កំពង់ចាមៈ ដោយអនុវត្ត តាមការប្តេជ្ញារបស់ លោកឧត្តមសេនីយ៍ បែន រ័ត្ន ស្នងការនគរបាល ខេត្តកំពង់ ចាម ក្នុងការថែរក្សាសន្តិសុខ សុវត្ថិភាពឲ្យបានល្អ ជូនប្រជាពលរដ្ឋក្នុងខេត្តកំពង់ចាមនោះ នៅវេលា ម៉ោង ១១និង៥០នាទី ថ្ងៃទី២៨ ខែមិថុនា ឆ្នាំ២០១៤នេះ កម្លាំងនគរបាល នៃអធិការដ្ឋាននគរបាល ស្រុកព្រៃឈរ ដឹកនាំដោយលោក ចាន់ ហោ អនុប្រធានការិយាល័យ កណ្តាលនគរបាលព្រហ្មទណ្ឌបាន ចុះបង្ក្រាបកន្លែងប្រជល់មាន់ ដាក់លុយមួយកន្លែង និងឃាត់ខ្លួនមនុស្ស ៣ នាក់ និងម៉ូតូ១១គ្រឿង នៅ ភូមិព្រៃស្រឡាញ់ ឃុំត្រពាំងព្រះ ស្រុកព្រៃឈរ ខេត្តកំពង់ចាម ។
តាមមន្ត្រីនគរបាល ស្រុកព្រៃឈរ បានឲ្យដឹងថា កន្លែងប្រជល់មាន់នោះ សមត្ថកិច្ចបានទទួលព័ត៌មាន ពីប្រជាពលរដ្ឋ និងបានចុះបង្ក្រាប ក្រោយពីទទួលគោលការណ៍ពីលោកឧត្តមសេនីយ៍ ស្នងការ និងមាន ការឯកភាពស្ថាប័ន អយ្យការខេត្តកំពង់ចាមផងដែរ ហើយប្រតិបត្តិការនេះ សមត្ថកិច្ច បានឃាត់ខ្លួន មនុស្សចំនួន ៣នាក់ ខណៈកំពុងលេងល្បែងជល់មាន់នៅចំណុចកើតហេតុ និងដកហូតបានម៉ូតូចំនួន ១១គ្រឿងផងដែរ ។ មន្ត្រីដដែលបានបន្តថា ក្នុងការចុះបង្ក្រាបដោយភូមិសាស្ត្រមានការលំបាក អ្នក លេងមាន់ជល់ជាច្រើននាក់ បានយកមាន់ និងសម្ភារៈរត់ចេញពីកន្លែងលេងមាន់ជល់នោះ ។ ហេតុ ដូច្នេះហើយ ទើបសមត្ថកិច្ច ឃាត់ខ្លួនបានតែ ៣ នាក់ ១-ឈ្មោះ រស់ សីលា ភេទប្រុស អាយុ ២៤ឆ្នាំ ទីលំនៅភូមិបឹងកុក សង្កាត់បឹងកុក ក្រុងកំពង់ចាម ២-ឈ្មោះ នៅ សុភី ភេទប្រុស អាយុ២០ឆ្នាំ និង៣- ឈ្មោះ សាំ កុសល ភេទប្រុស អាយុ ២០ឆ្នាំ អ្នកទាំងពីរ រស់នៅភូមិដូនដី ឃុំជ្រៃវៀន ស្រុកព្រៃឈរ ខេត្តកំពង់ចាម ហើយវត្ថុតាង និងជនសង្ស័យ កម្លាំងនគរបាលស្រុកព្រៃឈរ កំពុងរៀបចំបញ្ជូនមកស្នង ការដ្ឋាននគរបាលខេត្តកំពង់ចាម ដើម្បីចាត់ការបន្ត ៕
