-រថយន្ដ ២គ្រឿង ប៉ះគ្នា នៅលើផ្លូវ ជាតិលេខ ៣ សំណាងល្អ អត់មានអ្នករង របួស
កំពត ៖ បុរសម្នាក់ បានស្លាប់ភ្លាមៗ នៅកន្លែងកើតហេតុ រីឯ ២នាក់ផ្សេងទៀត រងរបួសធ្ងន់ បន្ទាប់ពីពួកគេបើកម៉ូតូបុកគ្នា កាលពីវេលាម៉ោង ៥ និង១០នាទីល្ងាចថ្ងៃ ទី ១៥ ខែមីនា ស្ថិតនៅលើផ្លូវជាតិលេខ ៣ ខាងជើងផ្សារសាមគ្គីកំពត ចម្ងាយប្រហែល ៤០០ម៉ែត្រ ក្នុងភូមិកំពង់បាយខាងជើង សង្កាត់កំពង់បាយ ក្រុងកំពត ខេត្ដកំពត ។
សេចក្ដីរាយការណ៍ ពីកន្លែងកើតហេតុ បានឱ្យដឹងថា មុនពេលកើតហេតុគេឃើញ ម៉ូតូវីវ៉ា ១គ្រឿង បើកបរដោយបុរសម្នាក់ ក្នុងទិសដៅពីជើងទៅត្បូង លុះដល់ចំណុច កើតហេតុ ក៏បុកគ្នាជាមួយម៉ូតូសង់កូរ៉េ ១ គ្រឿង ជិះគ្នា ២នាក់ ក្នុងទិសដៅពីត្បូង ទៅជើង បណ្ដាលឱ្យបុរសម្នាក់ជិះម៉ូតូសង់ កូរ៉េ ឈ្មោះ អ៊ិត អាយុជាង ៤០ឆ្នាំ ស្លាប់ ភ្លាមៗ នៅកន្លែងកើតហេតុ ។ ជនរងគ្រោះ រូបនេះ ត្រូវបានសមត្ថកិច្ចមូលដ្ឋានដែលចុះ ទៅកន្លែងកើតហេតុនោះ ប្រាប់ថា រស់នៅ ភូមិថ្មី ឃុំថ្មី ស្រុកទឹកឈូ ខេត្ដកំពត រីឯ ២ នាក់ផ្សេងទៀត រងរបួសធ្ងន់ មិនទាន់ ស្គាល់ឈ្មោះនៅឡើយទេ ។
ដោយឡែកកាលពីវេលាម៉ោង ១ និង ៤៥នាទី រសៀលថ្ងៃទី១៥ ខែមីនា នេះ រថយន្ដ ២គ្រឿង ១គ្រឿងម៉ាក ហ៊ីយ៉ាន់ ដាយ ចំណុះ ១តោន បានបើកលឿនជាន់ ហ្វ្រាំងមិនស៊ី ពេលមានភ្លៀងធ្លាក់មួយមេ ធំ លុះដល់ភូមិអណ្ដូងខ្មែរ ចំណុចផ្លូវចូល ខ្មោចចោរ លើផ្លូវជាតិលេខ ៣ សង្កាត់ អណ្ដូងខ្មែរ ក្រុងកំពត បានប៉ះជាមួយ រថយន្ដធុនធំ ១គ្រឿងទៀត បណ្ដាលឱ្យ រថយន្ដហ៊ីយ៉ាន់ដាយ ធ្លាក់ផ្លូវ ប៉ុន្ដែ សំណាង ល្អអ្នកបើករថយន្ដទាំង ២ ពុំមានរបួស ។
សេចក្ដីរាយការណ៍ ពីកន្លែងកើតហេតុ បានឱ្យដឹងថា អ្នកបើករថយន្ដធំឈ្មោះ ជុំ សម្បត្ដិ ភេទប្រុស អាយុ ២៥ឆ្នាំ រស់នៅ ភូមិពងទឹក ឃុំព្រៃតាកុយ ស្រុកកំពង់ត្រាច ខេត្ដកំពត រីឯអ្នកបើករថយន្ដហ៊ីយ៉ាន់ដាយ ធុនតូច ដឹកស៊ីម៉ងត៍ ឈ្មោះ សៀម សែន ភេទប្រុស អាយុ ៣៦ឆ្នាំ រស់នៅភូមិទ្វីខាង ជើង សង្កាត់អណ្ដូងខ្មែរ ក្រុងកំពត ។ ក្រោយគ្រោះថ្នាក់ចរាចរណ៍នេះ ទាំង រថយន្ដ និងម៉ូតូ ៤គ្រឿង ត្រូវបានសមត្ថកិច្ច យកទៅរក្សាទុក ដើម្បីដោះស្រាយបន្ដ ទៀត ៕
