាញ់នេះ អ្នកដែលទទួលរងគ្រោះ ច្រើនជាងគេគឺស្ត្រីភេទ ដោយពួកគាត់តែងតែ ចាញ់បោកការលួងលោមរបស់បុរស ដែលជាសង្សារ ព្រោះនារីឲ្យតែស្រលាញ់ បុរសណាម្នាក់ហើយ តែងតែស្រលាញ់អស់ពីចិត្ត និងហ៊ានប្រគល់អ្វីៗ ឲ្យគូស្នេហ៍របស់ខ្លួនដោយមិនគិត ពីផលវិបាកនៅថ្ងៃក្រោយ ហើយស្រ្តីគួទុកព្រហ្មចារីរបស់ខ្លួន ឲ្យដល់ថ្ងៃរៀបអាពាហ៍ពិពាហ៍ មិនត្រូវបំផ្លាញចោលក្នុងថ្ងៃ១៤កុម្ភៈនោះទេ។

លោក លី វ័យគួង ឲ្យដឹងទៀតថា “យ៉ាងណាក៏ដោយខ្ញុំជឿជាក់ថា យុវតីបច្ចុប្បន្នមានការយល់ ដឹងកាន់តែច្រើនទៅលើបញ្ហាទាំងនេះ ព្រោះតែសព្វថ្ងៃនេះ មានការផ្សព្វផ្សាយយ៉ាងទូលំទូលាយ តាមរយៈទូរទស្សន៍ វិទ្យុ ជាពិសេសតាមគេហទំព័រ ហ្វេសប៊ុក អំពីការផលអវិជ្ជមាននៅក្នុង ថ្ងៃបុណ្យនៃក្តីស្រលាញ់នេះ”។

លោក ឌួង ស៊ីឡែន ជានិស្សិតពេទ្យមួយរូប បានលើកឡើងនូវទស្សនៈរបស់ខ្លួនដែរ ស្រដៀងគ្នាដែរថា ពីមួយឆ្នាំទៅមួយឆ្នាំថ្ងៃបុណ្យនៃក្តីស្រលាញ់ ដែលយុវវ័យខ្មែរតែង ហៅថាថ្ងៃបុណ្យសង្សា រកាន់តែវាយលុកកាន់តែខ្លាំង ទៅលើយុវវ័យខ្មែរ ដោយធ្វើឲ្យពួកគេមាន ភាពឈ្លក់វង្វេងជាខ្លាំង សូម្បីតែក្មេងៗបឋមសិក្សា ហើយបញ្ហានេះពិតជាគួរអោយ បារម្ភខ្លាំងណាស់សំរាប់យុវវ័យខ្មែរ។

លោកថា យ៉ាងណាក៏ដោយ យុវតីភាគច្រើន ប្រហែលជាមានការយល់ដឹងខ្ពស់ និងចេះថែរក្សាខ្លួនប្រាណរបស់ខ្លួនបានល្អ ព្រោះបច្ចុប្បន្នតាមវិទ្យុ ទូរទស្សន៍ និងទស្សនាវដ្តី មានការផ្សព្វផ្សាយយ៉ាងទូលំទូលាយ ដើម្បីពញ្ញាក់ស្មារតីរបស់យុវវ័យជាពិសេសយុវតី កុំឲ្យមានភាពសប្បាយ ជ្រុលហួសហេតុពេកនៅក្នុង ថ្ងៃបុណ្យនៃក្តីស្រលាញ់នេះ ជាពិសេសកុំឲ្យប្តូរខ្លួនប្រាណ របស់យើងជាមួយ និងផ្កាមួយទង។

លោកបន្តថា”ចំពោះថ្ងៃបុណ្យនេះ ខ្ញុំមិនដែលឲ្យតម្លៃទៅលើវានោះទេ ព្រោះវាមិនមែនជាវប្បធម៌ របស់ជាតិខ្មែរឡើយ ប៉ុន្តែវាជាកម្មវិធីរបស់ពួកអ៊ឺរ៉ុប ហើយអ្វីដែលសំខាន់នោះ យុវវ័យខ្មែរយើងយល់ច្រឡំថា ថ្ងៃបុណ្យមួយនេះជាថ្ងៃបុណ្យសង្សា មិនមែនជាថ្ងៃបុណ្យនៃសេចក្តីស្រលាញ់ ដែលយើងត្រូវផ្តល់ឲ្យអ្នកគ្រប់គ្នា នៅជុំវិញយើងនោះឡើយ”។

លោក ហៃ សុខជា បានឲ្យដឹងដែរថា ជារៀងរាល់ឆ្នាំឲ្យតែជិតដល់ថ្ងៃបុណ្យសង្សារ គេតែងឃើញយុវវ័យខ្មែរ ជាពិសេសសិស្សសាលាតែងមាន ភាពជ្រួលច្របល់ ហើយមានយុវតីខ្លះត្រូវបាត់បង់ព្រហ្មចារី នៅថ្ងៃនោះក៏មានដែរ ដែលបង្កឲ្យកើតមានវិបត្តិ សង្គមកាន់តែច្រើន ដែលវិបត្តិទាំងនោះ បានធ្វើឲ្យភាគីទាំងសងខាងធ្លាក់ទឹកចិត្ត ជាពិសេសស្រ្តី ដោយពួកគេនឹងខូចកេរ្តិ៍ឈ្មោះទាំងខ្លួនឯង និងក្រុមគ្រួសារ ជាពិសេសវាផ្ទុយទៅនឹង ប្រពៃណីខ្មែរ ដែលមិនត្រូវប្រគល់ខ្លួនប្រាណ ឲ្យទៅបុរសមុនថ្ងៃរៀបការ។

លោកបន្តថា”ខ្ញុំយល់ថា ថ្ងៃបុណ្យសង្សារនេះ គឺបង្កឲ្យមានភាពច្របូកច្របល់ នៅក្នុងសង្គមខ្មែរយើងជាខ្លាំង ដោយយុវវ័យមួយចំនួនធំ ឲ្យតែដល់ថ្ងៃនោះ តែងតែរវើរវាយ មិនផ្តោតការយកចិត្តទុកដាក់លើការសិក្សា ហើយខ្វល់តែពីរឿង ទិញការដូរជូសង្សារបស់ខ្លួន”។

គេសង្កេតឃើញថា នៅតាមមហាវិថីមួយចំនួន និងនៅតាមសាលារៀន ក៏ដូចជានៅតាមហាងលក់ផ្កាជាដើម មានដាក់តាំងលក់ផ្កាកូលាប យ៉ាងទូលំទូលាយ និងមានការបញ្ចុះតម្លៃជាដើម ហើយជាបិសេសនោះ គឺនៅតាមកន្លែងសួនកំសាន្ត សប្បាយមួយចំនួន មានការផ្សព្វផ្សាយ ក្នុងការបញ្ចុះតម្លៃ ដើម្បីអបអរសាទរក្នុងឱកាសនៃ ថ្ងៃបុណ្យនៃក្តីស្រលាញ់នេះ យ៉ាងផុសផុលផងដែរ។ជាមួយគ្នានេះ នៅថ្ងៃទី១៤ ខែកុម្ភៈ ដែលត្រូវជាថ្ងៃបុណ្យនៃក្តីស្រលាញនេះដែរ យុវជនកាយរិទ្ធ នឹងរៀបចំពិធីមួយនៅពហុកីឡាដ្ឋាន ជាតិអូឡាំពិក ក្នុងគោលបំណង ដើម្បីពញាក់ស្មារតីរបស់យុវវ័យ កុំឲ្យសប្បាយភ្លើតភ្លើនជាមួយនិង ថ្ងៃបុណ្យនេះខ្លាំងហួសហេតុពេក ពិសេសយុវតីសូមកុំប្រគល់ ព្រហ្មចារីរបស់ខ្លួនឲ្យទៅបុរស។

ពីមួយថ្ងៃទៅមួយថ្ងៃ វប្បធម៌បរទេសមួយចំនួន បានចូលមកប្តូរនូវ អាកប្បកិរិយារបស់យុវវ័យ ឲ្យភ្លើតភ្លើនភ្លេចការរៀនសូត្រ និងគិតតែពីភាពឡូយឆាយ តែងខ្លួនបែបបរទេស មិនសូវមានការគោរពចាស់ទុំ មាតាបិតា។ ទង្វើនេះបានធ្វើឲ្យវប្បធម៌សង្គម និងកិត្តិយសសង្គមចុះអន់ថយ មិនតែប៉ុណ្ណោះគឺ តំលៃរបស់យុវជនផ្ទាល់ ត្រូវចុះខ្សោយ។

ប្រទេសកម្ពុជាមានវប្បធម៌ដ៏សម្បូរបែប ដែលជាស្នាដៃដ៏ផូផង់ របស់បុព្វបុរសបន្សល់ទុក សម្រាប់ខេមរជនគ្រប់ជំនាន់។ វប្បធម៌ទាំងអស់នេះ បានឆ្លុះបញ្ចាំងពីចរិកទន់ភ្លន់ របស់ប្រជាជនខ្មែរ និងកំណត់នូវអត្តសញ្ញាណរបស់ជាតិ។ ឆ្លងកាត់សម័យកាលនីមួយៗ វប្បធម៌នេះបានប្រែប្រួល ដោយសារការប្រព្រឹត្តរបស់ប្រជាជន និងលំហូរចូលនូវវប្បធម៌របស់បរទេស។ ក្នុងចំណោមប្រជាជនទាំងអស់ គឺមានតែស្រទាប់យុវវ័យ  នូវលក្ខណៈជាតិខ្លួន៕

ភ្នំពេញ ៖ រឿងរ៉ាវដែលគួរឱ្យហួសចិត្ដ និងធ្វើឱ្យឪពុកម្ដាយ ដែលមានគុណលើសភ្នំព្រះសុមេរុទៅទៀតនោះ កំពុង តែរងទុក្ខយ៉ាងធ្ងន់ធ្ងរ ផ្នែកផ្លូវចិត្ដ ដោយសារ តែកូនស្រីច្បងរបស់ខ្លួន ត្រូវបានស្ដ្រីម្នាក់ទៀត ដែលអាចនិយាយ បានថា ជាទំនាក់ទំនងស្នេហារវាងស្រីនិងស្រី បានពង្រត់ពីភ្នំពេញ ឆ្ពោះទៅកាន់ជាយក្រុង ប៉ោយប៉ែត ហើយថែម ទាំងបានគំរាមមកឪពុកម្ដាយថា បើហ៊ានតែប្ដឹងសមត្ថកិច្ច នោះនឹងរង់ចាំទទួល យកសពជាក់ស្ដែងមិនខានឡើយ ។

ករណីគួរឱ្យភ្ញាក់ផ្អើល និងមានចិត្ដអាណិតអាសូរយ៉ាងខ្លាំង ចំពោះអាណាព្យាបាល នារីដែលត្រូវដៃគូរបស់ខ្លួន បានពង្រត់គ្នាខាងលើនេះ កើតឡើងតាំងពីល្ងាចថ្ងៃចន្ទ ទី១១ ខែកុម្ភៈ ឆ្នាំ២០១៣ ប៉ុន្ដែរហូតមកដល់ពេលនេះ ពួកគេទាំងពីរ ដែលអះអាងថា កំពុងស្ថិតនៅទីក្រុងប៉ោយប៉ែត ខេត្ដបន្ទាយមានជ័យនោះ មិនទាន់ត្រឡប់មកវិញ នៅឡើយទេ ធ្វើឱ្យឪពុកម្ដាយ បងប្អូន និងក្រុមគ្រួសារទាំងមូល មានទុក្ខព្រួយយ៉ាងខ្លាំង ដោយសារតែរឿងរ៉ាវ បែបនេះ ។

លោក សុខ ជា អាយុប្រហែល ៤០ឆ្នាំ រស់នៅភូមិស្ពានទោល ឃុំលើកដែក ស្រុកកោះធំ ខេត្ដកណ្ដាល  និងមានប្រពន្ធឈ្មោះ ឯក ចន្ថា អាយុជាង ៣០ឆ្នាំ បាន រៀបរាប់ឱ្យដឹងថា កាលពីល្ងាចថ្ងៃចន្ទ ទី១១ ខែកុម្ភៈ ឆ្នាំ ២០១៣ កន្លងទៅនេះ កូនស្រីរបស់គាត់ ឈ្មោះ ជា ផល្លា អាយុ ២២ឆ្នាំ បច្ចុប្បន្នធ្វើការនៅរោងចក្រ ម្ដុំបឹងសំយាប ខណៈដែលចេញពីធ្វើការដូចសព្វរាល់ដងនោះ ក៏ត្រូវស្ដ្រីម្នាក់ទៀតឈ្មោះ អូន អាយុជាង ៣០ឆ្នាំ ចាប់ឡើងលើម៉ូតូ មិនដឹងទៅណានោះទេ ។

បន្ទាប់ពីទទួលព័ត៌មាន ថាបាត់កូនស្រី មិនឃើញត្រឡប់មកផ្ទះជួល វិញនោះ ធ្វើឱ្យរូបលោកជាឪពុក និងក្រុមគ្រួសារទាំងមូល ព្រមទាំងប្អូនៗទាំងបីនាក់ទៀត ភ័យតក់ស្លត់ និងមាន ទុក្ខយ៉ាងធ្ងន់ធ្ងរ ហើយបានចំណាយពេលវេលា ទាក់ទង និងស្វែងរកកូនស្រីរបស់ខ្លួន ប៉ុន្ដែរហូតមកដល់ពេលនេះ នៅមិនទាន់ឃើញនៅ ឡើយទេ ។

លោកសុខ ជា បានរៀបរាប់ទៀតថា ពេលបាត់ខ្លួនភ្លាមនោះ រហូតមកដល់ ល្ងាចថ្ងៃទី១៣ ខែកុម្ភៈ ឆ្នាំ២០១៣នេះ កូនស្រីរបស់គាត់ បានទូរស័ព្ទទាក់ទង ចំនួន ៣-៤លើកមកហើយ ប៉ុន្ដែ ពេលនិយាយម្ដងៗ គឺយំរហូត មិនដឹងជាមានរឿងអ្វីកើតឡើងនោះទេ ។ បើតាមលោក សុខ ជា នៅពេលដែល កូនស្រីរបស់គាត់និយាយ ទូរស័ព្ទនោះ កូនស្រីបានប្រាប់រូបគាត់ និងក្រុមគ្រួសារទាំងមូល កុំឱ្យដើររក ហើយបាន ព្រមានថា កុំប្ដឹងសមត្ថកិច្ច បើហ៊ានតែប្ដឹងសមត្ថកិច្ច នឹងចាំទទួលយក សពរបស់គេទៅ ។

