បាត់ដំបងៈ លោកនួន សាន ប្រធានក្រុមការងារ ចុះជួយឃុំតាលាស់ ស្រុកមោងឬស្សី និង សការី បានអញ្ជើញ ចូលរួមកាន់បិណ្ឌវេណទី១១ នៅវត្តត្រស់ស្រុកមោងឬស្សី កាលពីព្រឹក ថ្ងៃទី១១ខែតុលាឆ្នាំ២០១២ដោយមានការចូលរួមពីលោកកែវ សារ៉ន អនុប្រធានគណបក្ស ស្រុក លោក ហ៊ឹម សារិ ប្រធានគណបក្សឃុំតាលាស់ ប្រធានសាខាបក្សភូមិ ដូនជី តាជីនិងពុទ្ធបរិស័ទ្ធចំណុះជើងវត្តជាច្រើននាក់ទៀត។
បន្ទាប់ពីព្រះសង្ឃ បានសូត្រធម៌ឧទ្ទិសកុសល ជូនដល់បុព្វការីជន មានជីដូនជីតា និងញាតិការ ទាំង៧សណ្តាន ដែលបានចែកឋាន ស្លាប់ទៅហើយនោះ និងបានទេសនារួចមក គណអធិបតី បានវេភទ្ធហារ ប្រគេនព្រះសង្ឃ ទាំងអស់គ្រប់អង្គ បាននិមន្តឆាន់ ចង្ហាន់ក្នុងឱកាស នោះដែរ។
លោក នួន សាន ប្រធានក្រុមការងារ ចុះជួយឃុំតាលាស់ បានមានប្រសាសន៍ សំណេះ សំណាលក្នុងឱកាសនោះថា ថ្ងៃនេះលោកនិងសហការី ទាំងអស់ ដែលបាន ចូលរួមកាន់បិណ្ឌវេណទី១១ ក្នុងវត្តមជ្ឈឹមរាមហៅវត្តត្រស់ស្ថិតក្នុងភូមិត្រស់ឃុំតាលាស់ស្រុកមោងឬស្សី។
លោក នួន សាន មានប្រសាសន៌បន្តថា ជួសមុខឲ្យក្រុមការងារ និងសហការីនិង ក្រុមគ្រួសារ លោកបានធ្វើការផ្តាំផ្ញើ សួរសុខទុក្ខពីថ្នាក់ដឹកនាំខេត្ត ក៏ដូចជាគណបក្សប្រជាជន កម្ពុជាខេត្ត រួមទាំងក្រុមយុវជនយើង ក្នុងស្រុកមោងឬស្សីទាំងអស់ និងពុទ្ធបរិស័ទ្ធនាឱកាស នេះផងដែរ ជាពិសេស ថ្នាក់ដឹកនាំកំពូល គឺសម្តេចទាំង៣ ដែលបានតស៊ូ រំដោះជាតិមាតុភូមិឲ្យផុត ពីរបបប្រល័យពូជសាសន៌ នាថ្ងៃ៧មករា ឆ្នាំ១៩៧៩ ដែលជាថ្ងៃ កំណើតទី២ របស់យើងទាំងអស់គ្នា បើគ្មានថ្ងៃ៧មករានេះទេ គឺគ្មានអ្វីៗទាំងអស់ ដល់សព្វថ្ងៃដែរ ព្រមទាំងគ្មានឱកាសធ្វើបុណ្យភ្ជំបិណ្ឌនេះដែរ សូម្បីតែប្រែតក៏គ្មានឱកាសមកទទួល បាយបិណ្ឌពីញាតិសណ្តានខ្លួនដែរ។នេះសបញ្ជាក់ឲ្យឃើញថា ក្រោមស្មារតី៧មករា ឆ្នាំ១៩៧៩ គឺបានរំដោះ ប្រទេសជាតិ ប្រជាពលរដ្ឋទូទាំងប្រទេសរួមទាំង ប្រែតផងដែរ។
ក្នុងឱកាសនោះដែរ លោកប្រធានក្រុមការងារបានចែកអំណោយជាថវិកាកម្តដៃដល់តាជី ដូនជីម្នាក់៥.០០០រៀលចំនួន១០០នាក់ ប្រគេន បច្ច័យចំនួន៤.០៤៥.០០០រៀលសម្រាប់ កសាងព្រះវិហារវត្ត និងចំណាយថវិកាសម្រាប់កាន់វេណទី១១នេះចំនួន៣.៧២៦.៥០០រៀល សរុបទឹកប្រាក់ទាំងអស់ចំនួន ៨.២៧១.៥០០រៀល៕
