បាងកក៖ សាស្រ្តាចារ្យ មហាវិទ្យាល័យច្បាប់របស់ថៃ អះអាងថា ពលករបរទេសខុសច្បាប់លាក់ខ្លួន ធ្វើការងារនៅក្នុងប្រទេសថៃ មានប្រមាណជិត ៣ លាននាក់ យោធាត្រូវតែរៀបចំសណ្តាប់ ធ្នាប់ពលករខុសច្បាប់ឲ្យទៅជាពលករស្របច្បាប់។
យោងតាមគេហទំព័រ Thai News នៅថ្ងៃ ព្រហស្បតិ៍ ទី ១៩ ខែ មិថុនា ឆ្នាំ ២០១៤ នេះបានចុះផ្សាយឲ្យដឹងថា លោក ប៉ានិថាន វឌ្ឍាយ៉ាកន សាស្រ្តាចារ្យាផ្នែកនីតិសាស្ត្រ នៃសកលវិទ្យាល័យជុឡាឡុងកន ក្រុងបាងកក បានថ្លែងថា ករណីគណៈកម្មាការរក្សាសណ្តាប់ធ្នាប់ជាតិ បានរៀបចំសណ្តាប់ពលបរទេស មិនមែនជារឿងថ្មីនោះទេ ហើយបច្ចុប្បន្ននេះ ពលករបរទេសខុសច្បាប់ ដែលកំពុងស្នាក់នៅនិង បម្រើការងារនៅក្នុងប្រទេសថៃ បានកើនឡើង ប្រមាណជិត ៣លាននាក់។ ម្យ៉ាងវិញទៀតតួលេខ ក្រុមពលករខុសច្បាប់ជាង ពីរសែន នាក់ដែលបម្រើការងារក្នុងប្រទេសថៃ រយៈពេលយូរនោះ គឺគ្មានបញ្ហាអ្វីដែលគួរឲ្យកត់សំគាល់នោះទេ ប៉ុន្តែពលករបរទេស រួមមាន មីយ៉ាន់ម៉ា ឡាវ និង វៀតណាម ប្រមាណ២ លាននាក់ រួមទាំង ជនជាតិ រ៉ូហ៊ីងញ៉ា ជាក្រុមមានបញ្ហាច្រើនបំផុត ជាហេតុធ្វើឲ្យពិបាកគ្របគ្រង។ ដូច្នេះ រដ្ឋាភិបាលយោធា ដែលដឹកនាំដោយ ឧត្តមសេនីយ៍ ប្រាយុទ្ធ ចាន់អូឆា មេបញ្ជាការកងទ័ពជើង គោក ត្រូវតែមានវិធាន បន្ទាន់មួយ ស្តីពីការចុះឈ្មោះពលករបរទេសខុសច្បាប់ ឲ្យក្លាយទៅជាពលករស្រប ដើម្បីដោះស្រាយវិបត្តិខ្វះពលករ លើគ្រប់វិស័យក្នុងប្រទេសថៃ ឲ្យទាន់ ពេលវេលា៕