លោក សុខ ជា ដែល មានមុខរបរជាកសិករ បានបន្ដថា នៅពេលទូរស័ព្ទទាក់ទងត្រឡប់ទៅវិញ តាមរយៈលេខទូរស័ព្ទដដែលនេះ គឺ មិនចូលនោះឡើយ ហើយ បើតាមសម្ដីកូនស្រីរបស់គាត់ គឺបច្ចុប្បន្នរូបគេកំពុងស្ថិតនៅទីក្រុងប៉ោយប៉ែត។ លោក សុខ ជា បាននិយាយថា ករណីខាងលើនេះ អាចនឹងកើតមាន ក្នុងរូបភាព ស្រីស្រឡាញ់ស្រី ប៉ុន្ដែដោយសារតែមាន ការព្រមានពីកូនស្រីរបស់ខ្លួននោះ លោកក្នុងនាមជាឪពុក មិនទាន់បានដាក់ពាក្យបណ្ដឹង ទៅកាន់សមត្ថកិច្ចនោះ ឡើយ។

បើតាមលោក សុខ ជា ក្នុងរយៈពេលបីបួនឆ្នាំកន្លងមកនេះ ដែលកូនស្រីរបស់គាត់បានចាកចេញពីស្រុក កំណើត មកធ្វើការជាកម្មការិនីកាត់ដេរ នៅរាជធានីភ្នំពេញ នេះ មិនដែលមានរឿងអ្វីកើតឡើងទេ ទើបតែនៅ ថ្ងៃចន្ទ ដើមសបា្ដហ៍នេះ ក៏ជួបហេតុការណ៍ជាអកុសលនេះតែម្ដងទៅ ហើយស្ដ្រីដែលឈ្មោះ អូន ស្គាល់កូនស្រី របស់គាត់ជាយូរណាស់មកហើយ៕

រូបពាក់អាវពណ៌លឿង ឈ្មោះ អូន និង ពាក់ពណ៌ផ្កាឈូក ខោជើងខ្លី ឈ្មោះ ជា ផល្លា

នារីឈ្មោះ ជា ផល្លា

កំពង់ឆ្នាំង ៖ បច្ចុប្បន្ន ហ្គេមអ៊ីនធឺណែត ឬហ្គេមអនឡាញ ដែលកំពុងតែកើតមាន ជាច្រើនកន្លែង ក្នុងក្រុងកំពង់ឆ្នាំង បានពង្វក់ស្មារតី យុវវ័យ សិស្ស កំពុងសិក្សា រៀនសូត្រ បានគេចពីសាលា ទៅលេង ហ្គេមអ៊ីនធឺណែត ឬហ្គេមអនឡាញ ទាំងនោះ ។  

កន្លែងលេង ហ្គេម អ៊ីនធឺណែត ឬហ្គេមអនឡាញ ភាគច្រើនជ្រកក្រោម ស្លាកអាជីវកម្ម បំរើសេវាកម្ម អ៊ីនធឺណែត ហើយ ហ្គេមអ៊ីនធឺណែត ឬហ្គេមអនឡាញទាំងនេះ មានមិនក្រោម ជាង១០ កន្លែង ដូចជា ហាងសេវាកម្ម អ៊ីនធឺណែត សុគន្ធវារីណេត ស្ថិតនៅជាប់ របងសណ្ឋាគារ ទន្លេសាប ភូមិទី១ សង្កាត់ខ្សាម ,ហាងលក់ទូរសព្ទ័ និងបំរើសេវា អ៊ីនធឺណែត ម្តុំបេនឡានផ្សាលើ, ហាងសេវាកម្ម អ៊ីនធឺណែត វុឌ្ឃីហ្វាសអ៊ីនធឺណែត នៅទល់ មុខកីឡាដ្ឋាន បាល់ទាត់ ភូមិឡទឹកត្រី, ហាងសេវាកម្ម អ៊ីនធឺណែត និងមានបង្រៀនកុំព្យូទ័រ ព្រះគុណ ភូមិស្រែព្រីង ,ហាងសេវាកម្មអ៊ីនធឺណែត ហេបភីណែត ស្ថិតនៅខាងជើង ស្នងការដ្ឋាននគរបាលខេត្ត និង ហាងសេវាកម្មអ៊ីនធឺណែត ជាច្រើនទៀត ក្នុងក្រុងកំពង់ឆ្នាំង ដែលមានល្បែង ហ្គេមដូចខាងលើ ។

គេសង្កេត ឃើញថា គ្រប់ហាង បំរើសេវាអ៊ីនធឺណែត ទាំងនេះ ភាគច្រើនសំបូរ ទៅដោយ សិស្សសាលា ទាំងតូច-ទាំងធំ ចូលលេងជា ហូរហែរជាប្រចាំថ្ងៃ ។ ដោយអ្នកខ្លះ វក់និងល្បែងហ្គេមនេះគេចពី សាលារៀន ជារៀងរាល់ថ្ងៃ ដែលធ្វើអោយ អាណាព្យាបាល របស់ពួកគេ សំដែងនូវការបារម្ភចំពោះ អាណាគតកូនៗ ដែលជាទំពាំង ស្នងឬស្សី របស់ជាតិ មាតុភូមិ ។

ករណីខាងលើនេះ បើយោង ប្រភពពីអាជ្ញាធរបាន អោយដឹងថា អភិបាល ក្រុងកំពង់ឆ្នាំង លោក ហៃ មនោរម្យ  និងកោះអញ្ជើញ ម្ចាស់ហាងអ៊ីនធឺណែត ទាំងអស់ មកធ្វើការប្រជុំនៅ ព្រឹកថ្ងៃទី១៤ ខែកុម្ភៈ ឆ្នាំ២០១៣ ប៉ុន្តែគេពុំទាន់ដឹងថា លទ្ធផលយ៉ាងណានោះទេ ។

ហើយករណីខាងលើនេះ ប្រជាពលរដ្ឋ ជាពិសេស អាណាព្យាបាល កូនៗបានសំណូមពរ សូមអោយអាជ្ញាធរ ក្រុងកំពង់ឆ្នាំង មានវិធានការណ៍ អោយបានម៉ឺងម៉ាត់ ព្រោះអាចបណ្តាល អោយខូច អនាគតកូនៗ របស់ពួកគេ និងកើតមាន អំពើចោរកម្មផ្សេងៗ៕

ភ្នំពេញ៖ ផ្ទុយពីបណ្តាប្រទេសនានាជុំវិញខ្លួន ប្រជាជនកម្ពុជាគ្រប់រូប (ក្នុងវ័យបន្តពូជ) ត្រូវបានផ្តល់សិទ្ធិ យ៉ាងពេញលេញ ក្នុងការជ្រើសរើសកំណើត ទៅតាមលទ្ធភាពដែលខ្លួនចង់បាន ដោយមិនមានការដាក់កំហិត ដាច់ខាតត្រូវតែ យកកូនមួយរឺពីរនោះទេ។

ប្រទេសចិន ដែលមានប្រជាជនជាង ១.៣៤៤ពាន់លាននាក់ (មួយពាន់បីរយសែសិបបួនលាននាក់) បានកំហិតជាគោលនយោបាយ ឱ្យប្រជាពលរដ្ឋខ្លួន មានកំណើតតែមួយប៉ុណ្ណោះ សម្រាប់គ្រួសារដែលមានកូនប្រុស និងពីរនាក់ប្រសិនបើមានកូនស្រី ខណៈ ប្រទេសឥណ្ឌា មានប្រជាជនជាង ១.២៤១លាននាក់ (មួយពាន់២រយសែសិបមួយលាននាក់)។

ឯកទេសប្រជាជន និងការអភិវឌ្ឍកម្ពុជាមួយរូប បានថ្លែងថា ទោះបីជាកំណើនប្រជាជន នៅលើពិភពលោក បានកើនដល់ទៅ ៧ពាន់លានយ៉ាងណាក៏ដោយ ក៏ប្រទេសកម្ពុជា ដែលទើបតែមានប្រជាជនជាង ១៣លាននាក់នោះ មានសិទ្ធិពេញលេញ ក្នុងការជ្រើសរើស កំណើនសមាជិក គ្រួសាររបស់ខ្លួន។

លោក ហាស់ វង់ដារ៉ា អគ្គលេខាធិការរង គណៈកម្មាធិការប្រជាជន និងការអភិវឌ្ឍ បានថ្លែងប្រាប់មជ្ឈមណ្ឌល ព័ត៌មានដើមអម្ពិល ក្នុងកិច្ចសម្ភាសន៍ផ្តាច់មុខមួយថា រាជរដ្ឋាភិបាល បានសម្រេច មិនដាក់កំហិតឱ្យប្រជាជនកម្ពុជា ត្រូវតែមានកូនប៉ុន្មាននាក់នោះទេ អ្វីដែលសំខាន់គឺពលរដ្ឋខ្មែរ ខ្លួនឯងទេ ដែលជាអ្នកសម្រេចដោយខ្លួនឯង ថាតើចង់បានកូនប៉ុន្មាន ក្នុងគ្រួសារ ស្របតាមកម្រិតជីវភាពរបស់ខ្លួន។

លោក វង់ដារ៉ា បន្តថា ពិភពលោកទាំងមូល មានការព្រួយបារម្ភពីកំណើន ប្រជាជននលើផែនដី ពោលចាប់តាំងពីក្នុងជាងសតវត្សរ៍មកនេះ កំណើនប្រជាជន បានកើនឡើងយ៉ាងខ្លាំង។ កំណើននេះ នាំទៅដល់អតុល្យភាព នៃធនធានធម្មជាតិ សម្រាប់ចិញ្ចឹមមនុស្ស ជាពិសេសការកើនឡើងកំដៅផែនដី។

យ៉ាងណាក៏ដោយ សម្រាប់ប្រទេសកម្ពុជា បើតាមលោក ដារ៉ា គេនៅមិនទាន់អាចកំណត់ បានថាតើប្រជាជនចំនួន ប៉ុន្មានលាននាក់ ធៀបនឹងផ្ទៃដី និងធនធានដែលកម្ពុជាមាន នោះ ខណៈប្រទេសអូស្តា្រលី ដែលមានបច្ចុប្បន្នមានផ្ទៃដី ជាង៧លានគីឡូម៉ែត្រ ក្រឡា គេប៉ាន់ស្មានថា អាចផ្ទុកមនុស្សបានរហូត៦០លាន ដែលបច្ចុប្បន្នមានត្រឹមតែជាង២០លាននាក់។

ឯកទេសរូបនេះ បន្តទៀតថា ចំនួនប្រជាជនតិចរឺច្រើន សម្រាប់ប្រទេសមួយ វាមិនសំខាន់នោះ អ្វីដែលសំខាន់ គឺមនុស្សទាំងនោះ មានគុណភាពកម្រិតណា។ លោកលើកឧទាហរណ៍ ប្រទេសអូស្រ្តាលី និងកាណាដា ប្រទេសធំ តែមានប្រជាជនតិច ប៉ុន្តែប្រកបដោយគុណភាព និងសក្កានុពលគ្រប់គ្រាន់ សម្រាប់ធ្វើឱ្យប្រទេសមានការរីកចម្រើន៕

(សូមទស្សនាកិច្ចសម្ភាសន៍រវាងលោក សយ សុភា និងលោក ហាស់ វង់ដារ៉ា)

-កម្មករ និងកម្មការិនី បន្តឡោមព័ទ្ធ រោងចក្រ ខណៈសង្ស័យថា ថៅកែលួច ដឹកម៉ាស៊ីនចេញ

កណ្តាល៖ កម្មករ កម្មការិនី រោងចក្រ យ៉ុងវ៉ាចាស់ និងថ្មី ជាង៦ពាន់នាក់ បន្ទាប់ពីជួបជុំគ្នា នៅលើដងផ្លូវធ្វើកូដកម្មបិទ ផ្លូវជាតិលេខ២១បេ មិនឲ្យមានការចរាចរ ទៅមករួច អស់រយៈពេល១ ថ្ងៃពុំទទួលបានជាផ្លែផ្កា កាលពីថ្ងៃទី១២ ខែកុម្ភៈ ឆ្នាំ២០១៣ រួចមកនោះ នៅព្រឹកថ្ងៃទី១៣ ខែឆ្នាំដដែល បានបន្តធ្វើកូដកម្មបិទ ផ្លូវជាតិលេខ២១បេដដែល ដើម្បីបង្ខំ ឲ្យអាជ្ញាធរ និងស្ថាប័នពាក់ព័ន្ធនានា ឲ្យជួយរកដំណោះស្រាយ ជូនពួកគេ ដោយសារតែភាគីរោងចក្រ មិនព្រមបើប្រាក់ឈ្នួល ក្នុងខែមករា ដល់ពួកគេនោះ។

ប៉ុន្តែទោះបីជាយ៉ាងណា ពួកគេនៅមិនទាន់ទទួល បានដំណឹង ណាមួយនោះឡើយ ហើយពួកគេ បានត្អូញត្អែរថា បើនៅតែគ្មានដំណោះស្រាយ បន្តទៀត ពួកគេនិងជួប ផលលំបាក កាន់តែខ្លាំង ទាំងប្រាក់ការ វិលត្រឡប់ទៅ ស្រុកកំណើត និងថ្លៃផ្ទះជួល ម្ចាស់ផ្ទះជួល បង្ខំបិទទ្វារមិនឲ្យនៅ ។ ការធ្វើកូដកម្មនោះ ប្រព្រឹត្តទៅនៅលើដងផ្លូវជាតិ លេខ២១បេ ខាងមុខរោងចក្រយ៉ុងវ៉ាចាស់ និងថ្មី ភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល។

កម្មការិនីរោងចក្រម្នាក់ បានឲ្យដឹងថា ពួកគេធ្វើកូដកម្មនេះ គឺអស់រយៈពេល ជិត២ថ្ងៃហើយ ប៉ុន្តែមិនទាន់មានថ្នាក់ ណាមួយចេញមុខ មកជូនដំណឹងដល់ពួកគេអំពីបញ្ហា របស់រោងចក្រ ព្យួរការងារ ឬក៏ក្ស័យធន់នោះ ហើយប្រសិន មានបញ្ហាអ្វីមួយ សូមឲ្យតែបើកប្រាក់ឈ្នួលដល់ពួកគេ និងប្រាក់បំណាច់ខែ ផងដែរ ប្រសិនបើពុំដូច្នេះទេ ពួកគេនិង បន្តធ្វើកូដកម្ម រហូតដល់មានដំណោះស្រាយ ដ៏សមរម្យមួយ ។

