ភ្នំពេញ ៖ អំពើហិង្សា ដែលបានកើតមាននៅ ផ្លូវវ៉េងស្រេង កាលពីដើមខែមករា ដែលបានបណ្ដាល ឲ្យមនុស្ស៤នាក់ស្លាប់ និងអំពើហិង្សា កើតមានក្បែរ ទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤នេះ ត្រូវបានលោក ឈាង វុន បញ្ជាក់ថាមានភាពខុសគ្នា។
ថ្លែងនៅក្នុងសន្និសីទកាសែត នៅព្រឹកថ្ងៃទី១៨ ខែកក្កដា ឆ្នាំ២០១៤នេះ លោក ឈាង វុន សមាជិក គណៈកម្មាធិការអចិន្ត្រៃយ៍នៃរដ្ឋសភា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា បានមានប្រសាសន៍ថា "ផ្លូវវ៉េងស្រេងអំពើហិង្សា ការបាញ់ គ្នារវាងបាតុករ និងសមត្ថកិច្ចដោយសារតែបាតុករបំពានលើទ្រព្យសម្បត្តិឯកជន គឺគាត់ទៅវៃពេទ្យ គេបាត់ស្ថេរភាពសង្គម ហើយចូលទៅឃាត់មិនបានទៀត។ ដោយឡែកអំពើហិង្សានៅក្បែរ ទីលាន ប្រជាធិបតេយ្យវិញ វាគឺសកម្មភាពជាក់ស្ដែងដែលសន្តិសុខ គាត់អត់មានសកម្មភាព មានតែរំលោភ ដោយអំពើហិង្សាធ្ងន់ធ្ងរពីសំណាក់ជនអនាធិបតេយ្យ ដឹកនាំដោយគណបក្សសង្គ្រោះជាតិ ដែលនេះយើង អាចចាត់ទុកជាបទឧក្រិដ្ឋខុសច្បាប់ព្រហ្មទណ្ឌ"។
ការបកស្រាយរបស់លោក ឈាង វុន ដូចនេះ បន្ទាប់ពីមានការចោទសំណួរពីអ្នកកាសែត ជុំវិញព្រឹត្ត ការណ៍ ទាំងពីរខាងលើ ដែលកើតមាននៅឆ្នាំ២០១៤នេះ។ ព្រឹត្តការណ៍នៅក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ ដែលបង្កឲ្យមានរបួសស្នាមដល់សន្តិសុខ ខណ្ឌដូនពេញ ៣៩នាក់ ត្រូវបានរដ្ឋសភាតាមរយៈលោក ឈាង វុន បានអានសេចក្ដីថ្លែងការណ៍ ដោយថ្កោលទោស ចំពោះអំពើ ហិង្សាដ៏ឃោរឃៅព្រៃផ្សៃ អមនុស្សធម៌ និងរំលោភសិទ្ធិមនុស្សយ៉ាងធ្ងន់ធ្ងរ ហើយអំពើហិង្សានេះ បានធ្វើ ឲ្យមានភាពចលាចលប៉ះពាល់ដល់សន្តិសុខ សណ្ដាប់ធ្នាប់សាធារណៈ ៕