ភ្នំពេញៈ ក្រុមហ៊ុន RMA Cambodia ដែលជាក្រុមហ៊ុនចែកចាយ រថយន្ត Ford នៅកម្ពុជា កាលពីថ្ងៃទី២៧ ខែតុលា ឆ្នាំ២០១២ បានប្រកាស ពីក្បួនដង្ហែរថយន្ត ជាថ្មីម្តងទៀត សម្រាប់ដំណើរ កម្សាន្ត ឆ្នាំ២០១២ ដែលនឹងចូលមកដល់ នៅថ្ងៃទី៧ ខែធ្នូ ខាងមុខនេះ ។
លោក សេង វឹង នាយកគ្រប់គ្រងផ្នែករថយន្ត Ford ប្រចាំនៅកម្ពុជា បានឱ្យដឹងថា ក្បួនដង្ហែរថយន្ត Ford សម្រាប់ឆ្នាំ២០១២នេះ ជាក្បួនដង្ហែប្រចាំឆ្នាំ លើកទី៦ហើយ ដែលនឹងមានរថយន្ត Ford ប្រមាណ៥០គ្រឿង នឹងមនុស្សជាង៣០០នាក់ ធ្វើដំណើរកម្សាន្តរយៈពេល៣យប់ ៤ថ្ងៃ ទៅកាន់ ខេត្តមណ្ឌលគិរី ។
លោកបន្ថែមថា ក្បួនដង្ហែនេះ នឹងផ្តល់ឱកាសដល់ម្ចាស់រថយន្ត Ford គ្រប់គ្នា ដើម្បីចូលរួមសប្បាយរីក រាយជាមួយគ្នា ក្នុងដំណើរកម្សាន្តឆ្នាំនេះ ដោយអំឡុងពេលនោះ ពួកគេនឹងទទួលបាន ការចាក់សាំង ដោយឥតគិតថ្លៃ ក៏ដូចជាម្ហូបអាហារ ពិធីជប់លៀងរាំងកម្សាន្ត ជុំវិញភ្នក់ភ្លើង និងការបោះជំរុំផ្សេងៗ ដែលរៀបចំដោយ ក្រុមហ៊ុន RMA Cambodia និង Ford ។ មិនតែប៉ុណ្ណោះ គ្រប់គ្នា នឹងបានទៅ កម្សាន្ត នៅរមនីយដ្ឋាននានា ក្នុងខេត្តមណ្ឌលគិរីស ក៏ដូចជាបានចូលរួម ជួបជុំជាមួយ បងប្អូន ជនជាតិភាគតិច ដែលរស់នៅក្នុងខេត្តនេះផងដែរ ។
គួរបញ្ជាក់ថា ដំណើរកម្សាន្តប្រចាំឆ្នាំ របស់ Ford (Ford Adventure) នៅកម្ពុជា បានចាប់ផ្តើម តាំងពីឆ្នាំ២០០៧មកម៉្លេះ ដែលឆ្នាំនោះ គឺដំណើរកម្សាន្ត ទៅកាន់ខេត្តមណ្ឌលគិរីដែរ ។ ដោយឡែក ឆ្នាំ២០០៨ Ford បានរៀបចំដំណើរកម្សាន្តទៅកាន់ ខេត្តរតនគិរី និងឆ្នាំ២០០៩ ដំណើរកម្សាន្ត ទៅខេត្តប៉ៃលិន ហើយសម្រាប់ឆ្នាំ២០១០ និង២០១១ កន្លងទៅនេះ គឺជាដំណើរកម្សាន្ត ក្បួនដង្ហែ រថយន្ត ឆ្លងប្រទេស ទៅកាន់ខេត្តចម្ប៉ាសាក់ ប្រទេសឡាវជាដើម ៕