ពួកគេបានត្អូញត្អែថា បើរោងចក្រ មិនព្រមបើកប្រាក់ថ្លៃ ឈ្នួលឲ្យពួកគេនោះ គឺពួកគេនឹងជួប នូវផលលំបាកយ៉ាងខ្លាំង សូម្បីតែអីវ៉ាន់ នៅក្នុងផ្ទះជួលក៏យក ពុំបានដែរ ដោយម្ចាស់ផ្ទះចាក់សោរ បង្ខាំងទុក ដើម្បីឲ្យបង់ប្រាក់ទើប ព្រមឲ្យស្នាក់នៅបន្ត ឬក៏ឲ្យយកអីវ៉ាន់នោះចេញ ។

លោក វែន សុវិន ស្នងការង នគរបាល ខេត្តកណ្តាល ទទួលផែនសណ្តាប់ធ្នាប់ និងចរាចរ បានឲ្យដឹងថា នៅព្រឹកថ្ងៃទី១៣នេះ កម្មករ កម្មការិនី បាននាំគ្នាបិទផ្លូវ ចំចំណុចផ្លូវបែកជា៤ ដែលជាច្រកចេញចូល ដ៏សំខាន់ពីខេត្តកណ្តាល ចូលរាជធានីភ្នំពេញ ធ្វើឲ្យមានស្ទះ ចរាចរខ្លះដែរ ប៉ុន្តែទោះបីជាយ៉ាង លោកបានខិតខំប្រឹងប្រែង បញ្ជៀសចរាចរ មិនមានការកកស្ទះនោះទេ ដោយប្រើកម្លាំង ពីស្រុកស្អាង ស្រុកកណ្តាលស្ទឹង និងក្រុងតាខ្មៅ សហការ ជាមួយកម្លាំងខេត្ត ដាក់ពង្រាយ គ្រប់កន្លែង ដើម្បីបញ្ជៀសចរាចរ និងរៀបចំសណ្តាប់ធ្នាប់ នៅតាមដងផ្លូវផងដែរ។ ហើយជាពិសេសនោះ គឺបង្កាក្រែងមាន ផ្ទុះបាតុភាព មួយណាកើតឡើង ងាយនឹងទប់ស្កាត់។

ជាមួយគ្នានេះ សេចក្តីរាយការណ៍ចុងក្រោយ ពីកម្មករ បានឲ្យដឹងថា នៅល្ងាចថ្ងៃទី១៣ ខែកុម្ភៈ ឆ្នាំ២០១៣នេះ ក្រុមកម្មករ កម្មការិនី ជាច្រើននាក់ បានបន្តឡោមព័ទ្ធ រោងចក្រ ដោយសង្ស័យថា ខាងភាគីរោងចក្រ នឹងដឹកម៉ាស៊ីនចេញពីរោងចក្រ៕

-អាជ្ញាធរ ខណ្ឌមានជ័យ បង្វែពីការបង់ពិន័យ មកជាការ ដាំដើមលឿងរាជ ឡើងវិញ

នំពេញ ៖ អភិបាល ខណ្ឌមានជ័យ លោក គួច ចំរើន បានបញ្ជាឱ្យអាជ្ញាធរសង្កាត់ចាក់ អង្រែក្រោម ឃាត់ខ្លួនស្ដ្រីម្នាក់រស់នៅផ្ទះ លេខ៦៦២ ក្រុមទី១៣ ភូមិទួលរកា សង្កាត់ ចាក់អង្រែក្រោម បន្ទាប់ពីស្ដ្រីរូបនេះបាន កាប់ដើមលឿងរាជ នៅតាមផ្លូវមានទំហំធំៗ ចំនួនពីរដើម ។

យោងតាមមន្ដ្រីសាលាខណ្ឌមានជ័យ បានឱ្យដឹងថា  បន្ទាប់ពីស្ដ្រីឈ្មោះសុខ ណៃ អាយុ៦៨ឆ្នាំ បានកាប់ដើមលឿងរាជ ចំនួន ២ដើមធំៗនៅមុខផ្ទះរបស់ខ្លួនរួចមក ដែល សាលារាជធានីភ្នំពេញ ហាមកាប់បំផ្លាញ ដើមប្រភេទនេះ អភិបាលខណ្ឌមានជ័យបាន ឱ្យមន្ដ្រីសង្កាត់ចាក់អង្រែក្រោម ចុះទៅឃាត់ ខ្លួន ហើយធ្វើការផាកពិន័យ ចំនួន៥លាន រៀល ។

មន្ដ្រីសាលាខណ្ឌមានជ័យ បានឱ្យដឹងថា បើសិនស្ដ្រីរូបនេះ មិនបានបង់តាមការផាក ពិន័យចំនួន៥លានរៀលនោះទេ អាជ្ញាធរ និងកសាងសំណុំរឿងបញ្ជូនទៅសាលាដំបូង រាជធានីភ្នំពេញ ដើម្បីចាត់វិធានការតាមផ្លូវ ច្បាប់ ប៉ុន្ដែក្រោយពីការឃាត់ខ្លួននិងណែនាំ រួចមក ស្ដ្រីរូបនេះបានផ្ដល់ប្រាក់ផាកពិន័យ ចំនួន៥លានរៀល ។

បើយោងតាមអាជ្ញាធរសង្កាត់ចាក់អង្រែ ក្រោម មូលហេតុដែលនាំឱ្យអ្នកស្រីសុខ ណៃ កាប់បំផ្លាញដើមលឿងរាជនៅមុខផ្ទះ របស់ខ្លួន ចំនួន២ដើមធំៗខាងលើនេះ ដោយ សារតែស្ដ្រីរូបនេះ អាងសាច់ញាតិនិងបងប្អូន របស់ខ្លួនជាមន្ដ្រីនគរបាល នៅអធិការដ្ឋាន នគរបាលខណ្ឌមានជ័យ ។

យ៉ាងណាក៏ដោយបន្ទាប់ពីមានបទបញ្ជា របស់អភិបាលខណ្ឌមានជ័យរួចមក អាជ្ញាធរ សង្កាត់ចាក់អង្រែក្រោម បានឃាត់ខ្លួនស្ដ្រីរូប នេះ ហើយធ្វើការផាកពិន័យតាមផ្លូវច្បាប់ ប៉ុន្ដែបើសិនថ្ងៃក្រោយ នៅតែប្រព្រឹត្ដសកម្ម  ភាពបែបនេះទៀត អាជ្ញាធរនិងកសាងសំណុំ រឿងបញ្ជូនទៅតុលាការ ។

គួរបញ្ជាក់ថា កាលពីពេលកន្លងទៅលោក ឧកញ៉ា ថោង សារ៉ាត ក៏បានឱ្យកូនចៅរបស់ ខ្លួនកាប់បំផ្លាញដើមលឿងរាជនេះចោលផង ដែរ ប៉ុន្ដែនៅពេលនោះក៏ត្រូវអាជ្ញាធរខណ្ឌ មានជ័យ ធ្វើការផាកពិន័យតាមផ្លូវច្បាប់ ផងដែរ ។

ដើមលឿងរាជ ដែលត្រូវបានសាលារាជ ធានីភ្នំពេញ ដាំនៅតាមដងផ្លូវ ដើម្បីជួយ បង្កើនសោភណ្ឌ និងរក្សាបរិស្ថាន ហេតុដូច្នេះ ហើយមិនត្រូវឱ្យជនណាម្នាក់ កាប់បំផ្លាញ នោះទេ ។

យោងតាមសេចក្តីរាយការណ៍ ចុងក្រោយ ពីអាជ្ញាធរខណ្ឌមានជ័យ បានឲ្យដឹងថា នៅពេលដែលស្រ្តីរូបនេះ មិនព្រមបង់លុយ ចំនួន៥លានរៀលនោះ អាជ្ញាធរខណ្ឌ បានឲ្យស្រ្តីរូបនេះ ដាំដើមលឿងរាជឡើងវិញ៕

កំពង់ឆ្នាំង៖ សមត្ថកិច្ចចម្រុះ រដ្ឋបាលជលផល ខេត្តកំពង់ឆ្នាំង ចែកចេញ ជាបីក្រុម នៅថ្ងៃទី១៣ ខែកុម្ភៈ ឆ្នាំ២០១៣ បានចុះបង្រាប បទល្មើសនេសាទ ក្នុងដែនគ្រប់គ្រង ស្រុកកំពង់ត្រឡាច ស្រុកបរិបូណ៌ និងស្រុកកំពង់លែង ក្នុងខេត្តកំពង់ឆ្នាំង ។ ក្រុមទី១ ដឹកនាំដោយ នាយខណ្ឌរដ្ឋបាល ជលផល ខេត្តកំពង់ឆ្នាំង លោក សេង ប៊ុនឈឿន និងលោក មៀក សឿង នាយរង អធិការដ្ឋាន រដ្ឋបាល ជលផល ខាងត្បូង បឹងទន្លេសាប សហការជាមួយ សមត្ថកិច្ច នគរបាល អាជ្ញាធរ ស្រុកកំពង់ត្រឡាច រួមសហគមន៍ នេសាទបានចុះបង្រ្កាប បទល្មើសនេសាទ ប្រភេទរបាំង ស្បៃមុង នៅចំណុច ព្រំប្រទល់ ខេត្តកំពង់ឆ្នាំង និងខេត្តកំពង់ចាម ក្នុងស្រុកកំពង់ត្រឡាច ជាលទ្ធផល សមត្ថកិច្ចចម្រុះ បង្រ្កាបបានរបាំង ស្បៃមុងចំនួន១១កន្លែង ប្រវែង១១០០ម៉ែត្រ លូស្បៃមុង១១មាត់  បង្គោលចំនួន២០០ដើម និងចាក់លែង ត្រីគ្រប់ប្រភេទ ចូលទៅក្នុងបឹង ធម្មជាតិវិញចំនួន៥០គ.ក្រ  ។

 ក្រុមទី២ កម្លាំងរដ្ឋបាល ជលផល កំពង់លែង ដឹកនាំដោយ លោក ពុំ សុផល បានចុះបង្រ្កាប ការកាប់ដើមរាំងដែលជាប្រភេទ ព្រៃលិចទឹក សំរាប់ត្រីពងកូននោះ។ លោក ពុំ សុផល នាយសង្កាត់ រដ្ឋបាលជលផល កំពង់លែង បានអោយដឹងថា កម្លាំងសមត្ថកិច្ច ជលផល ខណៈកំពុងចុះធ្វើការ ល្បាតបានប្រទះឃើញ ជនល្មើសកំពុងធ្វើ សកម្មភាព កាប់ដើមរាំង ដាក់លើ កាណូត បាឡា នៅចំណុច អតីតឡូតិ៍លេខ៨ ប៉ុន្តែជនល្មើសពេលដែលឃើញ កម្លាំងសមត្ថកិច្ច ទៅដល់ក៏ បាននាំគ្នាលោតទឹក ហែលគេចចូលទៅ ក្នុងព្រៃបាត់ស្រមោល បន្ទាប់មកសមត្ថកិច្ច របស់លោកបានបន្តដំណើរ ហើយក៏ ប្រទះឃើញសកម្មភាព ហ៊ុំពទ័្ធសំរាស់ ដើម្បីចាប់ត្រី នៅត្រង់អតីតឡូតិ៍លេខ៥ ។

លោក ពុំ សុផល នាយសង្កាត់រដ្ឋបាល ជលផល កំពង់លែងបាន បញ្ជាក់ថា លទ្ធផលទាំងពីរលើក កម្លាំងសមត្ថកិច្ច រឹបអូសបានទូកដឹក សំរាស់ចំនួន២គ្រឿង និងទូកហ៊ុំសំរាស់ ចំនួន២គ្រឿង ព្រមជាមួយគ្នានេះ សមត្ថកិច្ចបានឃាត់ ខ្លួនជនសង្ស័យ ចំនួន៣នាក់ ធ្វើការអប់រំ ណែនាំស្របតាមនីតិវិធីច្បាប់ផងដែរ ។ ក្រុមទី៣ កម្លាំងសមត្ថកិច្ច រដ្ឋបាលជលផល បរិបូណ៌ ដឹកនាំដោយលោក ម៉ូត សៀងហេង បានចុះបង្ក្រាប បទល្មើស នេសាទ ប្រភេទរបាំងសាច់អួន នៅក្នុងភូមិសាស្រ្ត ភូមិកំពង់អួរ និងភូមិសេះស្លាប់  ក្នុងស្រុកបរិបូណ៌ លទ្ធផល កម្លាំងសមត្ថកិច្ច បានកាត់ផ្តាច់របាំងសាច់អួន ដែលមានប្រវែងលើស ពីរបាំងលក្ខណៈគ្រួសារ ដោយកាត់ របាំងសាច់អួនបាន ចំនួន៥កន្លែង ប្រវែង ២៥0ម៉ែត្រ លបលូ១០មាត់ បង្គោល៩០ដើម និងចាក់លែងត្រីគ្រប់ប្រភេទ ចូលទៅក្នុងបឹងទន្លេ សាបវិញបានចំនួន ១០គ.ក្រ ។

ដោយឡែក កាលពីកន្លងទៅថ្មីៗនេះកម្លាំងផ្នែក រដ្ឋបាលជលផល ផ្សារឆ្នាំង និងសង្កាត់រដ្ឋបាល ជលផលចុងកោះ ដឹកនាំដោយ លោក តាត សីហាក់ នាយផ្នែក រដ្ឋបាលជលផល ផ្សារឆ្នាំង បានចុះប្រជុំផ្សព្វផ្សាយ ច្បាប់ស្តីពីជលផល និងការកំណត់ឧបករណ៍ នេសាទ ដល់ប្រជានេសាទ ភូមិចុងកោះ សង្កាត់កំពង់ឆ្នាំង ក្រុងកំពង់ឆ្នាំង ។

