ភ្នំពេញ៖ ប្រមុខរាជរដ្ឋាភិបាលកម្ពុជា បានថ្លែងនៅថ្ងៃទី១៤ ខែវិច្ឆិកានេះថា មូលហេតុដែលប្រាក់ដុល្លារ អាមេរិកចុះថោក ហើយប្រាក់រៀល កម្ពុជាឡើងថ្លៃនោះ ដោយសារ តម្រូវការរបស់ប្រជាជនកម្ពុជា មានការកើនឡើងខុសពីធម្មតា មិនមែនមកការជាប់ឆ្នោត របស់លោកអូបាម៉ា ធ្វើឱ្យរូបិយប័ណ្ណ អាមេរិកធ្លាក់ចុះនោះក៏ទេដែ
សម្តេចនាយករដ្ឋមន្រ្តីតេជោ ហ៊ុន សែន មានប្រសាសន៍ក្នុងពិធីចុះចែកប័ណ្ណកម្មសិទ្ធិដីធ្លី ដល់ប្រជាបលរដ្ឋនៅខេត្តកំពង់ស្ពឺ នាព្រឹកថ្ងៃទី១៤ ខែវិច្ឆិកាថា ប្រាក់រៀល របស់ខ្មែរឡើងថ្លៃ ក្នុងរយៈពេលប៉ុន្មានថ្ងៃនេះ ហើយប្រាក់ដុល្លារអាមេរិក ចុះថោកនោះ មកពីតម្រូវការរបស់ ប្រជាពលរដ្ឋកម្ពុជាច្រើនពេក ពុំមែនមកពីប្រាក់ ដុល្លារ អាមេរិកទេ។
សម្តេចបន្ថែមថា “កាលពីម្សិលមិញខ្ញុំមើលតារាងប្តូរប្រាក់ ចង់ភ័យ ប្រហែលជាចាំបាច់ត្រូវធ្វើកិច្ចអន្តរាគមន៍ ហើយកាលពីម្សិលមិញនេះ មានផ្សារខ្លះ ១ដុល្លារប្តូរបានតែ ៣.៨៨៨ រៀលទេ បានន័យថា វាចុះមកក្រោម៤០០០រៀលហើយ ហើយក្នុងពេលដែលយើងចង់បានលុយរបស់យើងរត់ក្នុងចន្លោះ៤ពាន់ទៅ៤ពាន់៥០រៀល ប៉ុន្តែបញ្ហា ទាំងអស់នេះរឿងគោលនយោបាយរបស់ធនាគារទេ”។
នាយករដ្ឋមន្រ្តីបន្តថា ម្យ៉ាងទៀត ប្រាក់ដុល្លារចុះថោកពុំមែនមកពី លោក បារ៉ាក់ អូបាម៉ា ក្លាយជាប្រធានាធិបតេយ្យថ្មីនោះទេ មកពីតម្រូវការ សាច់ប្រាក់ធំ ហើយស្រប ពេលដែលជារដូវការ នៃការប្រមូលទិញផល កសិកម្ម(ស្រូវ) របស់ប្រជាពលរដ្ឋ ត្រូវការបង់ពន្ធ ត្រូវការចាយវាយផងដែរ៕