 លោក សេង ប៊ុនឈឿន នាយខណ្ឌរដ្ឋបាល ជលផល កំពង់ឆ្នាំង បានបញ្ជាក់អះអាងថា បើទោះកម្លាំង សមត្ថកិច្ច រដ្ឋបាលជលផល បានចុះបង្រ្កាប បទល្មើសបាន ជាបន្តបន្ទាប់ស្ទើរតែ រៀងរាល់ថ្ងៃ ប៉ុន្តែជនល្មើស នៅតែឆ្លៀតឱកាស លួចប្រព្រឹត្តធ្វើការនេសាទ នៅក្នុងព្រៃស្ងាត់ៗ និងពេលកម្លាំង សមត្ថកិច្ចត្រឡប់មកវិញ បទល្មើសនេសាទមា នរយៈពេលតែមួយបប្រិច ភ្នែកតែ ប៉ុណ្ណោះ ជនល្មើសអាចលួច នេសាទល្មើសច្បាប់ បានយ៉ាងងាយ ។

 លោក សេង ប៊ុនឈឿន បានបន្តអោយដឹងថា លោកនឹងស្វាគមន៍ ចំពោះព័ត៌មាន ទាំងឡាយណា ទាក់ទិននិង បទល្មើសជលផល ក្នុងដែន គ្រប់គ្រងរបស់ខ្លួន និងទទួលយកនូវការរិះគន់ ក្នុងន័យស្ថាបនា គ្រប់ពេលវេលា ហើយលោកក៏សូមអរគុណផងដែរ ចំពោះសេចក្តីរាយការណ៍ ពីអ្នកកាសែត តែងតែបានចង្អុលបង្ហាញ នូវរាល់បទល្មើស ដែលបានកើតមាន កំបាំងភ្នែក សមត្ថកិច្ច ៕ 

- ព្រះមហាក្សត្រ សម្ដេចម៉ែ សម្ដេចសង្ឃរាជទាំងពីរ ថ្វាយព្រះភ្លើង៤លើក មិនឆេះ លើកទី៥ សម្ដេតតេជោ បួងសួងសុំ ទើបថ្វាយព្រះភ្លើងឆេះ

ដោយ ៖ សយ សុភាព

ភ្នំពេញ៖ ក្រោយពីមជ្ឈមណ្ឌលព័ត៌មាន ដើមអម្ពិលបានចុះផ្សាយអត្ថបទរបស់លោក គុជ សុវណ្ណ ដែលមានចំ ណងជើងថា “បារមី របស់សម្ដេចតេជោ នៅពេលថ្វាយព្រះភ្លើង សម្ដេចព្រះនរោត្ដមសីហនុ” ដែលអត្ថបទ នេះ បានរៀប រាប់ថា សម្ដេចតេជោ ហ៊ុន សែន បានអធិដ្ឋាន លំឱនកាយថ្វាយបង្គំ បួងសួង ដោយការតាំងចិត្ដយ៉ាង មុតមាំ នៅទី បំផុតសម្ដេចតេជោ ថ្វាយព្រះភ្លើងក៏ឆាបឆេះភ្លាម ឡើងមួយរំពេច និងឆេះរហូតដល់នាទីចុងក្រោយ នៅសល់តែព្រះអដ្ឋិធាតុ។

មជ្ឈមណ្ឌលព័ត៌មានដើមអម្ពិលបានខិត ខំស្វែងរកព័ត៌មានបន្ថែមទៀតថា ពិតជាមាន អភិនិហាបែបនេះ យ៉ាង ណានោះ  ក៏ស្របពេលមានពាក្យចរចាមអារ៉ាម កើតចេញក្រោយ បន្ដិច ពេលថ្វាយព្រះភ្លើងសម្ដេចឪ ព្រះបរម សពព្រះ បរមរតនកោដ្ឋថា មានការប្រទាន ព្រះភ្លើងរហូតដល់ច្រើនដង ទើបឆេះនោះ មជ្ឈមណ្ឌលព័ត៌មានដើម អម្ពិលបាន ស្វះស្វែង រកព័ត៌មានដ៏អស្ចារ្យនេះ យកមកផ្សព្វផ្សាយជូនថា ពិត ឬមិនពិត?។

មជ្ឈមណ្ឌលព័ត៌មានដើមអម្ពិលនៅល្ងាច ថ្ងៃពុធ ទី១៣ ខែកុម្ភៈ ឆ្នាំ២០១៣ បានទទួល នូវព័ត៌មានដែលគួរឱ្យទុក ចិត្ដពីមន្ដ្រីមួយរូប ដែលសុំមិនបញ្ចេញឈ្មោះ ហើយបានឃើញ ហេតុការណ៍ផ្ទាល់នៅក្នុងពិធីថ្វាយព្រះភ្លើង ព្រះ បរមសព សម្ដេចឪ បានរៀបរាប់ថា ពិត ជាមានអភិនិហាដ៏អស្ចារ្យនេះប្រាកដមែន ហើយបាននិយាយថា បារមី សម្ដេចឪ ព្រះបាទ នរោត្ដម សីហនុ ពិតជាខ្លាំងពូកែ ហើយថា ក៏មានតែបុត្រធម៌របស់ព្រះអង្គ គឺសម្ដេចតេជោ ហ៊ុន សែន ដែល មានរិទ្ធានុភាព បាន អធិដ្ឋាន សុំព្រះវិញ្ញាណក្ខន្ធសម្ដេចឪ ដើម្បី ព្រះវិញ្ញាណក្ខន្ធព្រះអង្គរាជា នុញ្ញាតឱ្យសម្ដេច តេជោ ហ៊ុន សែន បានថ្វាយព្រះភ្លើង ហើយ ទីបំផុត គឺយ៉ាងដូច្នេះមែន។

មន្ដ្រីដែលបានចូលរួម ហើយបានឃើញ ផ្ទាល់ភ្នែកប្រាប់ឱ្យដឹងទៀតថា ការប្រទាន ភ្លើងសម្ដេចឪធ្វើឡើងរហូត ដល់៥ដង ទើបបានសម្រេចជាស្ថាពរ។ លើកទីមួយព្រះមហា ក្សត្រ សម្ដេចព្រះបរមនាថ នរោត្ដម សីហមុនី និង ព្រះមហាក្សត្រយានី នរោត្ដម មុនីនាថ សីហនុ បានថ្វាយព្រះភ្លើង ដោយផ្ទាល់ព្រះហស្ថ ហើយភ្លើងពិតជាបាន ឆេះមែន បន្ទាប់មកព្រះសង្ឃក៏បានចាប់ផ្ដើមសូត្រមន្ដបង្សុកូល តែទៀនក៏រលត់ទៅវិញ។ លើកទី២ ព្រះមហាក្ស ត្រ និងសម្ដេចម៉ែ បានថ្វាយព្រះភ្លើងម្ដងទៀត ពេលនោះភ្លើងទៀន ក៏បានឆេះខ្លាំង ជាងមុន តែមិនបានប៉ុន្មានផង ភ្លើងទៀននោះ ក៏ បានរលត់ម្ដងទៀត។ លើកទី៣ លោកអា ចារ្យ បាគូ ប្រចាំព្រះបរមរាជវាំង បានចាក់ អាល់កុល ដើម្បីងាយឱ្យឆេះពី លើទៀន ដោយចាប់ផ្ដើមចាក់ពីលើរហូតដល់ ក្រោម រួចហើយព្រះមហាក្សត្រនិងសម្ដេចម៉ែ បានថ្វាយព្រះភ្លើងម្ដងទៀត ភ្លើងក៏ឆេះទៀត ប៉ុន្ដែមិនបានប៉ុន្មានផង ភ្លើងនោះ ក៏បានរលត់ រហូតទៅដល់ក្រោម សូម្បីតែមានអាល់កុល ហើយក៏ដោយ ក៏ភ្លើងនោះ នៅតែរលត់ទាំង អស់តែម្ដង។ លើកទី៤ សម្ដេចព្រះសង្ឃរាជ ទាំងពីរគណៈ និងសម្ដេច នាយករដ្ឋមន្ដ្រី ហ៊ុន សែន បានកាន់ទៀនដុតថ្វាយព្រះភ្លើងសាជា ថ្មី តែមិនទាន់បាន ដុតផង ទៀនក៏រលត់ទៅ ទៀត រួមទាំងរលត់ទៀនសម្រាប់ចម្លងផង ដែរ។ លើកទី៥ គឺជាលើកចុងក្រោយ ហើយ ក៏ជាលើកទទួលបានជោគជ័យ ក្នុង ការថ្វាយ ព្រះភ្លើងសម្ដេចឪ ដោយមុនការប្រទាន សម្ដេចតេជោ ហ៊ុន សែន តែម្នាក់ឯងគត់ ដែល បានយកទៀន ដែលរលត់ទាំងពីរនោះ យក មកហើយក៏បានលើកដៃ បួងសួងអធិដ្ឋានលំ ឱនកាយថ្វាយបង្គំសម្ដេចឪ រួចក៏ថ្វាយព្រះ ភ្លើង ហើយព្រះភ្លើងក៏បានឆេះ រហូតដល់ទី បញ្ចប់ ដែលអាចរំលាយ ព្រះសពសល់តែព្រះ អដ្ឋិ ។

មន្ដ្រីដដែលនោះ បាននិយាយប្រាប់ដើម អម្ពិលទៀតថា ពេលដែលលោកបានឃើញផ្ទាល់ គឺពិតជាអស្ចារ្យ ហើយ បានព្រឺក្បាលខ្ញាក ដោយពោលក្នុងអារម្មណ៍ថា ព្រះវិញ្ញាណក្ខន្ធ របស់ព្រះអង្គពិតជាអស្ចារ្យ ហើយថា ក៏មានតែ សម្ដេចតេជោ ហ៊ុន សែន ម្នាក់គត់ ដែល ព្រះអង្គចាត់ទុកជាកូនធម៌ មានបុណ្យបារមី អាចធ្វើឱ្យព្រះវិញ្ញាណក្ខន្ធ របស់ ព្រះអង្គទទួល យកនូវការថ្វាយព្រះភ្លើង បន្ទាប់ពីសម្ដេច តេជោ បានអធិដ្ឋាន ដោយចិត្ដស្មោះស និង សេច ក្ដីគោរព ចំពោះព្រះវិញ្ញាណក្ខន្ធ និង ព្រះរាជបល្ល័ង្ក ។

ទោះជាយ៉ាងណាក៏ដោយ នេះគ្រាន់តែជា ការលើកឡើងរបស់មន្ដ្រីម្នាក់ ដែលបានមានភព្វសំណាងចូលរួមបុណ្យ ថ្វាយព្រះភ្លើងសម្ដេច ឪ កាលពីថ្ងៃទី៤ កុម្ភៈ កន្លងទៅ ហើយក៏បានឃើញព្រឹត្ដិការណ៍នេះ ដោយផ្ទាល់ផងដែរ។ មន្ដ្រីរូបនេះ ដែលនៅតែបដិសេធមិនឱ្យ បញ្ចេញឈ្មោះ ទោះបីមជ្ឈមណ្ឌលព័ត៌មាន ដើមអម្ពិលទទូចសុំបញ្ចេញ ឈ្មោះយ៉ាងណា ក៏ដោយ បានមានប្រសាសន៍ទៀតថា អ្នកចូល រួមប្រាកដជាបានឃើញព្រឹត្ដិការណ៍នោះថា ហេតុ អ្វីបានជាពេលថ្វាយព្រះភ្លើងមិនបាញ់កាំ ភ្លើងដំណាលគ្នា ហើយវាំងននបាំងនៅព្រះ បរមរតនកោដ្ឋ ហើយទូរទ ស្សន៍ មិនថតឱ្យចំ ដោយសារតែមានអព្ភូតហេតុដូច បានរៀប រាប់ខាងលើ។ ដូច្នេះគេរំពឹងថា ព័ត៌មាននេះ អាច នឹងមានការពន្យល់ជាសាធារណៈនាពេលណាមួយពីថ្នាក់ដឹកនាំគណៈកម្មការបុណ្យ ហើយអាចក្បោះក្បាយជាង ។

ប្រជាពលរដ្ឋខ្មែរនៅទូទាំងប្រទេស ក៏ ដូចជាបានចូលរួមនៅក្នុងពិធីថ្វាយព្រះភ្លើង បានសម្ដែងនូវជំនឿរបស់ពួក គាត់ ចំពោះបារមីស័ក្ដិសិទ្ធិរបស់ព្រះមហាវីរក្សត្រសម្ដេចឪ ហើយថា ព្រះវិញ្ញាណក្ខន្ធរបស់ព្រះអង្គពិតជាគង់នៅ ជាមួយប្រជារាស្ដ្រកូនចៅរបស់ព្រះអង្គ ដើម្បីជួយថែរក្សាឱ្យកូនចៅមានសេចក្ដី សុខ ប្រទេសរីកចំរើន ដែលសព្វ ថ្ងៃរាជរដ្ឋាភិ បាលដឹកនាំដោយសម្ដេចតេជោ ហ៊ុន សែន កំពុងដើរតាមមាគ៌ាដ៏ត្រឹមត្រូវរបស់ព្រះអង្គ ជាពិសេស បន្ដដឹកនាំប្រទេស ជាតិ តាមលំអានសម័យសង្គមរាស្ដ្រនិយម។

តាមការកត់សម្គាល់នៅក្នុងឆាកនយោ បាយកម្ពុជា គេសង្កេតឃើញអ្នកដឹកនាំដ៏ខ្លាំងពូកែ មានតែពីរអង្គគត់គឺ សម្ដេចឪ ព្រះបិតាជាតិ ព្រះបិតាបង្រួបបង្រួមជាតិ ផ្សះផ្សារជាតិ និងសម្ដេចតេជោ ហ៊ុន សែន ដែលជាបុត្រធម៌ ដែលជាបិតា ស្ថាបនិកកិច្ចព្រមព្រៀងសន្ដិភាព ទីក្រុងប៉ារីស ២៣ តុលា ១៩៩១។ ឥឡូវនេះ នៅសល់តែសម្ដេច តេជោមួយគត់ ដែលបន្ដពីសម្ដេចឪ ហើយក៏គេធ្លាប់ឃើញសម្ដេចតេ ជោ ហ៊ុន សែន មានរិទ្ធានុភាពខ្លាំង ទើបអាច ដង្ហែសម្ដេចព្រះ មហាវីរក្សត្រ បានដល់ទីបញ្ចប់ រីឯអ្នកនយោបាយខ្លះទៀត បានត្រឹមតែពាក់កណ្ដាល ឬក៏ទើប ចាប់ផ្ដើម ក៏បាត់ទៅវិញ អាចថាមក ពីខ្វះការតស៊ូ ឬក៏គ្មានរិទ្ធានុភាព ដែលអាចដង្ហែព្រះអង្គបាន៕

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជណាចក្រកម្ពុជា នឹងចូលរួមពិធីក្រុងពាលីបើក ឲ្យមានការសាងសង់រូបសំណាក ព្រះបរមរូបសម្តេចតា ព្រះមហាវីរក្សត្រនៅថ្ងៃទី២០ ខែកុម្ភៈ ឆ្នាំ២០១៣ នាសប្តាហ៍ក្រោយនេះ ធ្វើយ៉ាងណាឲ្យរូបសំណាកសម្តេចតា រួចរាល់ចំថ្ងៃប្រសូត្រព្រះអង្គ នៅខែតុលា ខាងមុខនេះ។

លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានប្រាប់មជ្ឍមណ្ឌល ព័ត៌មានដើមអម្ពិល ឲ្យដឹងនៅថ្ងៃសៅរ៍ ទី១៦ ខែកុម្ភៈថា សម្តេចតេជោ ហ៊ុន សែន នឹងចូលរូមពិធីសែនក្រុងពាលី សាងសង់ព្រះបរមរូប ព្រះបរមសព សម្តេចតា ព្រះមហាវីរក្សត្រ សម្តេចព្រះ នរោត្តម សីហនុ នៅថ្ងៃពុធ ទី២០ កុម្ភៈ សប្តាហ៍ក្រោយ នៅសួនច្បារខាងកើតវិមានឯករាជ្យ ដើម្បីឲ្យប្រជារាស្រ្តរបស់ព្រះអង្គចងចាំ ពីវីរភាពរបស់ព្រះអង្គជូនប្រទេសជាតិមាតុភូមិ។

លោកបញ្ជាក់ថា “តាមកាលវិភាគរបស់សាលារាជាធានីភ្នំពេញ សម្តេចតេជោនឹងចូលរូមពិធីក្រុងពាលី សាងសង់រូបសំណាកសម្តេចតា នៅថ្ងៃពុធសប្តាហ៍ក្រោយ ថ្ងៃទី២០កុម្ភៈ តាមពិធីព្រះពុទ្ធសាសនា ដើម្បីបើកផ្លូវឲ្យមានការសាងសង់ជាផ្លូវការ”។

យ៉ាងណាក៏ដោយចំពោះតម្លៃ នៃការសាងសង់មិនទាន់ដឹង នៅឡើយនោះទេ ខណៈបន្ទុកចំណាយទាំងអស់ជារបស់រាជរដ្ឋាភិបាល។ ការលាចាករបស់ព្រះអង្គជា រៀងរហូត ធ្វើឲ្យប្រជានុរាស្រ្តរបស់ព្រះអង្គសោកស្តាយជាពន់ពេក អាឡោះអាល័យ រកអ្វីប្រៀបពុំបានក្នុងការបាត់បង់ព្រះមហាវីរក្សត្រ ដែលព្រះអង្គបូជាកម្លាំងកាយ ព្រះអង្គពេញមួយជីវិត ដើម្បីជាតិក្នុងការស្វែងរកឯករាជ្យពីប្រទេសបារាំង និងស្នាព្រះហស្ថធៗជាច្រើនទៀត។

សូមជម្រាបថា រាជរដ្ឋាភិបាលកម្ពុជា បានប្រកាសសាងសង់រូបសំណាកសម្តេចតា ក្រោយពីព្រះអង្គចូលព្រះទិវង្គតនៅថ្ងៃទី១៥ ខែតុលាឆ្នាំ២០១៣ នាទីក្រុងប៉េកាំង ប្រទេសចិន។

ព្រះបរមសពរបស់ព្រះបរមរតនកោដ្ឋ ត្រូវបានដង្ហែចេញពីព្រះបរមរាជវាំង កាលពីថ្ងៃទី០១ ខែកុម្ភៈ ឆ្នាំ២០១៣ និងត្រូវបានថ្វាយព្រះភ្លើងចប់សព្វគ្រប់នាល្ងាចថ្ងៃទី៤ ខែកុម្ភៈ ឆ្នាំ២០១១៣ផងដែរ៕

ភ្នំពេញ ៖ កម្លាំងនគរបាលផ្នែកយុត្ដិធម៌ នៃអធិការដ្ឋាននគរបាលខណ្ឌដូនពេញ កាល ពីវេលាម៉ោង១០និង៣០នាទីព្រឹកថ្ងៃទី១៥ ខែកុម្ភៈ ឆ្នាំ២០១៣ បានឃាត់ខ្លួនជន សង្ស័យម្នាក់ ពីបទជួញដូរថ្នាំញៀនចំនួន ១៣ កញ្ចប់តូច ខណៈដែលជនសង្ស័យរូប នេះ កំពុងស្ថិតនៅមុខរង្គសាលចតុមុខ និង ផ្លូវជាតិលេខ៥ ភូមិទី១៦ សង្កាត់ស្រះចក ខណ្ឌដូនពេញ ។

មន្ដ្រីនគរបាលខណ្ឌដូនពេញ បានឱ្យដឹង ថា ជនសង្ស័យរូបនេះ មានឈ្មោះសាំង វិបុល ភេទប្រុស អាយុ២៧ឆ្នាំ មានមុខរបរ មិនពិតប្រាកដ រស់នៅផ្ទះជួលទល់មុខរង្គចតុ មុខ ។

បើតាមសមត្ថកិច្ចមុនពេលកើតហេតុ បន្ទាប់ពីទទួលបានព័ត៌មានសម្ងាត់នគរបាល ខណ្ឌដូនពេញ បានចុះទៅកន្លែងកើតហេតុ រួចហើយក៏ឃាត់ខ្លួនជនសង្ស័យរូបនេះ ដោយប្រទះឃើញថ្នាំញៀនចំនួន១៣កញ្ចប់ តូច នៅក្នុងហោប៉ៅខោ ។

បច្ចុប្បន្នជនសង្ស័យរូបនេះត្រូវបានឃុំ ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅតុលាការ។

បាត់ដំបងៈ នៅព្រឹកថ្ងៃ ទី១៦ ខែកុម្ភៈ ឆ្នាំ២០១៣ តំណាងមូលនិធិ សាលាអន្តរជាតិ យូ.អេស.អេ ដឹកនាំ ដោយលោក អាង រ៉េន អគ្គនាយករងតំណាង ឲ្យលោក ជា ហ៊ាង អគ្គនាយកសាលា អន្តរជាតិ យូ អេស អេ ភ្នំពេញ សៀមរាប និងបាត់ដំបង និងជាប្រធានមូលនិធិ សាលាអន្តរជាតិ យូ អេស អេ សម្រាប់ជួយ ជនក្រីក្រនិង អភិវឌ្ឍន៍សង្គម អមដំណើរដោយ លោកគ្រូ អ្នកគ្រូជាច្រើននាក់ បាននាំអំណោយ មួយ ចំនួន ទៅចែកជូនជនក្រីក្រ ចំនួន២គ្រួសារ ដែលកំពុងជួបការលំបាក នៅភូមិវត្តរកា សង្កាត់អូរម៉ាល់ ក្រុងបាត់ដំបង លោក អាង រ៉េន អគ្គនាយករងសាលាអន្តរជាតិ យូ.អេស.អេ បានឲ្យដឹងថា ក្រោយពីបាន ទទួល ដំណឹងតាម រយៈសារព័ត៌មាន ដោយជនក្រីក្របាន អំពាវនាវសុំរកជំនួយ ពីសប្បុរសជន រួចមក លោកជា ហ៊ាង អគ្គនាយកសាលាអន្តរជាតិ យូ អេស អេ ភ្នំពេញ សៀមរាប និងបាត់ដំបង និងជា ប្រធានមូលនិធិសាលាអន្តរជាតិ យូ អេស អេ សម្រាប់ជួយជនក្រីក្រ និងអភិវឌ្ឍន៍សង្គម បានឯកភាពគ្នា ជាមួយលោកគ្រូ អ្នកគ្រូទាំងអស់បានប្រមូល ថវិកាដែលបានមកពីការ ចូលរួមពីលោកគ្រូ អ្នកគ្រូ និង សិស្សានុសិស្សទាំងអស់ ផងដែរ ហើយបានចាត់តាំងក្រុម ការងារឲ្យនាំអំណោយចុះយកទៅ ចែកជូន ជនក្រីក្រ ចំនួន២គ្រួសារនៅភូមិវត្តរកា សង្កាត់អូរម៉ាល់ ក្រុងបាត់ដំបង ក្នុងនោះគ្រួសារទី១ មានលោក យាយ ឈ្មោះ ហាបញ៉ាន អាយុ៧៦ឆ្នាំ ចាស់ជរា មានកូនស្រីឈ្មោះ រួម ដាវី អាយុ៥២ឆ្នាំ កំពុងដេកឈឺ និង មានចៅស្រីម្នាក់ទៀតឈ្មោះ រស់ សុវ៉ឺន ភេទស្រី អាយុ២០ឆ្នាំ ជានិស្សិតពេទ្យឆ្នាំទី១ រៀននៅសាលា មធ្យម ភូមិភាគសុខាភិបាលខេត្តបាត់ដំបង (បឹងឈូក) បានប្រគល់ថវិកាជូនចំនួន ២០០.០០០រៀល និង គ្រួសារទី២ លោកតាឈ្មោះ ផន ភី អាយុ៨៩ឆ្នាំ លោកយាយឈ្មោះ គាត ហម អាយុ៨០ឆ្នាំ ទទួល ចិញ្ចឹម ចៅតូចៗ ចំនួន៥នាក់ ដោយបានប្រគល់ អំណោយមាន៖ ១.អង្ករ៥០គីឡូក្រាម ២.មីយើង១កេស ៣.នំធុង១ធុង ៤.ទឹកត្រីទឹកស៊ីអ៊ីវ២យួរ ៥.ទឹកក្រូច១កេស ៦.ថវិកាចំនួន១០០.០០០រៀល។

លោក អាង រ៉េន បានបញ្ជាក់ថា សាលាអន្តរជាតិ យូ អេសអេ ភ្នំពេញ សៀមរាប និងបាត់ដំបង បាន បង្កើត មូលនិធិ សម្រាប់ជួយជនក្រីក្រ និងអភិវឌ្ឍន៍សង្គម ដែលមានលោកអគ្គនាយក ជាប្រធានមូល និធិ រយៈកាលកន្លងមក សាលាអន្តរជាតិ យូ អេស អេតែងតែមានការគាំទ្រពីសប្បុរសជន នានាក៏ដូច ជាលោកគ្រូ អ្នកគ្រូ និងសិស្សានុសិស្សបាន កសាងមូលនិធិនេះឡើង ដើម្បីចូលរួមជួយ ជនក្រីក្រជា រៀងរាល់ ឆ្នាំរហូតមក និងបានជួយចែករំលែក ការងារផ្សេងៗដែលជាប្រយោជន៍ សង្គមជាតិ យើងផង ដែរ ។

មិនតែប៉ុណ្ណោះ សាលាយើងតែងតែពង្រឹងសមត្ថភាព ខ្លួនជានិច្ចក្នុងចំណោម វិស័យអប់រំឯកជន ដោយ មានទទួលសេវា បង្រៀនសិស្សចាប់ពី ថ្នាក់មតេយ្យដល់ថ្នាក់ទី១២ ដែលមានគុណភាពខ្ពស់ ព្រមទាំង មាន ការគាំទ្រពីសំណាក់ មាតាបិតាសិស្ស រហូតមកដល់បច្ចុប្បន្ន ៕

ឧត្តរមានជ័យ៖ អាជ្ញាធរខណ្ឌមានជ័យ ដឹកនាំដោយ លោក គួច ចំរើន និងអភិបាលរងខណ្ឌ ហៀក ចាន់លាង នៅរសៀល ថ្ងៃទី១៦ ខែកុម្ភៈ ឆ្នាំ២០១៣នេះ បានបន្តដំណើរ ចុះសួរសុខទុក្ខ និងចែកអំណោយ ដល់ក្រុមយុវជន សម្តេចតេជោ និងក្រុមមន្រ្តីវាល ក្រុមទី១២៦ នៅខេត្តឧត្តរមានជ័យ ដែលកំពុងបំពេញ ការងារ ចុះវាស់វែងដី ជូន ប្រជាពលរដ្ឋ នៅភូមិស្រែល្អ ឃុំបាក់អន្លូង ស្រុកត្រពាំងប្រាសាទ ខេត្តឧត្តរមានជ័យ ។

លោកអភិបាលខណ្ឌ គួច ចំរើន បានផ្តល់ថវិកា ចំនួន ៧០០ដុល្លារ សម្រាប់ជីក អណ្តូងទឹកមួយ នៅផ្ទះរបស់ប្រជាពលរដ្ឋ ដែលក្រុមយុវជន ស្នាក់នៅ ទុកប្រើប្រាស់ ប្រយោជន៍រួម ទាំងអស់គ្នា ផងដែរ។

ក្រោយពីចុះសួរ សុខទុក្ខ និងចែកអំណោយ ដល់ ក្រុមយុវជនស្ម័គ្រ ចិត្តទី១២៦ រួចមក លោកអភិបាលខណ្ឌ បានបន្ត ទៅសួរសុខទុក្ខ និងចែកអំណោយ ដល់ក្រុម ១០៩ ចុះវាស់វែងដីធ្លី នៅភូមិស្រឡៅស្រង់ ឃុំលំទង ស្រុកអន្លង់វែង ខេត្តឧត្តរមានជ័យ។

អំណោយ ដែលត្រូវចែកនោះ រួមមាន ៖ មីយើង ១៥កេសធំ, នំ២កេស, ត្រីខ ១កេស, ភេសជ្ជ:ប៉ូវកម្លាំង ២កេស, សាច់ប៉ាត់ តេ ២០គីឡូក្រាម, សាប៊ូដុសខ្លួន ៧០ដុំ, ទឹកត្រី ៤យួរ, ទឹកស៊ីអ៊ីវ ៤យួរ, ថ្នាំលាបការពារ មូសខាំ ៣៥ដប, ទឹកសុទ្ឋ ១៥០យួរ, ទឹកក្រូច ៥កេស និងសំភារ: ប្រើប្រាស់ ចំនួន១១មុខ ព្រមទាំង ថវិកា ២លានរៀល ផងដែរ។

នៅចំពោះមុខ ក្រុមយុវជន ស្ម័គ្រចិត្តទាំងអស់ លោក គួច ចំរើន បានជំរុញឲ្យ ក្រុមការងារ បន្តអនុវត្តការងារ ចុះវាស់វែងដីធ្លី ជូនប្រជាពលរដ្ឋ រហូតដល់ ចប់ចុងចប់ដើម ហើយឈានទៅ ដល់ការចេញ ប័ណ្ណកម្មសិទ្ធិ ជូនពួកគាត់ ។

លោក គួច ចំរើន បានផ្តាំផ្ញើការ សួរសុខទុក្ខ ពីសំណាក់ សម្តេចនាយករដ្ឋមន្រ្តី ហ៊ុន សែន និងលោកជំទាវ ដែលលោក ទាំងពីរ តែងតែយកចិត្តទុកដាក់ ដល់ក្រុមយុវជនស្ម័គ្រចិត្ត ទាំងអស់ដែលបាន និងកំពុងបំពេញ ការងារ ចុះវាស់វែងដីធ្លី ជូនប្រជាពលរដ្ឋ នៅតាមបណ្តាខេត្ត។

លោកអភិបាលខណ្ឌ បានផ្តាំផ្ញើឲ្យ ក្រុមយុវជនស្ម័គ្រចិត្ត ទាំងអស់ ត្រូវចេះជួយគ្នា ទៅវិញទៅមក ស្របតាមពាក្យ មួយម៉ាត់ ដែលសម្តេចនាយករដ្ឋមន្រ្តី តែងតែមានប្រសាសន៍ថា នៅផ្ទះម្តាយទីទៃ ទៅព្រៃម្តាយ តែមួយ។

ភ្នំពេញ ៖ ដើម្បីឆ្លើយតបនិងការតវ៉ា ក៏ ដូចជាការទាមទារបើកប្រាក់ សម្រាប់ខែ មករា ឆ្នាំ២០១៣ របស់កម្មករកម្មការិនី រោងចក្រយ៉ុងវ៉ា១ និងយ៉ុងវ៉ា២ ស្ថិតនៅក្រុង តាខ្មៅ  ខេត្ដកណ្ដាលនោះ កាលពីថ្ងៃទី១៣ ខែកុម្ភៈ ឆ្នាំ២០១៣ កន្លងទៅនេះ រដ្ឋមន្ដ្រី ក្រសួងសង្គមកិច្ច អតីតយុទ្ធជន និងយុវនីតិ សម្បទា និងជាប្រធានគណៈកម្មការសម្រាប់ ដោះស្រាយបញ្ហា កូដកម្ម បាតុកម្ម នៅតាម គ្រប់សញ្ញា លោកអ៊ិត សំហេង បានសរសេរ សំណើ ជូនដល់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដោយស្នើសុំបេប្រ ទានថវិកា ចំនួន ៣៦៨០០០០០០០រៀល ដើម្បីបើកឱ្យកម្មករ ចំនួន ៧២១៩នាក់ ក្នុង នោះបុគ្គលិកចំនួន៨៣នាក់ ។

យោងតាមសំណើរបស់លោករដ្ឋមន្ដ្រី អ៊ិត សំហេង នោះ សម្ដេចតេជោ ហ៊ុន សែន បានចារត្រឡប់មកភ្លាមៗ ដោយយល់ព្រម តាមសំណើនិងជូន ដល់ លោកឧបនាយករដ្ឋ មន្ដ្រី គាត ឈន់ សម្រាប់ដោះស្រាយបញ្ហា នេះជាបន្ទាន់ ។

សូមបញ្ជាក់ថា ដោយសារការសណ្ដោស ប្រណី និងអន្ដរាគមន៍ទាន់ពេលវេលា របស់ សម្ដេចតេជោ ហ៊ុន សែននោះ កម្មករកម្មការិនី រោងចក្រយ៉ុង វ៉ាទី១ទី២ ជាង៧០០០នាក់ បានថ្លែងអំណរគុណយ៉ាងជ្រាលជ្រៅ ដល់សម្ដេចតេជោ ដែលធ្វើឱ្យពួកគេរួចផុតពីការបណ្ដេញរបស់ម្ចាស់ផ្ទះជួល។

ភ្នំពេញ ៖ ម្ចាស់ក្រុមហ៊ុនស្រីរត្ន័ បានថ្លែង បដិសេធចំពោះការចោទប្រកាន់របស់អតិថិ ជន ដែលថា ក្រុមហ៊ុននេះ ជាមួយក្រុមហ៊ុន ស្កាយខេម បូឌាត្រា វែល ស៊ីដាច់លុយជិត ៦០០ដុល្លារ ប៉ុន្ដែមិនបានធ្វើដំណើរកំសាន្ដ រយៈពេល៤យប់៥ថ្ងៃ ទៅកាន់ប្រទេសថៃ។

ប្រធានក្រុមហ៊ុនខាងលើនេះ បានប្រាប់ មជ្ឈមណ្ឌលព័ត៌មានដើមអម្ពិលឱ្យដឹងថា មូលហេតុ ដែលអតិថិជនទាំងពីរនាក់នោះ មិនបានធ្វើដំណើរ កំសាន្ដទៅកាន់ប្រទេសថៃ ដោយសារលិខិតឆ្លងដែនហួសសុពលភាព ហើយពួកគេទាំងពីរនាក់ មិនព្រមបង់លុយ តាមការទារចំនួន១៥០០បាត ដើម្បីអាចធ្វើ ដំណើរទៅបាន ។

ជាមួយគ្នានេះ ខាងក្រុមហ៊ុនបានបញ្ជាក់ ថា នឹងមិនសងលុយជិត៦០០ដុល្លារទៅឱ្យ អតិថិជនរបស់ខ្លួននោះឡើយ ។ យ៉ាងណា ក៏ដោយ អតិថិជន ដែលរងការចាញ់បោកក្រុមហ៊ុនទាំងពីរនេះ នៅតែទាមទារសំណងរបស់ខ្លួន ពីព្រោះ ខ្លួនមិនបានទៅប្រទេសថៃនោះឡើយ ។

ចំពោះការលើកឡើងរបស់ក្រុមហ៊ុនថា អតិថិជនមិនបានទៅកំសាន្ដនៅប្រទេសថៃ ដោយសារតែលិខិតឆ្លងដែនហួសសុពលភាពនោះ គឺកំហុសនេះ បណ្ដាលមកពីក្រុមហ៊ុនខ្លួនឯង ដោយសារតែពេលទទួលភ្ញៀវ និងទទួល លុយ ហេតុអ្វីនៅតែយកទៀត បើដឹងថា លិខិតឆ្លងដែននោះហួស សុពលភាព ។ ដូច្នេះ នេះជារូបភាពបោកប្រាស់និងចង់កេងចំណេញ លុយកាក់ពីអតិថិជនតែប៉ុណ្ណោះ ។

ប្រសិនបើក្រុមហ៊ុនមិនបន្ដដោះស្រាយឬសងលុយទៅឱ្យអតិថិជនរបស់ខ្លួននោះ ច្បាស់ជា ក្រុមហ៊ុនខាងលើ និងបាត់បង់អតិថិជនយ៉ាង ច្រើន ដោយសារតែអស់ជំនឿទុកចិត្ដ ហើយម្នាក់ៗនៅពេលធ្វើដំណើរកំសាន្ដទៅ ក្រៅប្រទេសច្បាស់ជាមិនទាក់ទងតាមក្រុម ហ៊ុនទាំងពីរនេះទេ ។
គួរបញ្ជាក់ថា ស្ដ្រីមួយរូប បានអះអាងថា ក្រុមហ៊ុននាំភ្ញៀវដើរលេងកំសាន្ដនៅក្រៅ ប្រទេស យីហោ ស្កាយខេមបូឌាត្រាវែល ដែលមានទីតាំង ស្ថិតនៅផ្ទះលេខ១០៣ តាម បណ្ដោយផ្លូវព្រះស៊ីសុវត្ថិ សង្កាត់វត្ដភ្នំ ខណ្ឌ ដូនពេញ រួមជាមួយក្រុមហ៊ុនដៃគូរបស់ខ្លួន ឈ្មោះស្រីរត្ន័ ដែលមាន ទីតាំង នៅជិតសណ្ឋា គារស ក្បែរផ្សារធំថ្មី បានបោកលុយរបស់ គាត់ជិត៦០០ដុល្លារ ជាថ្នូរថា បានទៅលេង កំសាន្ដនៅប្រទេសថៃ រយៈពេល៤យប់៥ថ្ងៃ។

ស្ដ្រីរូបនេះ បានឱ្យដឹងថា ខ្លួននិងបង ប្រុសកាលពីថ្ងៃទី១៩ ខែមករា ឆ្នាំ២០១៣ កន្លងទៅ បានទិញសំបុត្រនិងបង់លុយចំនួន ៥៩៤ដុល្លារ ពីក្រុមហ៊ុន ស្កាយខេមបូឌាត្រាវែល ដើម្បីធ្វើដំណើរកំសាន្ដទៅកាន់ប្រទេសថៃ រយៈពេល៤យប់៥ថ្ងៃ ។ ស្ដ្រីដដែលនេះ បាន បន្ដថា ក្រោយពីបានបង់ លុយរួច អស់ហើយ ក្រុមហ៊ុនទេសចរណ៍មួយនេះ បានផ្ទេរអតិថិ ជនរបស់ខ្លួនទៅឱ្យក្រុមហ៊ុនជាដៃគូ ឈ្មោះស្រី រត្ន័ ដើម្បីរៀបចំជាកញ្ចប់មួយធ្វើ ដំណើរ កំសាន្ដ ទៅកាន់ប្រទេសថៃ ។

បើតាមស្ដ្រីរងគ្រោះរូបនេះបានអះអាង ទៀតថា ដំបូងឡើយដោយភ្លេចមើលថ្ងៃខែ នៅក្នុងលិខិតឆ្លងដែនរបស់ខ្លួន ដែលត្រូវផុតកំណត់នោះ ត្រូវបាន ក្រុមហ៊ុន ធានាថា មិនអីនោះឡើយ គ្រាន់តែបង់លុយ បន្ថែម  ចំនួន១៥០០បាត ពេលធ្វើដំណើរទៅដល់ព្រំដែន ដើម្បីឱ្យសមត្ថកិច្ចនៅ ទីនោះអាច វ៉ៃត្រា ចូលទៅបាន ។ ប៉ុន្ដែពេលធ្វើដំណើរទៅដល់ ច្រកទ្វារអន្ដរជាតិប៉ោយប៉ែត ខាងក្រុមហ៊ុន បានទម្លាក់រូបគាត់ និងបងប្រុសរបស់ខ្លួននៅទីនោះ ដោយអះអាងថា ធានាមិនបាននោះទេ ដោយសារតែថ្ងៃខែនៅក្នុងលិខិតឆ្លងដែន គឺហួសពេលកំណត់ ។

ដោយសារតែការទម្លាក់ចោលគ្មានទទួលខុសត្រូវ ស្ដ្រីរងគ្រោះនិងបងប្រុស បានស្នាក់នៅទីក្រុងប៉ោយប៉ែតមួយយប់ មុនពេលធ្វើដំណើរ មកភ្នំពេញវិញ ។

បើយោងតាមស្ដ្រីរងគ្រោះ រហូតមកដល់ពេលនេះ កញ្ចប់លុយជិត៦០០ដុល្លារ ដែលបង់ជូនក្រុមហ៊ុន សម្រាប់ដំណើរកំសាន្ដទៅប្រទេសថៃ គឺមិនបានមកវិញនោះ ទេ ដោយក្រុមហ៊ុនមិនព្រមសង ៕

បាត់ដំបង៖  នៅព្រឹកថ្ងៃទី១៦  ខែកុម្ភ: ឆ្នាំ២០១៣ នេះ លោករដ្ឋមន្ត្រី ក្រសួងយុត្តិធម៌ អង្គ វង្សវឌ្ឍានា អមដំណើរដោយ លោក អ៊ុក សាវុធ អគ្គព្រះរាជអាជ្ញា អមសាលា ឧទ្ទរណ៌ លោក គឹម សន្តិភាព អនុរដ្ឋលេខាធិការ លោក សំម ប្រជាមានិត នាយកខុទ្ទការល័យ លោក ច័ន្ទ មនោ អគ្គនាយក ព្រមទាំងមន្រ្តី មួយចំនួនទៀត របស់ក្រសួងយុត្តិធម៌ និងសាលាដំបូង រាជធានី ខេត្តមួយចំនួន និងអភិបាលស្រុក ក្រុមការងារ យុវជនគណបក្ស ខេត្ត បានចុះសាក សួរសុខទុក្ខ វីរ:យុវនិស្សិត សម្តេចតេជោ ដែលកំពុងបំពេញ បេសកម្មបំរើជាតិ និងប្រជាពលរដ្ឋនៅស្រុកកោះក្រឡរ និងស្រុករុក្ខគីរី នៃខេត្តបាត់ដំបង ។

 នៅពេលនេះ លោករដ្ឋមន្ត្រីកំពុងតែ ស្ថិតនៅក្នុងទីតាំង ជួបជុំក្នុង វត្តកោះក្រឡរ ស្ថិតក្នង ភូមិកោះក្រឡ ឃុំកោះក្រឡរ ស្រុកកោះក្រឡរ ហើយសំណេះសំណាល ជាមួយ វីរ:យុវនិស្សិត សម្តេចតេជោ ដែលស្ថិតក្នុង ក្រុមទី៣២ និងទទួលបំពេញភារកិច្ច អនុវត្តគោលនយោចាស់ សកម្មភាពថ្មី ក្នុងស្រុកកោះក្រឡរ ។

នាឱកាសនេះ លោករដ្ឋមន្ត្រី បានសម្តែងការកោតសរសើរ ដល់វីរ:យុវនិស្សិត សម្តេចតេជោ ដែលបានលះបង់ពេលវេលា ឯកជនរបស់ខ្លួន បែកពីគ្រួសារ ឪពុកម្តាយ បងប្អូន មិត្ត ភក្តិ មកបំរើ ជាតិមាតុភូមិ និងប្រជាពលរដ្ឋ ដោយមិនគិតពីការនឿយហត់ ។

លោករដ្ឋមន្រ្តីបានផ្តាំផ្ញើការសួរសុខទុក្ខ ពីសម្តេចនាយករដ្ឋមន្រ្តី និងលោកជំទាវ ដែលលោកទំាងពីរ តែងតែគិតគូរ និងព្រួយបារម្ភ គ្រប់ពេលវេលា របស់ក្រុមយុវជនស្ម័គ្រ ដែលចុះវាស់វែងដីធ្លី ជូនប្រជាពលរដ្ឋ នៅតាមបណ្តាខេត្ត។

ក្រោយបញ្ចប់ ការសាកសួរសុខទុក្ខ វីរ:យុវជនស្ម័គ្រចិត្ត សម្តេចតេជោ នៅស្រុកកោះក្រឡរ លោករដ្ឋមន្រ្តី និងមន្រ្តីក្រោមឱវាទ បាននិងកំពុងតែបន្ត ដំណើរ ទៅកាន់ ស្រុករុក្ខគីរី ដើម្បីបន្តការសាក សួរសុខទុក្ខ វីរ:យុវនិស្សិត សម្តេចតេជោ ក្រុមទី១៣២៕ 

បាត់ដំបង៖ កម្លាំងអាវុធហត្ថ ខេត្តបាត់ដំបង បានឃាត់ និង បញ្ជូន ជនសង្ស័យ២នាក់ ទៅតុលាការ នៅរសៀលថ្ងៃទី១៦ ខែកុម្ភៈ ឆ្នាំ២០១៣ ពីបទហិង្សា មានស្ថានទម្ងន់ ទោស ដែលបានប្រព្រឹត្ត កាលពីវេលា ម៉ោង១១និង៣០នាទី យប់ថ្ងៃទី១៤ ខែកុម្ភៈ ឆ្នាំ២០១៣ នៅចំណុច ភូមិដូងឃុំបឹងរាំង ស្រុកកំរៀង ខេត្តបាត់ដំបង។

លោកអនុសេនីយ៌ឯក ឡាច ប្រុស នាយការិយាល័យ បទល្មើស ព្រហ្មទណ្ឌខេត្តបាន ឲ្យដឹងថាតាមរបាយការណ៍ របស់អាវុធហត្ថ ស្រុកកំរៀង បានបញ្ជាក់ថា កាលពីវេលាម៉ោង១១និង៣០នាទី យប់ថ្ងៃទី១៤ ខែកុម្ភៈ ឆ្នាំ២០១៣ នៅចំណុច ភូមិដូងឃុំបឹងរាំង ស្រុកកំរៀង មានករណីអំពើហិង្សា មួយកើតឡើងបង្កដោយ ជនសង្ស័យ២នាក់ បានយកខ្សែក្រវ៉ាត់វ៉ៃ ទៅលើជនរងគ្រោះចំក្បាល បណ្តាលឲ្យបែកក្បាលហូរឈាម ជាច្រើនបណ្តាល ឲ្យដួលស្រឡប់ ភ្លាមៗ ត្រូវបានដឹកយកទៅ សង្រ្គោះនៅ ក្រុមពេទ្យយុវជនស្ម័គ្រចិត្ត សម្តេចតេជោ ក្រុមទី៣៤ប្រចាំស្រុកកំរៀង។

តាមសាក្សីបាន ប្រាប់សមត្ថកិច្ចថា មុនពេលកើតហេតុ រថយន្ត១គ្រឿង ដឹកក្រុមយុវជនស្ម័គ្រចិត្ត ត្រឡប់ ទៅកន្លែងសម្រាក ពេលមកដល់ចំណុច កើតហេតុ ក៏បានបត់ឆ្វេង ខណៈពេលម៉ូតូ ជនសង្ស័យ កំពុងបើកបរ ក្នុងល្បឿនលឿន ជាន់ហ្រ្វាំង មិនទាន់ បណ្តាលឲ្យធ្លាក់ថ្នល់ ធ្វើឲ្យជនសង្ស័យទាំង២នាក់ ខឹង ស្ទុះមកឈរកាក់ រថយន្តរករឿង និងប្រកែកគ្នា ទាំងកំរ៉ោល ពេលកំពុង ប្រកែកគ្នា ស្រាប់តែជនសង្ស័យបានដក ខ្សែក្រវ៉ាត់មក វ៉ៃជនរងគ្រោះចំ ក្បាលពីក្រោយ បណ្តាលឲ្យដួល សន្លប់ភ្លាមៗ តែងម្តង ។

ភ្លាមៗនោះជនសង្ស័យ ត្រូវបាន ក្រុមយុវជនស្ម័គ្រចិត្ត ចាប់ឃាត់ខ្លួន ប្រគល់ឲ្យកម្លាំង អាវុធហត្ថស្រុកតែម្តង។ ជនបង្កទាំង២នាក់ ត្រូវបានគេស្គាល់ ឈ្មោះ មាត មាន ភេទប្រុស អាយុ២៣ឆ្នាំ មុខរបរ ធ្វើចម្ការ និងឈ្មោះ ម៉ី ម៉ៅ ភេទប្រុស អាយុ២០ឆ្នាំ ទាំង២នាក់ នេះមានទីលំនៅ ភូមិថ្មី ឃុំអូរដា ស្រុកកំរៀង ខេត្តបាត់ដំបង ។

ចំណែក ជនរងគ្រោះមាន ឈ្មោះ មុំ បូផាន់ ភេទប្រុស អាយុ៣៣ឆ្នាំ ជាមន្រ្តី សុរិយោដី នៅជាមួយ ក្រុមយុវជនស្ម័គ្រចិត្ត ក្រុមទី៣៤ ប្រចាំស្រុកកំរៀង មានទីលំនៅ ភូមិបរតាំស៊ូ សង្កាត់បរយាខា ក្រុងប៉ៃលិន។

ជនសង្ស័យបានឆ្លើយសារភាពថា ខ្លួនពិតជា បានយកខ្សែក្រវ៉ាត់វ៉ៃ ទៅលើជនរងគ្រោះ ពិតប្រាកដមែន ដោយសារ តែពួកខ្លួន ខឹងនិងតៃកុង រថយន្តបត់ រថយន្តមកចំពីមុខ ម៉ូតូខ្លួនបណ្តាល ឲ្យធ្លាក់ផ្លូវហើយបាន ស្តីឲ្យពួកខ្លួនទើបខ្លួន ខឹងទ្រាំមិនបានក៏បាន វ៉ៃតែម្តងទៅ។ បច្ចុប្បន្ន ជនសង្ស័យទាំង២នាក់ ត្រូវបានកម្លាំង ជំនាញកសាងសំណុំរឿង បញ្ជូនខ្លួនជនសង្ស័យទៅតុលាការខេត្ត នៅរសៀលថ្ងៃទី១៦ ខែកុម្ភៈ នេះដើម្បីចាត់ការ តាមច្បាប់៕

ពោធិ៍សាត់៖ អ្នកភូមិព្រៃឪម៉ាល់ សង្កាត់រលាប ក្រុងពោធិ៍សាត់ ខេត្តពោធិ៍សាត់ ជាច្រើនគ្រួសារ បាន ត្អូញត្អែរថា រហូតមកដល់ ឆ្នាំ២០១៣ហើយ ពួកគាត់នៅតែពុំទាន់មាន ទឹកស្អាតប្រើប្រាស់ នៅឡើយទេ ។ ដោយពួកគាត់បាន លើកឡើងថា ចាប់តាំងពីឆ្នាំ១៩៧៩ រហូតមកដល់ដើម ឆ្នាំ២០១៣នេះ គឺគ្រួសារ ខ្លះនៅតែ ប្រើប្រាស់ទឹកស្រះ បួមទឹកអណ្តូង ចំណែកឯ គ្រួសារខ្លះទៀត ដែលគេមាន ធនធានគ្រាន់បើ គឺគេទិញទឹក ដឹកលក់តាមរថយន្ត ក្នុងតម្លៃពី ៣៥០០០រៀល ទៅ៤ម៉ឺនរៀល សម្រាប់ប្រើប្រាស់ ។

ការដែលអ្នកភូមិខ្លះបាន ទិញទឹកដឹកលក់តាម រថយន្តជាប្រចាំខែ បើធៀបទៅនឹង ការចំណាយនៃការ ប្រើប្រាស់ទឹកស្អាត គឺវាមានតម្លៃឆ្ងាយពីគ្នា ដូចមេឃនិងដីឯណោះ ពីព្រោះគ្រួសារខ្លះ ដែលមាន សមាជិកច្រើន គេប្រើប្រាស់ទឹកទិញ ពីរថយន្តដឹកលក់ ក្នុងមួយខែ យ៉ាងហោចក៏អស់ តែពី៥ម៉ឺន ឡើងទៅនោះទេ ។ ជាមួយគ្នានេះផងដែរ អ្នកភូមិក៏បាន សំណួមពរឲ្យ លោកប្រធាន អង្គភាពរដ្ឋាករទឹក ខេត្តពោធិ៍សាត់ ថាបើជំនាញអាច សិក្សាការពង្រីក បណ្តាទឹកស្អាត ឲ្យដល់ពួកគាត់បាន ប្រើប្រាស់នោះ គឺជាការល្អមួយ ហើយដើម្បី សុខភាព របស់អ្នកភូមិផងដែរ ៕

ភ្នំពេញ៖ អ្វីដែលខ្ញុំលើក យកមកអត្ថាធិប្បាយ នៅពេលនេះ ខ្ញុំមានបំណងចង់ចូលរួម វិភាគទានតិចតួចស្ដួចស្ដើង ជូនចំពោះប្រជា ពលរដ្ឋខ្មែរទាំងឡាយណា ដែលតែងតែយកបរទេសធ្វើជាមូលដ្ឋានបង្អែក គាំទ្រខាងនយោបាយ ក៏ដូចជាផ្នែកស្មារតីផ្សេងៗ ដើម្បីយើងរួមគិតទាំងអស់គ្នា ថាតើយើងបន្ដងប់ងល់យកបរទេសមកធ្វើជាបង្អែកទាំង ងងឹតងងល់តទៅទៀត ឬមួយរាប់អានគេ ក្នុងកម្រិតកិច្ចសហ ប្រតិបត្ដិការ ដោយស្មើភាព និងស្មើសិទ្ធិ។

ខ្ញុំពិតជាមានការ សោកស្ដាយណាស់ ដែលអ្នកនយោបាយខ្មែរ ជាទីគោរពរបស់ យើងខ្លះ ពេលដែលមានបញ្ហា កើតឡើងនៅ ក្នុងស្រុកបន្ដិច បន្ដួច រវាងខ្មែរ និងខ្មែរ ពួកគេ តែងតែហួងហែង យកបរទេសដាក់ពីមុខ។ ខ្ញុំសួរថា មានប្រទេសណាមួយនៅលើលោក នេះ ដែលស្រឡាញ់ ជនជាតិខ្លួន ប្រទេសជាតិ ខ្លួន តិចជាងសាសន៍ដទៃ ។ ជាការពិតគ្មាន នរណាម្នាក់ស្រឡាញ់ជាតិសាសន៍ដទៃជាង ស្រឡាញ់ជាតិ សាសន៍ខ្លួន និងជាតិខ្លួនឯង នោះទេ ។

ការស្រឡាញ់ និងជួយឈឺឆ្អាលជាតិ សាសន៍ដទៃ ក្នុងន័យថា ជាតិសាសន៍នោះ មានផលប្រយោជន៍សម្រាប់ជាតិ ខ្លួនឯងផងដែរ ។ ពោលប្រទេសធំមួយ ជួយប្រទេសដទៃផ្សេងទៀត ពិតណាស់ថា ប្រទេស ដែលទទួលជំនួយ នោះ ប្រាកដជាមានផលប្រយោជន៍សម្រាប់ខ្លួន ។ យ៉ាងណាមិញ ខ្ញុំសូមដកស្រង់នូវឯកសារប្រវត្ដិសាស្ដ្រស្ដីអំពី នយោបាយរបស់សាធារណរដ្ឋខ្មែរ ដឹកនាំដោយលន់ នល់ សិរិមតៈ និងបរិវ៉ា មានទំនាក់ទំនងការទូតជាមួយសហ រដ្ឋអាមេរិក ហើយទីចុងបញ្ចប់ តើរដ្ឋាភិបាលអាមេរិក នៅពេលនោះ មានជំហរយ៉ាងណា ចំពោះរបបលន់នល់  តើអ្នកអង្គម្ចាស់ ស៊ីសុវត្ថិសិរិមតៈ មានបន្ទូល យ៉ាងម៉េច ឆ្លើយតបទៅនឹងរដ្ឋាភិបាលអាមេរិក ។

យោងតាមសៀវភៅ ឯកសារប្រវត្ដិសាស្ដ្រ ក្រោមចំណងជើងថា “សង្គ្រាមអាមេរិក នៅកម្ពុជា លន់នល់ និងខ្មែរ ក្រហម ១៩៧០-១៩៧៥” ដែលនិពន្ធដោយ នួន សុធិមន្ដ ដោយបានសរសេរយ៉ាងក្បោះក្បាយអំពីនយោបាយ ការបរទេស របស់លន់នល់ ជាមួយនិងសហរដ្ឋ អាមេរិក ។ ខ្ញុំសូមដកស្រង់ នូវខ្លឹមសារ ខ្លះៗចេញពីសៀវភៅនេះ ត្រង់ទំព័រ ១៦៧ និងការឆ្លើយឆ្លងលិខិតរបស់អ្នកអង្គម្ចាស់ស៊ីសុវត្ថិសិរិមតៈ ជាមួយឯកអគ្គរដ្ឋទូត សហរដ្ឋអាមេរិក ប្រចាំនៅភ្នំពេញ នៃរដ្ឋាភិបាលលន់នល់ លោកហ្សន កាន់ធីឌីន ។ ខ្លឹមសារសង្ខេបមានដូចតទៅ “នៅថ្ងៃទី៨ ខែ មេសា ឆ្នាំ១៩៧៥ ដោយមានដំបូន្មានបន្ទាន់មួយ របស់ឯកអគ្គរដ្ឋទូតសហរដ្ឋអាមេរិកនៅភ្នំពេញ លោកហ្គាន់ធីឌីន លោកបានផ្ញើទូរសារ មួយទៅឱ្យ ប្រធានាធិបតី អាមេរិក លោក ហ្វដ ដោយសុំឱ្យគាត់ឈប់ផ្ដល់ជំនួយដល់កម្ពុជា ចំពេលដែលសភា អាមេរិក កំពុងពិនិត្យ លទ្ធភាព ផ្ដល់ជំនួយបន្ថែមដល់កម្ពុជា ចំនួន២២២លានដុល្លារ ដែលកម្ពុជា ស្នើសុំនៅនាទីចុងក្រោយ ដើម្បីទ្រទ្រង់ជីវិតរបបសាធារណរដ្ឋខ្មែរ ឱ្យឆ្លងផុតរហូតដល់រដូវវស្សា ព្រោះពេលនោះ ទាហាន ទាំងសង ខាង ច្រើន តែផ្អាកការប្រយុទ្ធគ្នា ដើម្បីឆ្លៀតឱកាសពង្រឹងកម្លាំង និងយុទ្ធសាស្ដ្ររៀងៗខ្លួន សម្រាប់ ប្រតិបត្ដិ ការ នារដូវប្រាំងបន្ដទៀត ។ តែទោះបីជាសភាអាមេរិក អនុម័តយល់ព្រមផ្ដល់ថវិកា នេះឱ្យកម្ពុជា ក៏ ដោយ ក៏ជំនួយទាំងនេះ មិនដឹងជាបញ្ជូនមកកម្ពុជាតាម មធ្យោបាយណាដែរ ហើយបើជំនួយនេះ បានមកដល់ កម្ពុជា តាមវិធីណា ផ្សេងនោះ ក៏ជំនួយនេះ មិនអាចជួយរដ្ឋាភិបាលលន់នល់ ឱ្យរស់រានបន្ដ ទៀត បានដែរ ព្រោះ មកដល់ពេលនេះ ពួកខ្មែរក្រហម បានឡោមព័ទ្ធជុំវិញ ទីក្រុងភ្នំពេញ ហើយ ហើយទី បំផុត ទឹកលុយទាំងនេះ នឹង ត្រូវបាត់បង់តែម្ដង ដោយសារតែគ្មានអ្នកទទួលខុសត្រូវ ។ មុនពេលចេញដំណើរពីកម្ពុជា របស់ឯកអគ្គរដ្ឋទូតអាមេ រិក ប្រចាំកម្ពុជា លោកហ្សន ហ្គាន់ធីឌីន គាត់បាន ផ្ញើលិខិតជា អាយុជីវិតមួយជូនព្រះអង្គម្ចាស់ស៊ីសុវត្ថិ សិរិមតៈ ដើម្បីអញ្ជើញព្រះអង្គ និងឥស្សរជន នយោ បាយ សាធារណរដ្ឋខ្មែរផ្សេងទៀត ដែលប្រឈម មុខនឹងគ្រោះថ្នាក់ ដល់អាយុជីវិតឱ្យចាកចេញពីកម្ពុជា ជាបន្ទាន់ជាមួយពួកគេ តាមជើងយន្ដហោះ ពិសេសចុងក្រោយរបស់អាមេរិក ដែលខ្លឹមសារសំបុត្រ មានអត្ថន័យ ដូចតទៅ ៖

ថ្ងៃទី១២ ខែមេសា ឆ្នាំ១៩៧៥

ជូនចំពោះ ឯកឧត្ដមជាទីស្នេហា ខ្ញុំ បាន ទទួលការណែនាំពីរដ្ឋមន្ដ្រីការបរទេស ទីក្រុង វ៉ាស៊ីនតោន ដែលស្នើឱ្យ ខ្ញុំជួយសម្រួលការ ចាកចេញជាបន្ទាន់នូវពលរដ្ឋអាមេរិកទាំងអស់ ដែលរស់នៅទីក្រុង ព្រមទាំងបុគ្គលិកខ្មែររបស់ យើងផងដែរ ដែលចង់ចាក ចេញជាមួយពួកយើង ពីព្រោះជីវិតពួកគេអាចមានគ្រោះថ្នាក់ បើគេបន្ដរស់នៅកម្ពុជា ទៀត  ដូចដែលខ្ញុំបានជម្រាបជូនឯកឧត្ដម នាពេលថ្មីៗនេះហើយថា យើងមាន កៅអី យន្ដហោះមួយចំនួន សម្រាប់សមាជិកសំខាន់ៗក្នុងរដ្ឋាភិបាល របស់ឯកឧត្ដម ដែល ចង់ចាកចេញពី កម្ពុជា នៅពេលនេះ ហើយជាអ្នក ដែលគ្រោះថ្នាក់ បំផុត ។ ដូចដែលខ្ញុំ ជម្រាបឯកឧត្ដមហើយ ការសម្រេច ចិត្ដនេះ អាស្រ័យលើឯកឧត្ដម ហើយខ្ញុំ ជឿលើឯកឧត្ដម ក្នុងការជូនព័ត៌មាន ដល់អ្នកដែលមាន បញ្ហាទាំង នេះ ។ អ្នកដែលសម្រេច ចិត្ដចាកចេញត្រូវនាំ មកជាមួយគ្រួសារ ដែលជិតបំផុត“សហព័ទ្ធនិងកូន” ដោយសារកន្លែងជិះមានកំណត់ ។ ជាមួយគ្នានេះ ដែរសូម ឯកឧត្ដមជូនព័ត៌មានឱ្យបានឆាប់ តាមតែអាចធ្វើបាន ចំពោះអ្នកទាំងឡាយ ដែលឯកឧត្ដមយល់ថា ត្រូវចាកចេញ ហើយចង់ ចាកចេញជាមួយពួកគេ ដោយ ហេតុថា ពួកគេមានពេលតែពីរម៉ោងប៉ុណ្ណោះ  សម្រាប់រៀបចំ ខ្លួនចាក ចេញ និងធ្វើដំណើរមកកាន់ស្ថានទូតអាមេរិក ។  អ្នកដែលចង់ចាក ចេញត្រូវធ្វើដំណើរមកកាន់ស្ថានទូតអាមេរិក ជាបន្ទាន់ (នៅមហាវិថី ៩តុលា)។ មនុស្ស ម្នាក់អាចយកតែកាបូប និងវ៉ាលីសមួយ ដែលអាចដាក់ពីភ្លៅអង្គុយតែ ប៉ុណ្ណោះ។ នៅ ម៉ោង ៩និង៣០នាទីព្រឹក(ថ្ងៃទី១២ ខែមេសា ) យន្ដហោះនឹងចាកចេញពីស្ថានទូតរបស់យើង ។ អ្នកដែលមក ដល់ ក្រោយម៉ោង៩និង៣០នាទី នឹងមិនមានឱកាសចាកចេញ ជាមួយពួកយើងទេ ខ្ញុំសូមបញ្ជាក់ ថា ពេលវេលាដែលត្រូវមកដល់ស្ថានទូត អាមេរិក គឺមុនម៉ោង៩និង៣០នាទី ។ អ្នកដែលមកដល់ មុននឹងមាន កន្លែងជិះ នៅលើ យន្ដហោះរបស់យើង គឺមានន័យថា អ្នកដែលមកកាន់ស្ថានទូតនៅម៉ោង៨ មានឱកាស បាន ជិះ ជាងអ្នកមកដល់ស្ថានទូតនៅ ម៉ោង៩និង២០នាទី ។

ហ្សន ហ្គាន់ធីឌីន

ឯកអគ្គរដ្ឋទូត សហរដ្ឋអាមេរិក

ក្នុងពេលជាមួយគ្នានេះដែរ ព្រះអង្គម្ចាស់ ស៊ីសុវត្ថិសិរិមតៈ ក៏បានសរសេរលិខិតមួយ ឆ្លើយតបទៅនឹងការ អញ្ជើញរបស់ឯកអគ្គរដ្ឋទូត សហរដ្ឋអាមេរិក ដោយធ្វើការ បដិសេធនូវបំណងល្អរបស់អាមេរិក ក្នុងការ ជួយ សង្គ្រោះជីវិតមេដឹកនាំសាធារណរដ្ឋ ខ្មែរ ដែលធ្លាប់ជាមិត្ដរួមការងារ ជាមួយគ្នាដ៏ស្អិតរល្មួត ដែលមានខ្លឹមសារ ទាំងស្រុង ដូចតទៅ ៖

ជូនចំពោះឯកឧត្ដម និងមិត្ដភក្ដិជាទីស្រឡាញ់ ខ្ញុំសូមថ្លែងអំណរគុណយ៉ាងស្មោះស្ម័គ្រ ចំពោះសារលិខិត ក្នុងការ ស្នើអញ្ជើញ នាំខ្ញុំ ទៅកាន់ប្រទេសឯកឧត្ដម ដែលពោរពេញ ដោយសេរីភាព ។ ប៉ុន្ដែគួរឱ្យសោកស្ដាយ ខ្ញុំមិនអាច ចាកចេញ ពីប្រទេសនេះ ក្នុង ស្ថានភាព កំសាកបែបនេះទេ ។ សម្រាប់រូបឯកឧត្ដម និងជាពិសេស ប្រទេសមហា អំណាចរបស់ឯកឧត្ដម ខ្ញុំមិនដែលជឿ ក្នុងមួយនាទីណា ដែល ឯកឧត្ដមមានគំនិត បោះបង់ប្រជាជនមួយដែល ជ្រើសរើសយកសេរីភាពឡើយ ។ ឯកឧត្ដម បានបដិសេធ មិនផ្ដល់ការ គាំពារដល់ពួកគេ ហើយយើង ក៏មិនអាច ធ្វើអ្វីបាន ដែរចំពោះរឿងនេះ ។ ឯកឧត្ដមបានចាកចោលពួកយើង ហើយខ្ញុំសូមឱ្យឯកឧត្ដម និងប្រទេសរបស់ឯក ឧត្ដម រស់នៅដោយសេចក្ដីសុខ ។

ប៉ុន្ដែឯក ឧត្ដម ត្រូវ ចងចាំថា ខ្ញុំសុខចិត្ដ ស្លាប់នៅទីនេះ នៅក្នុងប្រទេស ដែលខ្ញុំ ស្រឡាញ់ វាជារឿងអាក្រក់ ណាស់ ព្រោះយើងត្រូវ កើតនិងស្លាប់ថ្ងៃណាមួយចៀស មិនរួច ។ ខ្ញុំមានកំហុសតែមួយប៉ុណ្ណោះ គឺជឿជាក់លើ ឯកឧត្ដម ដែលជាជនជាតិ អាមេរិក ។

សូមឯកឧត្ដមជាទីស្រឡាញ់ ទទួលនូវការរាប់អានដ៏ស្មោះស្ម័គ្រនិងជាមិត្ដភាព អំពីខ្ញុំ ។

ស៊ីសុវត្ថិសិរិមតៈ

ចំណែកឯស្ថានទូត សហរដ្ឋអាមេរិកវិញ គេមិនអាចបន្ដនៅផ្សងព្រេងជាមួយជនជាតិ ខ្មែរតទៅទៀតបាន ឡើយ ពួកគេចាប់ផ្ដើម ដឹកជញ្ជូនមន្ដ្រី បុគ្គលិក និងជនជាតិគេទាំង អស់ចេញពីកម្ពុជា លើកលែងតែ អ្នកកាសែត ដែល ត្រូវការប្រមូលព័ត៌មានប៉ុណ្ណោះ ដែល បន្ដនៅជាមួយរដ្ឋាភិបាល ក្រុងភ្នំពេញ ជាមួយគ្នានោះ ។ ព្រលឹមស្រាង ឡើងមុន ថ្ងៃរះ ទៅទៀត ក្រុងប៉េកាំងបានឱ្យដំណឹងដល់ លោករីឆាដ ហូលប្រូក តំណាង អាមេរិកនៅ ប៉េកាំង ឱ្យដឹងថា មិនអាចទទួលស្គាល់ ការផ្ទេរអំណាចថ្វាយសម្ដេច សីហនុ ដូច បានព្រមព្រៀងគ្នានៅពេលមុនទេ ។  ប្រហែលជាការផ្លាស់ប្ដូរ អាកប្ប-កិរិយាចិនប៉េកាំង នេះហើយ ដែលជា ដើមហេតុ បណ្ដាលឱ្យសហរដ្ឋអាមេរិក ដាច់ចិត្ដ ដកទូត បុគ្គលិកនិងគ្រួសារអាមេ រិកទាំងអស់ ចេញ ពីភ្នំពេញ ស្អែកឡើងនាថ្ងៃទី១២ ខែមេសា ឆ្នាំ១៩ ៧៥ ។ ប្រធានាធិបតីអាមេរិក លោកហ្វ័ដ បានប្រកាស ថា “នេះជាការ ខ្លោចផ្សាមួយនៅកម្ពុជា ដែលយើងហួស ពេលស្រង់ទៅហើយ” ។

តាមពិតការផ្លាស់ប្ដូរ យ៉ាងឆាប់រហ័សនេះ ចាប់កើតឡើងក្រោយពេលភារៈធារី ឡយដ៏ រីវស័ បានមកជួបជាមួយ លោក សេនាប្រមុខ នៅ ក្រុងហូណូលូ (សហរដ្ឋអាមេរិក) ហើយបានជម្រាបប្រធានាធិបតីខ្មែរថា សហរដ្ឋអាមេរិក មិនអាចគាំទ្រ នៅក្នុងកម្ពុជា តទៅទៀតបានឡើយ ។ បុគ្គលិកស្ថានទូតអាមេរិកនឹងត្រូវដកចេញ ឱ្យអស់ មុន ម៉ោង ៤រសៀលថ្ងៃទី១២ ខែមេសា ឆ្នាំ១៩៧៥ ។

ខាងលើនេះ គឺជាខ្លឹមសារដើម នៃការ ឆ្លើយឆ្លងសំបុត្រ ហើយវាពិតជាបានបង្ហាញ ឱ្យយើងទាំងអស់គ្នាឃើញថា តើបរទេស ស្រឡាញ់ខ្មែរ ដូចដែលយើងស្រឡាញ់ជាតិ យើងដែរឬទេ ។ ដូច្នេះសូមឱ្យខ្មែរនិយមងប់ងល់ បរទេស ទាំងឡាយ ស្វែងយល់ពី ប្រវត្ដិសាស្ដ្រនា អតីតកាលរបស់យើងឡើងវិញ នោះទើបយើងអាចរកឃើញផ្លូវ ដែល ត្រូវ សម្រាប់ជាតិយើងនាពេលបច្ចុប្បន្ននិងទៅអនាគត ។ ដូច្នេះ សូមឱ្យអ្នក នយោបាយខ្មែរ និយមបរទេស សញ្ជឹងគិតឡើងវិញថា តើខ្លួនសុខចិត្ដងប់ងល់ជាមួយ នឹងបរទេស ឬមួយក៏យើងងាកមករក ការប្រាស្រ័យ ទាក់ទងគ្នារវាងខ្មែរនិងខ្មែរ ដែល មិនចាំបាច់ ត្រូវការអ្នកបកប្រែភាសាវិញឬយ៉ាងណា?